1 Thiab tau muaj tias nws txib cov neeg coob coob thiab nws cov thwj tim, kom lawv tsum thov. Thiab nws txib lawv kom lawv tsis txhob tsum thov Vajtswv nyob hauv lawv lub siab.

2 Thiab nws txib lawv kom lawv sawv thiab sawv tsees sawv ntsug rau saum lawv tej ko taw. Thiab lawv tau sawv thiab sawv tsees sawv ntsug.

3 Thiab tau muaj tias nws rov muab cov mov mog ntais thiab foom koob hmoov rau cov mov mog ntawd, thiab muab rau cov thwj tim noj.

4 Thiab thaum lawv tau noj lawm nws txib lawv kom lawv muab cov mov mog ntais, thiab muab rau cov neeg coob coob.

5 Thiab thaum lawv tau muab rau cov neeg coob coob noj lawm nws kuj muab cawv txiv hmab rau lawv haus thiab, thiab txib lawv kom lawv muab rau cov neeg coob coob.

6 Nim no, cov thwj tim thiab cov neeg coob coob twb tsis tau nqa cov mov mog thiab cawv txiv hmab tuaj;

7 Tiam sis nws yeej muab mov mog rau lawv noj thiab cawv txiv hmab rau lawv haus tiag tiag.

8 Thiab nws hais rau lawv tias: Tus uas noj cov mov mog no yog noj kuv lub cev rau nws tus ntsuj plig; thiab tus uas haus cov cawv txiv hmab no yog haus kuv cov ntshav rau nws tus ntsuj plig; thiab nws tus ntsuj plig yuav tsis tshaib thiab tsis nqhis ntxiv lawm, tiam sis yuav tsau.

9 Nim no, thaum tag nrho cov neeg coob coob tau noj thiab haus lawm, saib seb, lawv muaj tus Ntsuj Plig puv npo; thiab lawv ua ib lub suab qw tawm, thiab muab yeeb koob rau Yexus, tus uas lawv tau pom thiab tau hnov.

10 Thiab tau muaj tias thaum lawv sawv daws qhuas Yexus tas lawm, nws hais rau lawv tias: Saib seb nim no kuv ua raws li txoj lus txib uas Leej Txiv tau txib kuv ntsig txog cov neeg no kom tiav, cov uas seem tshuav ntawm tsev neeg Ixayees.

11 Nej nco ntsoov tias kuv tau hais rau nej thiab tau hais tias thaum muaj raws li Yaxayas tej lus lawm—saib seb twb muab tej lus ntawd sau cia, nej twb muaj tej lus ntawd nyob ntawm nej, yog li ntawd cia li tshawb xyuas tej lus ntawd—

12 Thiab kuv hais tseeb tseeb rau nej tias, thaum muaj raws li tej lus ntawd lawm ces twb yuav muaj raws li txoj kev khi lus uas Leej Txiv tau khi rau nws cov neeg, auj tsev neeg Ixayees.

13 Thiab thaum ntawd cov uas seem tshuav uas raug tawg khiav ri niab mus thoob plaws lub ntiaj teb, tus Tswv yuav muab lawv sau los ua ke tim sab hnub tuaj thiab sab hnub poob, thiab nram sab qab teb thiab pem sab qaum teb los ua ke; thiab tus Tswv yuav coj lawv los paub txog tus Tswv lawv tus Vajtswv, uas tau txhiv lawv dim.

14 Thiab Leej Txiv tau txib kuv kom kuv muab thaj av no rau nej, ua nej qub txeeg qub teg.

15 Thiab kuv hais rau nej tias, yog Lwm Haiv Neeg tsis hloov siab lees txim tom qab txoj koob hmoov uas lawv yuav tau txais, tom qab lawv ua rau kuv cov neeg tawg khiav ri niab—

16 Thaum ntawd nej, cov uas yog ib co uas seem tshuav ntawm tsev neeg Yakhauj, cia li tawm mus rau hauv lawv; thiab nej yuav mus nyob hauv nruab nrab ntawm lawv cov uas yuav muaj coob; thiab nej yuav mus nyob hauv lawv zoo li ib tug tsov ntxhuav nyob hauv tej tsiaj qus tom hav zoov, thiab zoo li ib tug thav tsov ntxhuav nyob hauv tej pab yaj, uas thaum nws mus rau hauv tej pab yaj ntawd, yuav muab lawv tsuj thiab dua ua daim, thiab tsis muaj leej twg cawm tau.

