1 Thiab nim no tau muaj tias nyob rau thaum pib ntawm xyoo thib peb caug ntawm cov neeg txiav txim txoj kev kav, nyob rau hnub xiab ob ntawm thawj lub hlis, Maulaunais tau txais Hilamas ib tsab ntawv, qhia txog tej hauj lwm ntawm cov neeg uas nyob rau ces kaum av ntawd.

2 Thiab nov yog tej lus uas nws sau, hais tias: Kuv tus tij laug, Maulaunais uas kuv hlub, los ntawm tus Tswv thiab los ntawm peb tej kev txom nyem ntawm peb tej kev ua rog; saib seb, kuv tus tij laug uas kuv hlub es, kuv muaj tej yam qhia koj txog peb tej kev ua rog nyob rau feem av ntawm no.

3 Saib seb, ob txhiab tug tub ntawm cov neeg uas Amoos coj tawm pem thaj av Nifais los—nim no koj twb paub tias cov no yog cov xeeb ntxwv ntawm Lamas, uas yog peb yawg koob Lihais tus tub hlob.

4 Nim no tsis tas kuv yuav rov qab qhia koj txog lawv tej kab lis kev cai los sis lawv tej kev tsis ntseeg, vim koj twb paub txog txhua yam no—

5 Yog li ntawd twb txaus kuv siab kom qhia rau koj tias ob txhiab tug tub hluas no tau nqa lawv tej cuab yeej ua rog, thiab xav kom kuv ua lawv tus thawj coj; thiab peb tau tawm tuaj tiv thaiv peb lub teb chaws.

6 Thiab nim no koj kuj paub txog txoj kev khi lus uas lawv txiv tau khi, hais tias lawv yuav tsis nqa lawv tej cuab yeej ua rog tawm tsam lawv cov kwv tij kom muaj ntshav nrog.

7 Tiam sis nyob hauv xyoo thib nees nkaum rau, thaum lawv pom peb tej kev nyuaj siab thiab peb tej kev txom nyem rau lawv, lawv twb yuav luag rhuav txoj kev khi lus uas lawv tau khi thiab yuav luag nqa lawv tej cuab yeej ua rog tiv thaiv peb.

8 Tiam sis kuv tsis kam lawv rhuav txoj kev khi lus no uas lawv tau khi, vim kuv xav tias yog lawv ua raws li txoj kev lav lus uas lawv tau lav, Vajtswv yuav txhawb peb lub dag lub zog, kom peb thiaj tsis txhob txom nyem tshaj ntxiv.

9 Tiam sis saib seb, qhov no yog ib qho uas yuav ua rau peb muaj kev xyiv fab heev. Vim saib seb, nyob hauv xyoo thib nees nkaum rau, kuv, Hilamas, tau taug kev pem hau ntej ntawm ob txhiab tug tub hluas mus rau tom lub nroog Yudais, mus pab Eethipas, tus uas koj tau tsa los ua ib tug thawj coj kav cov neeg nyob rau feem av ntawd.

10 Thiab kuv coj kuv ob txhiab tug tub, (vim yeej tsim nyog hu lawv ua cov tub) mus koom nrog Eethipas pab tub rog, mus txhawb lawv lub zog uas ua rau Eethipas zoo siab heev; vim saib seb, cov Neeg Lamas tau ua rau nws pab tub rog tsawg tuaj vim lawv cov tub rog tau tua peb cov neeg tuag coob leej, qhov uas tsim nyog rau peb quaj ntsuag.

11 Txawm li ntawd los, peb kuj muaj kev zoo siab txog qhov no tias, lawv tau tuag rau lub hom phiaj ntawm lawv lub teb chaws thiab ntawm lawv tus Vajtswv, muaj tseeb tiag, thiab lawv zoo siab.

12 Thiab cov Neeg Lamas kuj ceev tau coob leej neeg raug txim, cov uas tag nrho puav leej yog thawj hau rog, vim lwm cov neeg raug txim lawv twb tsis cia kom muaj sia nyob. Thiab peb xav tias nyob rau lub sij hawm nim no cov neeg raug txim yog nyob hauv thaj av Nifais; yeej yog li ntawd yog tias lawv tsis tau raug tua.

13 Thiab nim no tej no yog tej lub nroog uas cov Neeg Lamas txeeb tau los ntawm kev ua rau coob leej ntawm peb cov tub rog uas khov heev nqaij ntuag ntshav nrog:

14 Thaj av Meethais, los sis lub nroog Meethais, thiab lub nroog Xi-elas, thiab lub nroog Khumenais, thiab lub nroog Eethiphalas.

15 Thiab tej no yog tej lub nroog uas cov Neeg Lamas txeeb tau thaum kuv tuaj txog hauv lub nroog Yudais; thiab kuv tuaj pom Eethipas thiab nws cov tub rog tab tom khwv ua hauj lwm ua kom lub nroog ruaj khov.

