1 Nim no peb yuav tig peb phau ceev xwm txheej rov qab mus rau Amalikhaiyas thiab cov uas tau khiav nrog nws mus rau hauv hav zoov; vim, saib seb, nws tau coj cov uas kam mus nrog nws, thiab mus rau pem thaj av Nifais nrog cov Neeg Lamas nyob, thiab tau txhaub cov Neeg Lamas kom npau taws tawm tsam Nifais cov neeg, cov Neeg Lamas tus vaj ntxwv thiaj tau xa ib zaj lus tshaj tawm thoob plaws rau tag nrho hauv nws thaj av, rau tag nrho nws cov neeg, kom lawv yuav tsum sib sau tuaj ua ke dua mus ua rog tawm tsam cov Neeg Nifais.

2 Thiab tau muaj tias thaum zaj lus tshaj tawm mus rau hauv lawv, lawv ntshai heev kawg nkaus li; muaj tseeb tiag, lawv ntshai ua rau tus vaj ntxwv tsis txaus siab, thiab lawv kuj ntshai mus ua rog tawm tsam cov Neeg Nifais tsam lawv ho poob lawv txoj sia mus. Thiab tau muaj tias lawv tsis kam, los sis lawv feem coob tsis kam mloog tus vaj ntxwv tej lus txib.

3 Thiab nim no tau muaj tias tus vaj ntxwv npau taws vim yog lawv txoj kev tsis mloog lus; yog li ntawd nws cia rau Amalikhaiyas yog tus saib xyuas feem ntawm nws cov tub rog uas kam ua raws li nws tej lus txib, thiab txib kom Amalikhaiyas cia li tawm mus thiab txhib kom lawv mus ua rog.

4 Nim no saib seb, qhov no twb yog qhov uas Amalikhaiyas xav tau; vim nws yog ib tug neeg zais siab ua phem heev yog li ntawd nws tau npaj tswv yim nyob hauv nws lub siab mus rho cov Neeg Lamas tus vaj ntxwv tawm ntawm nws lub rooj theej kiab.

5 Thiab nim no nws twb yog tus uas saib xyuas feem ntawm cov Neeg Lamas uas kam ua raws li tus vaj ntxwv hais; thiab nws nrhiav kev ua kom cov uas tsis mloog lus nyiam nws; yog li ntawd nws thiaj tawm mus rau tom qhov chaw uas hu ua Aunidas, vim tag nrho cov Neeg Lamas tau khiav mus rau tod; vim lawv pom tias cov tub rog tab tom tuaj, thiab, xav tias ntshe cov tub rog yog tuaj ua kom lawv puas tsuaj, yog li ntawd lawv thiaj khiav mus rau tom Aunidas, mus rau tom qhov chaw ntawm tej cuab yeej ua rog.

6 Thiab lawv tau tsa ib tug txiv neej los ua tus vaj ntxwv thiab tus thawj coj kav lawv, vim lawv tau txiav txim siab ruaj tias lawv tsis xav raug khoo kom mus tawm tsam cov Neeg Nifais.

7 Thiab tau muaj tias lawv tau sib sau tuaj ua ke rau saum ib lub ncov roob uas hu ua Eethipas, npaj tuaj ua rog.

8 Nim no Amalikhaiyas tsis xav ua rog nrog lawv raws li tus vaj ntxwv tej lus txib; tiam sis saib seb, twb yog nws txoj kev xav ua kom cov Neeg Lamas cov tub rog nyiam nws, xwv kom nws yuav tau los ua lawv tus thawj thiab rho tau tus vaj ntxwv tawm ntawm nws lub rooj theej kiab thiab txeeb tau lub nceeg vaj.

9 Thiab saib seb, tau muaj tias nws hais rau nws cov tub rog kom rub lawv tej tsev pheeb suab ntaub rau hauv lub hav uas nyob ze lub roob Eethipas.

10 Thiab tau muaj tias thaum tsaus ntuj nws xa ib pab neeg xa xov ntsiag to mus rau saum lub roob Eethipas, thov kom tus thawj ntawm cov uas nyob saum roob, uas lub npe hu ua Lihoothis, kom nws los rau nram taw roob, vim nws xav nrog nws tham.

11 Thiab tau muaj tias thaum Lihoothis tau txais tsab xov nws tsis kam mus rau nram taw roob. Thiab tau muaj tias Amalikhaiyas rov xa xov dua zaum ob, xav kom Lihoothis los nrad. Thiab tau muaj tias Lihoothis tsis kam; thiab nws tau xa xov dua zaum peb.

