1 Thiab tau muaj tias tom qab nws tau xaus lus rau cov neeg lawm lawv coob leej tau ntseeg nws tej lus, thiab pib hloov siab lees txim, thiab tshawb xyuas cov vaj lug kub.

2 Tiam sis lawv feem coob xav ua kom lawv yuav ua rau Amas thiab Amulej puas tsuaj; vim lawv npau taws rau Amas, vim yog qhov meej ntawm nws tej lus uas hais rau Xi-elas; thiab lawv kuj hais tias Amulej tau dag lawv, thiab saib tsis taus lawv txoj kev cai thiab saib tsis taus lawv cov kws lij choj thiab cov neeg txiav txim.

3 Thiab lawv kuj npau taws rau Amas thiab Amulej; thiab vim nkawd tau ua tim khawv meej heev tawm tsam lawv tej kev phem, lawv nrhiav kev muab nkawd tua yam ntsiag to.

4 Tiam sis tau muaj tias lawv tsis tua nkawd; tiam sis lawv txhom nkawd thiab muab cov hlua khov khov los khi nkawd, thiab coj nkawd mus cuag tus thawj txiav txim ntawm thaj av.

5 Thiab cov neeg tawm mus thiab ua tim khawv nkaug nkawd—ua tim khawv hais tias nkawd saib tsis taus txoj kev cai, thiab lawv cov kws lij choj thiab cov neeg txiav txim ntawm thaj av, thiab tag nrho cov neeg uas nyob hauv thaj av; thiab hais tias nkawd ua tim khawv tias tsuas muaj ib tug Vajtswv xwb, thiab hais tias nws yuav xa nws Leej Tub los rau hauv cov neeg, tiam sis nws yuav tsis cawm kom lawv dim; thiab ntau yam zoo li no uas cov neeg tau ua tim khawv nkaug Amas thiab Amulej. Nim no tau ua li no nyob ntawm tus thawj txiav txim ntawm thaj av xub ntiag.

6 Thiab tau muaj tias Xi-elas xav tsis thoob rau tej lus uas tau hais lawm; thiab nws kuj paub txog txoj kev tsis thoob tsib to nrog, uas nws tau ua kom muaj los ntawm nws tej lus dag; thiab qhov uas nws paub txog nws txoj kev muaj txim ua rau nws lub siab pib raug tsim txom; muaj tseeb tiag, ntuj txiag teb tsaus tej kev mob pib los khaub zig nws.

7 Thiab tau muaj tias nws pib tshaj tawm rau cov neeg, hais tias: Saib seb, kuv muaj txim, thiab ob tug txiv neej no tsis muaj qhov phem rau ntawm Vajtswv. Thiab nws pib thov pab nkawd txij lub sij hawm ntawd mus; tiam sis cov neeg tsawm nws, hais tias: Puas yog koj raug tus dab phem lawm thiab? Thiab lawv nto qaub ncaug rau nws, thiab muab nws ntiab tawm ntawm lawv mus, thiab ntiab tag nrho cov uas ntseeg tej lus uas Amas thiab Amulej tau hais. Thiab lawv muab lawv cov no ntiab tawm, thiab txib kom neeg txawb pob zeb rau lawv.

8 Thiab cov neeg coj lawv cov poj niam thiab cov me nyuam tuaj ua ke, thiab txhua tus uas ntseeg los sis txhua tus uas txais lus qhia kom ntseeg Vajtswv txoj lus, cov neeg hais kom muab cov no pov rau hauv hluav taws, thiab cov neeg kuj tau nqa lawv tej ceev xwm txheej uas muaj cov vaj lug kub dawb huv, thiab kuj muab tej ceev xwm txheej no pov rau hauv hluav taws thiab, xwv kom tej ceev xwm txheej yuav raug hluav taws hlawv thiab ua kom puas tsuaj.

9 Thiab tau muaj tias lawv coj Amas thiab Amulej, thiab cab nkawd mus rau tom qhov chaw uas lawv muab cov ntseeg tua, xwv kom nkawd yuav pom txoj kev puas tsuaj ntawm cov uas raug hluav taws hlawv.

10 Thiab thaum Amulej pom tej kev mob ntawm cov poj niam thiab me nyuam uas raug hluav taws hlawv, kuj mob nws thiab; thiab nws hais rau Amas hais tias: Wb yuav cia li saib txoj kev phem no tau li cas? Yog li ntawd cia wb xyab wb txhais tes, thiab siv Vajtswv lub hwj chim uas nyob hauv wb, thiab cawm kom lawv dim ntawm tej nplaim taws.

