1 Nim no tau muaj tias tom qab uas Amulej tau xaus tej lus no lawm, lawv ncaim ntawm cov neeg coob coob thiab los rau hauv thaj av Yesoos.

2 Muaj tseeb tiag, thiab tag nrho cov kwv tij, tom qab lawv tau tshaj tawm txoj lus rau cov Neeg Xaulas, kuj tau los rau hauv thaj av Yesoos.

3 Thiab tau muaj tias tom qab cov uas nto koob nto npe ntawm cov Neeg Xaulas tau sab laj ua ke ntsig txog tej lus uas Amas tau tshaj tawm rau lawv, lawv npau taws vim yog txoj lus, vim txoj lus rhuav lawv lub tom txwv; yog li ntawd lawv tsis kam mloog tej lus.

4 Thiab lawv xa neeg thiab sib sau tag nrho cov neeg uas nyob thoob plaws thaj av tuaj ua ke, thiab sab laj nrog lawv ntsig txog tej lus uas tau hais lawm.

5 Nim no lawv cov nom tswv thiab lawv cov pov thawj thiab lawv cov xib hwb tsis pub cov neeg paub txog lawv lub hom phiaj; yog li ntawd lawv paub twj ywm txog tag nrho cov neeg lub siab xav.

6 Thiab tau muaj tias tom qab lawv paub txog tag nrho cov neeg lub siab xav, cov uas nyiam tej lus uas Amas thiab nws cov kwv tij tau hais raug muab ntiab tawm ntawm thaj av; thiab lawv muaj coob; thiab lawv kuj tau los rau hauv thaj av Yesoos.

7 Thiab tau muaj tias Amas thiab nws cov kwv tij tau qhuab qhia lawv.

8 Nim no cov Neeg Xaulas npau taws rau Amoos cov neeg uas nyob hauv Yesoos thiab cov Neeg Xaulas tus thawj coj, vim nws yog ib tug neeg phem heev, xa xov mus rau Amoos cov neeg kom lawv cia li muab cov neeg uas los pem cov Neeg Xaulas los ntiab tawm ntawm Amoos cov neeg thaj av.

9 Thiab nws hais ntau yam lus tsiv tsiv tawm tsam lawv. Thiab nim no Amoos cov neeg tsis ntshai lawv tej lus; yog li ntawd lawv tsis ntiab lawv tawm, tiam sis lawv txais tos tag nrho tej neeg pluag ntawm cov Neeg Xaulas uas los rau hauv lawv; thiab lawv pub mov rau lawv noj, thiab muab ris tsho rau lawv hnav, thiab muab av ua qub txeeg qub teg rau lawv; thiab pab lawv raws li lawv tej kev txom nyem.

10 Nim no qhov no ua rau cov Neeg Xaulas npau taws tawm tsam Amoos cov neeg, thiab lawv pib sib koom nrog cov Neeg Lamas thiab txhaub kom lawv npau taws tawm tsam Amoos cov neeg.

11 Thiab xws li no cov Neeg Xaulas thiab cov Neeg Lamas pib npaj ua rog tawm tsam Amoos cov neeg, thiab kuj tawm tsam cov Neeg Nifais.

12 Thiab xyoo thib kaum xya ntawm cov neeg txiav txim txoj kev kav cov Neeg Nifais tau xaus li no.

13 Thiab Amoos cov neeg tau tawm ntawm thaj av Yesoos, thiab los rau hauv thaj av Melej, thiab cia kom muaj chaw hauv thaj av Yesoos rau cov Neeg Nifais tej tub rog nyob, xwv kom lawv tau sib tawm tsam nrog cov Neeg Lamas tej tub rog thiab cov Neeg Xaulas tej tub rog; thiab xws li no tau pib ib npluav rog ntawm cov Neeg Lamas thiab cov Neeg Nifais, nyob hauv xyoo thib kaum yim ntawm cov neeg txiav txim txoj kev kav; thiab yuav hais txog lawv tej kev ua rog tom ntej no mus.

14 Thiab Amas, thiab Amoos, thiab lawv cov kwv tij, thiab Amas ob tug tub rov qab los rau hauv thaj av Xalahelas, tom qab lawv ua cuab yeej nyob hauv Vajtswv txhais tes uas coj tau coob leej ntawm cov Neeg Xaulas los rau kev hloov siab lees txim; thiab tag nrho cov uas coj tau los hloov siab lees txim, cov Neeg Xaulas uas tsis ncaj ncees muab lawv raws tawm ntawm lawv thaj av; tiam sis lawv twb muaj av nyob hauv thaj av Yesoos ua lawv qub txeeg qub teg, thiab lawv tau nqa tej cuab yeej ua rog tiv thaiv lawv tus kheej, thiab lawv cov poj niam, thiab cov me nyuam, thiab lawv thaj av.

15 Nim no Amas, vim nws tu siab heev rau nws cov neeg tej kev ua phem, muaj tseeb tiag rau tej kev ua rog, thiab tej kev ua rau nqaij ntuag ntshav nrog, thiab tej kev sib cav sib ceg uas nyob hauv lawv; thiab vim nws tau mus tshaj tawm txoj lus, los sis Vajtswv tau xa nws mus tshaj tawm txoj lus, rau tag nrho cov neeg nyob hauv txhua lub nroog; thiab vim nws pom tias cov neeg lub siab pib tawv tuaj, thiab lawv pib npau taws vim yog txoj kev nruj ntawm txoj lus, nws tu siab heev kawg nkaus li.

16 Yog li ntawd, nws thiaj hais kom nws cov tub tuaj sib sau ua ke, xwv kom nws yuav txib tau lawv txhua tus, nyias muaj nyias, ntsig txog tej uas hais txog kev ncaj ncees. Thiab peb twb muaj ib zaj txog nws tej lus txib, uas nws muab rau lawv raws li nws tus kheej phau ceev xwm txheej.