1 Thiab nim no tau muaj tias cov neeg ntawm cov Neeg Nifais tag nrho tau rov qab mus rau lawv tej av nyob hauv xyoo nees nkaum rau, txhua tus txiv neej, nrog nws tsev neeg, nws tej pab yaj thiab nws tej tsiaj txhu, nws tej nees thiab nws tej nyuj twm, thiab tag nrho txhua yam uas yog lawv li.

2 Thiab tau muaj tias lawv twb noj tsis tas lawv tej khoom noj; yog li ntawd lawv thiaj nqa tej uas lawv noj tsis tas nrog lawv mus, tag nrho lawv tej noob qoob noob loos txhua yam, thiab lawv tej kub, thiab lawv tej nyiaj dawb, thiab tag nrho lawv tej khoom muaj nuj nqis, thiab lawv rov mus rau lawv tej av thiab tej khoom uas lawv muaj, tsis hais nyob rau sab qaum teb los sis nyob rau sab qab teb, tsis hais nyob rau thaj av sab qaum teb los sis nyob rau thaj av sab qab teb.

3 Thiab lawv pub av rau cov tub sab uas tau ua kev khi lus los ceev txoj kev thaj yeeb ntawm thaj av, cov uas tseem xav ua Neeg Lamas, raws li tej neeg uas lawv muaj, xwv kom lawv yuav muaj chaw nrhiav noj, nrog lawv tej kev khwv; thiab li no lawv txhim tsa tau kev thaj yeeb nyob tag nrho hauv thaj av.

4 Thiab lawv pib vam meej thiab hloov los ua neeg zoo heev; thiab xyoo nees nkaum rau thiab xya tau dhau mus, thiab muaj kev tiaj tus heev nyob hauv thaj av; thiab lawv tau tsim kho lawv tej kev cai raws li kev sib txig thiab kev txim lij.

5 Thiab nim no twb tsis muaj ib yam dab tsi nyob tag nrho hauv thaj av los tab kaum cov neeg txoj kev uas vam meej mus tsis tu ncua, tsuas yog lawv yuav poob mus rau kev ua txhaum xwb.

6 Thiab nim no twb yog Nkinkidaunais, thiab tus txiav txim, Lakhoonias, thiab cov uas cov Neeg Nifais tsa los ua cov thawj coj, uas yog cov tau txhim tsa txoj kev thaj yeeb loj no nyob hauv thaj av.

7 Thiab tau muaj tias muaj ntau lub nroog uas yog ua tshiab, thiab tau kho ntau lub qub nroog.

8 Thiab tau ua ntau txoj kev loj, thiab tau ua ntau txoj kev, uas mus ntawm ib lub nroog rau ib lub nroog, thiab ntawm ib thaj av rau ib thaj av, thiab ntawm ib qho chaw rau ib qho chaw.

9 Thiab li no xyoo nees nkaus yim tau dhau mus, thiab cov neeg tau muaj kev thaj yeeb tsis tu ncua.

10 Tiam sis tau muaj tias nyob hauv xyoo nees nkaum cuaj pib muaj tej kev sib cav nyob rau hauv cov neeg; thiab ib txhia tau khav theeb rau txoj kev muab hlob thiab tej kev khav vim yog lawv tej kev nplua nuj heev, muaj tseeb tiag, twb ua rau lawv tsim txom cov uas tsis muaj;

11 Vim muaj ntau tus neeg ua lag luam nyob hauv thaj av, thiab kuj muaj ntau tus kws lij choj, thiab ntau tus nom tswv.

12 Thiab cov neeg pib sib cais kom ib co siab thiab ib co qis, raws li lawv tej kev nplua nuj, thiab lawv tej kev kawm; muaj tseeb tiag, ib txhia tsis paub vim yog lawv txoj kev pluag, tiam sis lwm cov tau txais kev kawm ntau vim yog lawv tej kev nplua nuj.

13 Ib txhia khav theeb nrog kev muab hlob, thiab lwm cov ho txo hwj chim heev; ib txhia rov ua phem pauj phem, hos lwm cov ho tau txais kev phem thiab kev tsim txom thiab txhua yam kev txom nyem, thiab tsis tig thiab cem rov qab, tiam sis txo hwj chim thiab ua neeg hloov siab lees txim rau Vajtswv.

14 Thiab yog li ntawd tau muaj kev tsis sib txig nyob tag nrho hauv thaj av, ua rau lub koom txoos pib tawg ua pab ua pawg; muaj tseeb tiag, nyob hauv xyoo peb caug ua rau lub koom txoos tawg nyob tag nrho hauv thaj av tsuas yog tshuav ib txhia ntawm cov Neeg Lamas uas tau hloov siab los ntseeg rau txoj kev ntseeg tseeb xwb; thiab lawv twb tsis kam muab txoj kev ntseeg tseeb ntawd tso tseg, vim lawv khov kho, thiab ruaj nrees, thiab tsis txav li, txaus siab nrog tag nrho kev rau siab ntso ua raws li tus Tswv tej lus txib.

15 Nim no lub ntsiab ntawm cov neeg no txoj kev ua phem twb yog li no—Dab Ntxwg Nyoog yeej muaj hwj chim loj, rau txoj kev txhaub cov neeg kom ua txhua yam kev phem, thiab kom lawv muaj kev muab hlob, ntxias kom lawv nrhiav hwj chim, thiab txoj cai, thiab kev nplua nuj, thiab tej uas tsis muaj nuj nqis ntawm lub ntiaj teb.

