1 Thiab tau muaj tias nws txib lawv kom lawv sau tej lus uas Leej Txiv tau muab rau Malakis, tej uas nws yuav qhia rau lawv. Thiab tau muaj tias tom qab tau muab tej lus ntawd sau cia lawm nws muab tej lus ntawd piav ntxaws rau lawv. Thiab tej no yog tej lus uas nws qhia rau lawv, hais tias: Leej Txiv tau hais rau Malakis li no tias—Saib seb, kuv yuav xa kuv tus tub xa xov los, thiab nws yuav npaj txoj kev ua kuv ntej, thiab tus Tswv uas nej nrhiav yuav los nrawm nroos rau nws lub tuam tsev, twb yog tus tub xa xov ntawm txoj kev khi lus, tus uas nej zoo siab rau; saib seb, nws yuav los, Ib Tsoom Tub Rog tus Tswv hais li.

2 Tiam sis leej twg yuav tiv taus hnub uas nws los, thiab leej twg yuav sawv tau thaum nws tshwm sim los? Vim nws yuav zoo li tus kws nchuav nyiaj lub qhov cub, thiab zoo li tus ntxhua khaub ncaws tej tshuaj.

3 Thiab nws yuav zaum zoo li ib tug kws nchuav nyiaj thiab kws ua kom nyiaj dawb; thiab nws yuav ua kom Levis cov tub dawb huv, thiab muab lawv txhuam zoo li kub thiab nyiaj, xwv kom lawv yuav coj ncaj ncees muab tau kev tiam rau tus Tswv.

4 Thaum ntawd tus Tswv yuav txaus siab rau Yudas thiab Yeluxalees nkawd txoj kev tiam, ib yam li nyob rau txheej thaum ub, thiab ib yam li nyob rau ntau xyoo dhau los.

5 Thiab kuv yuav los ze nej kom txiav txim rau nej; thiab kuv yuav ua ib tug tim khawv nrawm nroos tawm tsam cov neeg txawj ua khawv koob, thiab tawm tsam tej neeg deev luag poj luag txiv, thiab tawm tsam tej neeg ua tim khawv tsis tseeb, thiab tawm tsam cov uas ua phem khoo nws tej tub dag tub zog tej nyiaj, ua phem khoo cov poj ntsuam thiab cov me nyuam uas tsis muaj txiv, thiab cov uas tsis kam txais qhua los tsev, thiab cov uas tsis hwm kuv, Ib Tsoom Tub Rog tus Tswv hais li.

6 Vim kuv yog tus Tswv, kuv yeej tsis hloov; yog li ntawd nej uas yog Yakhauj cov tub yuav tsis raug puas tsuaj.

7 Twb txij li puag thaum nej cov yawg koob lub caij los nej tau txav deb ntawm kuv cov kab ke, thiab tsis ua raws li cov kab ke ntawd. Cia li rov los cuag kuv thiab kuv yuav rov los cuag nej, Ib Tsoom Tub Rog tus Tswv hais li. Tiam sis nej hais tias: Peb yuav rov qab los li cas?

8 Ib tug neeg puas yuav nyiag ntawm Vajtswv? Tiam sis nej twb nyiag ntawm kuv. Tiam sis nej hais tias: Peb tau nyiag ntawm koj li cas? Los ntawm ib feem kaum thiab tej khoom tiam.

9 Nej raug kev foom tsis zoo, vim nej tau nyiag ntawm kuv, twb yog tag nrho haiv neeg no.

10 Nej cia li nqa tag nrho tej ib feem kaum tuaj rau hauv lub tsev rau khoom, xwv kom yuav muaj nqaij nyob hauv kuv lub tsev; thiab nim no cia li sim kuv los ntawm qhov no, Ib Tsoom Tub Rog tus Tswv hais li, seb kuv puas qhib tej qhov rais saum ceeb tsheej rau nej, thiab foom koob hmoov nplua mias los rau nej xwv kom yuav tsis muaj chaw txaus txais.

11 Thiab kuv yuav cem tus uas ua kev puas tsuaj kom pab nej, thiab nws yuav tsis ua kom cov txiv hmab txiv ntoo ntawm nej thaj av puas tsuaj; thiab nej cov txiv hmab yuav tsis poob ua ntej lub sij hawm yuav siav, Ib Tsoom Tub Rog tus Tswv hais li.

12 Thiab txhua haiv neeg yuav hais tias nej tau koob hmoov, vim nej yuav yog ib thaj av uas ntxim nyiam heev, Ib Tsoom Tub Rog tus Tswv hais li.

13 Nej tej lus nyaum heev tawm tsam kuv, tus Tswv hais li. Tiam sis nej tseem hais tias: Peb tau hais dab tsi tawm tsam koj?

14 Nej tau hais tias: Ua hauj lwm rau Vajtswv twb tsis muaj nuj nqis dab tsi, thiab muaj nuj nqis dab tsi uas peb ua raws li nws cov kab ke thiab peb taug kev yam tu siab rau ntawm Ib Tsoom Tub Rog tus Tswv xub ntiag?

15 Thiab nim no peb hais tias cov neeg muab hlob yog cov neeg zoo siab; muaj tseeb tiag, lawv cov uas ua hauj lwm phem yog cov neeg vam meej; muaj tseeb tiag, lawv cov uas sim Vajtswv siab twb dim tiag.

16 Thaum ntawd lawv cov uas hwm tus Tswv ib leeg hais lus rau ib leeg ntau zaus, thiab tus Tswv mloog thiab hnov; thiab tus Tswv cov tub qhe sau ib phau ntawv nco txog rau ntawm nws xub ntiag rau lawv cov uas hwm tus Tswv, thiab cov uas xav txog nws lub npe.

17 Thiab lawv yuav yog kuv li, Ib Tsoom Tub Rog tus Tswv hais li, nyob rau hnub ntawd thaum kuv ua kuv tej saw nyiaj saw kub; thiab kuv yuav tseg lawv ib yam li ib tug neeg tseg nws tus tub uas ua hauj lwm rau nws.

18 Thaum ntawd nej yuav tig rov qab thiab paub tau cov neeg ncaj ncees thiab cov neeg phem, paub tus uas ua hauj lwm rau Vajtswv thiab tus uas tsis ua hauj lwm rau nws.