1 Yakhauj tej lus, tus uas yog Nifais tus kwv, uas nws hais rau Nifais cov neeg:

2 Saib seb, kuv cov kwv tij uas kuv hlub, kuv, Yakhauj, vim Vajtswv tau hu kuv, thiab tsa kuv raws li nws tus txheej txheem dawb huv, thiab vim kuv tus tij laug Nifais tau fij kuv, tus uas nej sawv daws saib yog ib tug vaj ntxwv los sis ib tug uas tiv thaiv nej, thiab tus uas nej sawv daws tso siab rau txoj kev nyab xeeb, saib seb nej paub tias kuv tau hais rau nej ntau yam kawg nkaus li.

3 Txawm li ntawd los, kuv hais rau nej dua; vim kuv xav kom nej tej ntsuj plig tau nyob zoo. Muaj tseeb tiag, kuv txhawj txog nej heev; thiab nej yeej paub hais tias kuv yeej ib txwm txhawj txog nej. Vim kuv tau rau siab ntso ntuas nej; thiab kuv tau qhia kuv txiv tej lus rau nej; thiab kuv tau hais rau nej ntsig txog txhua yam uas muab sau cia txij thaum ntuj tsim teb raug.

4 Thiab nim no, saib seb, kuv yuav hais rau nej ntsig txog tej xwm txheej uas twb muaj lawm, thiab tej uas tseem yuav muaj los; yog li ntawd, kuv yuav nyeem Yaxayas tej lus rau nej. Thiab tej lus no yog tej lus uas kuv tus tij laug xav kom kuv hais rau nej. Thiab kuv hais rau nej xwv kom yuav pab tau nej, kom nej kawm thiab kom nej qhuas nej tus Vajtswv lub npe.

5 Thiab nim no, tej lus uas kuv yuav nyeem yog tej lus uas Yaxayas tau hais txog tag nrho tsev neeg Ixayees; yog li ntawd, cov lus no yog hais txog nej, vim nej yog los ntawm tsev neeg Ixayees los. Thiab muaj ntau yam uas Yaxayas tau hais uas yog hais txog nej, vim nej yog los ntawm tsev neeg Ixayees los.

6 Thiab nim no, nov yog tej lus uas nws hais: Tus Tswv uas yog Vajtswv hais li no hais tias: Saib seb, kuv yuav tsa kuv txhais tes mus rau Lwm Haiv Neeg, thiab tsa kuv tus chij rau tej neeg; thiab lawv yuav coj nej cov tub hauv lawv txhais caj npab los, thiab yuav ev nej cov ntxhais saum lawv lub xub pwg los.

7 Thiab tej vaj ntxwv yuav ua nej txiv qhuav tu yug nej, thiab lawv tej niam vaj ntxwv yuav ua nej niam qhuav yug nej; lawv yuav nyo taub hau rau hauv av pe nej, thiab yaim tej plua tshauv ntawm nej tej ko taw; thiab nej yuav paub tias kuv yog tus Tswv; vim lawv cov uas tos ntsoov kuv yuav tsis poob ntsej muag.

8 Thiab nim no kuv, Yakhauj, yuav hais me ntsis txog tej lus no. Vim saib seb, tus Tswv tau qhia rau kuv tias cov uas tseem nyob tim Yeluxalees, txij thaum peb tau ncaim tuaj lawm, tau raug tua thiab raug cab coj mus ua qhev.

9 Txawm li ntawd los, tus Tswv tau qhia rau kuv tias lawv yuav rov qab los dua. Thiab nws kuj tau qhia rau kuv tias tus Tswv uas yog Vajtswv, cov neeg Ixayees tus Dawb Huv, yuav ua nws tus kheej tshwm sim los rau lawv nyob ntawm sab nqaij daim tawv; thiab tom qab nws ua nws tus kheej tshwm sim los rau lawv, lawv yuav muab nws nplawm thiab muab nws ntsia rau saum ntoo khaub lig, raws li tus tim tswv tej lus uas nws hais rau kuv.

