1 Nim no kuv, Nifais, yuav hais tej yam txog tej lus uas kuv tau sau, uas Yaxayas lub qhov ncauj tau hais. Vim saib seb, Yaxayas tau hais ntau yam uas nyuaj rau kuv cov neeg ntau tus to taub; vim lawv tsis paub txog cov Neeg Yudais tej kev qhia txog tej yuav muaj los yav tom ntej.

2 Vim kuv, Nifais, tsis tau qhia ntau yam rau lawv txog cov Neeg Yudais tej kev cai; vim lawv tej hauj lwm yog tej hauj lwm ntawm kev tsaus ntuj, thiab tej uas lawv ua yog tej yam ntawm kev qias.

3 Yog li ntawd, kuv sau rau kuv cov neeg, rau tag nrho txhua tus uas yuav txais tej no tom qab uas kuv sau, xwv kom lawv yuav paub Vajtswv tej kev txiav txim, uas yuav los rau txhua txhia haiv neeg, raws li txoj lus uas nws tau hais.

4 Yog li ntawd, cia li mloog, auj kuv cov neeg, uas yog tsev neeg Ixayees, thiab cia li cuab pob ntseg rau kuv tej lus; txawm tias Yaxayas tej lus tsis tshua meej rau nej, txawm li ntawd los nws tej lus yeej meej rau txhua tus uas muaj lub txiaj ntsim qhia tau tej yuav muaj los yav tom ntej. Tiam sis kuv qhia ib yam uas yuav muaj los yav tom ntej rau nej, raws li tus ntsuj plig uas nyob hauv kuv; yog li ntawd kuv yuav qhia tej uas yuav muaj los yav tom ntej raws li txoj kev qhia meej uas tau nrog kuv nyob txij thaum lub caij kuv tau tawm hauv Yeluxalees nrog kuv txiv tuaj; vim saib seb, kuv tus ntsuj plig zoo siab rau txoj kev qhia meej rau kuv cov neeg, xwv kom lawv yuav kawm tau.

5 Muaj tseeb tiag, thiab kuv tus ntsuj plig zoo siab rau Yaxayas tej lus, vim kuv tau tawm hauv Yeluxalees tuaj, thiab kuv lub qhov muag tau pom tej yam ntawm cov Neeg Yudais, thiab kuv paub tias cov Neeg Yudais to taub tej yam ntawm cov yaj saub, thiab tsis muaj lwm cov neeg uas yuav to taub txog tej uas cov yaj saub tau hais rau cov Neeg Yudais npaum li lawv, tsuas yog yuav qhia lawv raws li tej uas tau qhia rau cov Neeg Yudais lawm xwb.

6 Tiam sis saib seb, kuv, Nifais, tsis tau qhia cov Neeg Yudais tej kev cai rau kuv cov me nyuam; tiam sis saib seb, kuv, tus kheej, tau nyob tim Yeluxalees, yog li ntawd kuv paub txog tej thaj tsam ib puag ncig; thiab kuv tau piav rau kuv cov me nyuam txog Vajtswv tej kev txiav txim, uas tau muaj rau cov Neeg Yudais, rau kuv cov me nyuam, raws li txhua yam uas Yaxayas tau hais, thiab kuv tsis sau tej ntawd cia.

7 Tiam sis saib seb, kuv yuav hais ntxiv txog kuv txoj kev qhia tej yuav muaj los yav tom ntej, raws li kuv txoj kev qhia meej; yog txoj kev qhia meej uas kuv paub tias yuav tsis muaj neeg to taub yuam kev; txawm li ntawd los, thaum lub caij uas yuav muaj raws li Yaxayas tej lus lawm neeg yuav paub meej txog tej yuav muaj los yav tom ntej, thaum lub caij uas tej ntawd yuav muaj dhau los mus.

