1 Nim no tau muaj tias nyob hauv xyoo thib rau ntawm cov neeg txiav txim txoj kev kav Nifais cov neeg, tsis muaj kev sib cav sib ceg los sis kev ua rog nyob hauv thaj av Xalahelas;

2 Tiam sis cov neeg raug kev txom nyem, muaj tseeb tiag, txom nyem heev vim yog lawv cov kwv tij coob leej tau tuag, thiab vim yog lawv tej yaj thiab tej tsiaj txhu raug puas tsuaj, thiab vim yog lawv tej qoob loos uas raug tsuj lwj liam thiab cov Neeg Lamas ua kom puas tsuaj.

3 Thiab lawv tej kev txom nyem loj heev uas ua tau rau txhua tus neeg quaj ntsuag; thiab lawv ntseeg tias tej kev txom nyem ntawd twb yog Vajtswv tej kev txiav txim uas tau xa los rau lawv vim yog lawv tej kev phem thiab lawv tej kev qias; yog li ntawd tej kev txiav txim ntawd ua rau lawv tsim dheev los nco txog lawv tej dej num.

4 Thiab lawv pib txhim tsa lub koom txoos zoo dua ntxiv; muaj tseeb tiag, thiab coob leej tau ua kev cai raus dej nyob hauv cov dej Xidoos thiab los koom rau Vajtswv lub koom txoos; muaj tseeb tiag, lawv tau ua kev cai raus dej los ntawm Amas txhais tes, tus uas nws txiv Amas txhais tes tau tsa los ua tus pov thawj hlob saib xyuas cov neeg ntawm lub koom txoos.

5 Thiab tau muaj tias nyob hauv xyoo thib xya ntawm cov neeg txiav txim txoj kev kav, tau muaj kwv yees li peb txhiab tsib puas leej uas sib sau lawv tus kheej los rau hauv Vajtswv lub koom txoos thiab tau los ua kev cai raus dej. Thiab xws li no tau xaus xyoo thib xya ntawm cov neeg txiav txim txoj kev kav Nifais cov neeg; thiab tau muaj kev thaj yeeb tsis tu ncua nyob tag nrho thaum lub caij ntawd.

6 Thiab tau muaj tias nyob hauv xyoo thib yim ntawm cov neeg txiav txim txoj kev kav, cov neeg ntawm lub koom txoos pib muab hlob zuj zus, vim yog lawv tej kev nplua nuj heev, thiab lawv tej ntaub kab uas zoo, thiab lawv tej ntaub npuag, thiab vim yog lawv tej yaj coob thiab tsiaj txhu, thiab lawv tej kub thiab lawv tej nyiaj dawb, thiab txhua yam khoom muaj nuj nqis, uas lawv tau los ntawm lawv txoj kev ua hauj lwm hnyav; thiab hais txog tag nrho tej yam no lawv khav theeb vim lawv qhov muag muab hlob, vim lawv pib hnav tej ris tsho uas kim kim.

7 Nim no qhov no yog qhov uas ua rau Amas nyuaj siab ntau, muaj tseeb tiag, thiab ua rau coob leej ntawm cov neeg uas Amas tau tsa los ua xib hwb, thiab pov thawj, thiab txwj laug rau lub koom txoos; muaj tseeb tiag, lawv coob leej tu siab heev rau txoj kev phem uas lawv tau pom pib muaj nyob hauv lawv cov neeg.

8 Vim lawv pom thiab ntsia nrog txoj kev tu siab heev tias cov neeg ntawm lub koom txoos pib khav theeb vim lawv qhov muag muab hlob, thiab tso lawv lub siab rau kev nplua nuj thiab rau tej khoom tsis muaj nuj nqis ntawm lub ntiaj teb, ua rau lawv pib muaj kev ntxub ntxaug, ib leeg rau ib leeg, thiab lawv pib tsim txom cov uas tsis ntseeg raws li lawv lub siab xav thiab siab nyiam.

9 Thiab xws li no, nyob hauv xyoo thib yim ntawm cov neeg txiav txim txoj kev kav no, pib muaj kev sib cav sib ceg heev hauv cov neeg ntawm lub koom txoos; muaj tseeb tiag, muaj kev ntshaw luag tug, thiab kev kub ntxhov, thiab kev xav ua kom lwm tus puas tsuaj, thiab kev tsim txom, thiab kev muab hlob, uas tseem muab hlob tshaj cov uas tsis tau zwm rau Vajtswv lub koom txoos.

10 Thiab xws li no tau xaus xyoo thib yim ntawm cov neeg txiav txim txoj kev kav; thiab cov ntseeg txoj kev phem yog ib yam cav loj dawm taw rau cov uas tsis tau zwm rau lub koom txoos; thiab xws li no txoj kev vam meej ntawm lub koom txoos pib poob zuj zus.

