1 Thiab nim no saib seb, kuv hais rau nej tias thaum tus Tswv pom tias tsim nyog, raws li nws lub tswv yim, hais tias tej lus hais no yuav los rau Lwm Haiv Neeg raws li nws txoj lus, thaum ntawd nej yuav paub tias twb pib muaj raws li txoj kev khi lus uas Leej Txiv tau khi nrog cov neeg Ixayees, ntsig txog qhov uas yuav muab lawv txum tim rov qab los rau tej thaj av uas yog lawv qub txeeg qub teg.

2 Thiab nej yuav paub tias twb yuav muaj raws li tus Tswv tej lus, uas cov yaj saub dawb huv tau hais; thiab nej yuav tsum tsis txhob hais tias tus Tswv ncua nws txoj kev los rau cov neeg Ixayees.

3 Thiab nej tsis txhob xav nyob hauv nej lub siab tias tej lus uas tau hais twb tsis muaj nuj nqis, vim saib seb, tus Tswv yeej yuav nco ntsoov nws txoj kev khi lus uas nws khi rau nws cov neeg ntawm tsev neeg Ixayees.

4 Thiab thaum nej yuav pom tej lus hais no tshwm los nyob hauv nej, thaum ntawd nej tsis txhob xyeej thiab saib tsis taus tej uas tus Tswv ua, vim rab ntaj ntawm nws txoj kev txim lij twb nyob hauv nws sab tes xis; thiab saib seb, nyob rau hnub ntawd, yog nej xyeej thiab saib tsis taus tej uas nws ua ces nws yuav ua kom rab ntaj ntawm nws txoj kev txim lij kov yeej nej tsis ntev no.

5 Kev txom nyem yuav raug tus uas saib tsis taus tej uas tus Tswv ua; muaj tseeb tiag, kev txom nyem yuav raug tus uas yuav xyeej tus Khetos thiab nws tej hauj lwm!

6 Muaj tseeb tiag, kev txom nyem yuav raug tus uas xyeej tus Tswv tej kev tshwm sim, thiab tus uas hais tias tus Tswv tsis ua hauj lwm los ntawm kev tshwm sim ntxiv lawm, los sis los ntawm kev qhia tej yuav muaj los yav tom ntej, los sis los ntawm kev pub txiaj ntsim, los sis los ntawm kev txawj hais lwm yam lus, los sis los ntawm kev kho mob zoo, los sis los ntawm tus Vaj Ntsuj Plig Dawb Huv lub hwj chim!

7 Muaj tseeb tiag, thiab kev txom nyem yuav raug tus uas nyob rau hnub ntawd, uas ua kom muaj nyiaj nplua nuj, es hais tias Yexus Khetos twb tsis ua tej txuj ci tseem ceeb ntxiv lawm; vim tus uas ua li no yuav zoo li tus tub ntawm kev puas tsuaj, yuav tsis muaj kev hlub tshua rau nws, raws li Khetos txoj lus!

8 Muaj tseeb tiag, thiab nej tsis txhob hais lus thuam txog, los sis saib tsis taus, los sis thuam cov Neeg Yudais, los sis ib tug twg ntawm cov uas seem tshuav ntawm tsev neeg Ixayees ntxiv lawm; vim saib seb, tus Tswv nco ntsoov nws txoj kev khi lus rau lawv, thiab nws yuav ua rau lawv raws li tej uas nws tau khi lus tseg lawm.

9 Yog li ntawd nej tsis txhob xav tias nej yuav muaj peev xwm tig tau tus Tswv sab tes xis mus rau sab laug, xwv kom nws tsis txhob txiav txim kom muaj raws li txoj kev khi lus uas nws tau khi rau tsev neeg Ixayees lawm.