17 Nej txhais tes yuav tsa rau nej cov yeeb ncuab, thiab tag nrho nej cov yeeb ncuab yuav raug txiav tawm.

18 Thiab kuv yuav sau kuv cov neeg los ua ke ib yam li ib tug neeg sau nws tej tes nplej los rau hauv plag tsev.

19 Vim cov uas Leej Txiv tau khi lus rau, kuv yuav coj los ua kuv cov neeg, muaj tseeb tiag, kuv yuav ua kom nej muaj txwm kub hlau, thiab kuv yuav ua kom nej muaj rau tooj. Thiab nej yuav ntaus ntau pab neeg tawg ua tej dwb daim; thiab kuv yuav muab tej uas lawv yeej fij rau tus Tswv, thiab muab lawv tej khoom fij rau tus Tswv ntawm tag nrho lub ntiaj teb. Thiab saib seb, kuv twb yog tus uas ua li ntawd.

20 Thiab Leej Txiv hais li no, yuav muaj tias, nyob rau hnub ntawd rab ntaj ntawm kuv txoj kev txim lij yuav dai rawv ntawm lawv sab saud; thiab tsuas yog lawv hloov siab lees txim xwb tsis li ces rab ntaj yuav viag los raug lawv, Leej Txiv hais li, muaj tseeb tiag, viag los raug txhua haiv neeg ntawm Lwm Haiv Neeg.

21 Thiab yuav muaj tias kuv yuav txhim tsa kuv cov neeg, auj tsev neeg Ixayees.

22 Thiab saib seb, kuv yuav txhim tsa cov neeg no nyob rau hauv thaj av no, kom muaj raws li txoj kev khi lus uas kuv khi nrog nej tus yawg koob Yakhauj; thiab thaj av no yuav yog ib lub Yeluxalees tshiab. Thiab lub ntuj ceeb tsheej lub hwj chim yuav nyob nrog cov neeg no; muaj tseeb tiag, kuv los kuj yuav nyob nrog nej thiab.

23 Saib seb, kuv twb yog tus uas Mauxes hais txog, hais tias: Tus Tswv nej tus Vajtswv yuav tsa ib tug yaj saub tawm ntawm nej cov kwv tij los rau nej, ib yam li kuv; nej yuav tsum mloog txhua yam uas nws yuav hais rau nej. Thiab yuav muaj tias txhua tus neeg uas yuav tsis mloog tus yaj saub ntawd yuav raug txiav tawm ntawm cov neeg mus.

24 Kuv hais tseeb rau nej, muaj tseeb tiag, thiab txhua tus yaj saub txij li Xamuyees thiab cov tom qab ntawd, tag nrho cov uas tau hais lus, puav leej tau ua tim khawv txog kuv.

25 Thiab saib seb, nej yog cov yaj saub tej me nyuam; thiab nej yog los ntawm tsev neeg Ixayees; thiab nej yog los ntawm txoj kev khi lus uas Leej Txiv tau khi nrog nej cov yawg koob, uas tau hais rau Anplaham tias: Thiab los ntawm koj cov tub ki txhua pab neeg ntawm lub ntiaj teb yuav tau koob hmoov.

26 Leej Txiv xub tsa kuv los rau nej, thiab xa kuv los foom koob hmoov rau nej kom nej txhua tus tig ntawm nws tus kheej tej kev ua phem mus; thiab li no los twb vim yog nej yog cov me nyuam ntawm txoj kev khi lus—

27 Thiab tom qab uas nej tau koob hmoov thaum ntawd Leej Txiv ua kom muaj raws li txoj kev khi lus uas nws khi nrog Anplaham hais tias: Los ntawm koj cov tub ki txhua pab neeg ntawm lub ntiaj teb yuav tau koob hmoov—rau txoj kev muab tus Vaj Ntsuj Plig Dawb Huv nplua mias rau Lwm Haiv Neeg los ntawm kuv, uas yog txoj koob hmoov uas yuav ua rau Lwm Haiv Neeg muaj zog tshaj txhua tus, rau txoj kev muab kuv cov neeg ua kom tawg khiav ri niab, auj tsev neeg Ixayees.

28 Thiab lawv yuav ua ib txoj kev nplawm cov neeg ntawm thaj av no. Txawm li ntawd los, thaum lawv yuav tau txais qhov txhij txhua ntawm kuv txoj moo zoo, tom qab ntawd yog lawv yuav ua lawv lub siab tawv tawm tsam kuv, kuv yuav rov qab muab lawv tej kev ua phem los tso rau saum lawv taub hau, Leej Txiv hais li.

29 Thiab kuv yuav nco qab ntsoov txoj kev khi lus uas kuv tau khi nrog kuv cov neeg; thiab kuv tau khi lus nrog lawv tias kuv yuav sau lawv los ua ke thaum txog lub sij hawm uas kuv pom zoo, hais tias kuv yuav rov qab muab lawv cov yawg koob thaj av rau lawv ua lawv qub txeeg qub teg, uas yog thaj av Yeluxalees, uas yog thaj av uas cog lus cia rau lawv mus ib txhis, Leej Txiv hais li.

