1 Saib seb, nim no tau muaj tias tsis ntev tom qab uas Maulaunais xa nws tsab ntawv mus rau tus thawj tswv xeev, nws tau txais ib tsab ntawv ntawm Pehaulas, tus thawj tswv xeev. Thiab cov no yog cov lus uas nws tau txais:

2 Kuv, Pehaulas, tus uas yog tus thawj tswv xeev ntawm thaj av no, xa cov lus no tuaj rau Maulaunais, tus uas yog tus thawj hau rog kav cov tub rog. Saib seb, kuv hais rau koj, Maulaunais, hais tias kuv yeej tsis xyiv fab rau nej tej kev txom nyem loj, muaj tseeb tiag, qhov no ua rau kuv nyuaj siab heev.

3 Tiam sis saib seb, yeej muaj cov uas xyiv fab rau nej tej kev txom nyem, muaj tseeb tiag, lawv thiaj tau sawv ntxeev siab tawm tsam kuv, thiab tawm tsam kuv cov neeg uas yog neeg ywj pheej, muaj tseeb tiag, thiab cov uas tau sawv ntxeev siab mas muaj coob heev.

4 Thiab twb yog cov uas nrhiav kev txeeb lub rooj txiav txim ntawm kuv mus uas yog cov uas ua txoj kev ua phem loj no; vim lawv siv lus dag ntxias ntau, thiab lawv ntxias tau ntau tus neeg lub siab mus, uas yuav ua rau peb raug txom nyem loj heev; lawv tau tuav tseg peb tej khoom noj khoom siv thiab tau hem peb cov neeg ywj pheej xwv kom lawv tsis tuaj cuag koj.

5 Thiab saib seb, lawv tau raws kuv khiav tawm ntawm lawv mus, thiab kuv tau khiav mus rau tom thaj av Nkide-oos, nrog ntau tus tub rog npaum li uas kuv nrhiav tau.

6 Thiab saib seb, kuv tau xa ib zaj lus tshaj tawm mus thoob plaws rau thaj av sab no; thiab saib seb, txhua hnub cov neeg ywj pheej tab tom sib sau tuaj rau ntawm peb, nqa lawv tej cuab yeej ua rog, ntawm kev tiv thaiv lawv lub teb chaws thiab lawv txoj kev ywj pheej, thiab los ua pauj tej uas ua txhaum rau peb.

7 Thiab lawv tau tuaj cuag peb, peb thiaj tsis kawm mloog lawv cov uas tau sawv ntxeev siab tawm tsam peb, muaj tseeb tiag, ua rau lawv ntshai peb thiab tsis kam tuaj ua rog tawm tsam peb.

8 Lawv txeeb tau thaj av, los sis lub nroog Xalahelas; lawv tau tsa ib tug vaj ntxwv kav lawv, thiab nws tau sau ntawv mus rau cov Neeg Lamas tus vaj ntxwv, nyob hauv tsab ntawv ntawd nws tau koom tes nrog cov Neeg Lamas tus vaj ntxwv; los ntawm txoj kev koom tes nws kam tswj tuav lub nroog Xalahelas, kev tswj tuav uas nws xav tias yuav cia rau cov Neeg Lamas muaj peev xwm mus ntaus kom yeej cov zos uas tseem tshuav ntawm thaj av, thiab nws yuav tau ua vaj ntxwv kav cov neeg no thaum cov Neeg Lamas kov yeej lawv.

9 Thiab nim no, nyob hauv koj tsab ntawv koj tau hais hnyav rau kuv, tiam sis tsis ua li cas; kuv tsis npau taws, tiam sis zoo siab rau tej kev zoo ntawm koj lub siab. Kuv, Pehaulas, tsis yog nrhiav hwj chim, tsuas yog rov qab muab kom tau kuv lub rooj txiav txim xwv kom kuv yuav tsom kwm tau kev muaj cai thiab kev ywj pheej ntawm kuv cov neeg. Kuv tus ntsuj plig yeej nyob ruaj nrees rau ntawm txoj kev ywj pheej no uas Vajtswv tau ua rau peb nyob ywj siab.

