1 Thiab nim no tau muaj tias nyob hauv xyoo kaum rau txij thaum Khetos los, Lakhoonias, uas yog tus tswv xeev ntawm thaj av, tau txais ib tsab ntawv los ntawm tus thawj coj thiab tus tswv xeev ntawm pab neeg tub sab no; thiab cov no yog cov lus uas tau sau, hais tias:

2 Lakhoonias, tus muaj meej mom tshaj thiab tus thawj tswv xeev ntawm thaj av, saib seb, kuv sau tsab ntawv no tuaj rau koj, thiab qhuas koj heev, vim yog koj txoj kev ruaj nrees, thiab txoj kev ruaj nrees ntawm koj cov neeg, uas tswj tuav tej uas nej xav tias yog nej txoj kev muaj cai thiab txoj kev ywj pheej; muaj tseeb tiag, nej yeej sawv tau zoo, zoo li muaj ib tug Vajtswv txhais tes pab nej, thaum nej tiv thaiv nej txoj kev ywj pheej, thiab nej tej khoom, thiab nej lub teb chaws, los sis tej uas nej muab hu li ntawd.

3 Thiab zoo li yog kev tu siab rau kuv, Lakhoonias tus uas muaj meej mom tshaj es, hais tias nej yuav ruam thiab muaj plhus ua luaj es yuav xav tias nej muaj cuab kav sawv tawm tsam coob leej uas tsis ntshai dab tsi uas yog cov mloog kuv txoj kev txib, cov uas nim no nyob rau lub sij hawm no sawv nrog lawv tej cuab yeej ua rog, thiab kub siab lug tos ntsoov rau lo lus tias—Mus tawm tsam cov Neeg Nifais thiab ua kom lawv puas tsuaj.

4 Thiab kuv, paub txog lawv lub siab uas tsis muaj leej twg txawj kov yeej, vim kuv twb tau sim lawv nyob hauv tshav rog, thiab vim kuv paub txog lawv txoj kev ntxub uas kav ib txhis rau nej vim yog nej tau ua ntau yam uas tsis ncaj rau lawv, yog li ntawd yog tias lawv tuaj tawm tsam nej lawv yuav tuaj xyuas kom nej puas tsuaj huv tib si.

5 Yog li ntawd kuv thiaj sau tsab ntawv no, siv kiag kuv tus kheej txhais tes los muab khi cia, vim kuv txhawj txog nej txoj kev noj qab nyob zoo, vim yog nej txoj kev ruaj nrees ntawm tej uas nej ntseeg tias yog, thiab nej lub siab uas muaj meej mom nyob hauv tshav rog.

6 Yog li ntawd kuv thiaj sau ntawv tuaj rau koj, vim kuv thov kom nej cia li muab nej tej nroog, nej tej av, thiab nej tej khoom, ywj rau kuv cov neeg no, zoo dua li qhov uas lawv yuav tuaj xyuas nej nrog rab ntaj thiab qhov uas kev puas tsuaj yuav los raug nej.

7 Los yog hais tias, cia li ywj nej tus kheej rau peb, thiab koom nrog peb thiab los paub tej yam peb ua ntsiag to, thiab los ua peb cov kwv tij xwv kom nej yuav zoo li peb—tsis yog peb cov qhev, tiam sis yog peb cov kwv tij thiab ua kwv luag tau tag nrho tej khoom uas peb muaj.

8 Thiab saib seb, kuv cog lus rau koj tias, yog nej ua li no, nrog kev lav lus, nej yuav tsis raug puas tsuaj; tiam sis yog nej tsis ua li no, kuv cog lus rau koj nrog kev lav lus hais tias, nyob rau lub hlis tom ntej no kuv yuav txib kom kuv cov tub rog tuaj tawm tsam nej, thiab lawv yuav tsis cia lawv txhais tes so thiab yuav tsis tseg leej twg, tiam sis yuav tua nej, thiab yuav siv ntaj tua nej kom txog thaum nej tu noob.

9 Thiab saib seb, kuv yog Nkidi-ahais; thiab kuv yog tus tswv xeev ntawm pawg ua hauj lwm ntsiag to ntawm Nkadi-atoos no; uas kuv paub tias lawv pab pawg no thiab tej yam lawv ua yeej zoo; thiab twb muaj tej no puag thaum ub los thiab tau muab tej no cev los rau peb.