30 Thiab yuav muaj tias lub sij hawm yuav los, thaum yuav tshaj tawm qhov txhij txhua ntawm kuv txoj moo zoo rau lawv;

31 Thiab lawv yuav ntseeg kuv, ntseeg hais tias kuv yog Yexus Khetos, Vajtswv Leej Tub, thiab yuav thov Leej Txiv los ntawm kuv lub npe.

32 Thaum ntawd lawv tej neeg zov nyas yuav tsa lawv lub suab, thiab lawv yuav hu nkauj nrog lub suab ua ke; vim lawv yuav pom tim ntsej tim muag.

33 Thaum ntawd Leej Txiv yuav sau lawv los ua ke dua, thiab muab Yeluxalees rau lawv ua lawv thaj av qub txeeg qub teg.

34 Thaum ntawd lawv yuav tsa suab nrog txoj kev xyiv fab—Cia li hu nkauj ua ke, nej tej chaw puas tsuaj ntawm Yeluxalees; vim tus Tswv tau nplij nws cov neeg, nws tau txhiv Yeluxalees dim.

35 Leej Txiv tau thws nws txhais npab dawb huv rau txhua haiv neeg lub qhov muag pom, thiab cov neeg tag nrho thoob ntiaj teb yuav pom Leej Txiv txoj kev cawm seej; thiab Leej Txiv thiab kuv wb yog ib tug.

36 Thiab thaum ntawd yuav muaj raws li tej uas tau sau cia lawm tias: Cia li tsim, cia li tsim dheev, cia li muab nej lub zog los coj, auj Xi-oos es; cia li muab koj tej tsoos tsho uas zoo nkauj coj los hnav, auj Yeluxalees, lub nroog uas dawb huv es; vim txij li no mus yuav tsis muaj leej twg los tau rau hauv koj ntxiv lawm yog tias lawv tsis huv thiab tsis tau ua kev cai txiav.

37 Cia li nchos koj tus kheej ntawm tej hmoov av; cia li sawv, thiab zaum, auj Yeluxalees; daws tej hlua khi ntawm koj caj dab, auj Xi-oos tus ntxhais uas raug txhom es.

38 Vim tus Tswv hais li no tias: Nej tau muab nej tus kheej muag yam tsis muaj nuj nqis, thiab yuav tsis siv nyiaj los txhiv nej dim.

39 Kuv hais tseeb tseeb rau nej tias, kuv cov neeg yeej paub kuv lub npe; muaj tseeb tiag, hnub ntawd lawv yuav paub tias kuv yog tus uas hais lus.

40 Thiab thaum ntawd lawv yuav hais tias: Tus uas txhais ko taw zoo nkauj kawg nyob rau saum tej roob yog tus uas coj tej moo zoo los; uas tshaj tawm kev thaj yeeb, uas coj tej moo zoo ntawm tej yam zoo los; uas tshaj tawm kev cawm seej; uas hais rau Xi-oos hais tias, Nej tus Vajtswv kav!

41 Thiab thaum ntawd ib lub suab qw yuav tawm mus hais tias: Nej cia li tawm mus, nej cia li tawm mus, nej cia li tawm ntawm qhov ntawd mus, tsis txhob kov tej uas tsis huv; nej cia li tawm ntawm nws mus; nej cov uas nqa tus Tswv tej cuab yeej yuav tsum huv.

42 Vim nej yuav tsis tawm nrawm nroos mus thiab mus los ntawm kev tsiv; vim tus Tswv yuav mus ua nej ntej, thiab Ixayees tus Vajtswv yuav ua tus kav nej qab.

43 Saib seb, kuv tus tub qhe yuav ua yam txawj ntse; cov neeg yuav muab nws txhawb mus siab thiab qhuas nws thiab tsa nws siab heev.

44 Yam li ntau tus tau xav tsis thoob rau koj—nws lub ntsej muag tau ntswj mob heev, ntau tshaj li lwm tus neeg, thiab nws lub cev ntswj mob dua li neeg cov tub—

45 Tib yam li ntawd nws yuav tsuag ntshav rau ntau haiv neeg; cov vaj ntxwv yuav qos lawv lub qhov ncauj rau nws, vim lawv yuav pom tej uas tsis tau qhia rau lawv; thiab lawv yuav to taub tej uas lawv tsis tau hnov.

46 Kuv hais tseeb tseeb rau nej tias, txhua yam no yeej yuav los tiag tiag, ib yam li Leej Txiv tau txib kuv. Thaum ntawd yuav muaj raws li txoj kev khi lus no uas Leej Txiv khi nrog nws cov neeg; thiab thaum ntawd kuv cov neeg yuav rov tau mus nyob hauv Yeluxalees, thiab Yeluxalees yuav yog thaj av ntawm lawv qub txeeg qub teg.