1 Nim no tau muaj tias xyoo cuaj caum ib tau dhau mus thiab twb yog rau pua xyoo txij thaum lub sij hawm uas Lihais ncaim Yeluxalees; thiab twb yog xyoo uas Lakhoonias yog tus thawj txiav txim thiab tus tswv xeev kav thaj av.

2 Thiab Nifais, uas yog Hilamas tus tub, tau tawm ntawm thaj av Xalahelas mus, thiab tso hauj lwm rau nws tus tub Nifais, tus uas yog nws tus tub hlob, ceev cov phiaj toog, thiab tag nrho tej ceev xwm txheej uas tau ceev tseg cia, thiab tag nrho tej uas tau ceev kom dawb ceev txij thaum Lihais tau ncaim Yeluxalees.

3 Ces nws ncaim ntawm thaj av, thiab xyov nws mus qhov twg lawm, twb tsis muaj neeg paub; thiab nws tus tub Nifais tau pauv nws qhov chaw ceev tej ceev xwm txheej, muaj tseeb tiag, uas yog phau ceev xwm txheej hais txog cov neeg no.

4 Thiab tau muaj tias nyob rau thaum pib ntawm xyoo cuaj caum ob, saib seb, pib muaj raws li cov yaj saub tej kev qhia tej yuav muaj los yav tom ntej; vim pib muaj tej cim uas loj dua thiab tej txuj ci tseem ceeb dua nyob hauv cov neeg.

5 Tiam sis muaj ib txhia pib hais tias lub sij hawm uas yuav muaj raws li tej lus, uas Xamuyees, uas yog tus neeg Lamas, tau hais tseg, twb dhau lawm.

6 Thiab lawv pib zoo siab rau lawv cov kwv tij, hais tias: Saib seb lub sij hawm twb dhau lawm, thiab twb tsis muaj raws li Xamuyees tej lus; yog li ntawd, nej txoj kev xyiv fab thiab nej txoj kev ntseeg ntsig txog qhov no twb tsis muaj nuj nqis.

7 Thiab tau muaj tias lawv ua kev xeeb txob loj heev thoob plaws rau hauv thaj av; thiab cov uas ntseeg pib tu siab heev, tsam ho muaj tej yam ua rau tej uas tau hais lawm tsis muaj los.

8 Tiam sis saib seb, lawv saib ntsoov khov kho rau hnub ntawd thiab hmo ntawd thiab hnub ntawd uas yuav zoo li ib hnub uas tsis muaj hmo ntuj, xwv kom lawv yuav paub tias lawv txoj kev ntseeg yeej muaj nuj nqis.

9 Nim no tau muaj tias cov uas tsis ntseeg tau teem tseg ib hnub, yog tias lub cim ntawd, uas tus yaj saub Xamuyees hais tseg, tsis muaj los, ces lawv yuav muab tag nrho cov uas ntseeg tej kab lis kev cai ntawd tua.

10 Nim no tau muaj tias thaum Nifais, uas yog Nifais tus tub, pom txoj kev phem ntawm nws cov neeg no, nws tu siab heev kawg nkaus li.

11 Thiab tau muaj tias nws tawm mus thiab khoov rau hauv pem teb, thiab sib zog thov nws tus Vajtswv pab nws cov neeg, muaj tseeb tiag, pab lawv cov uas twb yuav raug puas tsuaj vim yog lawv ntseeg lawv cov yawg koob txoj kab lis kev cai.

12 Thiab tau muaj tias nws sib zog thov tus Tswv tag nrho hnub ntawd; thiab saib seb, tus Tswv lub suab los hais rau nws, hais tias:

13 Cia li tsa koj lub taub hau thiab cia li zoo siab; vim saib seb, twb yuav txog lub sij hawm lawm, thiab nyob rau hmo no yuav muab lub cim ua tshwm sim, thiab nyob rau tag kis kuv yuav los rau hauv lub ntiaj teb, kom ua rau neeg ntiaj teb pom tias kuv yeej yuav ua kom muaj raws li tag nrho tej uas kuv tau txib kom kuv cov yaj saub uas dawb huv lub qhov ncauj hais.

14 Saib seb, kuv los rau hauv kuv cov neeg kiag, los ua kom muaj raws li tag nrho tej uas kuv ua rau noob neej paub txij thaum ntuj tsim teb raug los, thiab los ua raws li lub siab nyiam, ntawm Leej Txiv thiab ntawm Leej Tub nkawd ob leeg—ntawm Leej Txiv vim yog kuv, thiab ntawm Leej Tub vim yog kuv cev nqaij daim tawv. Thiab saib seb, twb yuav txog lub sij hawm lawm, thiab hmo no yuav muab lub cim ua tshwm sim los.

15 Thiab tau muaj tias tau muaj raws li tej lus uas tau los rau Nifais, raws li tus Tswv tau hais; vim saib seb, thaum lub hnub poob twb tsis muaj kev tsaus ntuj; thiab cov neeg pib xav tsis thoob vim yog tsis muaj kev tsaus ntuj thaum hmo ntuj.

16 Thiab muaj coob leej, cov uas tsis ntseeg cov yaj saub tej lus, lawv vau rau hauv av thiab ua zoo li lawv twb tuag lawm, vim lawv paub tias txoj hau kev ntawm txoj kev puas tsuaj loj heev uas lawv tau npaj rau cov uas ntseeg cov yaj saub tej lus raug muab rhuav; vim lub cim uas Xamuyees tau muab tseg twb txog lawm.

