1 Thiab tau muaj tias cov neeg Amalej thiab cov neeg Amuloos thiab cov Neeg Lamas cov uas nyob hauv thaj av Amuloos, thiab cov uas nyob hauv thaj av Helas, thiab cov uas nyob hauv thaj av Yeluxalees, thiab lub ntsiab yog li no, cov uas nyob hauv txhua thaj av ib puag ncig, cov uas tsis tau hloov siab los ntseeg thiab cov uas tsis tau ris lub npe Eethais-Nifais-Lihais, raug cov neeg Amalej thiab cov neeg Amuloos txhaub kom npau taws tawm tsam lawv cov kwv tij.

2 Thiab lawv txoj kev ntxub ntxaug iab heev rau lawv cov kwv tij, npaum li uas ua rau lawv pib ntxeev siab rau lawv tus vaj ntxwv, ua rau lawv tsis xav kom nws ua lawv tus vaj ntxwv; yog li ntawd, lawv thiaj nqa cuab yeej ua rog tawm tsam cov neeg Eethais-Nifais-Lihais.

3 Nim no tus vaj ntxwv tau muab lub nceeg vaj rau nws tus tub kav, thiab nws muab nws tus tub lub npe hu ua Eethais-Nifais-Lihais.

4 Thiab tus vaj ntxwv tuag nyob rau tib xyoos thaum uas cov Neeg Lamas pib npaj ua rog tawm tsam Vajtswv cov neeg.

5 Nim no thaum Amoos thiab nws cov kwv tij thiab tag nrho cov uas tuaj nrog nws pom cov Neeg Lamas tej kev npaj ua kom lawv cov kwv tij puas tsuaj, lawv tawm tuaj rau ntawm thaj av Midias, thiab nyob rau qhov chaw ntawd Amoos sib ntsib nrog tag nrho nws cov kwv tij; thiab tawm ntawm qhov chaw ntawd lawv mus rau tom thaj av Ixama-ees xwv kom lawv yuav muaj ib lub rooj sab laj nrog Lamaunais thiab nrog nws tus kwv Eethais-Nifais-Lihais, saib lawv yuav ua li cas tiv thaiv lawv tus kheej tawm tsam cov Neeg Lamas.

6 Nim no ntawm cov uas tau hloov siab los ntseeg tus Tswv tsis muaj leej twg yuav kam nqa cuab yeej ua rog tawm tsam lawv cov kwv tij; tsis kam ua li ntawd, lawv twb tsis kam npaj dab tsi hlo li rau kev ua rog; muaj tseeb tiag, thiab lawv tus vaj ntxwv los kuj txib kom lawv tsis txhob nqa cuab yeej ua rog tawm tsam lawv cov kwv tij.

7 Nim no, cov no yog cov lus uas nws hais rau cov neeg ntsig txog qhov teeb meem ntawd: Kuv ua kuv tus Vajtswv tsaug, kuv cov neeg uas kuv hlub, vim peb tus Vajtswv uas muaj hwj chim muaj lub siab zoo xa peb cov kwv tij no, uas yog cov Neeg Nifais, tuaj rau peb tuaj qhuab qhia rau peb, thiab ua rau peb paub txog tej kab lis kev cai phem ntawm peb cov yawg koob.

8 Thiab saib seb, kuv ua peb tus Vajtswv uas muaj hwj chim tsaug uas nws tau muab ib feem ntawm nws tus Ntsuj Plig rau peb ua kom peb lub siab muag, uas ua rau peb pib sib raug zoo nrog cov kwv tij no, uas yog cov Neeg Nifais.

9 Thiab saib seb, kuv kuj ua kuv tus Vajtswv tsaug, vim los ntawm txoj kev pib sib raug zoo no peb thiaj paub txog peb tej kev txhaum, thiab txog ntau yam kev tua neeg uas peb tau ua.

10 Thiab kuv kuj ua kuv tus Vajtswv tsaug, muaj tseeb tiag, kuv tus Vajtswv uas muaj hwj chim, vim nws tau pub rau peb xwv kom peb yuav hloov siab lees txim rau tej yam no, thiab vim nws kuj tau zam txim rau peb tej kev txhaum thiab kev tua neeg ntau uas peb tau ua, thiab tau tshem peb lub txim tawm hauv peb lub siab mus, los ntawm tej yam zoo uas nws Leej Tub ua.

