1 Nim no saib seb, kuv yuav ua kom nej pom tias lawv txhim tsa tsis tau ib tug vaj ntxwv rau hauv thaj av; tiam sis nyob hauv tib xyoos no, muaj tseeb tiag, xyoo peb caug, lawv tau ua rau lub rooj txiav txim puas tsuaj, muaj tseeb tiag, tau tua tus thawj txiav txim ntawm thaj av.

2 Thiab cov neeg tau sib faib ib leeg tawm tsam ib leeg; thiab lawv ib leeg tau faib tawm ntawm ib leeg mus ua pab ua pawg, txhua tus neeg raws li nws tsev neeg thiab nws cov txheeb ze thiab cov phooj ywg; thiab li no lawv tau ua rau tej nom tswv ntawm thaj av puas tsuaj.

3 Thiab txhua pab pawg tau tsa ib tug yawg hlob los sis ib tug thawj los coj lawv; thiab yog li ntawd lawv ua pab ua pawg thiab tej thawj coj ntawm tej pab pawg.

4 Nim no saib seb, twb tsis muaj ib tug neeg nyob hauv lawv li uas tsis muaj tsev neeg loj thiab tej neeg txheeb ze thiab tej phooj ywg coob; yog li ntawd lawv tej pab pawg los muaj coob heev.

5 Nim no tau muaj tag nrho tej yam no, thiab tseem tsis tau muaj tej kev ua rog nyob hauv lawv; thiab tag nrho tej kev ua phem no tau los raug cov neeg vim yog lawv tau ywj lawv tus kheej rau Dab Ntxwg Nyoog lub hwj chim.

6 Thiab lub tsoom fwv tej kev cai raug puas tsuaj, vim yog txoj kev tuav hauv ntsiag to ntawm cov phooj ywg thiab cov neeg txheeb ze ntawm cov uas tua cov yaj saub.

7 Thiab lawv tau ua kom muaj kev sib cav sib ceg loj heev nyob hauv thaj av, ua rau feem ntawm cov neeg uas ncaj ncees zog tau hloov los ua neeg phem yuav luag tas; muaj tseeb tiag, tsuas yog tshuav ob peb tug neeg ncaj ncees nyob hauv lawv lawm xwb.

8 Thiab yog li ntawd twb tsis tau muaj rau xyoo txij thaum feem coob ntawm cov neeg tig ntawm lawv txoj kev ncaj ncees mus, ib yam li tus dev mus noj nws cov ntuav, los sis ib yam li tus maum npua mus da pas hawv.

9 Nim no cov uas tuav hauv ntsiag to no, uas tau coj kev ua phem loj heev los rau cov neeg, tau sau lawv tus kheej tuaj ua ke, thiab tau xaiv ib tug neeg los ua lawv tus thawj uas lawv muab hu ua Yakhauj;

10 Thiab lawv muab nws hu ua lawv tus vaj ntxwv; yog li ntawd nws los ua ib tug vaj ntxwv rau nws pab neeg phem no; thiab nws twb yog ib tug uas ua thawj heev tawm nws lub suab tawm tsam cov yaj saub uas ua tim khawv txog Yexus.

11 Thiab tau muaj tias lawv twb tsis muaj coob npaum li tej pab pawg ntawm cov neeg, cov uas yeej sib koom ua ke tsuas yog tias lawv cov thawj coj nyias tsim nyias tej kev cai xwb, txhua tus raws li nws pab pawg; txawm li ntawd los pab neeg phem ntawd twb yog yeeb ncuab rau tej pab pawg ntawm cov neeg; txawm tias tej pab pawg ntawm cov neeg twb tsis yog ib co neeg ncaj ncees los, lawv yeej sib koom ua ke ntxub cov uas tau ua kev khi lus ua kom lub tsoom fwv puas tsuaj.

12 Yog li ntawd, vim Yakhauj pom tias lawv cov yeeb ncuab coob dua lawv, vim nws yog tus vaj ntxwv ntawm pab neeg, yog li ntawd nws thiaj txib nws cov neeg kom lawv khiav mus rau pem sab qaum teb deb tshaj plaws ntawm thaj av, thiab txhim tsa ib lub nceeg vaj nyob rau ped rau lawv tus kheej, kom txog thaum muaj cov neeg ntxeev siab khiav los koom nrog lawm, (vim nws ntxias lawv hais tias yuav muaj cov neeg ntxeev siab coob leej) thiab kom lawv muaj zog txaus los tawm tsam tej pab pawg ntawm cov neeg; thiab lawv ua li no.

13 Thiab lawv taug kev mus nrawm heev thiaj tsis muaj leej twg tab kaum lawv txog rau thaum lawv twb tawm mus dhau deb ntawm qhov uas cov neeg yuav caum tau lawv. Thiab tau xaus xyoo peb caug li no; thiab tej kev ua neej ntawm Nifais cov neeg yog li no.

