1 Thiab tau muaj tias nyob rau thaum yuav kawg ntawm xyoo kaum yim cov tub rog tub sab ntawd tau npaj ua rog, thiab pib tuaj thiab maj nrawm nroos tawm pem tej pov roob, thiab tawm pem tej roob, thiab tej hav zoov, thiab lawv tej chaw nkaum, thiab lawv tej chaw uas tsis muaj neeg paub los, thiab pib tuaj nyob rau hauv thaj av, puav leej nyob hauv thaj av sab qab teb thiab nyob hauv thaj av sab qaum teb, thiab pib tuaj nyob rau tag nrho tej av uas cov Neeg Nifais tau muab tso tseg, thiab tej nroog uas raug tso cia kom quav poj.

2 Tiam sis saib seb, nyob hauv tej av uas cov Neeg Nifais tau tso tseg ntawd twb tsis muaj tsiaj qus los sis tsiaj rau lawv plob, thiab twb tsis muaj tsiaj rau cov tub sab ntawd plob tsuas yog nyob hauv hav zoov xwb.

3 Thiab cov tub sab tsis muaj peev xwm nyob tau tsuas yog nyob rau hauv hav zoov xwb, vim xawb tsis tau noj; vim cov Neeg Nifais tau tso lawv tej av ciaj quav poj, thiab sau lawv tej pab yaj thiab lawv tej tsiaj txhu thiab tag nrho lawv tej khoom, thiab lawv nyob ua ib pab.

4 Yog li ntawd, twb tsis muaj cib fim rau cov tub sab mus tua txeeb tej khoom thiab mus nrhiav zaub mov noj, tsuas yog tawm mus ua rog tawm tsam cov Neeg Nifais xwb; thiab vim cov Neeg Nifais nyob ua ib pab, thiab muaj coob heev, thiab tau tshwj rau lawv tus kheej tej khoom noj khoom siv, thiab tej nees thiab tej nyuj twm, thiab tej pab yaj txhua yam, xwv kom yuav kav lawv ncua li xya xyoo, nyob rau lub sij hawm uas lawv cia siab tias yuav ua tau rau cov tub sab ntawd puas tsuaj tawm ntawm thaj av mus; thiab li no xyoo kaum yim tau dhau mus.

5 Thiab tau muaj tias nyob hauv xyoo kaum cuaj Nkidi-ahais pom tias tsim nyog rau nws mus ua rog tawm tsam cov Neeg Nifais, vim twb tsis muaj kev rau lawv nrhiav noj tsuas yog mus tua txeeb tej khoom thiab ua tub sab thiab tua neeg xwb.

6 Thiab lawv twb tsis kam faib lawv tus kheej mus nyob rau hauv thaj av kom lawv yuav cog tau qoob loos, ntshai tsam cov Neeg Nifais ho tuaj tawm tsam lawv thiab tua lawv; yog li ntawd Nkidi-ahais txib nws cov tub rog tias nyob hauv xyoo no lawv yuav mus ua rog tawm tsam cov Neeg Nifais.

7 Thiab tau muaj tias lawv tau tuaj ua rog; thiab twb yog nyob hauv lub rau hli; thiab saib seb, hnub uas lawv tuaj ua rog yog ib hnub uas tseem ceeb thiab txaus ntshai heev; thiab lawv hnav tsoos tsho muaj yeeb yam zoo li tej neeg tub sab; thiab lawv muaj ib daim tawv yaj npog lawv puab tais, thiab lawv muab ntshav los zas lawv, thiab lawv lub taub hau chais do dus, thiab ntoo kaus mom hlau rau saum lawv lub taub hau; thiab Nkidi-ahais cov tub rog muaj coob thiab txaus ntshai heev, vim yog lawv tej cuab yeej ua rog, thiab vim yog lawv muab ntshav los zas lawv.

8 Thiab tau muaj tias thaum cov Neeg Nifais cov tub rog pom Nkidi-ahais cov tub rog, lawv txhua tus vau rau hauv av, thiab lawv tsa suab thov tus Tswv lawv tus Vajtswv, xwv kom nws yuav tseg lawv txoj sia thiab cawm lawv dim ntawm lawv cov yeeb ncuab txhais tes.

9 Thiab tau muaj tias thaum Nkidi-ahais cov tub rog pom li no lawv pib qw nrog ib lub suab nrov nrov, vim yog lawv txoj kev xyiv fab, vim lawv xav tias cov Neeg Nifais tau vau nrog txoj kev ntshai vim yog lawv cov tub rog txaus ntshai heev.

