Tshooj 8
Tej cua daj cua dub, tej av qeeg, tej hluav taws, tej khaub zig cua, thiab lwm yam kev puas tsuaj yog puav pheej ntawm txoj kev muab Khetos ntsia rau saum ntoo khaub lig—Coob leej raug puas tsuaj—Kev tsaus ntuj los vov thaj av tau peb hnub—Cov uas tseem tshuav quaj nyiav rau lawv tej kev puas ntsoog. Kwv yees li 33–34 xyoos tom qab Yexus yug los.
1 Thiab nim no tau muaj tias raws li peb phau ceev xwm txheej, thiab peb paub tias peb phau ceev xwm txheej yeej tseeb, vim saib seb, tus uas sau phau ceev xwm txheej twb yog ib tug neeg ncaj ncees—vim nws yeej ua tej txuj ci tseem ceeb ntau los ntawm Yexus lub npe; thiab twb tsis muaj ib tug neeg uas yuav muaj peev xwm ua ib yam txuj ci tseem ceeb los ntawm Yexus lub npe tsuas yog tus Tswv ntxuav nws kom huv tag nrho ntawm nws txoj kev ua phem—
2 Thiab nim no tau muaj tias, yog tsis muaj qhov yuam kev thaum tus neeg no suav peb lub caij nyoog, ces xyoo peb caug peb twb tau dhau mus;
3 Thiab cov neeg pib ua siab kub lug ntsia ntsoov rau lub cim uas tus yaj saub Xamuyees uas yog tus Neeg Lamas tau muab los, muaj tseeb tiag, rau lub sij hawm uas yuav muaj kev tsaus ntuj ncua li peb hnub rau hauv thaj av.
4 Thiab pib muaj kev tsis ntseeg loj heev thiab kev sib cav nyob hauv cov neeg, txawm tias tus Tswv twb tau muab ntau lub cim los.
5 Thiab tau muaj tias nyob hauv xyoo peb caug plaub, nyob hauv lub ib hlis ntuj, nyob rau hnub plaub ntawm lub hlis, tau muaj ib kob nag xob nag cua, ib kob uas tsis tau muaj dua li nyob tag nrho hauv thaj av.
6 Thiab kuj tau muaj ib nthw cua daj cua dub loj thiab phem heev; thiab tau muaj xob quaj nrov heev, ua rau tag nrho lub ntiaj teb co qeg txoog zoo li twb yuav tawg ua ob sab.
7 Thiab tau muaj tej xob laim uas ci ntsa heev, uas ib txwm tsis tau muaj dua li nyob tag nrho hauv thaj av.
8 Thiab lub nroog Xalahelas tau kub hnyiab.
9 Thiab lub nroog Maulaunais tau tog mus rau hauv qab thu dej hiav txwv, thiab cov neeg uas nyob hauv tau poob dej tuag tas.
10 Thiab tej av tau los npog lub nroog Maulaunaihas, ua rau nyob hauv qhov chaw ntawm lub nroog thiaj muaj ib lub roob loj heev.
11 Thiab muaj ib txoj kev puas tsuaj loj thiab phem heev nyob hauv thaj av sab qab teb.
12 Tiam sis saib seb, muaj ib txoj kev puas tsuaj loj dua thiab phem heev dua nyob rau thaj av sab qaum teb; vim saib seb, tag nrho thaj av raug hloov tas, vim yog tej cua daj cua dub thiab tej khaub zig cua thiab tej xob quaj thiab tej xob laim, thiab txoj kev qeeg loj heev ntawm tag nrho thaj av.
13 Thiab tej kev loj tau tawg tas thiab tej kev me tau piam tag, thiab ntau qhov chaw uas du du tau hloov los ua chaw cuam kawb.
14 Thiab ntau lub nroog loj thiab muaj npe tog rau hauv dej, thiab ntau lub raug kub hnyiab, thiab ntau lub co qeg txoog txog rau thaum tej tsev uas nyob hauv tau vau rau hauv av, thiab cov neeg uas nyob hauv tuag tas, thiab tej chaw raug tso tseg tsis muaj neeg nyob.
