1 Thiab nim no tau muaj tias muaj cov neeg coob coob ntawm Nifais cov neeg sib sau ua ke, tuaj rau ib puag ncig ntawm lub tuam tsev uas nyob hauv thaj av Huaj Vam; thiab lawv ib leeg zoo siab kawg nkaus thiab xav tsis thoob nrog ib leeg, thiab ib leeg qhia rau ib leeg txog tej yam tseem ceeb thiab zoo kawg nkaus uas tau muaj los.

2 Thiab lawv kuj tham txog tus Yexus Khetos no, tus uas tau muaj lub cim qhia txog nws txoj kev tuag.

3 Thiab tau muaj tias thaum lawv ib leeg tseem tab tom tham nrog ib leeg li no, lawv hnov ib lub suab zoo li tawm saum ntuj ceeb tsheej los; thiab lawv tsa lawv qhov muag ntsia ib puag ncig, vim lawv tsis to taub lub suab uas lawv hnov; thiab twb tsis yog ib lub suab nchav, thiab kuj tsis yog ib lub suab nrov; tiam sis, thiab txawm tias yog ib lub suab yau los lub suab ntawd tseem chob cov uas tau hnov mus txog ntua rau hauv nruab siab, thiaj li tsis muaj ib feem ntawm lawv lub cev uas lub suab tsis ua rau kom qeeg; muaj tseeb tiag, lub suab tau chob lawv mus rau puag hauv nruab siab, thiab ua rau lawv lub siab kub lug.

4 Thiab tau muaj tias lawv rov hnov lub suab dua, thiab lawv tsis to taub lub suab ntawd.

5 Thiab lawv hnov lub suab dua zaum peb, thiab cuab lawv pob ntseg mloog; thiab lawv qhov muag ntsia qhov chaw uas lub suab ntawd los; thiab lawv ntsia ntsoov mus rau saum ntuj, ntsia rau qhov uas lub suab los.

6 Thiab saib seb, zaum peb lawv thiaj to taub lub suab uas lawv hnov; thiab lub suab hais rau lawv tias:

7 Saib seb kuv Leej Tub uas kuv Hlub, tus uas ua rau kuv zoo siab heev, tus uas ua rau kuv lub npe tau yeeb koob—nej cia li mloog nws hais.

8 Thiab tau muaj tias, thaum lawv to taub lawm lawv rov qab tsa lawv lub qhov muag mus rau saum ntuj; thiab saib seb, lawv pom ib tug Neeg nqis saum ntuj los; thiab nws hnav ib lub tsho tshaj sab dawb; thiab nws nqis los sawv ntsug nyob hauv nruab nrab ntawm lawv; thiab tag nrho cov neeg qhov muag tau ntsia nws, thiab lawv tsis muaj cuab kav qhib lawv lub qhov ncauj, ib tug hais lus rau ib tug, thiab tsis paub tias qhov no txhais li cas, vim lawv xav tias yog ib tug tim tswv uas tau tshwm sim los rau lawv.

9 Thiab tau muaj tias nws xyab nws txhais tes thiab hais rau cov neeg, hais tias:

10 Saib seb, kuv yog Yexus Khetos, tus uas cov yaj saub ua tim khawv tias yuav los rau hauv lub ntiaj teb.

11 Thiab saib seb, kuv yog txoj kev kaj thiab txoj sia ntawm neeg ntiaj teb; thiab kuv twb tau haus ntawm lub khob dej iab uas Leej Txiv muab rau kuv, thiab ua rau Leej Txiv tau yeeb koob ntawm qhov uas kuv ris neeg ntiaj teb tej kev txhaum, kuv thiaj tau ua txhua yam raws li Leej Txiv lub siab nyiam txij thaum chiv keeb los.

12 Thiab tau muaj tias thaum Yexus hais cov lus no tas lawm tag nrho cov neeg coob coob cia li vau rau hauv av; vim lawv nco qab tias cov yaj saub twb tau qhia txog tej yuav muaj los yav tom ntej tias Khetos yuav los ua nws tus kheej rau lawv pom tom qab nws nce mus saum ntuj ceeb tsheej.

