1 Thiab nim no tau muaj tias thaum Yexus tau xaus cov lus hais no tas nws tsa nws qhov muag ntsia ib puag ncig ntawm cov neeg coob coob, thiab hais rau lawv tias: Saib seb, nej tau hnov tej yam uas kuv tau qhia ua ntej kuv nce mus cuag kuv Txiv; yog li ntawd, tus uas nco qab kuv tej lus hais no thiab ua raws li tej lus ntawd, kuv yuav tsa tus ntawd sawv thaum txog hnub kawg.

2 Thiab tau muaj tias thaum Yexus tau hais cov lus no tas nws paub tias muaj ib txhia neeg nyob hauv lawv uas xav tsis thoob, thiab xav seb nws yuav hais li cas ntsig txog Mauxes txoj kev cai; vim lawv tsis to taub qhov uas hais tias tej yam qub twb dhau mus, thiab hais tias txhua yam twb hloov los ua tshiab.

3 Thiab nws hais rau lawv tias: Txhob xav tsis thoob uas kuv hais rau nej tias tej yam qub twb dhau mus, thiab hais tias txhua yam twb hloov los ua tshiab.

4 Saib seb, kuv hais rau nej tias twb muaj raws li txoj kev cai uas tau muab rau Mauxes tiav lawm.

5 Saib seb, kuv twb yog tus uas muab txoj kev cai, thiab kuv twb yog tus uas khi lus nrog kuv cov neeg Ixayees; yog li ntawd, kuv twb ua kom muaj raws li txoj kev cai tiav lawm, vim kuv twb yog los ua kom muaj raws li txoj kev cai tiav; yog li ntawd txoj kev cai thiaj muaj qhov xaus.

6 Saib seb, tsis yog kuv rhuav cov yaj saub tej lus, vim tag nrho tej uas kuv tseem tsis tau ua kom muaj los, kuv hais tseeb rau nej tias, yeej yuav ua kom muaj raws li txhua yam tiav.

7 Thiab vim kuv tau hais rau nej tias tej yam qub twb dhau mus, tsis yog kuv rhuav tej uas tau hais txog tej yam uas tseem yuav muaj los.

8 Vim saib seb, twb tsis tau ua kom muaj raws li tag nrho tej kev khi lus uas kuv tau khi nrog kuv cov neeg; tiam sis txoj kev cai uas tau muab rau Mauxes twb los xaus los ntawm kuv.

9 Saib seb, kuv yog txoj kev cai, thiab txoj kev kaj. Ntsia ntsoov kuv, thiab nyiaj mus kom txog thaum kawg, thiab nej yuav muaj txoj sia; vim kuv yuav muab txoj sia nyob mus ib txhis rau tus uas nyiaj mus kom txog thaum kawg.

10 Saib seb, kuv tau muab tej lus txib rau nej; yog li ntawd ua raws li kuv tej lus txib. Thiab txoj kev cai thiab cov yaj saub tej lus twb qhia li no, vim tej no yeej ua tim khawv tseeb txog kuv.

11 Thiab nim no tau muaj tias thaum Yexus hais cov lus no tas, nws hais rau kaum ob leeg uas nws tau xaiv tias:

12 Nej yog kuv cov thwj tim; thiab nej yog ib lub teeb rau cov neeg no, cov uas yog ib co seem tshuav ntawm tsev neeg Yauxej.

13 Thiab saib seb, nov yog thaj av ntawm nej qub txeeg qub teg; thiab Leej Txiv tau muab thaj av no rau nej.

14 Thiab twb tsis tau muaj ib zaug uas Leej Txiv tau txib kom kuv qhia txog thaj av no rau nej cov kwv tij uas nyob hauv Yeluxalees.

15 Thiab twb tsis tau muaj ib zaug uas Leej Txiv tau txib kom kuv qhia rau lawv ntsig txog lwm xeem neeg ntawm tsev neeg Ixayees, uas Leej Txiv tau coj khiav tawm ntawm thaj av.

16 Leej Txiv tau txib kom kuv qhia rau lawv npaum li no:

17 Hais tias kuv muaj lwm cov yaj uas tsis yog los ntawm pab no; kuv kuj yuav tsum coj lawv los, thiab lawv yuav mloog kuv lub suab; thiab yuav muaj ib pab, thiab muaj ib tug tswv yug yaj.

18 Thiab nim no, vim yog txoj kev tawv ncauj thiab txoj kev tsis ntseeg lawv thiaj tsis to taub kuv tej lus; yog li ntawd Leej Txiv thiaj txib kom kuv tsis txhob hais dab tsi ntxiv ntsig txog tej yam no rau lawv.

19 Tiam sis, kuv hais tseeb rau nej tias, Leej Txiv tau txib kuv, thiab kuv qhia rau nej tias, nej raug cais tawm ntawm lawv los twb vim yog lawv txoj kev ua phem; yog li ntawd twb vim yog lawv txoj kev ua phem lawv thiaj tsis paub txog nej.

20 Thiab kuv rov hais tseeb rau nej dua hais tias, Leej Txiv tau cais lwm xeem neeg tawm ntawm lawv mus; thiab twb vim yog lawv txoj kev ua phem lawv thiaj tsis paub txog lawv.

21 Thiab kuv hais tseeb rau nej tias, nej yog cov uas kuv tau hais tias: Kuv muaj lwm cov yaj uas tsis yog los ntawm pab no; kuv kuj yuav tsum coj lawv los, thiab lawv yuav mloog kuv lub suab; thiab yuav muaj ib pab, thiab muaj ib tug tswv yug yaj.

22 Thiab lawv twb tsis to taub kuv, vim lawv xav tias yog Lwm Haiv Neeg; vim lawv twb tsis to taub tias Lwm Haiv Neeg yuav hloov siab los ntseeg vim yog los ntawm lawv txoj kev qhuab qhia.

23 Thiab lawv twb tsis to taub kuv thaum kuv hais tias lawv yuav mloog kuv lub suab; thiab lawv twb tsis to taub kuv tias Lwm Haiv Neeg yuav tsis hnov kuv lub suab—tsis to taub tias kuv yuav tsis ua kuv tus kheej tshwm sim rau lawv tsuas yog los ntawm tus Vaj Ntsuj Plig Dawb Huv xwb.

24 Tiam sis saib seb, nej puav leej tau hnov kuv lub suab, thiab pom kuv; thiab nej yog kuv cov yaj, thiab twb muab nej suav nrog cov uas Leej Txiv tau muab rau kuv.