10 Thiab kuv sau tsab ntawv no tuaj rau koj, Lakhoonias, thiab kuv cia siab tias nej yuav muab nej tej av thiab nej tej khoom rau peb, kom tsis muaj ntshav nrog, xwv kom kuv cov neeg no yuav rov tau lawv tej kev muaj cai thiab kev kav, cov uas tau ntxeev siab tawm ntawm nej mus vim yog nej txoj kev phem uas tsis cia rau lawv muaj cai kav, thiab tsuas yog nej ua li no xwb, tsis li ntawd kuv yuav ua pauj tej uas tau ua tsis ncaj rau lawv. Kuv yog Nkidi-ahais.

11 Thiab nim no tau muaj tias thaum Lakhoonias tau txais tsab ntawv no nws xav tsis thoob kiag li, vim yog Nkidi-ahais tau hais kom muab cov Neeg Nifais thaj av rau nws yam tsis ntshai kiag li, thiab hawv cov neeg thiab yuav ua pauj tej kev tsis ncaj rau cov uas twb tsis tau txais kev tsis ncaj, tsuas yog hais tias lawv tau ua tsis ncaj rau lawv tus kheej vim lawv tau ntxeev siab khiav mus rau cov tub sab uas phem thiab txaus ntxub ntawd.

12 Nim no saib seb, tus Lakhoonias no, uas yog tus tswv xeev, yog ib tug neeg ncaj, thiab ib tug tub sab tej lus thiab tej kev hawv twb tsis muaj peev xwm ua rau nws ntshai; yog li ntawd nws twb tsis mloog ua raws li Nkidi-ahais tsab ntawv, uas yog tus tswv xeev ntawm cov tub sab, tiam sis nws hais kom nws cov neeg thov tus Tswv kom muab zog rau lawv rau lub sij hawm thaum cov tub sab yuav tuaj tawm tsam lawv.

13 Muaj tseeb tiag, nws xa ib zaj lus tshaj tawm mus rau tag nrho hauv nws cov neeg, kom lawv sau lawv cov poj niam, thiab lawv cov me nyuam, lawv tej pab yaj thiab lawv tej tsiaj txhu, thiab tag nrho lawv tej khoom tuaj ua ke, rau ib qho chaw, tsuas yog tshuav lawv thaj av xwb.

14 Thiab nws tau hais kom ua tej chaw tiv thaiv ib puag ncig lawv, thiab ua kom tej ntawd ruaj khov heev. Thiab nws tau hais kom muab cov tub rog, tsis hais cov Neeg Nifais los sis cov Neeg Lamas, los sis tag nrho lawv cov uas raug muab suav nrog cov Neeg Nifais, tso zov ib puag ncig saib lawv, thiab zov lawv txhua hnub thiab txhua hmo tiv cov neeg tub sab.

15 Muaj tseeb tiag, nws hais rau lawv tias: Ib yam li tus Tswv muaj txoj sia nyob, tsuas yog nej hloov siab lees txim rau tag nrho nej tej kev ua phem, thiab thov tus Tswv xwb, tsis li ntawd tus Tswv yeej yuav tsis cawm kom nej dim ntawm cov tub sab Nkadi-atoos ntawd txhais tes.

16 Thiab Lakhoonais tej lus thiab tej kev qhia tej yuav muaj los yav tom ntej tseem ceeb thiab zoo kawg nkaus, nws tej lus thiaj ua rau tag nrho cov neeg ntshai; thiab lawv siv tag nrho lawv lub zog ua raws li Lakhoonias tej lus.

17 Thiab tau muaj tias Lakhoonias tsa tej thawj hau rog los kav tag nrho cov Neeg Nifais cov tub rog, los coj lawv rau thaum lub sij hawm uas cov tub sab yuav tuaj pem hav zoov tuaj tawm tsam lawv.

18 Nim no tau tsa tus thawj uas saib tag nrho cov thawj hau rog thiab tus thawj coj loj ntawm cov Neeg Nifais cov tub rog, thiab nws lub npe hu ua Nkinkidaunais.