13 Thiab tau muaj tias tus Tswv hais rau lawv hais tias:

14 Cia li sawv thiab los cuag kuv, xwv kom nej thiaj tau cev nej txhais tes los xuas kuv sab tav, thiab xwv kom nej thiaj tau xuas tej qhov ntsia hlau hauv kuv ob txhais tes thiab hauv kuv ob txhais taw, xwv kom nej thiaj paub tias kuv yog Ixayees tus Vajtswv, thiab yog tus Vajtswv ntawm tag nrho lub ntiaj teb, thiab tau raug tua rau neeg ntiaj teb tej kev txhaum.

15 Thiab tau muaj tias cov neeg coob coob txav mus, thiab cev lawv txhais tes mus xuas nws sab tav, thiab xuas tej qhov ntsia hlau hauv nws ob txhais tes thiab hauv nws ob txhais taw; thiab lawv ua li no, ib leeg txav mus zuj zus txog rau thaum lawv txhua tus tau mus, thiab pom ntawm lawv lub qhov muag thiab xuas ntawm lawv txhais tes, thiab paub qhov tseeb thiab ua tim khawv tias, twb yog nws, tus uas cov yaj saub sau tseg tias yuav los.

16 Thiab thaum lawv txhua tus tau txav mus thiab pom ntawm lawv tus kheej, lawv qw nrov nrov ua ke, hais tias:

17 Hauxanas! Cia li qhuas tus Vajtswv uas Siab Tshaj Plaws lub npe! Thiab lawv vau rau ntawm Yexus ko taw, thiab teev tiam nws.

18 Thiab tau muaj tias nws hais lus rau Nifais (vim Nifais nyob hauv cov neeg coob coob) thiab nws txib kom Nifais los.

19 Thiab Nifais sawv thiab mus, thiab qhau cev rau ntawm tus Tswv xub ntiag thiab nwj nws txhais ko taw.

20 Thiab tus Tswv txib kom nws cia li sawv. Thiab nws sawv thiab sawv ntawm tus Tswv xub ntiag.

21 Thiab tus Tswv hais rau nws tias: Kuv muab hwj chim rau koj xwv kom koj yuav muab cov neeg no ua kev cai raus dej thaum kuv rov qab nce mus saum ntuj ceeb tsheej lawm.

22 Thiab ntxiv tus Tswv hu lwm tus neeg los, thiab hais rau lawv tib yam; thiab nws muab hwj chim rau lawv ua kev cai raus dej. Thiab nws hais rau lawv tias: Nej yuav tsum ua kev cai raus dej li no; thiab tsis txhob cia muaj kev sib cav nyob hauv nej.

23 Kuv hais tseeb rau nej tias, tus uas hloov siab lees txim rau nws tej kev txhaum, thiab xav ua kev cai raus dej los ntawm kuv lub npe, vim yog los ntawm nej tej lus, nej yuav tsum ua kev cai raus dej li no rau lawv—Saib seb, nej yuav tsum mus thiab sawv rau hauv dej, thiab los ntawm kuv lub npe nej yuav muab lawv ua kev cai raus dej.

24 Thiab nim no saib seb, cov no yog cov lus uas nej yuav hais, tuav lawv lub npe, hais tias:

25 Vim Yexus Khetos tau muab txoj cai rau kuv, kuv muab koj ua kev cai raus dej los ntawm Leej Txiv, thiab ntawm Leej Tub, thiab ntawm tus Vaj Ntsuj Plig Dawb Huv lub npe. Amees.

26 Thiab tom qab ntawd nej yuav muab lawv raus rau hauv dej, thiab rov qab tawm hauv dej los.

27 Thiab nej yuav tsum ua kev cai raus dej zoo li no los ntawm kuv lub npe; vim saib seb, kuv hais tseeb rau nej tias, Leej Txiv, thiab Leej Tub, thiab tus Vaj Ntsuj Plig Dawb Huv yog ib tug; thiab kuv koom nrog Leej Txiv, thiab Leej Txiv koom nrog kuv, thiab Leej Txiv thiab kuv wb koom ib lub siab.

28 Thiab raws li kuv txib nej yuav tsum ua kev cai raus dej li no. Thiab tsis txhob cia muaj kev sib cav nyob hauv nej, ib yam li tau muaj yav tas los; thiab tsis txhob cia muaj kev sib cav nyob hauv nej ntsig txog kuv tej lus qhuab qhia, ib yam li tau muaj yav tas los.

