Tshooj 16
Yexus yuav mus xyuas lwm cov yaj ntawm Ixayees uas ploj lawm—Nyob rau hauv hnub nyoog kawg txoj moo zoo yuav mus rau Lwm Haiv Neeg thiab tom qab ntawd yuav mus rau tsev neeg Ixayees—Tus Tswv cov neeg yuav pom tim ntsej tim muag thaum Nws coj Xi-oos rov qab los. Kwv yees li 34 xyoos tom qab Yexus yug los.
1 Thiab kuv hais tseeb tseeb rau nej tias, kuv muaj lwm cov yaj, uas tsis yog nyob hauv thaj av no, thiab kuj tsis yog nyob hauv thaj av Yeluxalees, thiab kuj tsis yog nyob hauv ib puag ncig ntawm thaj av uas kuv tau mus txhawb pab.
2 Vim cov uas kuv hais txog yog cov uas tseem tsis tau hnov kuv lub suab; thiab kuv kuj tsis tau ua kuv tus kheej tshwm sim rau lawv pom ib zaug li.
3 Tiam sis kuv tau txais ib lo lus txib los ntawm Leej Txiv tias kuv yuav tsum mus rau lawv, thiab lawv yuav hnov kuv lub suab, thiab yuav muab lawv los suav nrog kuv cov yaj, xwv kom yuav muab ua ib pab thiab muaj ib tug tswv yug yaj; yog li ntawd kuv mus ua kuv tus kheej rau lawv pom.
4 Thiab kuv txib nej kom nej sau tej lus hais no tom qab uas kuv mus lawm, xwv kom yog tias kuv cov neeg uas nyob hauv Yeluxalees, lawv cov uas tau pom kuv thiab tau nrog kuv ua kuv txoj kev qhuab qhia, tsis thov Leej Txiv los ntawm kuv lub npe, kom lawv yuav tau txais kev paub txog nej los ntawm tus Vaj Ntsuj Plig Dawb Huv, thiab txog lwm xeem neeg uas lawv tsis paub txog, kom tej lus hais uas nej yuav sau no raug muab ceev cia thiab muab ua tshwm sim rau Lwm Haiv Neeg, kom los ntawm Lwm Haiv Neeg txoj kev muaj txoj moo zoo txhij txhua, yuav coj tau cov uas seem tshuav ntawm lawv cov tub ki rov los, uas Vajtswv tau ua kom tawg khiav ri niab mus thoob plaws lub ntiaj teb vim yog lawv txoj kev tsis ntseeg, los sis coj tau lawv los paub txog kuv, lawv tus Txhiv Dim.
5 Thiab thaum ntawd kuv yuav sau lawv ntawm plaub ceg kaum ntuj los ua ke; thiab thaum ntawd kuv yuav ua kom muaj raws li txoj kev khi lus uas Leej Txiv tau khi rau tag nrho cov neeg ntawm tsev neeg Ixayees.
6 Thiab Lwm Haiv Neeg tau koob hmoov, vim yog lawv txoj kev ntseeg kuv, los ntawm tus Vaj Ntsuj Plig Dawb Huv, uas ua tim khawv rau lawv txog kuv thiab txog Leej Txiv.
7 Saib seb, vim yog lawv txoj kev ntseeg kuv, Leej Txiv hais tias, thiab vim yog nej txoj kev tsis ntseeg, auj tsev neeg Ixayees es, nyob rau thaum hnub nyoog kawg qhov tseeb yuav los rau Lwm Haiv Neeg, xwv kom yuav muab txoj kev muaj txhij txhua ntawm tej yam no ua rau lawv paub.