8 Yog li ntawd, Yaxayas tej lus muaj nuj nqis rau noob neej, thiab tus uas xav tias nws cov lus tsis muaj nuj nqis, kuv yuav hais lus rau lawv cov no, thiab tseg tej lus no rau kuv cov neeg; vim kuv paub tias tej lus no yuav muaj nuj nqis heev rau lawv nyob rau hauv hnub nyoog kawg; vim nyob rau hnub ntawd lawv yuav to taub tej lus no; yog li ntawd, xwv kom yuav pab lawv kuv thiaj tau sau tej lus no.

9 Thiab ib yam li ib tiam neeg tau raug puas tsuaj nyob hauv cov Neeg Yudais vim txoj kev ua phem, ib yam li ntawd lawv tau raug puas tsuaj ntawm ib tiam neeg mus rau ib tiam raws li lawv tej kev ua phem; thiab lawv tsis tau muaj ib tug raug puas tsuaj uas tus Tswv cov yaj saub tsis tau qhia ua ntej rau lawv.

10 Yog li ntawd, tus Tswv cov yaj saub tau qhia lawv txog txoj kev puas tsuaj uas yuav los rau lawv, tom qab kiag uas kuv txiv tau ncaim Yeluxalees; txawm li ntawd los, lawv tseem ua lawv lub siab tawv qhawv; thiab raws li kuv txoj kev qhia tej yuav muaj los yav tom ntej lawv tau raug puas tsuaj, tsuas yog tshuav cov uas raug txhom coj mus ua qhev rau hauv Npanpiloos.

11 Thiab nim no kuv tau hais li no vim yog tus ntsuj plig uas nyob hauv kuv. Thiab txawm hais tias lawv tau raug coj mus lawm los lawv yuav rov qab los dua, thiab tau thaj av Yeluxalees ua lawv tug; yog li ntawd, tus Tswv yuav muab lawv txum tim rov qab los rau thaj av uas yog lawv qub txeeg qub teg dua.

12 Tiam sis, saib seb, lawv yuav muaj kev ua rog, thiab hnov lus paj lus cua txog kev ua rog; thiab thaum txog hnub uas Leej Txiv Tib Leeg Tub, muaj tseeb tiag, uas yog Leej Txiv ntawm lub ntuj thiab lub ntiaj teb, yuav ua nws tus kheej tshwm los rau lawv nyob hauv cev nqaij daim tawv, saib seb, lawv yuav xyeej nws, vim yog lawv tej kev ua phem, thiab lawv lub siab tawv, thiab lawv tej caj dab tawv qhawv.

13 Saib seb, lawv yuav muab nws ntsia rau saum ntoo khaub lig; thiab tom qab uas tau muab nws tso rau hauv ib lub ntxa pob zeb tau peb hnub lawm nws yuav sawv hauv qhov tuag rov qab los, nrog hwj chim kho tau mob nyob hauv nws ob txhais tis; thiab yuav cawm tag nrho cov uas ntseeg nws lub npe dim nyob rau hauv Vajtswv lub nceeg vaj. Yog li ntawd, kuv tus ntsuj plig zoo siab qhia tej uas yuav muaj los yav tom ntej ntsig txog nws, vim kuv tau pom nws lub neej, thiab kuv lub siab qhuas nws lub npe dawb huv.

14 Thiab saib seb yuav muaj tias tom qab tus Mexiyas tau sawv hauv qhov tuag rov los, thiab tau tshwm sim rau nws cov neeg, rau tag nrho cov uas yuav ntseeg nws lub npe, saib seb, Yeluxalees yuav raug puas tsuaj dua; vim kev txom nyem yuav raug lawv cov uas tawm tsam Vajtswv thiab cov neeg ntawm nws lub koom txoos.

15 Yog li ntawd, cov Neeg Yudais yuav tawg khiav ri niab mus rau txhua haiv neeg; muaj tseeb tiag, thiab Npanpiloos kuj yuav raug puas tsuaj thiab; yog li ntawd, lwm haiv neeg yuav ua rau cov Neeg Yudais tawg khiav ri niab.