11 Thiab nim no saib seb, kuv cov kwv tij es, vim peb yuav tsum ua txhua yam uas peb muaj peev xwm ua (vim peb yog cov uas yuam kev loj tshaj plaws ntawm tag nrho noob neej) los hloov siab lees txim rau tag nrho peb tej kev txhaum thiab kev tua neeg ntau uas peb tau ua, thiab los ua kom Vajtswv tshem tej kev txhaum ntawd tawm hauv peb lub siab mus, vim peb yuav tsum ua txhua yam uas peb muaj peev xwm ua los hloov siab lees txim txaus nkaus rau Vajtswv xwb nws thiaj yuav tshem peb tej kev tsuas mus—

12 Nim no, kuv cov kwv tij uas kuv hlub kawg nkaus, vim Vajtswv twb tshem peb tej kev tsuas mus lawm, thiab peb cov ntaj twb ci heev, yog li ntawd cia peb tsis txhob tsuas peb cov ntaj ntxiv nrog peb cov kwv tij cov ntshav.

13 Saib seb, kuv hais rau nej tias, Txhob ua li ntawd, cia peb ceev peb cov ntaj xwv kom peb cov ntaj tsis txhob tsuas nrog peb cov kwv tij cov ntshav; vim yog tias peb rov tsuas peb cov ntaj dua, tej zaum yuav tsis muaj peev xwm ntxuav kom peb cov ntaj rov ci dua los ntawm peb tus Vajtswv uas muaj hwj chim Leej Tub cov ntshav, uas yuav nrog rau txoj kev theej txhoj ntawm peb tej kev txhaum.

14 Thiab Vajtswv tus uas muaj hwj chim tau muaj kev hlub tshua rau peb, thiab ua tej yam no rau peb paub xwv kom peb tsis txhob piam sij; muaj tseeb tiag, thiab nws tau ua tej yam no rau peb paub ua ntej, vim nws hlub peb cov ntsuj plig ib yam li nws hlub peb cov me nyuam; yog li ntawd, nrog nws txoj kev hlub tshua nws los xyuas peb los ntawm nws cov tim tswv, xwv kom yuav qhia tau rau peb thiab tej tiam neeg yav tom ntej paub txog txoj hau kev cawm seej.

15 Auj, peb tus Vajtswv txoj kev hlub tshua loj kawg nkaus! Thiab nim no saib seb, vim peb yuav tsum ua npaum li peb muaj peev xwm ua es thiaj tshem tau peb tej kev tsuas tawm ntawm peb mus, thiab ua tau rau peb cov ntaj ci, cia peb muab peb cov ntaj zais cia xwv kom yuav ceev tau peb cov ntaj ci, ua tim khawv rau peb tus Vajtswv thaum txog hnub kawg, los sis thaum hnub uas nws coj peb los sawv ntawm nws xub ntiag txiav txim rau peb, hais tias txij thaum nws faib nws txoj lus rau peb thiab ua rau peb thiaj li dawb huv peb twb tsis tau tsuas peb cov ntaj nyob hauv peb cov kwv tij cov ntshav.

16 Thiab nim no, kuv cov kwv tij, yog peb cov kwv tij nrhiav kev ua kom peb puas tsuaj, saib seb, peb yuav muab peb cov ntaj zais cia, muaj tseeb tiag, peb twb yuav muab peb cov ntaj faus tob cia rau hauv av, xwv kom yuav ceev tau peb cov ntaj ci, ua tim khawv thaum txog hnub kawg tias peb twb tsis tau siv peb cov ntaj; thiab yog tias peb cov kwv tij ua rau peb puas tsuaj, saib seb, peb yuav mus cuag peb tus Vajtswv thiab yuav txais kev cawm dim.

17 Thiab nim no tau muaj tias thaum tus vaj ntxwv tau xaus tej lus hais no, thiab tag nrho cov neeg sib sau tuaj ua ke, lawv nqa lawv cov ntaj, thiab tag nrho tej cuab yeej ua rog uas siv ua rau tib neeg ntshav nrog, thiab lawv muab tej cuab yeej ntawd faus tob rau hauv av.

18 Thiab lawv ua li no, vim raws li lawv xav qhov no yog kev ua tim khawv rau Vajtswv, thiab rau tib neeg, hais tias lawv yuav tsis siv cuab yeej ua rog ua rau tib neeg ntshav nrog ntxiv lawm; thiab lawv ua li no, lawv ua pov thawj thiab khi lus nrog Vajtswv, hais tias lawv xum tso lawv txoj sia tseg tshaj qhov uas ua rau lawv cov kwv tij ntshav nrog; thiab lawv xum muab pub rau ib tug kwv tij tshaj qhov uas txeeb ib yam dab tsi ntawm nws; thiab lawv xum siv lawv txhais tes ua hauj lwm kub siab lug tshaj qhov uas ua lub neej tub nkeeg.