10 Tiam sis qhov no tsis yog raws li lawv siab xav, vim cov Neeg Nifais twb tsis ntshai lawv; tiam sis lawv hwm lawv tus Vajtswv thiab thov kom nws tsom kwm lawv; yog li ntawd, thaum Nkidi-ahais cov tub rog dhia tuaj tawm tsam lawv, lawv twb npaj txhij ntsib lawv; muaj tseeb tiag, lawv siv tus Tswv lub zog txais tos Nkidi-ahais cov tub rog.

11 Thiab npluav rog tau pib nyob hauv lub rau hli no; thiab npluav rog ntawd loj thiab txaus ntshai heev, muaj tseeb tiag, txoj kev sib txov siav ntawd loj thiab txaus ntshai heev, thiaj li tsis tau muaj dua kev sib txov siav uas loj npaum li ntawd nyob hauv tag nrho Lihais cov neeg txij thaum nws ncaim Yeluxalees.

12 Thiab txawm tias muaj tej kev hem thiab tej kev lav lus uas Nkidi-ahais tau ua lawm los, saib seb, cov Neeg Nifais tseem yeej lawv, ua rau lawv thim rov qab ntawm cov Neeg Nifais mus.

13 Thiab tau muaj tias Nkinkidaunais txib nws cov tub rog kom raws lawv qab mus kom txog tom tej ciam teb ntawm tej hav zoov, thiab kom lawv tsis txhob tseg ib tug twg uas poob rau hauv lawv txhais tes; thiab yog li ntawd lawv muab cov tub sab raws thiab muab lawv tua, mus txog tom tej ciam teb ntawm tej hav zoov, txog rau thaum lawv ua tiav raws li Nkinkidaunais txoj lus txib.

14 Thiab tau muaj tias Nkidi-ahais, tus uas tau sawv ntsug thiab sib tua yam tsis ntshai kiag, raug muab raws thaum nws khiav; thiab vim nws sab lim heev vim yog nws sib zog sib tua lawv caum cuag nws thiab muab nws tua. Thiab li no yog qhov kawg ntawm tus tub sab Nkidi-ahais.

15 Thiab tau muaj tias cov Neeg Nifais cov tub rog rov qab los rau lawv tej chaw tiv thaiv. Thiab tau muaj tias xyoo kaum cuaj no tau dhau mus, thiab cov tub sab twb tsis rov tuaj ua rog ntxiv lawm; thiab lawv twb tsis rov tuaj nyob hauv xyoo nees nkaum.

16 Thiab nyob hauv xyoo nees nkaum ib lawv tsis tuaj ua rog, tiam sis lawv tuaj zov khoo txhua sab ib puag ncig ntawm cov neeg Nifais; vim lawv xav tias yog lawv txiav cov Neeg Nifais tawm ntawm lawv tej av, thiab kaw lawv cia nyob txhua txhia sab, thiab yog tias lawv txiav tau lawv tawm ntawm tag nrho tej yam lawv ua nyob sab nraud, ces lawv yuav ua tau rau cov Neeg Nifais ywj lawv tus kheej rau lawv raws li lawv siab xav.

17 Nim no lawv tau tsa ib tug thawj coj ntxiv rau lawv tus kheej, uas muaj npe hu ua Xenalaihas; yog li ntawd twb yog Xenalaihas uas tau hais kom muaj kev zov khoo no.

18 Tiam sis saib seb, qhov no twb yog ib qho uas zoo rau cov Neeg Nifais; vim cov tub sab twb tsis muaj peev xwm zov khoo kom ntev txaus kom ua rau cov Neeg Nifais raug txom nyem, vim yog lawv tej khoom noj khoom siv ntau uas lawv tau teem tseg cia,

19 Thiab vim yog cov tub sab twb muaj khoom noj khoom siv tsis txaus; vim saib seb, lawv twb tsis muaj dab tsi li tsuas yog muaj nqaij los cawm lawv txoj sia, tej nqaij uas lawv nrhiav tau tom hav zoov los;

20 Thiab tau muaj tias tej tsiaj qus pib tsawg heev nyob hauv hav zoov npaum li uas cov tub sab twb yuav luag piam sij vim txoj kev tshaib.