11 Thiab tau muaj tias nyob rau thaum pib xyoo thib cuaj, Amas pom txoj kev phem ntawm cov ntseeg thiab nws kuj pom tias cov ntseeg tus yam ntxwv pib coj cov uas tsis ntseeg mus ua ib qho kev qias tas ib qho tuaj, xws li no yuav coj kev puas tsuaj los rau cov neeg.

12 Muaj tseeb tiag, nws pom kev tsis sib txig ntau nyob hauv cov neeg, uas muaj ib txhia khav lawv tus kheej nrog lawv txoj kev muab hlob, ntxub lwm tus, tig mus tsis kam pab cov neeg txom nyem thiab cov neeg liab qab thiab cov uas tshaib plab, thiab cov uas nqhis dej, thiab cov uas muaj mob thiab txom nyem.

13 Nim no qhov no yog ib qho uas ua kom muaj kev quaj nyiav heev nyob hauv cov neeg, thiab muaj ib txhia ho txo lawv lub hwj chim, pab cov txom nyem uas xav tau lawv txoj kev pab, xws li faib lawv tej khoom rau cov neeg pluag thiab cov txom nyem, pub rau cov tshaib plab noj, thiab nyiaj txhua yam kev txom nyem, vim txoj kev ntseeg Khetos, tus uas yuav los raws li lub txiaj ntsim qhia tau tej yuav muaj los yav tom ntej;

14 Cia siab tos ntsoov rau hnub ntawd, lawv thiaj tau txais txoj kev zam txim rau lawv tej kev txhaum li no; thiab muaj kev xyiv fab puv npo vim yog txoj kev sawv rov los ntawm cov tuag, raws li Yexus Khetos lub siab xav thiab lub hwj chim thiab txoj kev cawm dim ntawm tej hlua ntawm txoj kev tuag.

15 Thiab nim no tau muaj tias Amas, vim nws pom tej kev txom nyem ntawm cov neeg uas txo hwj chim coj raws li Vajtswv, thiab tej kev tsim txom ntau uas yog nws cov neeg uas tseem tshuav muab los tsuam rau saum lawv, thiab vim nws pom tag nrho lawv tej kev tsis sib txig, pib tu siab heev; txawm li ntawd los tus Tswv tus Ntsuj Plig tsis tau tso nws tseg.

16 Thiab nws xaiv ib tug txiv neej uas muaj tswv yim nyob hauv cov txwj laug ntawm lub koom txoos, thiab muab hwj chim rau nws raws li cov neeg lub suab, kom nws muaj hwj chim tsa tej kev cai raws li tej kev cai uas tau muab lawm, thiab siv tej kev cai ntawd los yuam raws li cov neeg tej kev phem thiab tej kev txhaum.

17 Nim no tus txiv neej no lub npe hu ua Nifaihas, thiab Amas muab nws tsa ua tus thawj txiav txim; thiab nws zaum hauv lub rooj txiav txim los txiav txim thiab kav cov neeg.

18 Nim no Amas tsis muab lub luag hauj lwm ua pov thawj hlob saib xyuas lub koom txoos rau nws, tiam sis Amas cia txoj hauj lwm ua pov thawj hlob rau nws tus kheej; tiam sis nws muab lub rooj txiav txim rau Nifaihas.

19 Thiab nws ua li no xwv kom nws tus kheej thiaj tau tawm mus rau hauv nws cov neeg, los sis rau hauv Nifais cov neeg, xwv kom nws tau tshaj tawm Vajtswv txoj lus rau lawv, txhaub kom lawv nco txog lawv txoj hauj lwm, thiab xwv kom nws yuav rhuav tshem tau, tag nrho tej kev muab hlob thiab kev txawj ntxias thiab tag nrho tej kev sib cav sib ceg uas nyob nrog nws cov neeg, los ntawm Vajtswv txoj lus, vim nws tsis pom ib txoj kev twg uas nws yuav pab tau lawv tsuas yog tawm tsam lawv nrog tej lus tim khawv tseeb tseeb xwb.

20 Thiab yog li ntawd thaum pib xyoo thib cuaj ntawm cov neeg txiav txim txoj kev kav cov neeg Nifais, Amas muab lub rooj txiav txim rau Nifaihas, thiab muab nws tus kheej tshwj tag nrho rau lub pov thawj hwj hlob ntawm Vajtswv tus txheej txheem dawb huv, rau kev ua tim khawv txog txoj lus, raws li lub txiaj ntsim txais tau kev tshwm sim thiab qhia tau tej yuav muaj los yav tom ntej.