29 Vim kuv hais tseeb tseeb rau nej tias, tus uas muaj siab xav sib cav sib ceg twb tsis yog los ntawm kuv, tiam sis yog los ntawm tus dab phem, tus uas yog leej txiv ntawm kev sib cav sib ceg, thiab nws txhaub neeg lub siab kom ib leeg sib cav sib ceg npau taws rau ib leeg.

30 Saib seb, nov tsis yog kuv txoj lus qhuab qhia, uas txhaub neeg lub siab kom npau taws, ib leeg tawm tsam ib leeg; tiam sis qhov no yog kuv txoj lus qhuab qhia, kom tsis txhob muaj tej ntawd.

31 Saib seb, kuv hais tseeb tseeb rau nej tias, kuv yuav qhia kuv txoj lus qhuab qhia rau nej.

32 Thiab nov yog kuv txoj lus qhuab qhia, thiab twb yog txoj lus qhuab qhia uas Leej Txiv tau muab rau kuv; thiab kuv ua tim khawv txog Leej Txiv, thiab Leej Txiv ua tim khawv txog kuv, thiab tus Vaj Ntsuj Plig Dawb Huv ua tim khawv txog Leej Txiv thiab kuv; thiab kuv ua tim khawv tias Leej Txiv txib tib neeg txhua tus, nyob txhua qhov chaw, kom hloov siab lees txim thiab ntseeg kuv.

33 Thiab tus uas ntseeg kuv, thiab ua kev cai raus dej, tus ntawd yuav txais kev cawm dim; thiab lawv yog cov uas yuav tau Vajtswv lub nceeg vaj ua lawv tug.

34 Thiab tus uas tsis ntseeg kuv, thiab tsis ua kev cai raus dej, tus ntawd yuav raug txim.

35 Kuv hais tseeb tseeb rau nej tias, nov yog kuv txoj lus qhuab qhia, thiab kuv ua tim khawv txog tej no tias yog los ntawm Leej Txiv los; thiab tus uas ntseeg kuv yeej ntseeg Leej Txiv thiab; thiab Leej Txiv yuav ua tim khawv rau tus ntawd txog kuv, vim nws yuav los xyuas tus ntawd nrog hluav taws thiab nrog tus Vaj Ntsuj Plig Dawb Huv.

36 Thiab li no Leej Txiv yuav ua tim khawv txog kuv, thiab tus Vaj Ntsuj Plig Dawb Huv yuav ua tim khawv rau nws txog Leej Txiv thiab kuv; vim Leej Txiv, thiab kuv, thiab tus Vaj Ntsuj Plig Dawb Huv peb yog ib tug.

37 Thiab ntxiv kuv hais rau nej, nej yuav tsum hloov siab lees txim, thiab hloov los ua zoo li ib tug me nyuam yaus, thiab ua kev cai raus dej los ntawm kuv lub npe, tsis li ntawd ces nej yeej yuav tsis txais tau tej yam no hlo li.

38 Thiab ntxiv kuv hais rau nej, nej yuav tsum hloov siab lees txim, thiab ua kev cai raus dej los ntawm kuv lub npe, thiab hloov los ua zoo li ib tug me nyuam yaus, tsis li ntawd ces nej yeej yuav tsis tau Vajtswv lub nceeg vaj los ua nej tug hlo li.

39 Kuv hais tseeb tseeb rau nej tias, nov yog kuv txoj lus qhuab qhia, thiab tus uas cog rau saum qhov no yog cog rau saum kuv lub pob zeb, thiab tej rooj vag ntawm ntuj txiag teb tsaus yuav kov tsis yeej lawv.

40 Thiab tus uas tshaj tawm ntau dua los sis tsawg dua qhov no, thiab hais tias qhov ntawd yog kuv txoj lus qhuab qhia, tus ntawd yog los ntawm kev phem los, thiab twb tsis yog cog rau saum kuv lub pob zeb; tiam sis nws cog rau saum ib lub hauv paus xuab zeb, thiab thaum tej dej los nyab thiab tej cua los nplawm, tej rooj vag ntawm ntuj txiag teb tsaus yuav qhib txais tos cov zoo li no.

41 Yog li ntawd, cia li tawm mus rau cov neeg no, thiab tshaj tawm tej lus uas kuv tau hais, rau cov neeg nyob thoob plaws lub ntiaj teb.