1 Thiab nim no saib seb, twb tsis muaj leej twg nyob hauv tag nrho cov Neeg Nifais uas tsis ntseeg tej lus uas cov yaj saub dawb huv tau hais; vim lawv paub tias yeej yuav muaj raws li cov yaj saub hais.

2 Thiab lawv paub tias yeej tsim nyog uas Khetos twb los lawm, vim yog tej cim ntau uas tus Tswv tau muab raws li cov yaj saub tej lus; thiab vim yog tej uas twb tau muaj los lawm lawv paub tias yuav tsum muaj txhua yam raws li tej uas tau hais.

3 Yog li ntawd lawv thiaj tso tseg tag nrho lawv tej kev txhaum, thiab lawv tej kev qias, thiab lawv tej kev sib daj sib deev, thiab rau siab ntso ua hauj lwm rau Vajtswv nruab hnub thiab hmo ntuj.

4 Thiab nim no tau muaj tias thaum lawv txhom tau tag nrho cov tub sab ntawd los ua neeg raug txim, ua rau cov uas tsis raug tua los tsis muaj ib tug dim li, lawv muab lawv cov neeg raug txim tso rau hauv lub tsev kaw, thiab hais kom tshaj tawm Vajtswv txoj lus rau lawv; thiab tag nrho cov uas kam hloov siab lees txim rau lawv tej kev txhaum thiab ua kev khi lus tias lawv yuav tsis tua neeg ntxiv lawm raug muab tso.

5 Tiam sis tag nrho cov uas tsis ua kev khi lus, thiab cov uas tseem pheej muaj tej kev tua neeg ntsiag to nyob hauv lawv lub siab, muaj tseeb tiag, tag nrho cov uas pom tias tseem hawv tawm tsam lawv cov kwv tij raug nyob txim thiab rau txim raws li kev cai.

6 Thiab li no lawv tau xaus tag nrho cov neeg tuav hauv uas phem, thiab ntsig to, thiab txaus ntxub, uas yog los ntawm tej ntawd muaj kev phem ntau, thiab kev tua neeg coob heev.

7 Thiab li no xyoo nees nkaum ob tau dhau mus, thiab xyoo nees nkaum peb los tib yam, thiab xyoo nees nkaum plaub, thiab xyoo nees nkaum tsib; thiab yog li ntawd nees nkaum tsib xyoos tau dhau mus.

8 Thiab tau muaj ntau yam tshwm sim los, uas raws li ib txhia xav, yog tej yam tseem ceeb thiab zoo kawg nkaus; txawm li ntawd los, tsis muaj peev xwm muab tag nrho tej ntawd sau rau hauv phau ntawv no; muaj tseeb tiag, phau ntawv no ntim tsis tau tas ib feem pua ntawm tej uas tau ua nyob hauv cov neeg coob heev nyob hauv lub sij hawm ntawm nees nkaum tsib xyoos.

9 Tiam sis saib seb yeej muaj cov ceev xwm txheej uas ntim tag nrho tej uas cov neeg no tau ua; thiab Nifais tau muab ib zaj uas luv tiam sis yeej tseeb coj los hais qhia.

10 Yog li no kuv tau sau kuv phau ceev xwm txheej txog tej no raws li Nifais phau ceev xwm txheej, uas yog muab sau rau saum cov phiaj uas muab hu ua Nifais cov phiaj.

11 Thiab saib seb, kuv sau phau ceev xwm txheej rau saum cov phiaj uas kuv tau xuas kuv ob txhais tes ua kiag.

12 Thiab saib seb, kuv hu ua Maumoos, vim tau muab kuv tis npe raws li thaj av Maumoos, thaj av uas Amas tau txhim tsa lub koom txoos nyob hauv cov neeg, muaj tseeb tiag, thawj lub koom txoos uas tau txhim tsa nyob hauv lawv tom qab lawv txoj kev ua txhaum.

13 Saib seb, kuv yog ib tug thwj tim ntawm Yexus Khetos, uas yog Vajtswv Leej Tub. Nws tau hu kuv mus tshaj tawm nws txoj lus rau nws cov neeg, xwv kom lawv yuav muaj txoj sia uas kav ib txhis.

