1 Thiab tau muaj tias thaum Yexus tau hais tej lus no tas, nws hais lus rau nws cov thwj tim, ib tug dhau ib tug, hais rau lawv tias: Nej xav tau dab tsi ntawm kuv, tom qab uas kuv mus cuag Leej Txiv lawm?

2 Thiab lawv txhua tus, tsuas yog tshuav peb tug xwb, hais tias: Peb xav kom tom qab uas peb ua neej nyob mus txog tib neeg lub hnub nyoog, kom peb txoj kev qhuab qhia, qhov uas koj tau hu peb, yuav muaj qhov xaus, xwv kom peb yuav nrawm nroos los cuag koj nyob hauv koj lub nceeg vaj.

3 Thiab nws hais rau lawv tias: Nej tau koob hmoov vim nej xav tau qhov no ntawm kuv; yog li ntawd, tom qab uas nej muaj xya caum ob xyoos nej yuav los cuag kuv nyob hauv kuv lub nceeg vaj; thiab nrog kuv, nej yuav nrhiav tau chaw so.

4 Thiab thaum nws tau hais rau lawv tas, nws tig nws tus kheej mus rau peb tug, thiab hais rau lawv tias: Nej xav kom kuv ua dab tsi rau nej thaum kuv mus cuag Leej Txiv lawm?

5 Thiab lawv tu siab, vim lawv tsis muaj cuab kav hais qhov uas lawv xav tau rau nws.

6 Thiab nws hais rau lawv tias: Saib seb, kuv paub nej tej kev xav, thiab nej xav tau qhov uas Yauhas, tus uas kuv hlub, tus uas tau nyob nrog kuv ua kuv txoj kev qhuab qhia, ua ntej kuv raug cov Neeg Yudais muab dai, xav tau ntawm kuv.

7 Yog li ntawd, nej tau koob hmoov ntau dua, vim nej yeej yuav tsis saj kev tuag; tiam sis nej yuav muaj sia nyob mus pom tag nrho tej uas Leej Txiv ua rau noob neej, kom txog rau thaum muaj txhua yam raws li Leej Txiv lub siab nyiam, thaum kuv yuav los nrog kuv lub yeeb koob thiab nrog hwj chim saum ntuj.

8 Thiab nej yuav tsis tiv tej kev mob ntawm kev tuag; tiam sis thaum kuv los nrog kuv lub yeeb koob tib ntsais muag xwb nej yuav hloov ntawm lub cev uas txawj tuag mus rau lub cev uas tsis txawj tuag; thiab tom qab ntawd nej yuav tau koob hmoov nyob hauv kuv Txiv lub nceeg vaj.

9 Thiab ntxiv, nej yuav tsis muaj mob thaum nej tseem ua neej nyob, thiab tsis muaj kev tu siab tsuas yog rau neeg ntiaj teb tej kev txhaum xwb; thiab kuv yuav ua txhua yam no vim yog qhov uas nej xav tau ntawm kuv, vim nej xav kom nej yuav coj tau tib neeg tus ntsuj plig los cuag kuv, thaum lub ntiaj teb tseem muaj nyob.

10 Thiab vim lub ntsiab no nej yuav muaj kev xyiv fab puv npo; thiab nej yuav tau zaum nyob hauv kuv Txiv lub nceeg vaj; muaj tseeb tiag, nej txoj kev xyiv fab yuav muaj puv npo, tib yam li Leej Txiv tau muab kev xyiv fab puv nkaus rau kuv; thiab nej yuav zoo tib yam li kuv, thiab kuv zoo tib yam li Leej Txiv; thiab Leej Txiv thiab kuv wb yog ib tug.

11 Thiab tus Vaj Ntsuj Plig Dawb Huv ua tim khawv txog Leej Txiv thiab kuv; thiab Leej Txiv muab tus Vaj Ntsuj Plig Dawb Huv rau noob neej, vim yog kuv.

12 Thiab tau muaj tias thaum Yexus tau hais tej lus no tas, nws xuas nws tus ntiv tes los chwv lawv txhua tus tsuas yog tshuav peb tug uas yuav nyob xwb, thiab tom qab ntawd nws ncaim mus lawm.