15 Thiab muaj ib txhia nroog uas tseem nyob; tiam sis tej kev piam ntawm cov ntawd yeej loj heev, thiab muaj coob leej uas nyob hauv tej lub nroog ntawd tau tuag.
16 Thiab muaj ib txhia uas raug khaub zig cua ntsawj mus; thiab twb tsis muaj neeg paub lawv mus dua twg lawm, tsuas yog lawv paub tias lawv raug ntsawj mus lawm xwb.
17 Thiab li no tag nrho thaj av tau hloov txawv tag vim yog tej cua daj cua dub, thiab tej xob quaj, thiab tej xob laim, thiab txoj kev qeeg ntawm tej av.
18 Thiab saib seb, tej pob zeb tawg ua ob sab; tej pob zeb ntawd tawg rau hauv tag nrho thaj av, ua rau cov neeg pom tias muaj pob zeb tawg ntsoog ntxaws, thiab tawg pleb thiab nrwb pleb, nyob tag nrho rau hauv thaj av.
19 Thiab tau muaj tias thaum tej xob quaj, thiab tej xob laim, thiab tej nag xob nag cua, tej cua daj cua dub, thiab tej kev qeeg ntawm thaj av tau tsum—vim saib seb, muaj tej no ncua ntev li peb teev; thiab ib txhia kuj hais tias lub sij hawm ntev dua ntawd; txawm li ntawd los, tag nrho tej yam loj thiab phem no tau tshwm sim ntev li peb teev—thiab tom qab ntawd saib seb, muaj kev tsaus ntuj nyob rau hauv thaj av.
20 Thiab tau muaj tias muaj kev tsaus ntuj uas tsaus heev tuaj nyob rau hauv tag nrho thaj av, npaum li uas cov uas tsis tau tuag muaj peev xwm hnov tau tej huab ntawm kev tsaus ntuj;
21 Thiab twb muaj tsis taus qhov pom kev li, vim yog txoj kev tsaus nti, thiab twb tsis muaj neeg taws tau tswm ciab, los sis tsau; thiab twb tsis muaj neeg rauv tau taws txawm tias lawv siv tej ntoo zoo thiab ntoo qhuav heev, ces thiaj li muaj tsis taus ib qho pom kev hlo li;
22 Thiab twb tsis pom muaj ib lub teeb, los sis hluav taws, los sis txoj kev kaj qauj les li, thiab tsis pom lub hnub, thiab lub hli, thiab tej hnub qub, vim tej huab ntawm kev tsaus ntuj uas muaj nyob rau hauv thaj av tuab heev li.
23 Thiab tau muaj tias qhov uas tsis pom kev ntawd muaj tau li peb hnub; thiab muaj kev quaj ntsuag thiab quaj nrov nrov thiab quaj nyiav nyob tag nrho hauv cov neeg tsis tu ncua; muaj tseeb tiag, tej kev quaj nyiav ntawm cov neeg loj heev, vim yog txoj kev tsaus ntuj thiab txoj kev puas tsuaj loj uas tau los raug lawv.
24 Thiab nyob hauv ib qho chaw hnov cov neeg qw nrov, hais tias: Auj kheev lam peb tau hloov siab lees txim ua ntej hnub tseem ceeb thiab phem no, ces ntshe tus Tswv twb tseg cia peb cov kwv tij, thiab ntshe lawv twb tsis raug kub hnyiab nyob hauv lub nroog loj Xalahelas ntawd.
25 Thiab nyob hauv lwm qhov chaw tau hnov cov neeg qw thiab quaj ntsuag, hais tias: Auj kheev lam peb tau hloov siab lees txim ua ntej hnub tseem ceeb thiab phem no, thiab tsis txhob tua thiab xuas pob zeb ntaus cov yaj saub, thiab muab lawv ntiab tawm; ces ntshe tus Tswv twb tseg cia peb niam thiab peb cov ntxhais zoo nkauj, thiab peb cov me nyuam, thiab ntshe twb tsis raug muab faus rau hauv lub nroog loj Maulaunaihas ntawd. Thiab yog li ntawd cov neeg tau quaj nrov thiab txaus ntshai heev.