19 Nim no twb yog kab lis kev cai nyob hauv tag nrho cov Neeg Nifais kom tsa cov uas muaj lub txiaj ntsim txais tau kev tshwm sim thiab qhia tau tej yuav muaj los yav tom ntej los ua lawv cov thawj hau rog (tsuas yog tsis ua li no thaum lub caij uas lawv ua phem xwb); yog li ntawd, tus Nkinkidaunais no yog ib tug yaj saub tseem ceeb heev nyob hauv lawv, thiab kuj yog tus thawj txiav txim thiab.

20 Nim no cov neeg hais rau Nkinkidaunais tias: Thov tus Tswv, thiab cia peb mus pem roob thiab rau hauv hav zoov, xwv kom peb yuav mus tawm tsam cov tub sab thiab rhuav kom lawv puas tsuaj nyob hauv lawv thaj av.

21 Tiam sis Nkinkidaunais hais rau lawv tias: Tus Tswv txwv tsis pub; yog peb mus tawm tsam lawv ces tus Tswv yuav coj peb mus rau hauv lawv txhais tes; yog li ntawd peb yuav npaj peb tus kheej nyob hauv nruab nrab ntawm peb thaj av, thiab peb yuav sau tag nrho peb cov tub rog tuaj ua ke, thiab peb yuav tsis mus tawm tsam lawv, tiam sis peb yuav tos kom txog thaum lawv tuaj tawm tsam peb; yog li ntawd ib yam li tus Tswv muaj txoj sia nyob, yog peb ua li no nws yuav coj lawv los rau hauv peb txhais tes.

22 Thiab tau muaj tias nyob hauv xyoo kaum xya, nyob rau thaum xyoo yuav kawg, Lakhoonias zaj lus tshaj tawm tau mus thoob plaws rau hauv thaj av, thiab lawv tau coj lawv tej nees, thiab lawv tej tsheb nees luag, thiab lawv tej nyuj twm, thiab tag nrho lawv tej pab yaj, thiab tag nrho lawv tej tsiaj txhu, thiab lawv tej noob qoob loos, thiab tag nrho lawv tej khoom, thiab tau taug kev mus muaj txog txhiab txhiab thiab kaum tawm txhiab leej, txog rau thaum lawv tag nrho tau mus rau qhov chaw uas tau xaiv tseg kom lawv yuav tsum sau lawv tus kheej tuaj ua ke, tiv thaiv lawv tus kheej tawm tsam lawv cov yeeb ncuab.

23 Thiab thaj av uas tau xaiv tseg yog thaj av Xalahelas thiab thaj av uas nyob nruab nrab ntawm thaj av Xalahelas thiab thaj av Huaj Vam, muaj tseeb tiag, mus txog rau ntawm tus ciam teb uas nyob nruab nrab ntawm thaj av Huaj Vam thiab thaj av Quav Poj.

24 Thiab muaj ntau txhiab leej heev uas muab hu ua cov Neeg Nifais, cov uas tau sau lawv tus kheej tuaj ua ke nyob hauv thaj av no. Nim no Lakhoonias tau hais kom lawv sau lawv tus kheej tuaj ua ke nyob rau hauv thaj av sab qab teb, vim yog txoj kev foom tsis zoo loj uas nyob rau hauv thaj av sab qaum teb.

25 Thiab lawv ua chaw tiv thaiv lawv tus kheej tawm tsam lawv cov yeeb ncuab; thiab lawv nyob hauv ib thaj av, thiab ua ib pab, thiab lawv ntshai tej lus uas Lakhoonias tau hais, ua rau lawv hloov siab lees txim rau tag nrho lawv tej kev txhaum; thiab lawv tso lawv tej kev thov rau tus Tswv lawv tus Vajtswv, kom nws yuav tso lawv dim thaum lub sij hawm thaum lawv cov yeeb ncuab tuaj ua rog tawm tsam lawv.

26 Thiab lawv tu siab heev vim yog lawv cov yeeb ncuab. Thiab Nkinkidaunais tau hais kom lawv ua txhua txhia yam cuab yeej ua rog, thiab kom lawv yuav tsum muaj tej cuab yeej ua rog uas khov, thiab muaj tej phiaj hlau, thiab muaj tej phiaj hlau kheej, raws li nws txoj kev qhia.