1 Thiab thaum ntawd tej uas tau muab sau cia lawm yuav muaj los: Hu nkauj, auj tus poj niam uas muaj tsis taus me nyuam, koj tus uas tsis yug me nyuam; cia li tsa suab hu nkauj, thiab qw nrov nrov, koj tus uas ib txwm tsis tau mob plab yug me nyuam; vim tus poj niam tshob cov me nyuam coob dua tus poj niam muaj txiv cov me nyuam, tus Tswv hais li.

2 Cia li ua kom qhov chaw ntawm koj lub tsev pheeb suab ntaub dav tuaj, thiab cia lawv nthuav cov ntaub kom puv koj chaw nyob; txhob tseg, txuas koj tej hlua kom ntev thiab txhos koj tej tswg kom khov;

3 Vim koj yuav tawg plho nyob rau sab xis thiab sab laug, thiab koj cov tub ki yuav los tau tej uas yog Lwm Haiv Neeg tug ua qub txeeg qub teg thiab ua rau tej nroog uas tsis muaj neeg nyob muaj neeg nyob tuaj.

4 Tsis txhob ntshai, vim koj yuav tsis poob ntsej muag; thiab koj yuav tsis raug ua kom puas tsuaj, vim yuav tsis ua kom koj poob ntsej muag; vim koj yuav hnov qab tej kev poob ntsej muag thaum koj tseem hluas, thiab yuav tsis nco qab txog tej kev poob ntsej muag thaum koj tseem hluas, thiab yuav tsis nco txog txoj kev poob ntsej muag thaum koj tseem ua poj ntsuam nyob ntxiv lawm.

5 Vim tus uas tsim koj, koj tus txiv, Ib Tsoom Tub Rog tus Tswv yog nws lub npe; thiab koj tus Txhiv Dim, Ixayees tus Dawb Huv—neeg yuav muab nws hu ua tus Vajtswv ntawm tag nrho lub ntiaj teb.

6 Vim tus Tswv tau hu koj ib yam li ib tug poj niam uas raug tso tseg thiab muaj kev nyuaj siab ntawm sab ntsuj plig, thiab ib tug poj niam hluas, thaum koj raug xyeej, koj tus Vajtswv hais li.

7 Kuv tau tso koj tseg ib nyuag pliag xwb, tiam sis nrog txoj kev hlub tshua heev kuv yuav sau koj rov qab.

8 Nrog kev npau taws me ntsis kuv zais kuv lub ntsej muag ntawm koj ib nyuag pliag, tiam sis nrog txoj kev hlub uas kav ib txhis kuv yuav muaj kev hlub tshua rau koj, tus Tswv koj tus Txhiv Dim hais li.

9 Vim qhov no, rau kuv ces zoo ib yam li cov dej thaum Nau-as lub caij, vim ib yam li kuv tau cog lus tias cov dej ntawm Nau-as yuav tsis los nyab lub ntiaj teb ib zaug ntxiv, ib yam li ntawd kuv tau cog lus tias kuv yuav tsis npau taws rau koj.

10 Vim tej roob yuav pob thiab tej pov roob yuav nphau, tiam sis kuv txoj kev hlub yuav tsis ncaim koj mus, thiab yuav tsis tshem txoj kev khi lus ntawm kuv txoj kev kaj siab lug, tus Tswv uas muaj kev hlub tshua rau nej hais li.

11 Auj koj, tus uas raug txom nyem, raug cua ntsawj, thiab tsis raug nplij siab es! Saib seb, kuv yuav xuas cov tsos uas ci zoo nkauj los pua koj tej pob zeb, thiab yuav muab tej pob zeb xiav zoo nkauj los pua koj tej plag tsev.

12 Thiab kuv yuav xuas tej hlaws liab los ua koj tej qhov rais, thiab muab tej qe zeb liab los ua koj tej rooj loog, thiab siv tej pob zeb zoo los ua tag nrho koj tej ntsa loog.

13 Thiab tus Tswv yuav qhia koj cov me nyuam txhua tus; thiab koj cov me nyuam txoj kev kaj siab lug yuav loj heev.

14 Tus Tswv yuav muab koj txhim tsa ntawm kev ncaj ncees; koj yuav nyob deb ntawm kev quab yuam vim koj yuav tsis ntshai, thiab deb ntawm kev ntshai heev vim kev ntshai yuav tsis los ze koj.

15 Saib seb, tej ntawd yuav sib sau ua ke tawm tsam koj tiag, tsis yog los ntawm kuv; txhua tus uas yuav sib sau ua ke tawm tsam koj yeej yuav swb xwv kom pab tau koj.

16 Saib seb, kuv tau tsim tus neeg ntaus hlau tus uas tshuab tej thee hauv qhov cub, thiab tus uas ntaus tau ib rab cuab yeej rau nws txoj hauj lwm; thiab kuv tau tsim tus uas rhuav tshem los ua kom puas tsuaj.

17 Tsis muaj ib rab cuab yeej ua rog twg uas ua los tawm tsam koj es yuav kov yeej; thiab koj yuav tsum rau txim rau txhua tus nplaig uas yuav cem koj kom txiav txim rau koj. Qhov no yog tus Tswv cov tub qhe ntiag tug, thiab lawv txoj kev ncaj ncees yog los ntawm kuv, tus Tswv hais li.