12 Thiab tau muaj tias thaum Amalikhaiyas pom tias nws coj tsis tau Lihoothis los pem roob los, nws mus rau pem roob, yuav luag txog ntawm Lihoothis lub yeej; thiab nws rov xa dua nws tsab xov zaum plaub mus rau Lihoothis, thov kom nws los, thiab thov kom nws coj nws cov tub zov nyas nrog nws.

13 Thiab tau muaj tias thaum Lihoothis thiab nws cov tub zov nyas tau los ntsib Amalikhaiyas, Amalikhaiyas xav kom Lihoothis thiab nws cov tub rog los nrad thaum hmo ntuj, thiab vij cov tub rog, uas tus vaj ntxwv tau muab rau nws saib xyuas, nyob hauv lawv tej tsev pheeb suab ntaub, thiab nws yuav coj lawv los rau hauv Lihoothis txhais tes, yog hais tias Lihoothis kam cia nws (Amalikhaiyas) ua tus thawj thib ob kav tag nrho cov tub rog.

14 Thiab tau muaj tias Lihoothis thiab nws cov tub rog tau los nrad thiab vij Amalikhaiyas cov tub rog, yog li ntawd ua ntej lawv tsim thaum sawv ntxov Lihoothis cov tub rog twb muab lawv vij tas.

15 Thiab tau muaj tias thaum lawv pom tias lawv raug vij tas, lawv tau thov Amalikhaiyas kom nws cia lawv los koom nrog lawv cov kwv tij, xwv kom lawv yuav tsis raug puas tsuaj. Nim no qhov no twb yog kiag qhov uas Amalikhaiyas xav tau.

16 Thiab tau muaj tias nws coj nws cov tub rog los rau hauv Lihoothis txhais tes, tsis yog raws li tus vaj ntxwv tej lus txib. Nim no qhov no twb yog qhov uas Amalikhaiyas xav tau, xwv kom nws yuav ua tau raws li nws tej tswv yim rho tus vaj ntxwv tawm ntawm nws lub rooj theej kiab.

17 Nim no twb yog cov Neeg Lamas txoj kab lis kev cai, yog tias lawv tus thawj coj raug tua lawm, yuav tsum tsa tus thawj coj thib ob los ua lawv tus thawj coj.

18 Thiab tau muaj tias Amalikhaiyas hais kom ib tug ntawm nws cov tub qhe muab tshuaj lom Lihoothis me me zuj zus ces nws tuag lawm.

19 Nim no, thaum Lihoothis tuag lawm, cov Neeg Lamas tsa Amalikhaiyas los ua lawv tus coj thiab lawv tus thawj coj.

20 Thiab tau muaj tias Amalikhaiyas taug kev nrog nws cov tub rog (vim nws ua tau li nws siab xav) mus rau tom thaj av Nifais, rau hauv lub nroog Nifais, uas yog lub tuam nroog.

21 Thiab tus vaj ntxwv nrog rau nws cov tub zov nyas tawm tuaj ntsib Amalikhaiyas, vim nws xav tias Amalikhaiyas tau ua raws li nws tej lus txib, thiab xav tias Amalikhaiyas sau tau ib pab tub rog coob heev mus ua rog tawm tsam cov Neeg Nifais.

22 Tiam sis saib seb, thaum tus vaj ntxwv tawm tuaj ntsib nws, Amalikhaiyas hais kom nws cov tub qhe mus ntsib tus vaj ntxwv. Thiab lawv mus thiab khoov rau ntawm tus vaj ntxwv xub ntiag, zoo li lawv hawm nws vim yog nws muaj hwj chim loj.

23 Thiab tau muaj tias tus vaj ntxwv cev nws txhais tes tuaj tsa lawv, raws li cov Neeg Lamas txoj kab lis kev cai, uas yog ib lub cim ntawm kev thaj yeeb, txoj kab lis kev cai uas lawv muab ntawm cov Neeg Nifais los.

24 Thiab tau muaj tias thaum nws tsa thawj tug sawv hauv av los, saib seb nws tib nkaug riam tshab plaws tus vaj ntxwv lub plawv; thiab nws vau rau hauv av.

25 Nim no tus vaj ntxwv cov tub qhe khiav; thiab Amalikhaiyas cov tub qhe tsa suab qw nrov nrov, hais tias:

26 Saib seb, tus vaj ntxwv cov tub qhe nkaug nws tshab plaws nws lub plawv, thiab nws tau vau thiab lawv tau khiav lawm; saib seb, tuaj thiab ntsia saib.

