1 Thiab thaum ntawd kuv yuav hu ib zaj nkauj uas kuv nyiam rau tus neeg uas kuv hlub, hais txog nws lub vaj txiv hmab. Tus neeg uas kuv hlub muaj ib lub vaj txiv hmab nyob pem ib lub pov roob uas txi txiv heev.

2 Thiab nws tau xov laj kab ncig, thiab tau sau tej pob zeb hauv tawm pov tseg, thiab tau muab cov txiv hmab uas zoo tshaj plaws coj los cog rau hauv, thiab tau tsa ib tug pej thuam rau hauv plawv, thiab kuj tau txua lub qhov zeb los tsuam kua txiv hmab rau hauv thiab; thiab nws vam tias yuav txi txiv hmab, tiam sis ho txi txiv hmab qus.

3 Thiab nim no, auj cov neeg uas nyob hauv Yeluxalees, thiab cov neeg hauv Yudas, kuv thov nej txiav txim, rau kuv thiab kuv lub vaj txiv hmab.

4 Tshuav dab tsi ua ntxiv rau kuv lub vaj txiv hmab uas kuv tsis tau ua? Yog li ntawd, thaum kuv vam tias yuav txi txiv hmab kuv lub vaj ho txi txiv hmab qus.

5 Thiab nim no, cia li mus, kuv yuav qhia rau nej saib kuv yuav ua li cas rau kuv lub vaj txiv hmab—Kuv yuav muab tus laj kab ntawd tshem, thiab tej tsiaj yuav noj lub vaj txiv hmab kom tas; thiab kuv yuav tsoo kom lub phab ntsa ntawd vau, thiab tej tsiaj yuav tsuj lub vaj txiv hmab kom tiaj;

6 Thiab kuv yuav rhuav kom lub vaj txiv hmab puas tsuaj; yuav tsis yim thiab yuav tsis nthua; tiam sis yuav muaj ntoo pos thiab pos kaus ntsaj tuaj; kuv kuj yuav txib kom tej huab tsis txhob tso nag los rau haud.

7 Vim Ib Tsoom Tub Rog tus Tswv lub vaj txiv hmab yog tsev neeg Ixayees, thiab cov neeg hauv Yudas yog nws tsob txiv hmab uas zoo heev; thiab nws xav tias yuav pom kev txiav txim, tiam sis nws pom kev tsim txom; xav tias yuav pom kev ncaj ncees, tiam sis saib seb, pom kev quaj ntsuag.

8 Kev txom nyem yuav raug cov uas muab ib lub tsev los sau nrog ib lub tsev, mus txog thaum tsis muaj chaw nyob, xwv kom tsuas tshuav lawv nyob hauv lub teb chaws xwb!

9 Rau kuv ob lub pob ntseg, Ib Tsoom Tub Rog tus Tswv tau hais tias, muaj tseeb tiag ntau lub tsev yuav khoom qhuav qhawv, thiab tej nroog loj thiab zoo nkauj yuav tsis muaj neeg nyob li.

10 Muaj tseeb tiag, dav li kaum lub vaj txiv hmab yuav zom tau ib thoob kua txiv hmab xwb, thiab cog kaum thoob noob yuav muab tau ib thoob nplej xwb.

11 Kev txom nyem yuav raug lawv cov uas sawv ntxov ntxov thaum kaj ntug, xwv kom lawv yuav tau haus tej dej cawv, kom mus txog thaum tsaus ntuj, thiab lawv qaug dej qaug cawv!

12 Thiab tej raj, tej ncas, tej nruas, thiab tej raj nkauj see, thiab tej cawv txiv hmab los kuj muaj nyob hauv lawv tej kev noj kev haus; tiam sis lawv tsis xav txog tej uas tus Tswv ua, thiab tsis xav txog tej uas nws txhais tes ua tau.

13 Yog li ntawd, kuv cov neeg tau raug mus poob cev qhev, vim lawv tsis muaj kev txawj ntse; thiab lawv tej neeg tsim txiaj tshaib plab, thiab lawv tej pab coob coob tau qhuav rau kev nqhis dej.

14 Yog li ntawd, ntuj txiag teb tsaus tau loj tuaj, thiab rua nws lub qhov ncauj dav li dav tau; thiab kuv cov neeg lub yeeb koob, thiab lawv tej pab coob coob, thiab lawv txoj kev ci zoo nkauj, thiab tus uas zoo siab, yuav nqis mus rau hauv ntuj txiag teb tsaus.