16 Muaj tseeb tiag, thiab lawv nyuaj siab ntawm sab nqaij daim tawv thiab ntawm sab ntsuj plig, vim lawv tau sib ntaus sib tua yam khov heev thaum nruab hnub thiab khwv ua hauj lwm thaum hmo ntuj kom tswj tuav tau lawv cov nroog; thiab yog li ntawd lawv tau raug txhua yam kev txom nyem loj.

17 Thiab nim no lawv txiav txim siab tias yuav ua kom yeej nyob hauv qhov chaw no los sis ua kom tuag; yog li ntawd nyaj koj yuav xav tias pab tub rog tsawg tsawg uas kuv coj nrog kuv tuaj no, muaj tseeb tiag, kuv cov tub ntawd, muab tau kev cia siab loj thiab kev xyiv fab ntau rau lawv.

18 Thiab nim no tau muaj tias thaum cov Neeg Lamas pom tias Eethipas tau txais dag zog ntxiv rau nws cov tub rog, lawv raug yuam los ntawm Amauloos tej lus txib kom tsis txhob tuaj tawm tsam lub nroog Yudais, los sis tuaj ua rog tawm tsam peb.

19 Thiab xws li no peb tau koob hmoov los ntawm tus Tswv; yog tias lawv tuaj tawm tsam peb thaum peb tseem qaug zog tej zaum lawv twb ua tau rau peb pab tub rog uas tsawg tsawg puas tsuaj lawm; tiam sis tus Tswv tau tsom kwm peb zoo li no.

20 Amauloos txib lawv kom tswj tuav cov nroog uas lawv txeeb tau lawm. Thiab xyoo thib nees nkaum rau tau xaus li no. Thiab nyob rau thaum pib ntawm xyoo thib nees nkaum xya peb tau npaj peb lub nroog thiab peb tus kheej rau kev tiv thaiv.

21 Nim no peb xav kom cov Neeg Lamas tuaj tawm tsam peb; vim peb tsis xav mus tawm tsam lawv nyob hauv lawv tej chaw ruaj khov.

22 Thiab tau muaj tias peb tso neeg mus soj rau ib puag ncig, mus saib tej kev mus los ntawm cov Neeg Lamas, kom lawv tsis txhob hla dhau peb thaum hmo ntuj los sis thaum nruab hnub mus tawm tsam peb lwm cov nroog uas nyob sab qaum teb.

23 Vim peb paub tias nyob hauv cov nroog ntawd lawv tseem tsis tau muaj zog txaus mus ntsib cov Neeg Lamas; yog li ntawd peb xav hais tias, yog lawv tuaj hla ntawm peb mus, peb yuav tawm tsam lawv tom lawv qab, thiab tav tau lawv tom qab tuaj zoo li no thaum tib lub sij hawm ntawd lawv ho raug ntsib tom hauv ntej tuaj. Peb xav tias peb yuav kov yeej lawv; tiam sis saib seb, peb poob siab rau qhov uas peb xav no.

24 Lawv tsis kam hla peb nrog tag nrho lawv pab tub rog, thiab lawv twb tsis kam cia ib feem tuaj, tsam lawv tsis muaj zog txaus thiab tsam lawv swb.

25 Thiab lawv twb tsis kam mus tawm tsam nram lub nroog Xalahelas; thiab lawv twb tsis kam hla tus hau dej ntawm tus dej Xidoos, mus rau lub nroog Nifaihas.

26 Thiab yog li ntawd, nrog lawv cov tub rog, lawv tau txiav txim siab tswj tuav cov nroog uas lawv txeeb tau lawm.

27 Thiab nim no tau muaj tias nyob hauv lub ob hlis ntawm xyoo no, kuv ob txhiab leej tub ntawd tej txiv tau nqa khoom noj khoom siv ntau yam tuaj rau peb.

28 Thiab kuj tau xa ob txhiab tug neeg tom thaj av Xalahelas tuaj rau peb thiab. Thiab yog li ntawd peb npaj tau kaum txhiab leej neeg, thiab tau tej khoom noj khoom siv rau lawv, thiab kuj tau rau lawv cov poj niam thiab lawv cov me nyuam.

29 Thiab cov Neeg Lamas, vim lawv pom peb cov tub rog ib hnub muaj coob zuj zus zoo li no, thiab tej khoom noj khoom siv tuaj pab peb, lawv pib ntshai, thiab pib maj nrawm nroos tawm tuaj, saib txiav puas tau qhov uas peb tau txais tej khoom noj khoom siv thiab dag zog.