27 Thiab tau muaj tias Amalikhaiyas txib kom nws cov tub rog tawm mus thiab saib seb muaj dab tsi tshwm sim rau tus vaj ntxwv; thiab thaum lawv tuaj txog rau ntawm qhov chaw, thiab pom tus vaj ntxwv pw tsau nws cov ntshav, Amalikhaiyas ua txuj npau taws, thiab hais tias: Leej twg uas hlub tus vaj ntxwv, cia nws tawm mus, thiab raws nws cov tub qhe qab kom tua tau lawv.

28 Thiab tau muaj tias tag nrho lawv cov uas hlub tus vaj ntxwv, thaum lawv hnov cov lus no lawm, tawm los thiab mus raws tus vaj ntxwv cov tub qhe qab.

29 Nim no thaum tus vaj ntxwv cov tub qhe pom ib pab tub rog raws lawv qab, lawv poob siab nthav dua, thiab khiav mus rau hauv hav zoov, thiab los rau hauv thaj av Xalahelas thiab los koom nrog Amoos cov neeg.

30 Thiab cov tub rog uas mus raws lawv qab tau rov qab los, vim mus raws tsis tau lawv; thiab yog li ntawd Amalikhaiyas, los ntawm nws txoj kev dag ntxias, tau ua rau cov neeg tso siab rau nws.

31 Thiab tau muaj tias hnub tom qab nws nkag mus rau hauv lub nroog Nifais nrog nws cov tub rog, thiab muab lub nroog los ua nws tug.

32 Thiab nim no tau muaj tias tus niam vaj ntxwv, thaum nws hnov tias tus vaj ntxwv raug tua lawm—vim Amalikhaiyas tau xa ib co neeg xa xov mus qhia tus niam vaj ntxwv tias tus vaj ntxwv raug nws cov tub qhe tua tuag lawm, hais tias nws tau raws lawv qab mus nrog nws cov tub rog, tiam sis raws tsis tau, thiab lawv khiav dim lawm—

33 Yog li ntawd, thaum tus niam vaj ntxwv tau txais tsab xov no nws xa xov mus rau Amalikhaiyas, xav kom nws txhob tua cov neeg hauv lub nroog; thiab tus niam vaj ntxwv kuj xav kom Amalikhaiyas mus ntsib nws; thiab nws kuj thov kom Amalikhaiyas coj tim khawv nrog nws mus ua tim khawv ntsig txog tus vaj ntxwv txoj kev tuag.

34 Thiab tau muaj tias Amalikhaiyas coj tus tub qhe uas tua tus vaj ntxwv, thiab tag nrho cov uas nrog nws, thiab mus ntsib tus niam vaj ntxwv, mus rau ntawm qhov chaw uas nws zaum; thiab lawv txhua tus ua tim khawv rau nws hais tias tus vaj ntxwv raug nws cov tub qhe tua; thiab lawv kuj hais tias: Tus vaj ntxwv cov tub qhe tau khiav lawm; qhov no tsis yog ua tim khawv hais tias lawv txhaum los? Thiab xws li no lawv ua rau tus niam vaj ntxwv txaus siab ntsig txog tus vaj ntxwv txoj kev tuag.

35 Thiab tau muaj tias Amalikhaiyas nrhiav kev ua kom tus niam vaj ntxwv nyiam nws, thiab yuav nws los ua poj niam; thiab yog li ntawd los ntawm nws txoj kev dag ntxias, thiab los ntawm nws cov tub qhe uas txawj dag txoj kev pab, nws txeeb tau ua vaj ntxwv; muaj tseeb tiag, cov neeg lees paub hais tias nws yog tus vaj ntxwv nyob thoob plaws tag nrho hauv thaj av, nyob hauv tag nrho cov Neeg Lamas, uas yog muaj cov Neeg Lamas thiab cov Neeg Lemu-ees thiab cov Neeg Ixama-ees, thiab tag nrho cov Neeg Nifais uas ntxeev siab, txij thaum Nifais kav los txog lub sij hawm no.

36 Nim no cov neeg ntxeev siab no, twb tau txais cov lus qhuab qhia tib yam thiab kev kawm ntawm cov Neeg Nifais tib yam, muaj tseeb tiag, twb tau kawm kev paub txog tus Tswv los tib yam, txawm li ntawd los, yeej txawv kawg uas, tsis ntev tom qab lawv ntxeev siab lawv hloov los ua neeg siab tawv thiab tsis kam hloov siab lees txim, thiab ua neeg qus, phem thiab nyaum tshaj cov Neeg Lamas—txaus siab hlo txais yuav cov Neeg Lamas tej kab lis kev cai; qhib kev lug rau kev tub nkeeg, thiab rau txhua yam kev sib daj sib deev; muaj tseeb tiag, hnov qab tag nrho txog tus Tswv lawv tus Vajtswv.