14 Thiab raws li Vajtswv lub siab nyiam, xwv kom tej kev thov Vajtswv ntawm cov uas tau dhau mus lawm, cov uas yog neeg dawb huv, kom muaj raws li lawv txoj kev ntseeg, twb tsim nyog tias kuv yuav tsum sau ib phau ceev xwm txheej txog tej yam no uas cov neeg tau ua—

15 Muaj tseeb tiag, ib phau ceev xwm txheej me me uas sau txog tej uas tau muaj los txij thaum Lihais ncaim Yeluxalees, los txog rau lub sij hawm no.

16 Yog li ntawd kuv sau kuv phau ceev xwm txheej los ntawm tej zaj uas yog cov nyob ua ntej kuv muab los, los txog rau thaum pib ntawm kuv lub caij nyoog.

17 Thiab tom qab ntawd kuv thiaj sau ib phau ceev xwm txheej txog tej yam uas kuv tau pom nrog kuv qhov muag kiag.

18 Thiab kuv paub tias phau ceev xwm txheej uas kuv sau yeej yog ib phau ceev xwm txheej uas ncaj thiab tseeb; txawm li ntawd los muaj ntau yam uas, raws li peb yam lus hais, peb tsis muaj peev xwm sau tau.

19 Thiab nim no kuv xaus kuv cov lus hais, uas yog los ntawm kuv tus kheej, thiab yuav qhia txog tej uas tau muaj ua ntej kuv.

20 Kuv yog Maumoos, thiab yog ib tug uas tseem xeeb ntxwv ntawm Lihais. Twb tsim nyog rau kuv qhuas kuv tus Vajtswv thiab kuv tus Cawm Seej Yexus Khetos, hais tias nws tau coj peb cov yawg koob tawm ntawm thaj av Yeluxalees, (thiab twb tsis muaj leej twg paub tsuas yog nws tus kheej thiab cov uas nws tau coj tawm ntawm thaj av xwb) thiab hais tias nws tau muab txoj kev paub ntau heev txog txoj kev cawm seej ntawm peb tus ntsuj plig rau kuv thiab kuv cov neeg.

21 Tseeb tiag nws twb foom koob hmoov rau tsev neeg Yakhauj, thiab muaj siab hlub tshua rau Yauxej cov tub ki.

22 Thiab npaum li uas Lihais cov me nyuam ua raws li nws tej lus txib nws twb foom koob hmoov rau lawv thiab ua rau lawv vam meej raws li nws txoj lus.

23 Muaj tseeb tiag, thiab tseeb tiag nws yuav rov qab coj cov uas seem tshuav ntawm Yauxej cov tub ki los paub txog tus Tswv lawv tus Vajtswv dua.

24 Thiab tseeb npaum li tus Tswv muaj txoj sia nyob, nws yuav sau tag nrho cov uas seem tshuav ntawm Yakhauj cov tub ki tawm ntawm plaub ceg kaum ntuj los ua ke, cov uas tawg khiav ri niab mus nyob rau txhua qhov chaw hauv lub ntiaj teb.

25 Thiab ib yam li nws tau khi lus nrog tag nrho tsev neeg Yakhauj, ib yam li ntawd yuav muaj raws li kev khi lus uas nws tau khi tseg nrog tsev neeg Yakhauj thaum txog lub sij hawm uas nws pom zoo, kom txum tim tag nrho tsev neeg Yakhauj rov qab los paub txog txoj kev khi lus uas nws tau khi nrog lawv.

26 Thiab thaum ntawd lawv yuav paub lawv tus Txhiv Dim, tus uas yog Yexus Khetos, Vajtswv Leej Tub; thiab thaum ntawd tus Tswv yuav muab lawv sau tawm ntawm plaub ceg kaum ntuj los rau lawv tej av, tawm ntawm tej av uas lawv tau tawg khiav ri niab mus nyob; muaj tseeb tiag, ib yam li tus Tswv muaj txoj sia nyob ces twb yuav muaj li ntawd. Amees.