1 Thiab tau muaj tias Yexus txib nws cov thwj tim kom lawv nqa ib co mov mog thiab cawv txiv hmab los rau nws.

2 Thiab thaum lawv tseem mus nqa mov mog thiab cawv txiv hmab lawm, nws txib cov neeg coob coob kom lawv zaum rau hauv av.

3 Thiab thaum cov thwj tim nqa tau mov mog thiab cawv txiv hmab los, nws muab cov mov mog los thiab muab ntais thiab foom koob hmoov rau; thiab nws muab rau cov thwj tim thiab hais kom lawv noj.

4 Thiab thaum lawv noj tas thiab tsau lawm, nws txib kom lawv muab rau cov neeg coob coob noj.

5 Thiab thaum cov neeg coob coob noj tas thiab tsau lawm, nws hais rau cov thwj tim tias: Saib seb kuv yuav tsa ib tug nyob hauv nej, thiab kuv yuav muab hwj chim rau nws xwv kom nws yuav ntais mov mog thiab foom koob hmoov thiab muab rau cov neeg ntawm kuv lub koom txoos noj, rau txhua tus uas yuav ntseeg thiab ua kev cai raus dej los ntawm kuv lub npe.

6 Thiab nej yuav tsum nco ntsoov ua raws li no, ib yam li kuv tau ua, ib yam li kuv tau ntais mov mog thiab foom koob hmoov thiab muab rau nej noj.

7 Thiab nej yuav ua li no kom nco txog kuv lub cev, uas kuv tau ua rau nej pom. Thiab qhov uas nej ua li no yuav ua tim khawv rau Leej Txiv tias nej nco ntsoov txog kuv. Thiab yog tias nej nco ntsoov txog kuv nej yuav muaj kuv tus Ntsuj Plig nrog nej nyob.

8 Thiab tau muaj tias thaum nws hais cov lus no tas, nws txib nws cov thwj tim kom lawv txais cov cawv txiv hmab nyob hauv lub khob thiab muab haus, thiab kom lawv muab rau cov neeg coob coob xwv kom lawv yuav tau haus.

9 Thiab tau muaj tias lawv tau ua li ntawd, thiab tau haus thiab tau tsau; thiab lawv tau muab rau cov neeg coob coob, thiab lawv tau haus, thiab lawv tau tsau.

10 Thiab thaum cov thwj tim tau ua li no tas, Yexus hais rau lawv tias: Nej tau koob hmoov rau qhov uas nej tau ua li no, vim qhov no yog ua raws li kuv tej lus txib, thiab qhov no ua tim khawv rau Leej Txiv tias nej yeej txaus siab ua raws li tej uas kuv txib nej ua.

11 Thiab qhov no los nej yuav ua tas mus li rau cov uas hloov siab lees txim thiab ua kev cai raus dej los ntawm kuv lub npe; thiab nej yuav ua li no nco txog kuv cov ntshav, uas kuv tau cia nrog rau nej, xwv kom nej yuav ua tim khawv rau Leej Txiv tias nej nco ntsoov txog kuv. Thiab yog tias nej nco ntsoov txog kuv nej yuav muaj kuv tus Ntsuj Plig nrog nej nyob.

12 Thiab kuv muab ib lo lus txib rau nej tias nej yuav tsum ua tej yam no. Thiab nej tau koob hmoov yog tias nej yuav ua tej yam no tas mus li, vim nej cog rau saum kuv lub pob zeb.

13 Tiam sis tus uas nyob hauv nej uas ua ntau dua los sis tsawg dua tej yam no twb tsis yog cog rau saum kuv lub pob zeb, tiam sis cog rau saum xuab zeb; thiab thaum nag los, thiab dej nyab los, thiab cua tshuab, thiab nplawm lawv, lawv yuav vau, thiab tej rooj vag ntawm ntuj txiag teb tsaus yeej qhib lug tos txais lawv.

14 Yog li ntawd nej tau koob hmoov yog tias nej yuav ua raws li kuv tej lus txib, uas Leej Txiv tau txib kuv kom kuv muab rau nej.

15 Kuv hais tseeb tseeb rau nej tias, nej yuav tsum saib xyuas thiab thov Vajtswv tas mus li, nyob tsam nej raug tus dab phem haub ntxias, thiab nws coj nej mus txhom khi.

16 Thiab ib yam li kuv tau thov Vajtswv nyob hauv nej ib yam li ntawd nej yuav thov Vajtswv nyob hauv kuv lub koom txoos, nyob hauv kuv cov neeg uas hloov siab lees txim thiab ua kev cai raus dej los ntawm kuv lub npe. Saib seb kuv yog txoj kev kaj; kuv tau ua ib tug yam ntxwv rau nej.

17 Thiab tau muaj tias thaum Yexus hais cov lus no rau nws cov thwj tim tas lawm, nws rov tig mus rau cov neeg coob coob thiab hais rau lawv tias:

18 Saib seb, kuv hais tseeb tseeb rau nej tias, nej yuav tsum saib xyuas thiab thov Vajtswv tas mus li nyob tsam nej pib raug kev haub ntxias; vim Dab Ntxwg Nyoog xav tau nej, kom nws yuav tshau tau nej ib yam li tej nplej.

19 Yog li ntawd nej yuav tsum thov Leej Txiv tas mus li los ntawm kuv lub npe;

20 Thiab qhov uas nej yuav thov Leej Txiv los ntawm kuv lub npe, uas yog qhov ncaj ncees, thiab ntseeg tias nej yuav tau txais, saib seb Leej Txiv yuav muab qhov ntawd rau nej.

21 Thov Leej Txiv nyob hauv nej tej tsev neeg, los ntawm kuv lub npe tas mus li, xwv kom nej cov poj niam thiab nej cov me nyuam yuav tau koob hmoov.

