1 Thiab tau muaj tias thaum pib xyoo tsib ntawm lawv txoj kev kav, pib muaj ib txoj kev sib cav sib ceg nyob hauv cov neeg; vim ib tug txiv neej, hu ua Alixais, nws yog ib tug neeg txawj dag ntxias heev, muaj tseeb tiag, yog ib tug neeg txawj ntse mus raws li lub tswv yim ntawm neeg ntiaj teb, nws ua raws li tus txheej txheem ntawm tus txiv neej uas tau xuas ntaj tua Nkide-oos, tus uas raug tuag raws li txoj kev cai—

2 Nim no tus Alixais no, los ntawm nws txoj kev txawj ntxias, tau coj neeg coob leej coj raws li nws; twb coob kawg nkaus uas lawv pib muaj zog heev; thiab lawv pib rau siab ntso txhim tsa Alixais los ua ib tug vaj ntxwv kav cov neeg.

3 Nim no qhov no ua rau cov neeg ntawm lub koom txoos ntshai, thiab kuj ua rau tag nrho cov uas tsis tau ua raws li Alixais tej kev dag ntxias ntshai; vim lawv paub tias raws li lawv txoj kev cai tej yam zoo li ntawd yuav tsum yog txhim tsa los ntawm cov neeg lub suab.

4 Yog li ntawd, yog hais tias Alixais yuav muaj cov neeg lub suab, vim nws yog ib tug txiv neej phem, nws yuav rhuav tshem lawv txoj cai thiab tej sam xeeb ntawm lub koom txoos; vim nws lub hom phiaj yog ua kom Vajtswv lub koom txoos puas tsuaj.

5 Thiab tau muaj tias cov neeg sib sau tuaj ua ke thoob plaws hauv thaj av, txhua tus neeg raws li nws lub siab xav, seb yuav nrog los sis tawm tsam Alixais, nyob rau hauv tej pab pawg, thiab lawv muaj kev sib cam ntau thiab kev sib cav sib ceg ntawm ib leeg rau ib leeg uas xav tsis thoob.

6 Thiab yog li ntawd lawv tau sib sau ua ke tuaj tawm lawv lub suab txog yam xwm ntawd; thiab muab lawv lub suab tso rau ntawm cov neeg txiav txim xub ntiag.

7 Thiab tau muaj tias cov neeg lub suab tawm tsam Alixais, kom nws tsis tau los ua vaj ntxwv kav cov neeg.

8 Nim no qhov no ua rau cov neeg uas tawm tsam nws xyiv fab heev; tiam sis Alixais tau txhaub kom cov uas nyiam nws npau taws tawm tsam cov uas tsis nyiam nws.

9 Thiab tau muaj tias cov uas nyiam nws sib sau tuaj ua ke, thiab tsa Alixais ua lawv tus vaj ntxwv.

10 Nim no thaum Alixais tau los ua vaj ntxwv kav lawv lawm nws txib kom lawv yuav tsum mus ua rog tawm tsam lawv cov kwv tij; thiab nws tau ua li no xwv kom nws thiaj yuam tau lawv los ywj rau nws.

11 Nim no tau muab Alixais cov neeg cais hu raws li Alixais lub npe, thiab hu lawv ua cov Neeg Alixais; thiab muab cov uas tseem tshuav hu ua cov Neeg Nifais, los sis Vajtswv cov neeg.

12 Yog li ntawd cov Neeg Nifais paub txog tej uas cov Neeg Alixais yuav ua, thiab yog li ntawd lawv npaj tos ntsib lawv; muaj tseeb tiag, lawv npaj nqa ntaj, thiab liag, thiab hneev, thiab xub, thiab pob zeb, thiab hlua fiav, thiab txhua yam cuab yeej ua rog, ntawm txhua txhia yam.

13 Thiab xws li no cov Neeg Nifais tau npaj tos ntsib cov Neeg Alixais rau thaum lub sij hawm lawv tuaj. Thiab lawv tsa tej thawj tub rog, thiab tej thawj tub rog uas siab zog, thiab tej thawj hau rog, raws li cov neeg uas lawv muaj.

14 Thiab tau muaj tias Alixais tau npaj txhua yam cuab yeej ua rog ntawm txhua txhia yam rau nws cov neeg; thiab nws kuj tsa tej nom tswv thiab tej thawj coj rau nws cov neeg, los coj lawv mus ua rog tawm tsam lawv cov kwv tij.