10 Thiab nim no, saib seb, peb yuav tawm tsam kev phem txawm tias txog thaum nqaij ntuag ntshav nrog. Peb yuav tsis ua rau cov Neeg Lamas nqaij ntuag ntshav nrog yog tias lawv nyob twj ywm hauv lawv thaj av.

11 Peb yuav tsis ua rau peb cov kwv tij nqaij ntuag ntshav nrog yog tias lawv tsis txhob sawv ntxeev siab thiab nqa ntaj tuaj tawm tsam peb.

12 Peb yuav ywj peb tus kheej rau tus quab ntawm kev ua qhev yog tias Vajtswv txoj kev txim lij hais kom peb ua li ntawd, los sis yog tias nws txib kom peb ua li ntawd.

13 Tiam sis saib seb nws twb tsis txib kom peb ywj peb tus kheej rau peb cov yeeb ncuab, tiam sis kom peb tso siab rau nws, thiab nws yuav cawm peb dim.

14 Yog li ntawd, kuv tus kwv tij, Maulaunais uas kuv hlub es, cia peb tawm tsam qhov phem, thiab txhua yam kev phem uas peb tsis muaj peev xwm siv peb tej lus los tawm tsam, muaj tseeb tiag, xws li kev ntxeev siab thiab kev sib cav sib ceg, cia peb siv peb cov ntaj los tawm tsam tej ntawd, xwv kom peb yuav rov tau peb txoj kev ywj pheej, xwv kom peb yuav zoo siab txog txoj kev muaj cai muaj peb lub koom txoos, thiab txog tej ntsiab cai ntawm peb tus Txhiv Dim thiab peb tus Vajtswv.

15 Yog li ntawd, nrawm nroos coj koj ob peb pawg tub rog los cuag kuv, thiab tseg cov tseem tshuav rau Lihais thiab Thi-akhas saib; muab hwj chim rau nkawd coj npluav rog nyob feem av ntawm ko, raws li Vajtswv tus Ntsuj Plig, uas kuj yog tus Ntsuj Plig ntawm kev ywj pheej uas nyob hauv lawv.

16 Saib seb kuv twb xa me ntsis khoom noj khoom siv mus rau lawv, kom lawv tsis txhob piam sij kom txog thaum koj los cuag tau kuv.

17 Sib sau ua ke pab tub rog twg uas koj sau tau thaum koj taug kev tuaj ntawm no, thiab peb yuav nrawm nroos mus tawm tsam cov neeg ntxeev siab ntawd, nrog peb tus Vajtswv lub dag zog raws li txoj kev ntseeg uas muaj nyob hauv peb.

18 Thiab peb yuav txeeb kom tau lub nroog Xalahelas, xwv kom peb yuav tau zaub mov ntxiv xa tawm mus rau Lihais thiab Thi-akhas; muaj tseeb tiag, peb yuav tawm mus tawm tsam lawv nrog tus Tswv lub dag zog, thiab peb yuav ua kom txoj kev ua phem loj no xaus.

19 Thiab nim no, Maulaunais, kuv xyiv fab uas tau txais koj tsab ntawv, vim kuv txhawj me ntsis ntsig txog qhov uas peb yuav ua, seb puas ncaj rau peb mus tawm tsam peb cov kwv tij.

20 Tiam sis koj tau hais tias, tsuag yog lawv hloov siab lees txim tsis li ntawd tus Tswv tau txib kom koj mus tawm tsam lawv.

21 Xyuas kom koj yuav txhawb zog rau Lihais thiab Thi-akhas los ntawm tus Tswv; qhia rau nkawd kom tsis txhob ntshai, vim Vajtswv yuav cawm lawv dim, muaj tseeb tiag, thiab tag nrho cov uas nyob ruaj nrees rau ntawm txoj kev ywj pheej uas Vajtswv tau ua rau lawv nyob ywj siab. Thiab nim no kuv xaus kuv tsab ntawv rau kuv tus kwv tij, Maulaunais, uas kuv hlub.