17 Thiab lawv pib paub tias Vajtswv Leej Tub yeej yuav los sai sai; muaj tseeb tiag, lub ntsiab yog li no, tag nrho cov neeg uas nyob thoob plaws rau hauv lub ntiaj teb ntawm sab hnub poob mus rau sab hnub tuaj, tsis hais nyob hauv thaj av sab qaum teb thiab nyob hauv thaj av sab qab teb, lawv xav tsis thoob heev ua rau lawv cia li vau rau hauv av.

18 Vim lawv paub tias cov yaj saub twb tau ua tim khawv txog tej no tau ntau xyoo, thiab paub tias lub cim uas Xamuyees muab tseg twb txog lawm; thiab lawv pib ntshai vim yog lawv txoj kev ua phem thiab lawv txoj kev tsis ntseeg.

19 Thiab tau muaj tias tag nrho hmo ntawd twb tsis muaj kev tsaus ntuj li, tiam sis kaj cuag li yog thaum tav su. Thiab tau muaj tias thaum sawv ntxov lub hnub rov qab tawm tuaj, raws li ib txwm tuaj; thiab lawv paub tias yog hnub uas tus Tswv yuav los yug, vim yog lub cim uas Xamuyees tau muab tseg.

20 Thiab tau muaj li ntawd, muaj tseeb tiag, txhua yam, txhua lo lus, raws li cov yaj saub tej lus.

21 Thiab tau muaj tias muaj ib lub hnub qub tshiab tshwm tuaj, raws li txoj lus.

22 Thiab tau muaj tias txij li lub sij hawm no mus Dab Ntxwg Nyoog pib xa tej kev dag mus rau hauv cov neeg, ua kom lawv lub siab tawv, vim xav kom lawv tsis txhob ntseeg tej cim thiab tej txuj ci uas xav tsis thoob ntawd uas lawv tau pom; tiam sis txawm tias muaj tej kev dag thiab tej kev ntxias no los feem coob ntawm cov neeg kuj ntseeg, thiab hloov siab los ntseeg tus Tswv.

23 Thiab tau muaj tias Nifais, thiab lwm tus neeg coob leej, tau mus rau hauv cov neeg, muab cov neeg ua kev cai raus dej rau txoj kev hloov siab lees txim, uas ua rau lawv muaj kev zam txim rau tej kev txhaum ntau heev. Thiab li no cov neeg rov pib muaj kev thaj yeeb dua nyob hauv thaj av.

24 Thiab twb tsis muaj kev sib cav sib ceg, tsuas yog ob peb leeg uas pib qhuab qhia, rau siab ntso siv vaj lug kub los qhia tias tsis tas yuav coj Mauxes txoj kev cai ntxiv lawm. Nim no lawv yuam kev txog qhov no, vim lawv tsis to taub cov vaj lug kub.

25 Tiam sis tau muaj tias tsis ntev lawv hloov siab los ntseeg, thiab ua rau lawv pom qhov yuam kev uas lawv tau ua, vim tau ua rau lawv paub tias tseem tsis tau muaj raws li txoj kev cai tiav lawm, thiab yeej yuav ua kom muaj raws li txhua lo ntawm txoj kev cai tiav; muaj tseeb tiag, txoj lus los rau lawv hais tias yeej yuav ua kom muaj raws li txoj kev cai tiav; muaj tseeb tiag; hais tias ib ib nyuag qhov los sis ib qho me xwb los yuav tsis poob mus kom txog thaum muaj raws li txhua yam; yog li ntawd nyob hauv tib xyoos no tus Tswv coj lawv los paub txog lawv txoj kev tsis yog thiab lawv lees lawv tej kev txhaum.

26 Thiab xyoo cuaj caum ob tau dhau mus li no, coj tau tej moo zoo siab los rau cov neeg vim yog tej cim uas tau muaj los, raws li tag nrho cov yaj saub uas dawb huv tej lus ntawm txoj kev qhia tej yuav muaj los yav tom ntej.

27 Thiab tau muaj tias xyoo cuaj caum peb kuj tau dhau mus nrog kev thaj yeeb, tsuas yog tshuav cov tub sab Nkadi-atoos xwb, cov uas nyob pem roob, uas nyob coob heev hauv thaj av; vim lawv tej chaw tiv thaiv thiab lawv tej chaw uas tsis muaj neeg paub tau muaj zog heev ua rau cov neeg tsis muaj peev xwm kov yeej lawv; yog li ntawd lawv tua neeg coob leej, thiab txov ntau txoj sia nyob hauv cov neeg.

28 Thiab tau muaj tias nyob hauv xyoo cuaj caum plaub lawv pib huaj vam coob heev tuaj, vim yog muaj cov Neeg Nifais ntxeev siab coob leej uas tau khiav mus rau lawv, uas ua rau cov Neeg Nifais uas tseem nyob hauv thaj av tu siab heev.

29 Thiab kuj muaj kev tu siab heev nyob hauv cov Neeg Lamas; vim saib seb, lawv muaj me nyuam coob leej uas tau loj hlob thiab pib muaj hnub nyoog, uas lawv pib xaiv rau lawv tus kheej, thiab raug ib txhia uas yog Neeg Xaulas yaum coj mus, los ntawm lawv tej kev dag thiab lawv tej lus ntxias, kom mus koom nrog cov tub sab Nkadi-atoos ntawd.

30 Thiab cov Neeg Lamas los kuj raug txom nyem tib yam zoo li no, thiab lawv txoj kev ntseeg thiab kev ncaj ncees pib tsawg zuj zus, vim yog txoj kev phem ntawm tiam neeg uas tab tom loj hlob.