15 Thiab tus neeg dog dig yuav raug txo kom qis, thiab tus neeg nto moo yuav raug txo hwj chim, thiab cov neeg uas muaj qhov muag cus ciav yuav raug txo hwj chim.

16 Tiam sis Ib Tsoom Tub Rog tus Tswv txoj kev txiav txim yuav tsa nws sawv siab, thiab Vajtswv tus uas dawb huv nws txoj kev ncaj ncees yuav ua rau nws dawb huv.

17 Thaum ntawd cov yaj yuav noj zaub li lawv ib txwm noj, thiab tej chaw puas tsuaj puas ntsoog ntawm tej tsiaj rog yuav raug cov neeg pej kum noj.

18 Kev txom nyem yuav raug cov uas xuas tej hlua uas tsis muaj nuj nqis cab lawv tej kev phem, thiab zoo li lawv xuas tej hlua pluam cab lawv tej kev txhaum;

19 Cov uas hais tias: Cia nws nrawm nroos ua nws txoj hauj lwm, xwv kom peb yuav pom tej ntawd; thiab cia Ixayees tus Dawb Huv tej lus ntuas nyob ze thiab los, xwv kom peb yuav paub tej ntawd.

20 Kev txom nyem yuav raug cov uas hu qhov phem ua qhov zoo, thiab qhov zoo ua qhov phem, uas muab kev tsaus ntuj ua kev kaj, thiab muab kev kaj ua kev tsaus ntuj, thiab muab qhov iab ua qhov qab zib, thiab qhov qab zib ua qhov iab!

21 Kev txom nyem yuav raug cov uas saib hais tias lawv muaj tswv yim thiab cov uas pom hais tias lawv txawj ntse!

22 Kev txom nyem yuav raug cov uas muaj zog haus cawv txiv hmab, thiab cov uas txawj muab tej dej cawv sib tov;

23 Cov uas hais tias tej neeg phem tsis muaj txim kom txais nqi zog, thiab saib tsis taus tej neeg ncaj ncees txoj kev ncaj!

24 Yog li ntawd, ib yam li hluav taws kub tej quav nyab npleg, thiab nplaim taws kub cov npluag nplej, lawv tej cag yuav lwj mus, thiab lawv tej paj yuav qhuav ntsws yaj tshaws li hmoov av; vim lawv tau muab Ib Tsoom Tub Rog tus Tswv txoj kev cai pov tseg, thiab tsis quav ntsej txog Ixayees tus Dawb Huv txoj lus.

25 Yog li ntawd, tus Tswv txoj kev npau taws thiaj npau rau nws cov neeg, thiab nws tau xyab nws txhais tes tawm tsam lawv, thiab tau nplawm lawv; thiab tej pov roob tau nphau, thiab lawv lub cev uas tau tuag lawm tau raug muab dua pov rau tom tej plawv kev. Txawm muaj li no los nws txoj kev npau taws tseem tsis tau thim thiab, tiam sis nws txhais tes tseem xyab li qub.

26 Thiab nws yuav tsa ib tug chij rau tej haiv neeg uas nyob deb deb, thiab yuav hu nrov nrov rau lawv cov uas nyob deb deb; thiab saib seb, lawv yuav los nrawm kawg nkaus; lawv yuav tsis muaj leej twg qaug zog los sis dawm taw.

27 Lawv yuav tsis muaj leej twg qhau cev pw los sis tsaug zog; thiab lawv yuav tsis daws txoj siv ntawm lawv lub duav, thiab yuav tsis hle lawv tej hlua khau;

28 Lawv tej xib xub yuav ntse, thiab lawv txhua rab hneev yuav nta, thiab lawv cov nees tej rau yuav tawv li zeb ntais, thiab lawv tej log tsheb yuav kiv zoo li ib lub khaub zig cua, lawv tej suab nyooj yuav nrov li ib tug tsov ntxhuav.

29 Lawv yuav nyooj zoo li tej thav tsov ntxhuav; muaj tseeb tiag, lawv yuav nyooj, thiab yuav nthos nkaus tus tsiaj, thiab yuav nqa hlo mus, thiab yuav tsis muaj leej twg cheem tau.

30 Thiab nyob rau hnub ntawd cov neeg uas nyob deb deb tuaj yuav nyooj nroo ntws rau tus Tswv cov neeg yam li tej dej hiav txwv uas nrov nroo ntws; thiab yog tias tus Tswv cov neeg tsa muag ntsia thaj av, saib seb, lawv yuav pom kev tsaus ntuj thiab kev tu siab, thiab qhov kaj saum ntuj yuav tsaus.