1 Kev txom nyem raug lawv cov uas tshaj tawm tej lus tshaj tawm tsis ncaj ncees, thiab cov uas sau tej kev cai tsuj yuam uas lawv tau tsa;

2 Los txwv tsis pub kev txim lij rau cov neeg txom nyem, thiab los txeeb kev ywj siab ntawm kuv cov neeg pluag, xwv kom cov poj ntsuam yuav raug lawv tsim txom, thiab xwv kom lawv yuav nyiag tau ntawm cov me nyuam ntsuag!

3 Thiab nej yuav ua li cas nyob rau hnub uas rau txim, thiab nyob rau txoj kev puas tsuaj uas tuaj deb tuaj? nej yuav khiav mus nrhiav kev pab ntawm leej twg? thiab nej yuav muab nej lub yeeb koob coj mus tso rau qhov twg?

4 Yog tsis muaj kuv ces lawv yuav khoov ris tej neeg uas raug kaw, thiab lawv yuav raug tuag nyob hauv qab cov neeg uas twb raug tua tuag lawm. Txawm muaj li no los nws txoj kev npau taws tseem tsis tau thim thiab, tiam sis nws txhais tes tseem xyab li qub.

5 Auj cov neeg Axilias es, nej uas yog lub zog ntawm kuv txoj kev npau taws, thiab tus pas uas nyob hauv lawv txhais tes yog lawv txoj kev npau taws.

6 Kuv yuav xa nws mus tawm tsam haiv neeg uas siab dag, thiab kuv yuav cia nws mus txeeb tej khoom ntawm cov neeg uas kuv npau taws rau, thiab mus tsim txom, thiab mus tsuj lawv zoo li tej av nkos tom tej kev.

7 Txawm li ntawd los nws tsis tau npaj li ntawd, thiab nws lub siab tsis tau xav li ntawd; tiam sis nyob hauv nws lub siab yog xav ua kom puas tsuaj thiab txiav tawm ntau haiv neeg, tsis yog tsawg.

8 Vim nws hais tias: Kuv tej tub vaj ntxwv tag nrho ua ke tsis yog tej vaj ntxwv los?

9 Kanaus tsis zoo ib yam li Kakhemis los? Hamas tsis zoo ib yam li Alepas los? Xamalis tsis zoo ib yam li Damaxes los?

10 Ib yam li kuv txhais tes tau tsim tej teb chaws ua muaj mlom, thiab tej uas muaj mlom puab ntau tshaj li tej uas nyob hauv Yeluxalees thiab hauv Xamalis;

11 Es kuv tseem yuav tsis ua rau Yeluxalees thiab nws tej mlom, ib yam li kuv tau ua rau Xamalis thiab nws tej mlom los?

12 Yog li ntawd yuav muaj tias thaum tus Tswv tau ua tiav tag nrho nws txoj hauj lwm rau saum Roob Xi-oos thiab rau Yeluxalees, kuv yuav rau txim rau tej txiv ntoo ntawm vaj ntxwv Axilias lub siab khav txiv, thiab lub yeeb koob ntawm nws txoj kev muaj plhus.

13 Vim nws hais tias: Los ntawm kuv txhais tes lub zog thiab los ntawm kuv lub tswv yim kuv tau ua tej yam no; vim kuv txiav txim ncaj; thiab kuv tau txeeb tej neeg tej ciam av, thiab tau nyiag lawv tej nyiaj txiag, thiab kuv tau ntaus yeej tej neeg zoo li ib tug neeg muaj peev xwm;

14 Thiab kuv txhais tes nrhiav tau tej neeg txoj kev nplua nuj zoo li ib lub zes noog; thiab zoo li ib tug neeg uas sau tej qe uas seem kuv tau sau ntiaj teb tag nrho; thiab tsis muaj leej twg xyab txhais tis, los sis rua lub qhov ncauj, los sis ua suab.

15 Puas tsim nyog rab taus qhuas nws tus kheej rau tus neeg uas siv rab taus phua? Puas tsim nyog rab kaw khav nws tus kheej rau tus neeg uas siv rab kaw txiav? Ntshe tus pas yuav txawj co mus los rau tus neeg uas muab nws nqa, los sis ntshe tus pas nrig yuav txawj nqa nws tus kheej zoo li nws tsis yog ntoo!

16 Yog li ntawd tus Tswv, Ib Tsoom Tub Rog tus Tswv, yuav xa tej ntshiv ntshiv mus rau nws tej rog rog; thiab nyob hauv nws lub yeeb koob tus Tswv yuav zes kom muaj ib qho kub zoo li qhov hluav taws kub.