21 Thiab cov Neeg Nifais tau tawm mus tsis tu ncua nruab hnub thiab hmo ntuj, thiab mus tawm tsam lawv cov tub rog, thiab muab lawv txiav pov tseg txog txhiab txhiab thiab kaum tawm txhiab leej.

22 Thiab yog li ntawd Xenalaihas cov neeg thiaj xav thim ntawm lawv lub tswv yim, vim yog txoj kev puas tsuaj loj uas tau los raug lawv thaum nruab hnub thiab thaum hmo ntuj.

23 Thiab tau muaj tias Xenalaihas txib nws cov neeg kom lawv thim lawv tus kheej ntawm txoj kev zov khoo, thiab taug kev mus rau pem feem uas deb tshaj plaws ntawm thaj av sab qaum teb.

24 Thiab nim no, vim Nkinkidaunais paub txog lawv lub tswv yim, thiab paub txog lawv txoj kev qaug zog vim tsis muaj zaub mov noj, thiab txoj kev tua tuag coob leej uas yog nyob hauv lawv, yog li ntawd nws thiaj xa nws cov tub rog tawm mus thaum hmo ntuj, thiab mus txiav kev ntawm txoj kev uas lawv yuav thim rov qab, thiab muab nws cov tub rog tso rau ntawm txoj kev uas lawv yuav thim rov qab.

25 Thiab lawv ua qhov no nyob rau thaum hmo ntuj, thiab taug kev mus dhau cov tub sab, es kom tag kis, thaum cov tub sab pib taug kev mus, lawv mus ntsib cov Neeg Nifais cov tub rog nyob tom lawv hauv ntej thiab nyob tom lawv qab huv tib si.

26 Thiab cov tub sab uas nyob rau sab qab teb los kuj raug txiav kev ntawm lawv tej chaw thim rov qab. Thiab tau ua txhua yam no los ntawm Nkinkidaunais txoj kev txib.

27 Thiab muaj ntau txhiab leej uas ywj lawv tus kheej los ua neeg raug txim rau cov Neeg Nifais, thiab lawv cov uas seem raug muab tua.

28 Thiab lawv tus thawj coj, Xenalaihas, raug muab txhom thiab muab dai rau saum ib tsob ntoo, muaj tseeb tiag, dai rau saum tsob ntsis ntoo ntawd txog rau thaum nws tuag. Thiab thaum lawv muab nws dai txog rau thaum nws tuag lawm lawv muab tsob ntoo ntov vau rau hauv av, thiab qw nrog ib lub suab nrov nrov, hais tias:

29 Thov kom tus Tswv tsom kwm nws cov neeg thaum muaj kev ncaj ncees thiab muaj lub siab dawb huv, kom lawv yuav ua tau rau txhua tus uas nrhiav kev tua lawv kom tau lub hwj chim thiab tej kev tuav hauv ntsiag to vau rau hauv av, ib yam li tau ua rau tus txiv neej no vau rau hauv av.

30 Thiab lawv zoo siab, thiab qw nrog ib lub suab dua, hais tias: Thov kom Anplaham tus Vajtswv, thiab Ixaj tus Vajtswv, thiab Yakhauj tus Vajtswv, tsom kwm cov neeg no thaum ua ncaj ncees, ntev npaum li uas lawv yuav hu lawv tus Vajtswv lub npe kom tsom kwm lawv.

31 Thiab tau muaj tias lawv tag nrho ua ib pab, hu nkauj, thiab qhuas lawv tus Vajtswv rau qhov tseem ceeb uas nws ua rau lawv, hais txog qhov uas tau tsom kwm kom lawv txhob poob mus rau hauv lawv cov yeeb ncuab txhais tes.

32 Muaj tseeb tiag, lawv qw hais tias: Hauxanas rau tus Vajtswv uas Siab Tshaj Plaws. Thiab lawv qw hais tias: Cia li qhuas tus Tswv Vajtswv uas Muaj Hwj Chim Tag Nrho, tus Vajtswv uas Siab Tshaj Plaws lub npe.

33 Thiab lawv lub siab muaj kev xyiv fab puv npo, ua rau lawv los kua muag ntau, vim yog Vajtswv txoj kev zoo heev uas cawm lawv dim ntawm lawv cov yeeb ncuab txhais tes; thiab lawv yeej paub tias twb vim yog lawv txoj kev hloov siab lees txim thiab lawv txoj kev txo hwj chim es tus Tswv thiaj cawm lawv dim ntawm ib txoj kev puas tsuaj uas kav ib txhis.