11 Tiam sis Amas hais rau nws tias: Tus Ntsuj Plig txhib kuv kom kuv tsis txhob xyab kuv txhais tes; vim saib seb tus Tswv twb txais lawv mus rau nws tus kheej, nyob rau hauv yeeb koob; thiab nws cia lawv ua tej yam no, los sis cia cov neeg ua tej yam no rau lawv, raws li lawv txoj kev siab tawv, xwv kom tej kev txiav txim uas nws yuav txiav rau lawv nrog nws txoj kev npau taws yuav ncaj ncees; thiab cov neeg tsis muaj kev txhaum cov ntshav yuav ua tim khawv nkaug lawv, muaj tseeb tiag, thiab quaj nrov nrov tawm tsam lawv thaum txog hnub kawg.

12 Nim no Amulej hais rau Amas hais tias: Saib seb, tej zaum lawv kuj yuav muab wb hlawv thiab.

13 Thiab Amas hais tias: Cia kom muaj raws li tus Tswv lub siab nyiam. Tiam sis, saib seb, wb txoj hauj lwm tseem tsis tau tiav; yog li ntawd lawv yuav tsis muab wb hlawv.

14 Nim no tau muaj tias thaum cov uas raug muab pov rau hauv hluav taws lawv lub cev, thiab cov ceev xwm txheej uas tau muab pov nrog lawv tau kub hnyiab tas lawm, tus thawj txiav txim ntawm thaj av los thiab sawv ntawm Amas thiab Amulej xub ntiag, thaum uas nkawd tseem raug khi; thiab nws xuas ncuav pias rau nkawd plhu, thiab hais rau nkawd hais tias: Tom qab neb tau pom li no, neb puas tseem yuav qhuab qhia rau cov neeg no ntxiv tias, lawv yuav raug muab pov rau hauv lub pas hluav taws thiab leej faj?

15 Saib seb, neb twb pom tias neb tsis muaj hwj chim cawm tau cov uas raug muab pov rau hauv hluav taws; thiab Vajtswv los twb tsis cawm lawv vim yog lawv ntseeg ib yam li neb. Thiab tus thawj txiav txim rov qab xuas ncuav pias rau nkawd plhu, thiab nug hais tias: Neb yuav hais dab tsi pab neb tus kheej?

16 Nim no tus thawj txiav txim no ua raws li tib tug txheej txheem thiab tib txoj kev ntseeg ib yam li Nihos, tus uas tua Nkide-oos.

17 Thiab tau muaj tias Amas thiab Amulej tsis teb nws dab tsi li; thiab nws rov qab ntaus nkawd dua, thiab muab nkawd rau cov tub ceev xwm coj mus tso rau hauv lub tsev kaw.

18 Thiab thaum nkawd raug tso rau hauv lub tsev kaw tau peb hnub, muaj coob tus kws lij choj, thiab neeg txiav txim, thiab cov pov thawj, thiab cov xib hwb, cov uas yog tib txoj kev ntseeg li Nihos; thiab lawv tuaj rau hauv lub tsev kaw tuaj saib nkawd, thiab lawv nug nkawd txog ntau lo lus; tiam sis nkawd tsis teb lawv dab tsi li.

19 Thiab tau muaj tias tus neeg txiav txim los sawv ntawm nkawd xub ntiag, thiab hais tias: Yog vim li cas neb thiaj tsis teb cov neeg no tej lus? Neb puas paub tias kuv muaj hwj chim muab neb pov rau hauv tej nplaim hluav taws? Thiab nws hais kom nkawd hais lus; tiam sis nkawd tsis teb dab tsi li.

20 Thiab tau muaj tias lawv tau ncaim thiab nyias mus nyias, tiam sis rov qab tuaj dua hnub tom qab; thiab tus neeg txiav txim kuj rov qab xuas ncuav pias rau nkawd plhu. Thiab coob leej kuj tau txav los, thiab ntaus nkawd, hais tias: Neb puas yuav rov qab sawv dua thiab txiav txim rau cov neeg no, thiab thuam peb txoj kev cai? Yog neb muaj hwj chim loj npaum ntawd vim li cas neb ho tsis cawm neb tus kheej dim?

21 Thiab lawv hais ntau yam zoo li no rau nkawd, tom lawv hniav qees rau nkawd, thiab nto qaub ncaug rau nkawd, thiab hais tias: Peb yuav zoo li cas thaum peb raug txim?