30 Nim no thaum peb pom tias cov Neeg Lamas pib txhawj txog tej yam no, peb xav siv ib lub tom txwv kom raug lawv; yog li ntawd Eethipas txib kom kuv nrog kuv cov tub hluas taug kev tawm mus rau ib lub nroog uas nyob ze, kom zoo li peb tab tom ris khoom noj khoom siv mus rau lub nroog nyob ze ntawd.

31 Thiab peb yuav tsum mus ze rau ntawm lub nroog Eethiphalas, yam li peb tab tom mus rau lub nroog uas nyob tom ntej, uas nyob ze ntug hiav txwv.

32 Thiab tau muaj tias peb taug kev tawm mus, yam li peb ris tej khoom noj khoom siv, mus rau lub nroog ntawd.

33 Thiab tau muaj tias Eethipas taug kev tawm mus nrog ib feem ntawm nws cov tub rog, thiab tseg cov uas seem tswj tuav lub nroog. Tiam sis nws twb tsis tawm mus txog rau thaum uas kuv nrog rau kuv pab tub rog hluas twb tawm mus ze rau ntawm lub nroog Eethiphalas lawm tso.

34 Thiab nim no, nyob hauv lub nroog Eethiphalas muaj cov Neeg Lamas pab tub rog uas muaj zog tshaj; muaj tseeb tiag, nyob coob tshaj.

35 Thiab tau muaj tias thaum lawv cov neeg soj xyuas los qhia lawv, lawv tawm nrog lawv pab tub rog tuaj tawm tsam peb.

36 Thiab tau muaj tias peb khiav ntawm lawv mus rau sab qaum teb. Thiab xws li no peb ntxias tau cov Neeg Lamas pab tub rog uas muaj zog tshaj tawm mus;

37 Muaj tseeb tiag, twb mus tau ib ntus deb tsawv, ua rau thaum lawv pom Eethipas cov tub rog tab tom raws lawv, nrog lawv lub zog, lawv twb tsis tig mus rau sab xis los sis sab laug, tiam sis lawv taug kev ncaj nraim raws peb; thiab, ib yam li peb xav, twb yog lawv lub hom phiaj xav tua kom tau peb ua ntej Eethipas caum tau lawv, thiab lawv ua li no xwv kom peb cov neeg thiaj vij tsis tau lawv.

38 Thiab nim no Eethipas, thaum nws pom peb txoj kev plhom sij, hais kom nws cov tub rog taug kev nrawm zog. Tiam sis saib seb, twb yog thaum tsaus ntuj; yog li ntawd lawv caum tsis tau peb, thiab Eethipas los kuj caum tsis tau lawv; yog li ntawd peb thiaj rub yeej rau hmo ntawd.

39 Thiab tau muaj tias ua ntej kaj ntug txoog thaum sawv ntxov, saib seb, cov Neeg Lamas tab tom caum peb. Nim no peb twb tsis muaj zog txaus sib tawm tsam nrog lawv; muaj tseeb tiag, kuv yuav tsis cia kom kuv cov tub hluas poob rau hauv lawv txhais tes; yog li ntawd peb taug kev mus ntxiv, thiab peb taug kev mus rau hauv hav zoov.

40 Nim no lawv tsis kam tig mus rau sab xis los sis mus rau sab laug ntshai tsam lawv yuav raug vij; thiab kuv los kuj tsis kam tig mus rau sab xis los sis mus rau sab laug ntshai tsam lawv caum tau kuv, thiab peb tsis muaj cuab kav sawv tawm tsam lawv, tiam sis ntshe peb yuav raug tua, thiab lawv yuav dim mus; thiab yog li ntawd peb khiav hnub ntawd ib hnub mus rau hauv hav zoov, twb mus txog rau thaum tsaus ntuj.

41 Thiab tau muaj ntxiv tias, thaum kaj ntug sawv ntxov peb pom cov Neeg Lamas raws peb, thiab peb khiav ntawm lawv mus.

42 Tiam sis tau muaj tias lawv twb tsis raws peb mus deb ua ntej lawv nres; thiab twb yog thaum sawv ntxov hnub xiab peb ntawm lub xya hli.

43 Thiab nim no, peb tsis paub xyov Eethipas raws tau lawv lawm los tsis tau, tiam sis kuv hais rau kuv cov tub rog tias: Saib seb, peb xav tias tej zaum lawv nres vim yog lawv xav kom peb mus tawm tsam lawv, xwv kom lawv yuav txhom tau peb nyob hauv lawv rooj ntxiab.

44 Yog li ntawd, kuv cov tub, nej hais li cas, nej puas kam mus ua rog tawm tsam lawv?

45 Thiab nim no kuv hais rau koj, kuv tus tij laug Maulaunais uas kuv hlub, hais tias kuv ib txwm tsis tau pom dua ib co uas siab loj siab tuab npaum li ntawd, tsis tau pom dua li, nyob hauv tag nrho cov Neeg Nifais.