22 Thiab saib seb, nej yuav tuaj sib ntsib ua ke ntau zaus; thiab nej tsis txhob txwv ib tug neeg twg uas tuaj rau hauv nej thaum nej yuav sib ntsib ua ke, tiam sis cia lawv tuaj rau hauv nej thiab tsis txhob txwv lawv.

23 Tiam sis nej yuav tsum thov Vajtswv rau lawv, thiab tsis txhob ntiab lawv tawm; thiab yog tias lawv tuaj rau hauv nej ntau zaus, nej yuav tsum thov Leej Txiv rau lawv, los ntawm kuv lub npe.

24 Yog li ntawd, tsa nej lub teeb kom ci rau neeg ntiaj teb. Saib seb kuv yog lub teeb uas nej yuav tsa—tej uas nej tau pom kuv ua. Saib seb nej pom tias kuv tau thov Leej Txiv, thiab nej txhua tus twb pom.

25 Thiab nej pom tias kuv twb tsis tau hais kom nej ib tug twg khiav mus, tiam sis tsuas yog hais kom nej los cuag kuv, xwv kom nej yuav tau xuas thiab pom; nej yuav tau ua ib yam li no rau neeg ntiaj teb; thiab tus uas tsis ua li txoj lus txib no cia nws tus kheej raug coj mus rau kev haub ntxias.

26 Thiab nim no tau muaj tias thaum Yexus hais cov lus no tas lawm, nws rov tig nws lub qhov muag mus rau cov thwj tim uas nws tau xaiv, thiab hais rau lawv tias:

27 Saib seb kuv hais tseeb tseeb rau nej tias, kuv muab dua ib lo lus txib rau nej, thiab tom qab ntawd kuv yuav tsum mus cuag kuv Txiv xwv kom kuv yuav ua raws li cov lus txib ntxiv uas nws tau muab rau kuv.

28 Thiab nim no saib seb, nov yog txoj lus txib uas kuv muab rau nej, kom nej tsis txhob cia ib tug twg uas paub ntsoov tias nws tsis tsim nyog noj kuv lub cev thiab haus kuv cov ntshav, thaum nej foom koob hmoov rau;

29 Vim tus uas tsis tsim nyog noj kuv lub cev thiab haus kuv cov ntshav noj thiab haus kev raug txim rau nws tus kheej; yog li ntawd yog nej paub tias ib tug neeg twg tsis tsim nyog noj kuv lub cev thiab haus kuv cov ntshav nej yuav tsum txwv nws.

30 Txawm li ntawd los, nej tsis txhob muab nws ntiab tawm ntawm nej mus, tiam sis nej yuav tsum txhawb pab nws thiab thov Leej Txiv rau nws, los ntawm kuv lub npe; thiab yog hais tias nws hloov siab lees txim thiab ua kev cai raus dej los ntawm kuv lub npe, ces nej yuav tsum txais yuav nws, thiab yuav foom koob hmoov thiab muab kuv lub cev thiab cov ntshav rau nws.

31 Tiam sis yog nws tsis hloov siab lees txim ces yuav tsis suav nws nyob hauv kuv cov neeg, xwv kom nws thiaj tsis ua rau kuv cov neeg puas tsuaj, vim saib seb kuv yeej paub kuv cov yaj, thiab twb muab lawv suav.

32 Txawm li ntawd los, nej tsis txhob ntiab nws tawm ntawm nej tej tsev sab laj, los sis nej tej chaw teev tiam, vim nej yuav tsum txhawb pab cov uas zoo li no tsis tu ncua; vim nej twb tsis paub tiam sis muaj ib hnub lawv yuav rov los thiab hloov siab lees txim, thiab los cuag kuv kawg siab kawg ntsws, thiab kuv yuav kho kom lawv zoo; thiab nej yog txoj kev uas coj lawv mus rau txoj kev cawm seej.

33 Yog li ntawd, cia li ua raws li tej lus hais uas kuv tau txib nej no xwv kom nej thiaj tsis los raug txim; vim kev txom nyem yuav raug tus uas Leej Txiv rau txim rau.

34 Thiab kuv muab tej lus txib no rau nej vim yog tej kev sib cav sib ceg uas tau muaj nyob hauv nej. Thiab nej tau koob hmoov yog tias nej tsis muaj kev sib cav sib ceg nyob hauv nej.

35 Thiab nim no kuv mus cuag Leej Txiv, vim twb tsim nyog tias kuv yuav tsum mus cuag Leej Txiv kom pab tau nej.

36 Thiab tau muaj tias thaum Yexus xaus cov lus hais no, nws xuas nws txhais tes tuav cov thwj tim uas nws tau xaiv, ib tug dhau ib tug, txog rau thaum uas nws tau tuav lawv txhua tus, thiab hais lus rau lawv thaum nws tuav lawv.

37 Thiab cov neeg coob coob twb tsis hnov tej lus uas nws hais, yog li ntawd lawv thiaj tsis ua tim khawv; tiam sis cov thwj tim ua tim khawv tias nws tau muab hwj chim rau lawv kom muab tau tus Vaj Ntsuj Plig Dawb Huv. Thiab kuv yuav qhia rau nej tom qab no tias cov lus tim khawv no muaj tseeb.

38 Thiab tau muaj tias thaum Yexus tuav lawv txhua tus lawm, muaj ib tauv huab los thiab roos cov neeg coob coob ua rau lawv tsis pom Yexus.

39 Thiab thaum tauv huab roos lawv nws ncaim ntawm lawv mus, thiab nce mus rau saum ntuj. Thiab cov thwj tim pom thiab ua tim khawv tias nws nce rov mus saum ntuj lawm.