16 Thiab tom qab lawv tau tawg khiav ri niab, thiab tus Tswv uas yog Vajtswv, los ntawm lwm haiv neeg, tau nplawm lawv ntau tiam neeg, muaj tseeb tiag, twb dhau ib tiam neeg mus rau ib tiam kom txog thaum yuav yaum tau lawv los ntseeg Khetos, Vajtswv Leej Tub, thiab txoj kev theej txhoj uas tsis muaj qhov kawg rau tib neeg txhua leej txhua tus—thiab thaum txog hnub uas lawv ntseeg Khetos, thiab teev tiam Leej Txiv los ntawm nws lub npe, nrog lub siab dawb thiab txhais tes huv, thiab tsis txhob tos ntsoov lwm tus Mexiyas ntxiv, ces, thaum ntawd, hnub ntawd yuav los uas yeej yuav tsum muaj li no hais tias lawv yuav ntseeg tej yam no.

17 Thiab tus Tswv yuav ncav nws txhais tes dua zaum ob los txum tim nws cov neeg tawm hauv lawv txoj kev poob zoo thiab txoj kev qaug. Yog li ntawd, nws yuav pib ua ib txoj hauj lwm zoo kawg nkaus thiab ib qho txuj ci xav tsis thoob nyob rau hauv noob neej.

18 Yog li ntawd, nws yuav coj nws tej lus los rau lawv, tej lus uas yuav txiav txim rau lawv thaum txog hnub kawg, vim tus Tswv yuav muab tej lus no rau lawv kom yaum lawv ntseeg tus Mexiyas tseeb, tus uas lawv tau xyeej; thiab kom yaum lawv ntseeg tias lawv tsis tas cia siab tos ntsoov ib tug Mexiyas los ntxiv, vim yuav tsis muaj ib tug los, tsuas yog yuav muaj tus Mexiyas cuav uas yuav dag ntxias cov neeg; vim tsuas muaj tib tug Mexiyas uas cov yaj saub tau hais, thiab tus Mexiyas ntawd yog tus uas cov Neeg Yudais xyeej.

19 Vim raws li cov yaj saub tej lus, tus Mexiyas yuav los rau pua xyoo txij li lub caij uas kuv txiv tau ncaim Yeluxalees; thiab raws li cov yaj saub tej lus, thiab Vajtswv tus tim tswv txoj lus, nws lub npe yuav hu ua Yexus Khetos, Vajtswv Leej Tub.

20 Thiab nim no, kuv cov kwv tij es, kuv tau qhia meej meej xwv kom nej thiaj tsis to taub yuam kev. Thiab ib yam li tus Tswv uas yog Vajtswv tseem muaj txoj sia nyob tus uas tau coj cov neeg Ixayees tawm tim lub teb chaws Iyiv los, thiab tau muab lub hwj chim rau Mauxes kom nws yuav tsum kho cov neeg tom qab tej nab muaj taug tom lawv, yog hais tias lawv yuav tsa qhov muag ntsia tus nab uas nws tau tsa sawv ntawm lawv xub ntiag, thiab kuj tau muab lub hwj chim rau nws xwv kom nws yuav ntaus tau lub pob zeb thiab dej yuav tawm hauv los; muaj tseeb tiag, saib seb kuv hais rau nej tias, xws li tej yam no twb muaj tseeb, thiab ib yam li tus Tswv uas yog Vajtswv tseem muaj txoj sia nyob, tsis muaj lwm lub npe nyob hauv qab ntuj no tsuas yog Yexus Khetos, tus uas kuv tau hais txog, uas yuav cawm tau neeg dim.

21 Yog li ntawd, yog vim li no tus Tswv uas yog Vajtswv thiaj tau cog lus rau kuv tias cov Neeg Nifais yuav ceev thiab hwm tej yam uas kuv sau tseg, thiab muab mus rau kuv cov tub ki, ntawm ib tiam neeg mus rau ib tiam, xwv kom yuav muaj raws li cov lus cog tseg rau Yauxej, hais tias nws cov tub ki yuav tsis muaj hnub piam sij yog tseem muaj lub ntiaj teb.

