Tshooj 25
Nyob rau thaum txoj Kev Los Zaum Ob cov neeg muab hlob thiab cov neeg phem yuav raug kub hnyiab zoo li quav nyab npleg—Eliyas yuav rov qab los ua ntej hnub tseem ceeb thiab txaus ntshai heev ntawd—Piv rau Malakis 4. Kwv yees li 34 xyoos tom qab Yexus yug los.
1 Vim saib seb, hnub ntawd yuav los uas yuav kub li lub qhov cub; thiab tag nrho cov neeg uas muab hlob, muaj tseeb tiag, thiab tag nrho cov neeg ua phem, yuav yog quav nyab npleg; thiab hnub uas yuav los ntawd yuav muab lawv hlawv, Ib Tsoom Tub Rog tus Tswv hais li, yuav tsis tseg tej cag los sis tej ceg rau lawv.
2 Tiam sis rau nej cov uas hwm kuv lub npe, Leej Tub ntawm Kev Ncaj Ncees yuav sawv los nrog hwj chim kho tau mob nyob hauv nws ob txhais tis; thiab nej yuav tawm mus thiab loj hlob zoo li tus me nyuam nyuj nyob hauv nkuaj.
3 Thiab nej yuav tsuj cov neeg phem; vim lawv yuav yog tej hmoov av nyob hauv nej tej qab xib taws nyob rau hnub uas kuv yuav ua li no, Ib Tsoom Tub Rog tus Tswv hais li ntawd.
4 Nej cia li nco ntsoov Mauxes txoj kev cai, kuv tus tub qhe, txoj kev cai uas kuv tau muab rau nws nyob saum lub roob Haulenpes rau tag nrho cov neeg Ixayees, nrog tej kev cai thiab tej kev txiav txim.
5 Saib seb, kuv yuav xa tus yaj saub Eliyas los rau nej ua ntej tus Tswv txoj kev los ntawm hnub tseem ceeb thiab txaus ntshai;
6 Thiab nws yuav muab cov yawg koob lub siab tig mus rau cov me nyuam, thiab muab cov me nyuam lub siab tig mus rau cov yawg koob, yog tsis ua li ntawd kuv yuav los nplawm lub ntiaj teb nrog kev foom tsis zoo.