13 Thiab saib seb, rooj ntug qhib, thiab lawv raug coj mus saum ntuj, thiab pom thiab hnov tej uas hais tsis tau.

14 Thiab tau txwv kom lawv tsis txhob hais; thiab twb tsis muab hwj chim rau lawv kom lawv muaj cuab kav hais tau tej uas lawv pom thiab hnov;

15 Thiab xyov yog lawv nyob hauv lub cev los sis tawm ntawm lub cev, lawv twb tsis paub; vim zoo li lawv twb hloov hlo, ua rau lawv lub cev uas txawj tuag mus rau ib qho uas tsis txawj tuag, ua rau lawv muaj peev xwm pom tau tej yam txog Vajtswv.

16 Tiam sis tau muaj tias lawv rov qhuab qhia rau hauv lub ntiaj teb dua; txawm li ntawd los lawv twb tsis qhuab qhia txog tej uas lawv hnov thiab pom, vim yog txoj lus txib uas muab rau lawv nyob saum ntuj.

17 Thiab nim no, xyov yog lawv txawj tuag los sis tsis txawj tuag, txij li hnub uas lawv tau hloov hlo, kuv tsis paub;

18 Tiam sis kuv paub npaum li no, raws li phau ceev xwm txheej uas tau muab los—lawv tau tawm mus rau hauv thaj av, thiab tau qhuab qhia tag nrho cov neeg, sau tau los rau lub koom txoos tag nrho cov uas ntseeg lawv tej lus qhuab qhia; muab lawv ua kev cai raus dej, thiab tag nrho cov uas ua kev cai raus dej tau txais tus Vaj Ntsuj Plig Dawb Huv.

19 Thiab cov uas tsis zwm rau lub koom txoos muab lawv tso rau hauv lub tsev kaw. Thiab tej tsev kaw twb kaw tsis tau lawv, vim tej tsev kaw tau tawg ua ob sab.

20 Thiab lawv raug muab pov rau hauv tej qhov av, tiam sis lawv siv Vajtswv txoj lus ntaus cov av, ces los ntawm nws lub hwj chim lawv thiaj dim tawm hauv tej qhov av tob tob los; thiab yog li ntawd cov neeg uas tsis zwm rau lub koom txoos tsis muaj peev xwm khawb tej qhov kom txaus kaw lawv.

21 Thiab lawv raug muab pov peb zaug nkaus rau hauv qhov cub thiab tsis raug mob dab tsi hlo li.

22 Thiab lawv raug muab pov ob zaug nkaus rau hauv ib lub qhov uas muaj tej tsiaj qus nyob; thiab saib seb lawv tau ua si nrog tej tsiaj qus zoo li ib tug me nyuam yaus ua si nrog ib tug me nyuam yaj uas tsis tau tso mis, thiab tsis raug mob dab tsi hlo li.

23 Thiab tau muaj tias lawv tawm mus rau hauv tag nrho Nifais cov neeg li no, thiab tshaj tawm Khetos txoj moo zoo rau tag nrho cov neeg uas nyob hauv thaj av; thiab lawv tau hloov siab los ntseeg tus Tswv, thiab tau los sib koom rau Khetos lub koom txoos, thiab yog li ntawd cov neeg ntawm tiam neeg ntawd tau koob hmoov, raws li Yexus txoj lus.

24 Thiab nim no kuv, Maumoos, yuav xaus hais txog tej yam no ib ntus.

25 Saib seb, kuv twb yuav luag sau lub npe ntawm cov uas yuav tsis tau saj kev tuag ntawd, tiam sis tus Tswv txwv tsis pub ua li ntawd; yog li ntawd kuv thiaj tsis sau, vim lawv lub npe raug muab zais ntawm neeg ntiaj teb.

26 Tiam sis saib seb, kuv tau pom lawv, thiab lawv tau muab kev txhawb pab rau kuv.

27 Thiab saib seb lawv yuav nrog Lwm Haiv Neeg nyob, thiab Lwm Haiv Neeg yuav tsis paub lawv.

28 Lawv kuj yuav nrog cov Neeg Yudais nyob thiab, thiab cov Neeg Yudais yuav tsis paub lawv.

29 Thiab yuav muaj tias, thaum tus Tswv pom tias tsim nyog raws li nws lub tswv yim kom lawv yuav muab kev txhawb pab rau tag nrho tej xeem neeg Ixayees uas tau tawg khiav ri niab, thiab rau txhua haiv neeg, txhua xeem neeg, txhua yam lus thiab txhua yam neeg, thiab yuav coj tau coob leej tawm ntawm lawv los mus cuag Yexus, xwv kom yuav muaj raws li lawv lub siab xav, thiab kuj yog vim tias muaj Vajtswv lub hwj chim nyob hauv lawv uas yaum tau tib neeg.