19 Thiab yog li ntawd peb pom tias, thaum cov Neeg Lamas no los ntseeg thiab paub qhov tseeb, lawv nyob ruaj nrees, thiab xum raug kev txom nyem txawm tias yuav tuag kiag tshaj qhov uas yuav ua txhaum; thiab yog li no peb pom tias lawv faus lawv tej cuab yeej ntawm kev thaj yeeb, los sis lawv faus tej cuab yeej ua rog, kom muaj kev thaj yeeb.

20 Thiab tau muaj tias lawv cov kwv tij, cov Neeg Lamas, tau npaj ua rog, thiab tuaj rau pem thaj av Nifais nrog lub hom phiaj xav ua kom tus vaj ntxwv puas tsuaj, thiab muab lwm tus pauv nws qhov chaw los kav, thiab ua kom cov neeg Eethais-Nifais-Lihais puas tsuaj tawm ntawm thaj av mus.

21 Nim no thaum cov neeg pom tias cov Neeg Lamas tab tom tuaj tawm tsam lawv, lawv tawm mus ntsib cov Neeg Lamas, thiab pw pua lua rau hauv av rau ntawm lawv xub ntiag, thiab pib hu txog tus Tswv lub npe; thiab thaum lawv tab tom ua li no cov Neeg Lamas pib tawm tsam lawv, thiab pib xuas ntaj tua lawv.

22 Thiab yog li ntawd vim tsis muaj kev tiv thaiv, cov Neeg Lamas tua lawv tuag ib txhiab thiab tsib leeg; thiab peb paub tias lawv tau koob hmoov, vim lawv twb tau mus nrog lawv tus Vajtswv nyob.

23 Nim no thaum cov Neeg Lamas pom tias lawv cov kwv tij tsis khiav ntawm rab ntaj mus li, thiab lawv tsis tig mus rau sab xis los yog sab laug, tiam sis lawv cia li pw ntog thiab piam sij, thiab qhuas Vajtswv txawm tias tab tom raug piam sij los ntawm rab ntaj—

24 Nim no thaum cov Neeg Lamas pom li no lawv thiaj tsum tsis tua lawv lawm; thiab muaj coob leej uas ua rau lawv lub siab puv npo rau cov kwv tij uas tau tuag los ntawm rab ntaj, vim lawv hloov siab lees txim rau tej uas lawv tau ua.

25 Thiab tau muaj tias lawv muab lawv tej cuab yeej ua rog tso pov tseg, thiab lawv tsis kam nqa tej cuab yeej ntawd ntxiv, vim lawv tu siab rau tej kev tua neeg uas lawv tau ua; lawv pw ntog ib yam li lawv cov kwv tij, vam khom rau tej kev hlub tshua ntawm cov uas tsa ntaj tua lawv.

26 Thiab tau muaj tias nyob rau hnub ntawd muaj neeg los koom nrog Vajtswv cov neeg coob tshaj cov uas raug tua; thiab cov uas raug tua puav leej yog neeg ncaj ncees, yog li ntawd peb tsis muaj dab tsi txhawj tiam sis paub tias lawv twb txais kev cawm dim.

27 Thiab cov ua raug tua twb tsis muaj ib tug uas yog neeg phem; tiam sis coj tau coob tshaj ib txhiab leej los paub txog qhov tseeb; yog li no peb pom hais tias tus Tswv siv tej txoj kev ntau kom coj tau kev cawm seej los rau nws cov neeg.

28 Nim no feem coob ntawm cov Neeg Lamas uas tua lawv cov kwv tij tuag coob leej yog cov neeg Amalej thiab cov neeg Amuloos, cov uas feem coob yog raws li tus txheej txheem ntawm Nihos.

29 Nim no, ntawm cov uas los koom nrog tus Tswv cov neeg, tsis muaj ib tug uas yog neeg Amalej los sis neeg Amuloos, los sis tsis muaj cov uas yog tib txoj kev ntseeg li Nihos, tiam sis lawv yog kiag Lamas thiab Lemu-ees cov xeeb leej xeeb ntxwv.

30 Thiab xws li no peb paub meej hais tias, tom qab Vajtswv tus Ntsuj Plig tau ua rau ib co neeg pom kev ib zaug, thiab ua rau lawv paub ntau yam ntsig txog kev ncaj ncees, thiab tom qab ntawd lawv poob mus rau kev txhaum thiab kev ua txhaum, lawv yuav ua siab tawv dua li qub, thiab xws li no lawv lub neej yuav phem tshaj qhov uas yog lawv ib txwm tsis tau paub tej yam no dua li.