1 Kuv hais tseeb tseeb tias, kuv xav kom nej pub rau cov neeg pluag; tiam sis ceev faj kom nej tsis txhob pub rau neeg ntsia kom lawv pom tau; yog nej ua li ntawd nej yuav tsis tau nqi zog ntawm nej Leej Txiv tus uas nyob saum ntuj ceeb tsheej.

2 Yog li ntawd, thaum nej yuav pub rau lwm tus tsis txhob tshuab raj hlau nrov nrov ua ntej, ib yam li cov neeg siab dag yuav ua nyob hauv tej tsev sab laj thiab nyob tom tej kev, xwv kom neeg qhuas lawv. Kuv hais tseeb rau nej tias, lawv twb tau lawv nqi zog lawm.

3 Tiam sis thaum nej pub rau lwm tus tsis txhob cia nej sab tes laug paub yam uas nej sab tes xis ua;

4 Xwv kom nej txoj kev pub rau lwm tus yuav ua twj ywm; thiab nej Leej Txiv tus uas pom tej uas ua twj ywm, nws tus kheej yuav qhib lug muab nqi zog rau nej.

5 Thiab thaum nej thov Vajtswv nej tsis txhob ua li cov neeg siab dag ua, vim lawv nyiam thov Vajtswv sawv ntsug hauv tej tsev sab laj thiab nyob tom tej ces kaum kev, xwv kom yuav muaj neeg pom lawv. Kuv hais tseeb rau nej tias, lawv twb tau lawv nqi zog lawm.

6 Tiam sis nej, thaum nej thov Vajtswv, cia li nkag mus rau hauv nej chav tsev teev tiam, thiab thaum nej kaw nej lub qhov rooj lawm, mam li thov nej Leej Txiv tus uas nej qhov muag tsis pom; thiab nej Leej Txiv, tus uas pom tej uas ua twj ywm, yuav qhib lug muab nqi zog rau nej.

7 Tiam sis thaum nej thov Vajtswv, tsis txhob hais mus hais los qhov qub yam tsis muaj nuj nqis, ib yam li cov neeg tsis hwm Vajtswv hais, vim lawv xav tias lawv tej vaj tswv yuav hnov vim yog lawv hais lus ntau.

8 Yog li ntawd nej tsis txhob ua zoo li lawv, vim nej Leej Txiv twb paub yam uas nej xav tau ua ntej nej thov nws.

9 Yog li no nej cia li thov Vajtswv zoo li no: Peb Leej Txiv tus uas nyob saum ntuj ceeb tsheej, thov kom sawv daws hwm koj lub npe.

10 Thov kom muaj raws li koj lub siab xav nyob hauv ntiaj teb ib yam li nyob saum ntuj ceeb tsheej.

11 Thiab thov zam txim rau peb tej nuj nqis, ib yam li peb zam txim rau cov uas tshuav peb nqi.

12 Thiab coj peb mus kom tsis txhob raug kev haub ntxias, tiam sis pab kom peb dim ntawm kev phem.

13 Vim lub nceeg vaj, thiab lub hwj chim, thiab lub yeeb koob, yog koj li mus ib txhis. Amees.

14 Yog tias nej zam txim rau neeg tej kev txhaum ces nej Leej Txiv tus uas nyob saum ntuj ceeb tsheej kuj yuav zam txim rau nej thiab;

15 Tiam sis yog nej tsis zam txim rau neeg tej kev txhaum ces nej Leej Txiv los kuj yuav tsis zam txim rau nej thiab.

16 Tsis tas li ntawd, thaum nej yoo mov tsis txhob ua li cov neeg siab dag, es ua ntsej muag mluas mlob, vim lawv ua lawv lub ntsej muag mluas mlob xwv kom neeg yuav pom tias lawv yoo mov. Kuv hais tseeb rau nej tias, lawv twb tau lawv nqi zog lawm.

17 Tiam sis nej, thaum nej yoo mov, pleev roj rau nej lub taub hau, thiab ntxuav nej lub ntsej muag;

18 Xwv kom neeg txhob pom tias nej yoo mov, tiam sis ua rau nej Leej Txiv, tus uas nej qhov muag tsis pom; thiab nej Leej Txiv, tus uas pom tej uas ua twj ywm, yuav qhib lug muab nqi zog rau nej.

