1 Thiab kuv hais tseeb rau nej tias, kuv muab ib lub cim rau nej, xwv kom nej yuav paub lub sij hawm thaum yuav luag muaj tej yam no—hais tias kuv yuav sau kuv cov neeg los ua ke, tawm ntawm lawv txoj kev sib faib uas tau ntev lawm, auj tsev neeg Ixayees, thiab yuav txhim tsa kuv lub Xi-oos dua nyob hauv lawv.

2 Thiab saib seb, qhov no yog qhov uas kuv yuav muab rau nej ua ib lub cim—vim kuv hais tseeb rau nej tias thaum tej yam no uas kuv tshaj tawm rau nej, thiab tej yam uas kuv yuav tshaj tawm rau nej tom qab no, thiab los ntawm tus Vaj Ntsuj Plig Dawb Huv lub hwj chim uas Leej Txiv yuav muab rau nej, Leej Txiv yuav ua kom Lwm Haiv Neeg paub xwv kom lawv paub ntsig txog cov neeg no uas yog ib co seem tshuav ntawm tsev neeg Yakhauj, thiab ntsig txog kuv cov neeg no uas lawv yuav muab ua kom tawg khiav ri niab;

3 Kuv hais tseeb tseeb rau nej tias, thaum Leej Txiv yuav ua tej yam no rau lawv paub, thiab Leej Txiv yuav ua kom tej yam no tawm ntawm lawv los rau nej;

4 Vim twb yog Leej Txiv lub tswv yim kom yuav muab lawv txhim tsa nyob hauv thaj av no, thiab muab lawv tsa ua ib co neeg nyob ywj siab los ntawm Leej Txiv lub hwj chim, xwv kom tej yam no yuav tawm tau ntawm lawv los rau ib co seem tshuav ntawm nej cov tub ki, xwv kom yuav muaj raws li Leej Txiv txoj kev khi lus uas nws khi nrog nws cov neeg, auj tsev neeg Ixayees;

5 Yog li ntawd, thaum tej hauj lwm no thiab tej hauj lwm uas yuav ua kom tiav nyob hauv nej tom qab no mus yuav tawm ntawm Lwm Haiv Neeg los, rau nej cov tub ki uas yuav tso txoj kev ntseeg tseg zuj zus vim yog txoj kev ua phem;

6 Vim li no thiaj li yog Leej Txiv lub siab nyiam kom tej yam no yuav tsum los ntawm Lwm Haiv Neeg los, xwv kom nws yuav ua tau nws lub hwj chim rau Lwm Haiv Neeg pom, vim li no xwv kom Lwm Haiv Neeg, yog tias lawv tsis ua lawv lub siab tawv, es lawv yuav hloov siab lees txim thiab los cuag kuv thiab ua kev cai raus dej los ntawm kuv lub npe thiab paub tej ntsiab cai tseeb ntawm kuv txoj lus qhuab qhia, xwv kom yuav muab lawv suav nrog kuv cov neeg, auj tsev neeg Ixayees;

7 Thiab thaum tej yam no muaj los xwv kom nej cov tub ki yuav pib paub tej yam no—tej yam no yuav yog ib lub cim rau lawv, xwv kom lawv yuav paub tias Leej Txiv txoj hauj lwm twb tau pib muaj raws li txoj kev khi lus uas nws khi rau cov neeg uas yog tsev neeg Ixayees.

8 Thiab thaum hnub ntawd yuav los, yuav muaj tias tej vaj ntxwv yuav qos lawv lub qhov ncauj; vim lawv yuav pom tej uas tsis tau qhia rau lawv; thiab lawv yuav to taub tej uas lawv tsis tau hnov.

9 Vim nyob rau hnub ntawd, Leej Txiv yuav ua ib txoj hauj lwm los pab kuv, uas yuav yog ib txoj hauj lwm tseem ceeb thiab zoo kawg nkaus nyob hauv lawv; thiab yuav muaj cov uas nyob hauv lawv uas tsis ntseeg tej ntawd, txawm tias twb yog ib tug neeg tshaj tawm rau lawv.

10 Tiam sis saib seb, kuv tus tub qhe txoj sia yuav nyob hauv kuv txhais tes; yog li ntawd lawv yuav tsis ua rau nws raug mob, txawm tias lawv yuav ua rau nws nqaij tawv puas. Txawm li ntawd los kuv yuav kho nws kom zoo, vim kuv yuav ua rau lawv pom tias kuv laj lim tswv yim yeej loj dua tus dab phem txoj kev dag ntxias.

11 Yog li ntawd yuav muaj tias cov uas tsis ntseeg kuv tej lus, tus uas yog Yexus Khetos, uas Leej Txiv tau ua kom nws coj los rau Lwm Haiv Neeg, thiab yuav muab hwj chim rau nws xwv kom nws yuav coj tau kuv tej lus los rau Lwm Haiv Neeg, (yuav ua ib yam li Mauxes tau hais lawm), lawv yuav raug txiav tawm ntawm kuv cov neeg, cov uas tau khi lus tseg.