16 Thiab li no Dab Ntxwg Nyoog thiaj coj tau cov neeg lub siab mus ua txhua yam kev phem; yog li ntawd lawv thiaj li muaj kev thaj yeeb tau ob peb xyoos xwb.

17 Thiab li no, nyob rau thaum pib ntawm xyoo peb caug—vim cov neeg cia lawv tus kheej rau tus dab phem tej kev ntxias coj lawv mus rau qhov twg uas nws xav cab lawv mus, thiab mus ua tej kev ua phem dab tsi los xij uas nws xav kom lawv ua—thiab yog li ntawd nyob rau thaum pib ntawm xyoo peb caug no, lawv nyob muaj kev phem kawg nkaus.

18 Nim no tsis yog lawv tsis paub tias lawv ua txhaum, vim lawv twb paub Vajtswv lub siab nyiam ntsig txog lawv; vim Vajtswv cov tub qhe twb qhia nws lub siab nyiam rau lawv lawm; yog li ntawd yeej yog lawv txhob txwm ntxeev siab tawm tsam Vajtswv.

19 Thiab nim no cov neeg tej kev phem no twb yog nyob hauv lub caij ntawm Lakhoonias, uas yog Lakhoonias tus tub, vim Lakhoonias tau los zaum saum nws txiv lub rooj txiav txim thiab los kav cov neeg rau xyoo ntawd.

20 Thiab pib muaj cov neeg uas Vajtswv tshoov siab los saum ntuj ceeb tsheej los thiab xa tawm mus, sawv nrog cov neeg nyob tag nrho hauv thaj av, qhuab qhia thiab ua tim khawv yam tsis ntshai kiag txog cov neeg tej kev txhaum thiab kev ua phem, thiab ua tim khawv rau lawv txog txoj kev txhiv dim uas tus Tswv yuav ua rau nws cov neeg, los yog hais tias, txog Khetos txoj kev sawv rov los; thiab lawv ua tim khawv yam tsis ntshai kiag txog nws txoj kev tuag thiab tej kev nyuaj siab.

21 Nim no muaj coob leej ntawm cov neeg uas npau taws heev vim yog cov uas tau ua tim khawv txog tej yam no; thiab feem coob ntawm cov uas npau taws twb yog cov thawj txiav txim, thiab lawv cov uas yog cov pov thawj hlob thiab cov kws lij choj; muaj tseeb tiag, tag nrho cov kws lij choj npau taws rau cov uas tau ua tim khawv txog tej yam no.

22 Nim no twb tsis muaj ib tug kws lij choj los sis neeg txiav txim los sis pov thawj hlob twg uas muaj hwj chim phua txim tuag rau ib tug neeg twg yog tias tus tswv xeev tsis tau kos npe rau txoj kev phua txim ntawd.

23 Nim no muaj coob leej ntawm cov uas ua tim khawv yam tsis ntshai kiag txog tej yam ntsig txog Khetos, uas raug cov neeg txiav txim muab txhom thiab muab tua ntsiag to, yog li ntawd thaum tus tswv xeev ntawm thaj av paub tias lawv tuag ces twb yog tom qab lawv tuag lawm.

24 Nim no saib seb, qhov no twb tsis raws li tej kev cai ntawm thaj av, hais tias yuav muab ib tug neeg twg tua yog tias tsis tau txoj cai los ntawm tus tswv xeev ntawm thaj av—

25 Yog li ntawd muaj kev tsis txaus siab tuaj rau ntawm thaj av Xalahelas, rau tus tswv xeev ntawm thaj av, tawm tsam cov neeg txiav txim uas tau phua txim tuag rau tus Tswv cov yaj saub, uas tsis raws li txoj kev cai.

26 Nim no tau muaj tias lawv raug txhom thiab raug coj tuaj rau ntawm tus neeg txiav txim xub ntiag, kom raug txiav txim rau txoj kev txhaum uas lawv tau ua, raws li txoj kev cai uas cov neeg tau txhim tsa.

27 Nim no tau muaj tias cov neeg txiav txim ntawd muaj phooj ywg thiab neeg txheeb ze coob heev; thiab cov uas tseem tshuav, muaj tseeb tiag, twb yuav luag tag nrho cov kws lij choj thiab cov pov thawj hlob, lawv tau sib sau tuaj ua ke, thiab koom nrog cov neeg txheeb ze ntawm cov neeg txiav txim uas yuav raug coj los hais plaub raws li txoj kev cai.

28 Thiab lawv ib leeg khi lus rau ib leeg, muaj tseeb tiag, twb yog txoj kev khi lus uas cov txheej thaum ub tau muab los, txoj kev khi lus uas tus dab phem yog tus muab los thiab tus coj, los sib koom tawm tsam tag nrho tej kev ncaj ncees.

29 Yog li ntawd lawv sib koom tawm tsam tus Tswv cov neeg, thiab ua kev khi lus los ua kom tus Tswv cov neeg puas tsuaj, thiab los tso cov uas muaj txim tua neeg kom dim ntawm kev txim lij txhais tes, uas twb yuav luag phua txim kom raws li txoj kev cai.

30 Thiab lawv twb tsis kam ua raws li txoj kev cai thiab tej kev muaj cai ntawm lawv lub teb chaws; thiab lawv ib leeg tau khi lus rau ib leeg tias yuav ua kom tus tswv xeev puas tsuaj thiab yuav txhim tsa ib tug vaj ntxwv rau hauv thaj av, xwv kom thaj av tsis txhob muaj kev ywj pheej ntxiv lawm tiam sis ywj rau tus vaj ntxwv.