30 Thiab lawv zoo li Vajtswv cov tim tswv, thiab yog tias lawv yuav thov Leej Txiv los ntawm Yexus lub npe lawv yuav muaj peev xwm ua lawv tus kheej los rau txhua tus neeg pom, raws li lawv pom zoo.

31 Yog li ntawd, lawv yuav ua tau tej hauj lwm tseem ceeb thiab zoo kawg nkaus, ua ntej hnub tseem ceeb thiab yuav los thaum tag nrho cov neeg yeej yuav mus sawv ntawm Khetos lub rooj txiav txim tiag tiag;

32 Muaj tseeb tiag lawv kuj yuav ua ib txoj hauj lwm tseem ceeb thiab zoo kawg nkaus nyob hauv Lwm Haiv Neeg, ua ntej hnub txiav txim ntawd.

33 Thiab yog tias nej tau tag nrho cov vaj lug kub uas qhia txog tag nrho tej yam zoo kawg nkaus uas Khetos ua, ces raws li Khetos tej lus, nej yuav paub tias tej yam no yeej yuav muaj los tiag.

34 Thiab kev txom nyem yuav raug tus uas tsis mloog Yexus tej lus, thiab tsis mloog cov uas nws tau xaiv thiab xa mus rau hauv lawv; vim tus uas tsis kam txais Yexus tej lus thiab cov uas nws xa mus tej lus ces twb yog tsis kam txais yuav nws; thiab yog li ntawd nws yuav tsis kam txais yuav lawv thaum txog hnub kawg;

35 Thiab yuav zoo dua rau lawv yog tias lawv tsis tau yug los. Vim nej puas xav tias nej muaj peev xwm tshem tau txoj kev txim lij ntawm ib tug Vajtswv uas chob siab, tus uas tib neeg muab tsuj rau hauv qab xib taws, xwv kom yuav coj tau kev cawm seej los?

36 Thiab nim no saib seb, ib yam li kuv tau hais txog cov uas tus Tswv tau xaiv, muaj tseeb tiag, peb tug uas raug coj mus dua saum ntuj lawm, hais tias kuv tsis paub xyov tus Tswv ua rau lawv huv ntawm txoj kev txawj ploj txawj tuag mus rau txoj kev tsis txawj ploj tsis txawj tuag—

37 Tiam sis saib seb, txij thaum kuv sau tej ntawd tas, kuv tau thov tus Tswv, thiab nws tau qhia rau kuv paub tias yuav tsum muaj ib txoj kev hloov ua rau lawv lub cev, yog tsis li ntawd lawv yeej yuav saj kev tuag;

38 Yog li ntawd, xwv kom lawv tsis tau saj kev tuag thiaj muaj ib txoj kev hloov uas ua rau lawv lub cev, xwv kom lawv yuav tsis raug mob nkeeg los sis kev tu siab tsuas yog rau neeg ntiaj teb tej kev txhaum xwb.

39 Nim no txoj kev hloov no twb tsis npaum li kev hloov uas yuav muaj thaum txog hnub kawg; tiam sis yeej muaj ib txoj kev hloov ua rau lawv, ua rau Dab Ntxwg Nyoog twb tsis muaj hwj chim kov yeej lawv, ua rau nws tsis muaj peev xwm haub ntxias tau lawv; thiab tau muab lawv cev nqaij daim tawv hloov ua dawb huv, ua rau lawv dawb huv, thiab ua rau lub hwj chim ntawm lub ntiaj teb twb tsis muaj peev xwm tuav tau lawv.

40 Thiab lawv yuav nyob zoo li no kom txog rau thaum Khetos hnub txiav txim; thiab nyob rau hnub ntawd lawv yuav tau txais kev hloov uas loj dua, thiab yuav txais lawv mus rau hauv Leej Txiv lub nceeg vaj uas yuav tsis tawm mus sab nraud ib zaug ntxiv li lawm, tiam sis yuav nyob nrog Vajtswv saum ntuj ceeb tsheej mus ib txhis li.