17 Thiab Ixayees qhov kaj yuav zoo li ib lub qhov cub, thiab nws Tus Dawb Huv yuav zoo li ib tug nplaim hluav taws, thiab yuav kub thiab yuav nqos nws tej pos kaus ntsaj thiab nws tej ntoo pos tib hnub kom tag nrho;

18 Thiab nws tej hav zoov uas muaj yeeb koob yuav kub hnyiab mus, thiab nws thaj teb uas huaj vam, tsis hais sab ntsuj plig thiab sab cev nqaij daim tawv los yog; thiab lawv yuav zoo li thaum uas tus neeg tuav chij feeb tas.

19 Thiab cov ntoo uas seem tshuav ntawm nws thaj hav zoov yuav tsawg heev, uas txaus rau ib tug me nyuam yaus suav.

20 Thiab yuav muaj tias nyob rau hnub ntawd, Ixayees cov seem tshuav, thiab tsev neeg Yakhauj cov uas khiav dim, yuav tsis vam khom rau tus uas tau nplawm lawv, tiam sis yuav vam khom rau tus Tswv, uas yog Ixayees tus Dawb Huv, muaj tseeb tiag.

21 Cov seem tshuav yuav rov qab los, muaj tseeb tiag, twb yog Yakhauj cov seem tshuav, uas yuav los mus cuag tus Vajtswv uas muaj hwj chim.

22 Txawm tias nej cov neeg Ixayees yuav muaj coob npaum li tej xuab zeb tom ntug dej hiav txwv los, tsuas yog lawv ib co seem tshuav thiaj yuav rov qab los xwb; txoj kev puas tsuaj uas tau teem tseg yuav muaj kev ncaj ncees phwj yaws.

23 Vim Ib Tsoom Tub Rog tus Tswv uas yog Vajtswv yuav ua ib txoj kev puas tsuaj, uas twb tau npaj rau txhua thaj av.

24 Yog li ntawd, tus Tswv uas yog Ib Tsoom Tub Rog tus Vajtswv hais li no: Auj kuv cov neeg uas nyob rau hauv Xi-oos es, tsis txhob ntshai cov neeg Axilias; nws yuav xuas ib tug pas nplawm nej, thiab yuav tsa nws tus pas nrig tawm tsam nej, ib yam li Iyiv tau ua.

25 Vim tsuas yog ib nyuag ntu xwb, thiab txoj kev npau taws yuav tu, thiab kuv txoj kev chim siab yuav tu thaum lawv raug puas tsuaj.

26 Thiab Ib Tsoom Tub Rog tus Tswv yuav txhaub muab ib txoj kev nplawm rau nws zoo li txoj kev raug tua tuag ntawm Midias uas nyob ntawm lub pob zeb Aules; thiab ib yam li tus Tswv tau tsa nws tus pas rau saum tej dej hiav txwv nws yuav tsa nws tus pas ib yam li tau ua nyob hauv Iyiv.

27 Thiab yuav muaj tias nyob rau hnub ntawd yuav muab nws lub nra hnyav tshem saum nej xub pwg mus, thiab nws tus quab tshem saum nej caj dab mus, thiab tus quab yuav raug puas tsuaj mus los ntawm kev cai pleev roj.

28 Nws tuaj rau hauv A-is, nws tau hla mus rau Minkaloos; nws tau muab nws tej khoom nws nqa cia rau tim Mikamas.

29 Lawv tau hla txoj kev mus; lawv tau mus so rau tim Nkenpas; cov neeg nyob hauv Lamothes tau ntshai; cov neeg nyob hauv Xa-ules lub nroog Nkinpe-as tau khiav tas.

30 Tsa lub suab kom nrov, auj Nkalees tus ntxhais es; ua kom nrov ncha mus txog La-isas, auj Anathaus uas txom nyem es.

31 Cov neeg nyob hauv Mamenas tau khiav tas; cov neeg nyob hauv Nkenpis sib sau npaj yuav khiav.

32 Tiam sis hnub ntawd nws tseem nyob rau tim lub zos Naunpas; nws yuav co tes tawm tsam lub roob ntawm Xi-oos tus ntxhais, uas yog Yeluxalees lub pov roob.

33 Saib seb, Ib Tsoom Tub Rog tus Tswv tso kev ntshai kawg los txiav tej ceg kom tu; thiab cov uas muaj meej mom siab yuav raug txiav kom tu; thiab cov uas khav txiv yuav raug txo hwj chim.

34 Thiab nws yuav xuas hlau kab ntov tej hav zoov nuj xiab kom vau, tus uas muaj hwj chim yuav ua kom Lenpanoos vau mus.