1 Vim saib seb, tus Tswv, uas yog Ib Tsoom Tub Rog tus Tswv, tshem tawm hauv Yeluxalees thiab hauv Yudas, tej khoom noj thiab tej khoom haus, tag nrho tej zaub mov noj, thiab tag nrho tej dej haus—

2 Tus neeg muaj hwj chim, thiab tus neeg ua rog, tus neeg txiav txim, thiab tus yaj saub, thiab tus neeg txawj ntse, thiab tus neeg laus;

3 Tus thawj tub rog pawg tsib caug, thiab tus neeg ua nom ua tswv, thiab tus neeg txawj ntuas, thiab tus neeg uas txawj ua yees siv, thiab tus neeg uas txawj hais lus rau laj mej pej xeem.

4 Thiab kuv yuav muab me nyuam rau lawv los ua lawv tej huab tais, thiab tej me nyuam mos yuav los kav lawv.

5 Thiab tej neeg yuav raug quab yuam, ib leeg quab yuam ib leeg, thiab txhua tus nyias raug nyias tus neeg zej zog quab yuam; tus me nyuam yaus yuav tsis hwm tus laus, thiab tus uas tsis tsim txiaj yuav tsis hwm tus uas muaj koob meej.

6 Thaum ntawd ib tug neeg yuav tuav nkaus nws tus kwv tij ntawm nws txiv tsev neeg, thiab yuav hais tias: Koj muaj ris tsho hnav, koj cia li los ua peb tus nom, thiab tsis txhob cia txoj kev puas ntsoog no los nyob hauv koj txhais tes—

7 Nyob rau hnub ntawd nws yuav twv, hais tias: Kuv tsis kam ua tus kho tib neeg; vim nyob hauv kuv lub tsev twb tsis muaj mov noj thiab tsis muaj ris tsho hnav; tsis txhob muab kuv ua tus nom kav cov neeg.

8 Vim Yeluxalees twb raug puas tsuaj lawm, thiab Yudas twb poob lawm, vim yog lawv tej nplaig thiab lawv tej hauj lwm tawm tsam tus Tswv, kom thab lub qhov muag ntawm nws lub yeeb koob.

9 Lawv lub ntsej muag twb ua tim khawv nkaug lawv, thiab tshaj lawv tej kev txhaum zoo ib yam li cov neeg uas nyob hauv lub nroog Xaudoos, thiab lawv yeej zais tsis tau li. Lawv tej ntsuj plig yuav raug kev txom nyem, vim lawv tau muab nqi zog phem rau lawv tus kheej!

10 Hais rau cov neeg ncaj ncees tias lawv yuav noj qab nyob zoo; vim lawv yuav tau noj cov txiv ntoo ntawm lawv tej hauj lwm.

11 Kev txom nyem yuav raug cov neeg phem, vim lawv yuav piam sij mus; vim nqi zog ntawm lawv tes hauj lwm yuav los raug lawv!

12 Thiab kuv cov neeg, tej me nyuam tsim txom lawv, thiab tej poj niam kav lawv. Auj kuv cov neeg es, lawv cov uas coj nej ua kom nej ua txhaum thiab rhuav nej tej kev.

13 Tus Tswv twb sawv los hais pab cov neeg, thiab sawv los txiav txim rau cov neeg.

14 Tus Tswv yuav txiav txim rau cov txwj laug ntawm nws cov neeg thiab cov tub huab tais ntawd; vim nej tau noj ntawm lub vaj txiv hmab tag lawm thiab txeeb tej cuab yeej ntawm cov neeg pluag coj los hauv nej tej tsev.

15 Tus Tswv uas yog Ib Tsoom Tub Rog tus Vajtswv hais tias, nej xav tau dab tsi? Nej muab kuv cov neeg ntaus ntsoog txaws, thiab zom tej neeg pluag lub ntsej muag.

16 Tus Tswv hais ntxiv, hais tias: Vim Xi-oos cov ntxhais khav txiv heev, thiab mus kev ncav caj dab ntev thiab ua qhov muag cus ciav, ke mus kev ke xuab ko taw yam muaj plhus ntxiag, thiab lawv tej ko taw ua suab nrov nrib nreeb—

17 Yog li ntawd tus Tswv yuav foom kom Xi-oos cov ntxhais tiaj taub hau kom ua kiav txhab, thiab tus Tswv yuav ua kom pom tej chaw uas lawv muab npog.

18 Nyob rau hnub ntawd tus Tswv yuav muab lawv tej saw nyiaj saw kub uas nrov zoo nkauj, thiab tej kaus mom paj, thiab tej saw caj dab uas kheej li lub hlis pov tseg;

19 Tej saw hlau thiab tej saw tes, thiab tej phuam npog ntsej muag;

20 Tej kaus mom nyiaj kaus mom kub, thiab tej saw uas coj ntawm tej kav ceg, tej saw khi taub hau, thiab tej txws rau tshuaj tsw qab, thiab tej kauj ntseg;

21 Tej nplhaib, thiab tej kauj ntswg;

22 Tej ce ris tsho uas muaj nuj nqis, thiab tej kaus mom huab tais, thiab tej tsho loj, thiab tej hnab rau nyiaj;

23 Tej tsom qhov muag, thiab tej ntaub uas zoo nkauj, thiab tej phuam vas taub hau thiab caj dab, thiab tej phuam npog qhov muag.

24 Thiab yuav muaj tias, tsis yog muaj qhov tsw qab tiam sis muaj qhov tsw phem; thiab tsis muaj txoj siv sia, tiam sis muaj khaub hlab ntuag; tsis muaj plaub hau ntxhee yees, tiam sis muaj do hau; tsis muaj ib lub ntiab tsuj ntiab npuag, tiam sis muaj ib lub ntiab seev tsaj; tsis muaj kev zoo nkauj, tiam sis muaj kub hnyiab.

25 Koj cov txiv neej yawg yuav tuag rau hniav ntaj hniav riam thiab koj cov neeg khov yuav tuag rau npluav rog.

26 Thiab Yeluxalees tej neeg yuav quaj ntsuag thiab yuav nyiav; thiab Yeluxalees yuav nyob qhuav qhawv, thiab yuav zaum rau hauv av.