12 Thiab kuv cov neeg uas yog ib co seem tshuav ntawm tsev neeg Yakhauj yuav nyob hauv Lwm Haiv Neeg, muaj tseeb tiag, nyob hauv lawv nruab nrab zoo li ib tug tsov ntxhuav nyob hauv tej tsiaj qus tom hav zoov, thiab zoo li ib tug thav tsov ntxhuav nyob hauv tej pab yaj, uas thaum nws mus rau hauv tej pab yaj ntawd, yuav muab lawv tsuj thiab dua ua daim, thiab tsis muaj leej twg cawm tau.

13 Lawv txhais tes yuav tsa rau lawv cov yeeb ncuab, thiab tag nrho lawv cov yeeb ncuab yuav raug txiav tawm.

14 Muaj tseeb tiag, kev txom nyem yuav raug Lwm Haiv Neeg tsuas yog lawv hloov siab lees txim xwb; vim hnub ntawd yuav muaj tias, Leej Txiv hais li, kuv yuav muab nej tej nees txiav tawm ntawm nej mus, thiab kuv yuav muab nej tej tsheb nees luag ua kom puas tsuaj;

15 Thiab kuv yuav muab tej nroog ntawm nej thaj av txiav tawm mus, thiab rhuav tag nrho nej tej chaw ruaj khov;

16 Thiab kuv yuav muab tej kev ua khawv koob ntawm nej thaj av txiav tawm mus, thiab nej yuav tsis muaj tej neeg saib hmoov ntxiv lawm;

17 Nej tej mlom los kuv kuj yuav txiav tawm, thiab nej tej mlom sawv ntsug los kuj yuav raug muab txiav tawm ntawm nej mus, thiab nej yuav tsis teev tiam tej uas nej xuas tes ua ntxiv lawm;

18 Thiab kuv yuav rho nej tej ntoo yuj tawm ntawm nej mus; ib yam li ntawd kuv yuav ua kom nej tej nroog puas tsuaj.

19 Thiab yuav muaj tias Leej Txiv yuav ua kom tag nrho tej kev dag, thiab tej kev ntxias, thiab tej kev xav tau luag tug, thiab tej kev sib cav sib ceg, thiab tej tswv yim xib hwb cuav, thiab tej kev sib daj sib deev, ploj mus.

20 Leej Txiv hais tias, vim yuav muaj tias, nyob rau hnub ntawd cov uas tsis kam hloov siab lees txim thiab los cuag kuv Leej Tub uas kuv Hlub, cov ntawd kuv yuav muab txiav tawm ntawm kuv cov neeg mus, auj tsev neeg Ixayees;

21 Thiab kuv yuav phua kev ua pauj thiab kev npau taws rau lawv, ib yam li rau cov neeg uas tsis hwm Vajtswv, xws li tej uas lawv tsis tau hnov dua.

22 Tiam sis yog lawv yuav hloov siab lees txim thiab mloog kuv tej lus, thiab tsis ua lawv lub siab tawv, kuv yuav txhim tsa kuv lub koom txoos nyob hauv lawv, thiab lawv yuav ua kev khi lus, thiab yuav muab lawv suav nrog Yakhauj cov uas seem tshuav no, cov uas kuv tau muab thaj av no los ua lawv qub txeeg qub teg;

23 Thiab lawv yuav pab kuv cov neeg, Yakhauj cov uas seem tshuav, thiab tsev neeg Ixayees coob npaum li uas yuav los, xwv kom lawv yuav ua tau ib lub nroog, uas yuav muab hu ua Yeluxalees Tshiab.

24 Thiab thaum ntawd lawv yuav pab kuv cov neeg xwv kom yuav sau tau lawv los, cov uas tau tawg khiav ri niab mus rau hauv txhua thaj av, los rau hauv Yeluxalees Tshiab.

25 Thiab thaum ntawd lub hwj chim ntawm lub ntuj ceeb tsheej yuav nqis los rau hauv lawv; thiab kuv los kuj yuav nyob hauv plawv.

26 Ces Leej Txiv txoj hauj lwm yuav pib nyob rau hnub ntawd, twb nyob rau thaum yuav muab txoj moo zoo no tshaj tawm rau cov uas seem tshuav ntawm cov neeg no. Kuv hais tseeb rau nej tias, nyob rau hnub ntawd Leej Txiv txoj hauj lwm yuav pib nyob hauv tag nrho kuv cov neeg uas raug faib rau ub rau no, muaj tseeb tiag, twb yog tej xeem neeg uas tau ploj lawm, uas Leej Txiv tau coj tawm ntawm Yeluxalees mus.

27 Muaj tseeb tiag, Leej Txiv yuav pib ua hauj lwm nyob hauv tag nrho kuv cov neeg uas raug faib rau ub rau no, los npaj txoj kev uas yuav coj tau lawv los cuag kuv, xwv kom lawv yuav thov Leej Txiv los ntawm kuv lub npe.

28 Muaj tseeb tiag, thiab thaum ntawd Leej Txiv yuav pib txoj hauj lwm no, nyob hauv tag nrho txhua haiv neeg kom npaj tau txoj kev sau tau nws cov neeg los mus tsev rau thaj av ntawm lawv qub txeeg qub teg.

29 Thiab lawv yuav tawm ntawm txhua haiv neeg mus; thiab lawv yuav tsis tawm nrawm nroos mus thiab mus los ntawm kev tsiv; vim kuv yuav mus ua lawv ntej, Leej Txiv hais li, thiab kuv yuav ua tus kav nej qab.