46 Ib yam li kuv tau hu lawv ua kuv cov tub (vim lawv txhua tus tseem hluas heev) ib yam li ntawd lawv hais rau kuv tias: Txiv, saib seb peb tus Vajtswv twb nrog peb, thiab nws yuav tsis cia kom peb tuag; yog li ntawd cia peb tawm mus; peb yuav tsis tua peb cov kwv tij yog tias lawv tsis thab peb; yog li ntawd cia peb mus, nyob tsam lawv yuav kov yeej Eethipas cov tub rog.

47 Nim no lawv ib txwm tsis tau sib ntaus sib tua dua li, tiam sis lawv tsis ntshai kev tuag; thiab lawv xav txog lawv txiv txoj kev ywj pheej tshaj lawv xav txog lawv txoj sia; muaj tseeb tiag, lawv niam tau qhia lawv hais tias, yog lawv ntseeg, Vajtswv yuav cawm lawv dim.

48 Thiab lawv qhia lawv niam cov lus rau kuv, hais tias: Peb ntseeg tias peb niam yeej paub li ntawd.

49 Thiab tau muaj tias kuv nrog rau kuv ob txhiab leej tig rov mus tawm tsam cov Neeg Lamas no uas tau raws peb. Thiab nim no saib seb, Eethipas cov tub rog twb caum tau lawv, thiab ib npluav rog uas txaus ntshai heev tau pib.

50 Eethipas pab tub rog sab lim heev thiab twb yuav luag poob mus rau hauv cov Neeg Lamas txhais tes, vim lawv tau taug kev deb heev nyob hauv lub sij hawm uas luv heev; thiab yog hais tias kuv nrog rau kuv ob txhiab leej tsis tig rov mus ces ntshe cov Neeg Lamas twb ua tau raws li lawv lub hom phiaj lawm.

51 Vim Eethipas tau raug tua los ntawm rab ntaj, thiab coob leej ntawm nws cov thawj coj, vim yog lawv txoj kev sab lim, uas yog los ntawm qhov lawv taug kev mus nrawm—yog li ntawd Eethipas cov tub rog pib thim ntawm cov Neeg Lamas mus, vim lawv ua tom ntej tom qab vim lawv cov thawj coj tau tuag.

52 Thiab tau muaj tias cov Neeg Lamas siab loj tuaj, thiab pib caum lawv; thiab yog li ntawd cov Neeg Lamas tab tom tag siab nrho caum lawv thaum Hilamas tuaj tom lawv qab nrog nws ob txhiab leej, thiab pib muab lawv tua heev kawg nkaus li, ua rau tag nrho cov Neeg Lamas pab tub rog nres thiab tig mus rau Hilamas.

53 Nim no thaum Eethipas cov tub rog pom cov Neeg Lamas tig rov qab, lawv sau lawv cov tub rog los ua ke thiab rov mus dua rau tom cov Neeg Lamas qab.

54 Thiab nim no tau muaj tias peb, Nifais cov neeg, Eethipas cov neeg, thiab kuv nrog rau kuv ob txhiab leej, tau vij cov Neeg Lamas, thiab tau tua lawv; muaj tseeb tiag, lawv thiaj raug yuam kom tso lawv tej cuab yeej ua rog thiab lawv tus kheej ua neeg raug txhom hauv hav rog.

55 Thiab nim no tau muaj tias thaum lawv ua siab swb rau peb lawm, saib seb, kuv suav cov tub hluas uas nrog kuv sib ntaus sib tua, vim kuv ntshai tias lawv coob leej raug tua lawm.

56 Tiam sis saib seb, ua rau kuv xyiv fab heev, lawv tsis muaj leej twg uas vau rau hauv av; muaj tseeb tiag, thiab lawv tau sib ntaus sib tua yam li nrog Vajtswv lub zog; muaj tseeb tiag, ib txwm tsis tau muaj neeg sib ntaus sib tua nrog lub zog uas muaj tej txuj ci npaum li ntawd; thiab lawv tau tawm tsam cov Neeg Lamas nrog lub hwj chim loj heev, lawv thiaj ua rau cov Neeg Lamas ntshai; thiab vim qhov no cov Neeg Lamas thiaj cia lawv tus kheej los ua neeg raug txhom hauv hav rog.

57 Thiab vim peb tsis muaj chaw rau peb cov neeg raug txim, kom peb muaj peev xwm saib xyuas tau lawv kom ceev tau lawv tawm ntawm cov Neeg Lamas tej tub rog, yog li ntawd peb thiaj xa lawv mus rau tom thaj av Xalahelas, thiab ib feem ntawm Eethipas cov neeg uas tsis tau raug tua, nrog lawv mus; thiab kuv coj cov uas tseem tshuav los koom nrog kuv cov tub hluas uas yog Neeg Amoos, thiab rov qab taug kev mus rau tom lub nroog Yudais.