14 Thiab tau muaj tias nyob hauv xyoo peb caug ib lawv tau sib faib ua pab pawg, txhua tus neeg raws li nws tsev neeg, tej txheeb ze thiab tej phooj ywg; txawm li ntawd los lawv tau sib yeem tias lawv ib leeg yuav tsis ua rog rau ib leeg; tiam sis lawv twb tsis sib koom ua ke ntawm lawv tej kev cai, thiab lawv tej kev kav, vim tau txhim tsa tej kev cai thiab tej kev kav no raws li lawv cov yawg hlob thiab lawv cov thawj coj lub siab xav. Tiam sis lawv tau txhim tsa tej kev cai nruj heev tias kom ib pab tsis txhob ua phem tawm tsam ib pab, ua rau lawv kuj muaj kev thaj yeeb nyob hauv thaj av tau ib ntus; txawm li ntawd los, lawv lub siab tig ntawm tus Tswv lawv tus Vajtswv mus, thiab lawv xuas pob zeb ntaus cov yaj saub thiab muab lawv ntiab tawm ntawm lawv mus.

15 Thiab tau muaj tias Nifais—vim tau muaj cov tim tswv thiab tus Tswv lub suab los xyuas nws, yog li ntawd vim nws tau pom cov tim tswv, thiab vim nws tau pom ntawm nws qhov muag kiag, thiab vim tau muab hwj chim rau nws kom nws paub txog Khetos txoj kev qhuab qhia, thiab kuj tau pom lawv tig nrawm heev ntawm kev ncaj ncees mus rau kev phem thiab kev qias ntawm nws qhov muag kiag.

16 Yog li ntawd, vim nws tu siab rau lawv lub siab tawv thiab lawv tsis thoob tsib to nrog—nws thiaj tawm mus rau hauv lawv nyob hauv tib xyoos ntawd, thiab pib ua tim khawv, yam tsis ntshai kiag, hais txog kev hloov siab lees txim thiab kev zam txim rau tej kev txhaum uas yog los ntawm kev ntseeg tus Tswv Yexus Khetos.

17 Thiab nws qhia ntau yam rau lawv; thiab tsis muaj peev xwm sau tau txhua yam, thiab ib feem xwb twb tsis tsim nyog, yog li ntawd thiaj tsis muab sau rau hauv phau ntawv no. Thiab Nifais qhuab qhia nrog hwj chim thiab nrog txoj cai loj heev.

18 Thiab tau muaj tias lawv npau taws rau nws, twb vim yog nws muaj hwj chim loj dua lawv, vim lawv twb tsis muaj cuab kav tsis ntseeg nws tej lus, vim nws txoj kev ntseeg tus Tswv Yexus Khetos loj heev ua rau cov tim tswv niaj hnub los txhawb pab nws.

19 Thiab los ntawm Yexus lub npe nws ntiab tau cov dab phem thiab cov ntsuj plig tsis huv tawm; thiab nws tsa tau nws tus kwv tij kiag sawv hauv qhov tuag los, tom qab cov neeg xuas pob zeb ntaus nws thiab ua rau nws tuag.

20 Thiab cov neeg twb pom qhov no, thiab saib qhov no, thiab npau taws rau nws vim yog nws lub hwj chim; thiab nws kuj tau ua ntau yam txuj ci tseem ceeb, rau cov neeg pom, los ntawm Yexus lub npe.

21 Thiab tau muaj tias xyoo peb caug ib tau dhau mus, thiab twb muaj tsis coob uas tau hloov siab los ntseeg tus Tswv; tiam sis tag nrho cov uas hloov siab los ntseeg yeej qhia tseeb rau cov neeg hais tias Vajtswv lub hwj chim thiab Vajtswv tus Ntsuj Plig tau los xyuas lawv, uas yog los ntawm Yexus Khetos, uas yog tus lawv ntseeg.

22 Thiab tag nrho cov uas Nifais muab cov dab phem ntiab tawm ntawm lawv mus, thiab kho tau lawv tej kev mob thiab lawv tej kev qaug zog, qhia tseeb rau cov neeg tias tej ntawd twb yog Vajtswv tus Ntsuj Plig ua los, thiab kho tau lawv zoo; thiab lawv kuj ua tej cim tawm thiab kuj ua tej txuj ci tseem ceeb nyob rau hauv cov neeg.

23 Xyoo peb caug ob kuj tau dhau mus li no. Thiab Nifais tau qhia rau cov neeg nyob rau thaum pib ntawm xyoo peb caug peb; thiab nws tshaj tawm rau lawv txog kev hloov siab lees txim thiab kev zam txim rau tej kev txhaum.

24 Nim no kuv kuj xav kom nej nco ntsoov thiab, hais tias twb tsis muaj ib tug uas Nifais tau coj los rau txoj kev hloov siab lees txim es tsis tau muab ua kev cai raus dej.

25 Yog li ntawd, Nifais tsa ib co txiv neej los rau txoj kev qhuab qhia no, xwv kom txhua tus uas los rau lawv yuav ua kev cai raus dej, thiab ua li no kom ua tim khawv thiab ua pov thawj rau Vajtswv thiab rau cov neeg tias, lawv tau hloov siab lees txim thiab tau txais kev zam txim rau lawv tej kev txhaum lawm.

26 Thiab tau muaj coob leej nyob rau thaum pib ntawm xyoo no uas ua kev cai raus dej rau txoj kev hloov siab lees txim; thiab li no feem ntau ntawm lub xyoos tau dhau mus li no.