10 Thiab tom qab lawv tau ua lawv lub siab tawv qhawv thiab lawv lub caj dab tawv qhawv rau cov neeg Ixayees tus Dawb Huv, saib seb, tej kev txiav txim ntawm cov neeg Ixayees tus Dawb Huv yuav los raug lawv. Thiab hnub uas lawv raug puas tsuaj thiab raug kev txom nyem twb yuav los.

11 Yog li ntawd, tom qab lawv raug ntiab khiav mus rau ub rau no, tus tim tswv hais li no, coob leej yuav raug kev txom nyem ntawm cev nqaij daim tawv, thiab yuav tsis raug piam sij, vim tej kev thov Vajtswv ntawm cov uas rau siab ntseeg; lawv yuav tawg khiav ri niab, thiab raug luag ntaus, thiab raug luag ntxub; txawm li ntawd los, tus Tswv yuav muaj siab hlub tshua lawv, xwv kom thaum lawv los paub txog lawv tus Txhiv Dim, lawv yuav rov sib sau los ua ke dua nyob rau hauv tej av uas yog lawv qub txeeg qub teg.

12 Thiab Lwm Haiv Neeg tau koob hmoov, lawv cov uas tus yaj saub tau sau txog; vim saib seb, yog hais tias lawv hloov siab lees txim thiab tsis tawm tsam Xi-oos, thiab tsis sib sau ua ke rau hauv lub koom txoos uas muaj zog thiab txaus ntxub, ces yuav cawm lawv dim; vim tus Tswv uas yog Vajtswv yuav ua raws li nws tej kev khi lus uas nws tau khi rau nws cov me nyuam; thiab twb yog rau lub hom phiaj no tus yaj saub thiaj tau sau tej yam no.

13 Yog li ntawd, lawv cov uas tawm tsam Xi-oos thiab tus Tswv cov neeg khi lus yuav yaim tej hmoov av ntawm lawv tej ko taw; thiab tus Tswv cov neeg yuav tsis poob ntsej muag. Vim tus Tswv cov neeg yog cov uas tos ntsoov nws; vim lawv tseem tos hnub uas tus Mexiyas yuav los.

14 Thiab saib seb, raws li tus yaj saub tej lus, tus Mexiyas yuav npaj nws tus kheej dua zaum ob los coj lawv mus cuag nws; yog li ntawd, nws yuav ua nws tus kheej tshwm los rau lawv nrog hwj chim thiab yeeb koob loj, yuav los ua kev puas tsuaj rau lawv cov yeeb ncuab, thaum hnub ntawd los txog thaum lawv ntseeg nws; thiab cov uas ntseeg nws yuav tsis muaj ib tug raug puas tsuaj hlo li.

15 Thiab lawv cov uas tsis ntseeg nws yuav raug puas tsuaj, los ntawm hluav taws thiab los ntawm cua daj cua dub, thiab los ntawm av qeeg, thiab los ntawm nqaij ntuag ntshav nrog, thiab los ntawm tej kab mob phem, thiab los ntawm kev tshaib nqhis. Thiab lawv yuav paub tias tus Tswv yog Vajtswv, tus uas yog cov neeg Ixayees tus Dawb Huv.

16 Puas yuav tshem tau tej khoom uas txeeb tau tom yeeb ncuab los tawm ntawm cov neeg uas muaj hwj chim, los sis tus neeg uas raug kaw raws li kev cai puas yuav dim?

17 Tiam sis tus Tswv hais li no tias: Cov neeg raug txim ntawm tej neeg muaj hwj chim los kuj yuav raug coj mus, thiab tej neeg phem heev tej khoom txeeb tau los yeej yuav raug muab rov qab; vim tus Vajtswv uas Muaj Hwj Chim yuav cawm kom nws cov neeg khi lus dim. Vim tus Tswv hais li no: Kuv yuav tawm tsam lawv cov uas tawm tsam nej—

18 Thiab lawv cov uas quab yuam nej, kuv yuav muab lawv tus kheej tej nqaij rov qab yug lawv; thiab lawv yuav rov qab qaug rau lawv tej ntshav li qaug cawv txiv hmab qab zib; thiab tag nrho tib neeg yuav paub tias kuv, tus uas yog tus Tswv, yog nej tus Cawm Seej thiab nej tus Txhiv Dim, tus Muaj Hwj Chim ntawm Yakhauj.