22 Yog li ntawd, tej yam no yuav mus ntawm ib tiam neeg mus rau ib tiam yog tseem muaj lub ntiaj teb; thiab tej yam no yuav mus raws li Vajtswv lub siab xav thiab lub siab nyiam; thiab tej haiv neeg uas txais tej yam no yuav raug txiav txim raws li tej lus uas tau sau cia.

23 Vim peb rau siab ntso sau ntawv, los yaum peb cov me nyuam, thiab peb cov kwv tij thiab, kom los ntseeg Khetos, thiab rov los nrog Vajtswv sib raug zoo; vim peb paub hais tias twb yog los ntawm txoj kev tshav ntuj peb thiaj tau txais kev cawm seej, tom qab peb tau ua txhua yam uas peb muaj peev xwm ua lawm.

24 Thiab, txawm hais tias peb ntseeg Khetos los, peb tseem ua raws li Mauxes txoj kev cai, thiab nyob khov kho cia siab tos ntsoov Khetos, mus txog thaum ua kom muaj raws li txoj kev cai lawm.

25 Vim yog lub hom phiaj no tus Tswv thiaj tau muab txoj kev cai; yog li ntawd, rau peb ces txoj kev cai twb tuag lawm, thiab vim yog peb txoj kev ntseeg peb thiaj muaj sia los ntawm Khetos; txawm li ntawd los peb tseem coj txoj kev cai vim yog tej lus txib.

26 Thiab peb hais txog Khetos, peb xyiv fab rau Khetos, peb qhia txog Khetos, peb qhia tej yuav muaj los yav tom ntej txog Khetos, thiab peb sau raws li peb tej lus qhia tej yuav muaj los yav tom ntej, xwv kom peb cov me nyuam yuav paub cia siab rau lub hauv paus twg kom txais kev zam txim rau lawv tej kev txhaum.

27 Yog li ntawd, peb hais txog txoj kev cai xwv kom peb cov me nyuam yuav paub tias txoj kev cai twb tuag lawm; thiab vim lawv paub tias txoj kev cai twb tuag lawm, lawv thiaj yuav cia siab tos ntsoov txoj sia uas yog los ntawm Khetos, thiab paub tias rau lub hom phiaj twg tus Tswv thiaj tau muab txoj kev cai. Thiab tom qab Khetos ua kom muaj raws li txoj kev cai, lawv thiaj yuav tsis ua lawv lub siab tawv qhawv tawm tsam nws thaum tsim nyog muab txoj kev cai tso tseg mus.

28 Thiab nim no saib seb, kuv cov neeg, nej yog ib co neeg tawv ncauj; yog li ntawd, kuv tau qhia meej meej rau nej, xwv kom nej thiaj tsis to taub yuam kev. Thiab tej lus uas kuv tau hais los yuav nyob ruaj nrees ua tim khawv nkaug nej; vim tej lus ntawd yeej qhia txaus txog txoj kev yog rau txhua tus neeg; vim txoj kev yog yeej yog ntseeg Khetos thiab tsis txhob xyeej nws; vim yog nej xyeej nws ces nej kuj xyeej cov yaj saub thiab xyeej txoj kev cai.

29 Thiab nim no saib seb, kuv hais rau nej tias txoj kev yog yeej yog ntseeg Khetos, thiab tsis txhob xyeej nws; thiab Khetos yog Ixayees tus Dawb Huv; yog li ntawd nej yuav tsum pe nws, thiab teev tiam nws kom kawg nej lub dag lub zog, thiab lub siab, thiab tag nrho nej tus ntsuj plig; thiab yog hais tias nej ua li no nej yeej yuav tsis raug ntiab tawm.

30 Thiab, npaum li uas tsim nyog ua, nej yuav tsum ua raws li Vajtswv tej kev ua thiab tej kab ke mus txog thaum ua kom muaj raws li txoj kev cai uas tau muab rau Mauxes.