8 Tiam sis Leej Txiv hais tias, kev txom nyem yuav raug Lwm Haiv Neeg cov uas tsis ntseeg—txawm hais tias lawv tau tuaj txog rau hauv thaj av no, thiab tau ua rau kuv cov neeg uas yog tsev neeg Ixayees tawg khiav ri niab; thiab kuv cov neeg uas yog cov ntawm tsev neeg Ixayees tau raug ntiab tawm ntawm lawv mus, thiab raug lawv muab tsuj rau hauv qab xib taws;
9 Thiab vim yog Leej Txiv txoj kev hlub tshua rau Lwm Haiv Neeg, thiab kuj yog Leej Txiv tej kev txiav txim kuv cov neeg uas yog tsev neeg Ixayees, kuv hais tseeb tseeb rau nej tias tom qab txhua yam no, thiab kuv tau ua rau kuv cov neeg uas yog tsev neeg Ixayees raug nplawm, thiab raug txom nyem, thiab raug tua, thiab raug ntiab tawm ntawm lawv mus, thiab raug lawv ntxub, thiab raug lawv thuam thiab muab ua lus kwv huam hais—
10 Thiab Leej Txiv txib kom kuv hais li no rau nej: Nyob rau hnub ntawd thaum Lwm Haiv Neeg yuav ua txhaum tawm tsam kuv txoj moo zoo, thiab yuav xyeej txoj kev muaj txhij txhua ntawm kuv txoj moo zoo, thiab lawv yuav khav theeb vim lawv lub siab muab hlob tshaj tag nrho tej haiv neeg, thiab tshaj tag nrho tej neeg ntawm lub ntiaj teb huv si, thiab yuav muaj txhua yam kev dag puv npo, thiab tej kev ntxias, thiab tej kev ua tsis zoo, thiab txhua yam kev siab dag, thiab tej kev tua neeg, thiab tej tswv yim xib hwb cuav, thiab tej kev sib daj sib deev, thiab tej kev qias uas ntsiag to; thiab yog tias lawv yuav ua tag nrho tej yam ntawd, thiab yuav xyeej qhov uas muaj txhij txhua ntawm kuv txoj moo zoo, saib seb, Leej Txiv hais tias, kuv yuav tshem qhov uas muaj txhij txhua ntawm kuv txoj moo zoo tawm ntawm lawv mus.
11 Thiab thaum ntawd kuv yuav nco qab txog kuv txoj kev khi lus uas kuv tau khi rau kuv cov neeg, auj tsev neeg Ixayees es, thiab kuv yuav coj kuv txoj moo zoo los rau lawv.
12 Thiab kuv yuav ua rau nej pom, auj tsev neeg Ixayees es, hais tias Lwm Haiv Neeg twb tsis muaj hwj chim tshaj nej; tiam sis kuv yuav nco qab txog kuv txoj kev khi lus rau nej, auj tsev neeg Ixayees es, thiab nej yuav los paub txog txoj kev muaj txhij txhua ntawm kuv txoj moo zoo.
13 Tiam sis Leej Txiv hais tias, yog Lwm Haiv Neeg yuav hloov siab lees txim thiab tig rov qab los cuag kuv, saib seb yuav muab lawv suav nrog kuv cov neeg, auj tsev neeg Ixayees es.
14 Thiab kuv yuav tsis cia kuv cov neeg, uas yog tsev neeg Ixayees, mus dhau rau hauv lawv, thiab muab lawv tsuj, Leej Txiv hais li.
15 Tiam sis yog lawv tsis tig los cuag kuv, thiab tsis mloog kuv lub suab, kuv yuav cia lawv, muaj tseeb tiag, kuv yuav cia kuv cov neeg, auj tsev neeg Ixayees, kom lawv yuav mus dhau rau hauv lawv, thiab yuav muab lawv tsuj, thiab lawv yuav zoo ib yam li cov ntsev uas tsuag lawm, uas tom qab ntawd tsis zoo rau dab tsi tsuas yog muab pov tseg, thiab muab tsuj rau hauv kuv cov neeg qab xib taws, auj tsev neeg Ixayees.
16 Kuv hais tseeb tseeb rau nej tias, Leej Txiv tau txib kuv li no—kom kuv muab thaj av no rau cov neeg no ua lawv qub txeeg qub teg.
17 Thiab thaum ntawd yuav muaj raws li tus yaj saub Yaxayas tej lus, uas hais tias:
18 Koj cov neeg zov nyas yuav tsa lawv lub suab; lawv yuav hu nkauj nrog lub suab ua ke, vim lawv yuav pom kiag ntawm qhov muag thaum tus Tswv yuav coj Xi-oos rov qab los.
19 Cia li tsa suab nrog kev xyiv fab; cia li hu nkauj ua ke, nej tej chaw puas tsuaj ntawm Yeluxalees; vim tus Tswv tau nplij nws cov neeg, nws tau txhiv Yeluxalees dim.
20 Tus Tswv tau thws nws txhais npab dawb huv rau txhua haiv neeg lub qhov muag pom, thiab cov neeg tag nrho thoob ntiaj teb yuav pom peb tus Vajtswv txoj kev cawm seej.