19 Tsis txhob khaws tej uas muaj nqis cia rau nej tus kheej nyob hauv ntiaj teb no, uas muaj npauj thiab xeb noj, thiab muaj tub sab tsoo tau los thiab muab nyiag;

20 Tiam sis khaws tej uas muaj nqis cia rau nej tus kheej nyob saum ntuj ceeb tsheej, uas tsis muaj npauj thiab xeb noj, thiab tub sab tsoo tsis tau los thiab tsis muab nyiag.

21 Vim tej uas muaj nqis rau nej nyob qhov twg, nej lub siab yuav nyob qhov ntawd.

22 Qhov kaj ntawm lub cev yog lub qhov muag; yog li ntawd, yog nej lub qhov muag ntsia ntsoov rau Vajtswv xwb, tag nrho nej lub cev yuav muaj qhov kaj puv npo.

23 Tiam sis yog nej lub qhov muag phem, tag nrho nej lub cev yuav muaj kev tsaus ntuj puv npo. Yog li ntawd, yog tias qhov kaj uas nyob hauv nej yog kev tsaus ntuj, qhov tsaus ntuj ntawd yuav tsaus ntom nti!

24 Tsis muaj ib tug neeg yuav ua tau hauj lwm rau ob tug tswv; vim nws yuav ntxub tus no thiab nyiam tus tod, los sis nws yuav npuab tus no thiab tsis quav ntsej tus tod. Nej yeej ua tsis tau hauj lwm rau Vajtswv thiab rau Nyiaj Txiag.

25 Thiab nim no tau muaj tias thaum Yexus hais cov lus no tas nws ntsia kaum ob tug uas nws tau xaiv, thiab hais rau lawv tias: Nco ntsoov tej lus uas kuv tau hais. Vim saib seb, nej yog cov uas kuv tau xaiv los txhawb pab cov neeg no. Yog li ntawd kuv hais rau nej tias, tsis txhob txhawj txog nej lub neej, hais tias nej yuav noj dab tsi, los sis nej yuav haus dab tsi; los sis rau nej lub cev, nej yuav hnav dab tsi. Puas yog txoj sia muaj nuj nqis dua nqaij thiab lub cev muaj nuj nqis dua tej khaub ncaws hnav?

26 Saib cov noog saum nruab ntug, lawv twb tsis cog qoob loo, thiab lawv twb tsis hlais los sis sau los rau hauv txhab; tiam sis nej Leej Txiv tus uas nyob saum ntuj ceeb tsheej twb pub lawv noj. Nej tsis muaj nqis dua lawv los?

27 Nej leej twg yog xav txog xwb yuav muaj peev xwm ntxiv tau ib tshim kom nws siab tuaj?

28 Thiab vim li cas nej pheej xav txog khaub ncaws? Xav txog tej paj deg tom tej liaj saib lawv loj hlob li cas; lawv twb tsis ua hauj lwm, thiab lawv twb tsis ntos ntaub ntos xov;

29 Thiab tsis tas li no kuv hais rau nej tias, txawm yog Xaulaumoos, muaj nws lub yeeb koob, los twb tsis tau hnav zoo nkauj npaum li ib lub paj no.

30 Yog li ntawd, yog Vajtswv twb ua rau tej nyom tom tej liaj zoo nkauj li ntawd, uas hnub no muaj nyob, thiab tag kis raug muab pov rau hauv qhov cub, tib yam li ntawd nws yuav nrhiav ris tsho rau nej hnav, yog nej txoj kev ntseeg tsis yog tsawg xwb.

31 Yog li ntawd tsis txhob txhawj, hais tias, Peb yuav noj dab tsi? los sis, Peb yuav haus dab tsi? los sis, Peb yuav hnav dab tsi?

32 Vim nej Leej Txiv tus uas nyob saum ntuj ceeb tsheej yeej paub tias nej yuav tsum muaj txhua yam no.

33 Tiam sis nej cia li xub nrhiav Vajtswv lub nceeg vaj thiab nws txoj kev ncaj ncees tso, thiab yuav muab tag nrho tej no ntxiv rau nej.

34 Yog li ntawd tsis txhob txhawj txog tag kis, rau qhov tag kis yeej muaj kev txhawj txaus rau tag kis lawm. Ib hnub twg yeej muaj kev phem txaus rau hnub ntawd.