1 Thiab nim no tau muaj tias thaum Yexus tau hais tej lus no tas nws tig rov qab mus rau cov neeg coob coob, thiab rov qab qhib nws lub qhov ncauj rau lawv, hais tias: Kuv hais tseeb tseeb rau nej tias, tsis txhob txiav txim rau lwm tus, es nej thiaj tsis raug txiav txim.

2 Vim txoj kev txiav txim twg uas nej siv los txiav txim rau lwm tus, nej kuj yuav raug txiav txim thiab; thiab txoj kev ntsuas twg uas nej siv los ntsuas lwm tus, kuj yuav siv los ntsuas nej thiab.

3 Thiab vim li cas nej ho pom qhov hmoov ntoo uas nyob hauv nej tus kwv tij lub qhov muag, tiam sis ho tsis xav txog yav tog ntoo uas nyob hauv nej tus kheej lub qhov muag?

4 Los sis ua li cas nej ho muaj cuab kav hais rau nej tus kwv tij tias: Cia kuv rho qhov hmoov ntoo tawm hauv koj qhov muag—thiab saib seb, twb muaj ib yav tog ntoo nyob hauv nej lub qhov muag?

5 Nej cov niag neeg siab dag, xub muab yav tog ntoo tawm hauv nej lub qhov muag tso; thiab tom qab ntawd nej thiaj yuav pom kev tseeb rho qhov hmoov ntoo tawm hauv nej tus kwv tij lub qhov muag.

6 Tsis txhob muab tej yam uas dawb huv rau dev, thiab tsis txhob pov nej tej hlaws rau ntawm npua hauv ntej, tsam lawv muab tej ntawd tsuj rau hauv lawv qab xib taws, thiab tig rov los thiab tom nej.

7 Cia li thov, thiab yuav muab rau nej; cia li nrhiav, thiab nej yuav ntsib; cia li khob, thiab yuav qhib rau nej.

8 Vim txhua tus uas thov, yuav tau txais; thiab tus uas nrhiav, yuav ntsib; thiab rau tus uas khob, yuav qhib rau nws.

9 Los sis puas muaj leej twg uas nyob hauv nej es yog nws tus tub thov mov, yuav muab ib lub pob zeb rau nws?

10 Los sis yog nws thov ib tug ntses, yuav muab ib tug nab rau nws?

11 Yog tias nej, cov uas phem, twb paub muab yam khoom zoo rau nej cov me nyuam, ces nej Leej Txiv tus uas nyob saum ntuj ceeb tsheej haj yam yuav muab tej yam uas zoo ntau dua rau cov uas thov nws?

12 Yog li ntawd, txhua yam uas nej xav kom lwm tus ua rau nej, nej cia li ua li ntawd rau lawv thiab, vim txoj kev cai thiab cov yaj saub qhia li no.

13 Nej cia li nkag mus rau hauv lub rooj vag uas nqaim; vim lub rooj vag yeej loj, thiab txoj kev yeej dav, uas mus rau txoj kev puas tsuaj, thiab muaj coob leej uas mus rau qhov ntawd;

14 Vim lub rooj vag yeej nqaim, thiab txoj kev yeej ti, uas coj mus rau txoj sia, thiab muaj tsawg tus thiaj li nrhiav tau.

15 Ceev faj txog cov yaj saub cuav, uas los rau ntawm nej uas ntsia rau sab nraud zoo li yog yaj, tiam sis nyob rau sab hauv lawv yog cov hma tshaib plab.

16 Nej yuav paub lawv los ntawm lawv cov txiv ntoo. Puas muaj leej twg sau tau txiv hmab los ntawm tej pos tshauv los sis sau tau txiv cev los ntawm tej pos nphuab?

17 Ib yam li ntawd txhua tsob ntoo zoo yeej txi cov txiv zoo; tiam sis tsob ntoo liam yeej txi cov txiv phem.

18 Tsob ntoo zoo yeej txi tsis tau cov txiv phem, thiab tsob ntoo liam yeej txi tsis tau cov txiv zoo.

19 Txhua tsob ntoo uas tsis txi cov txiv zoo yuav raug muab ntov, thiab muab pov rau hauv hluav taws.

20 Yog li ntawd, los ntawm lawv cov txiv ntoo nej yuav paub lawv.

21 Tsis yog txhua tus uas hais rau kuv tias, tus Tswv, tus Tswv, yuav tau nkag mus rau hauv lub nceeg vaj ceeb tsheej; tiam sis tsuas yog tus uas ua li kuv Txiv tus uas nyob saum ntuj ceeb tsheej lub siab nyiam xwb.

22 Nyob rau hnub ntawd muaj coob leej yuav hais tias: Tus Tswv, tus Tswv, peb puas tau qhia tej yuav muaj los yav tom ntej los ntawm koj lub npe, thiab puas tau ntiab tawm tej dab phem los ntawm koj lub npe, thiab puas tau ua ntau yam zoo heev los ntawm koj lub npe?

23 Thiab thaum ntawd kuv yuav hais meej rau lawv tias: Kuv yeej ib txwm tsis paub nej; khiav ntawm kuv mus, nej cov uas ua kev phem.

24 Yog li ntawd, tus uas hnov kuv tej lus hais no thiab ua raws li tej lus ntawd, kuv yuav muab nws piv rau ib tug neeg muaj tswv yim, uas cog nws lub tsev rau saum ib lub pob zeb.

25 Thiab nag los, thiab dej nyab, thiab cua tshuab, thiab nplawm lub tsev ntawd; thiab lub tsev tsis vau, vim tau muab nws lub tsev cog rau saum lub pob zeb.

26 Thiab txhua tus uas hnov kuv tej lus hais no thiab tsis ua raws li tej lus ntawd yuav muab piv rau ib tug neeg tsis muaj tswv yim, uas cog nws lub tsev rau saum tej xuab zeb—

27 Thiab nag los, thiab dej nyab, thiab cua tshuab, thiab nplawm lub tsev ntawd; thiab lub tsev vau, thiab txoj kev vau ntawd loj heev.