22 Thiab ntau yam zoo li no, muaj tseeb tiag, lawv hais txhua yam zoo li no rau nkawd; thiab xws li no lawv thuam nkawd tau ntau hnub. Thiab lawv tsis pub zaub mov rau nkawd xwv kom nkawd tshaib plab, thiab tsis pub dej xwv kom nkawd nqhis dej; thiab lawv kuj tshem nkawd tej tsoos tsho xwv kom nkawd liab qab; thiab xws li no nkawd raug khi nrog cov hlua khov kho, thiab raug kaw.

23 Thiab tau muaj tias tom qab nkawd raug txom nyem xws li no tau ntau hnub, (thiab yog hnub kaum ob, thaum lub kaum hli ntuj, nyob hauv xyoo thib kaum ntawm cov neeg txiav txim txoj kev kav Nifais cov neeg) tus thawj txiav txim rau thaj av Amoonaihas thiab coob leej ntawm lawv cov xib hwb thiab lawv cov kws lij choj mus rau hauv lub tsev kaw uas Amas thiab Amulej raug hlua khi.

24 Thiab tus thawj txiav txim los sawv ntawm nkawd xub ntiag, thiab rov qab ntaus nkawd dua, thiab hais rau nkawd tias: Yog neb muaj Vajtswv lub hwj chim cia li cawm neb tus kheej dim ntawm tej hlua no, thiab tom qab ntawd peb yuav ntseeg tias tus Tswv yuav ua kom cov neeg no puas tsuaj raws li neb tej lus.

25 Thiab tau muaj tias lawv txhua tus mus thiab ntaus nkawd, hais tib co qub lus, mus txog ntua tus kawg; thiab thaum tus kawg hais lus rau nkawd tas lawm Vajtswv lub hwj chim los rau Amas thiab Amulej, thiab nkawd sawv los thiab sawv ntsug.

26 Thiab Amas thov, hais tias: Wb tseem yuav raug tej kev txom nyem heev no ntev npaum li cas os tus Tswv es? Auj tus Tswv, muab lub zog rau wb raws li wb txoj kev ntseeg uas yog txoj kev ntseeg Khetos, xwv kom muaj kev cawm dim. Thiab nkawd tu cov hlua uas khi nkawd; thiab thaum cov neeg pom qhov no, lawv pib khiav, vim txoj kev ntshai kev puas tsuaj tau los rau lawv.

27 Thiab tau muaj tias lawv ntshai kawg nkaus li uas ua rau lawv vau rau hauv av, thiab mus tsis txog sab qhov rooj sab nraud ntawm lub tsev kaw; thiab daim av tshee heev kawg li, thiab tej phab ntsa ntawm lub tsev kaw tawg ua ob sab, ua rau tej phab ntsa vau rau hauv av; thiab tus thawj txiav txim, thiab cov kws lij choj, thiab cov pov thawj, thiab cov xib hwb, uas tau ntaus Amas thiab Amulej, raug tsuam tuag los ntawm qhov uas tej phab ntsa vau no.

28 Thiab Amas thiab Amulej tawm hauv lub tsev kaw los, thiab nkawd tsis raug mob dab tsi li; vim tus Tswv tau pub hwj chim rau nkawd, raws li nkawd txoj kev ntseeg uas yog txoj kev ntseeg Khetos. Thiab nkawd tawm plaws hauv lub tsev kaw ncaj qha los; thiab tej hlua uas khi nkawd tau plam tas; thiab lub tsev kaw tau vau rau hauv av, thiab txhua tus neeg uas nyob sab hauv tej phab ntsa puav leej tuag tas, tsuas yog tshuav Amas thiab Amulej xwb; thiab nkawd tawm ncaj qha mus rau hauv lub nroog.

29 Nim no vim cov neeg tau hnov ib lub suab nrov loj lawv khiav ua ke tej pwb pawg tuaj saib seb yog dab tsi; thiab thaum lawv pom Amas thiab Amulej tawm hauv lub tsev kaw los, thiab pom tej phab ntsa ntawm lub tsev kaw vau rau hauv av, lawv ntshai kawg li, thiab khiav ntawm Amas thiab Amulej mus zoo li ib tug tshis coj nws tus me nyuam khiav ntawm ob tug tsov ntxhuav; thiab lawv khiav ntawm Amas thiab Amulej mus zoo li no.