15 Thiab tau muaj tias cov Neeg Alixais tuaj rau saum lub pov roob Anihus, uas nyob sab hnub tuaj ntawm tus dej Xidoos, uas ntws los ze thaj av Xalahelas, thiab lawv pib ua rog nrog cov Neeg Nifais nyob rau qhov chaw ntawd.

16 Nim no Amas, vim nws yog tus thawj txiav txim thiab tus tswv xeev ntawm cov Neeg Nifais, yog li ntawd nws nrog nws cov neeg mus ped, muaj tseeb tiag, nrog nws cov thawj tub rog, thiab cov thawj hau rog, muaj tseeb tiag, nyob tom hauv ntej ntawm nws cov tub rog, ua rog tawm tsam cov Neeg Alixais.

17 Thiab lawv pib tua cov Neeg Alixais nyob saum lub pov roob sab hnub tuaj ntawm Xidoos. Thiab cov Neeg Alixais sib ntaus sib tua nrog cov Neeg Nifais yam muaj zog heev, ua rau cov Neeg Nifais coob leej qaug ntawm cov Neeg Alixais xub ntiag.

18 Txawm li ntawd los tus Tswv tseem tau ua rau cov Neeg Nifais txhais tes muaj dag zog, uas lawv tua tau cov Neeg Alixais coob leej heev, uas ua rau lawv pib khiav ntawm lawv mus.

19 Thiab tau muaj tias cov Neeg Nifais caum cov Neeg Alixais qab tag nrho hnub ntawd, thiab tua tau lawv coob leej heev, ua rau cov Neeg Alixais kaum ob txhiab tsib puas peb caug ob leeg raug tua tuag; thiab cov Neeg Nifais tuag yog rau txhiab tsib puas rau caum ob leeg.

20 Thiab tau muaj tias thaum Amas caum tsis tau cov Neeg Alixais ntxiv lawm nws hais kom nws cov neeg rub lawv tej tsev pheeb suab ntaub nyob rau hauv lub hav Nkide-oos, lub hav uas yog hu raws li Nkide-oos tus uas raug Nihos xuas ntaj tua; thiab hmo ntawd cov Neeg Nifais tau rub lawv tej tsev pheeb suab ntaub nyob rau hauv lub hav no.

21 Thiab Amas tau xa neeg mus soj raws cov Neeg Alixais uas seem tshuav qab, kom nws paub txog lawv tej tswv yim npaj ua ntej thiab lawv tej tom txwv, xwv kom nws yuav tiv thaiv tau nws tus kheej tawm tsam lawv, xwv kom nws yuav tshwj tau nws cov neeg kom tsis txhob puas tsuaj.

22 Nim no cov neeg uas Amas tau xa tawm mus soj xyuas cov Neeg Alixais lub yeej yog hu ua Xelas, thiab Anaws, thiab Meethais, thiab Leehawj; cov no thiab lawv cov tub rog yog cov uas tawm mus soj xyuas cov Neeg Alixais lub yeej.

23 Thiab tau muaj tias hnub tom qab lawv maj heev rov qab los rau hauv cov Neeg Nifais lub yeej, thiab lawv xav tsis thoob, thiab ntshai heev, hais tias:

24 Saib seb, peb raws cov Neeg Alixais lub yeej qab, thiab ua rau peb xav tsis thoob, nyob hauv thaj av Mainoos, saum toj thaj av Xalahelas, nyob ze txoj kev uas mus rau tom thaj av Nifais, peb pom ib pab tub rog Lamas coob heev; thiab saib seb, cov Neeg Alixais tau mus koom nrog lawv;

25 Thiab lawv tab tom tawm tsam peb cov kwv tij nyob hauv thaj av ntawd; thiab peb cov kwv tij tab tom coj lawv tej tsiaj, thiab lawv cov poj niam, thiab lawv cov me nyuam, khiav ntawm cov Neeg Lamas thiab cov Neeg Alixais, mus rau tom peb lub nroog; thiab yog peb tsis tsuag tsuag ces cov Neeg Lamas thiab cov Neeg Alixais yuav tuaj txeeb tau peb lub nroog, thiab tua peb cov yawg koob, thiab peb cov poj niam, thiab peb cov me nyuam.

26 Thiab tau muaj tias cov Neeg Nifais tau yaws lawv tej tsev pheeb suab ntaub thiab tau ncaim tawm ntawm lub hav Nkide-oos mus rau tom lawv lub nroog, uas yog lub nroog Xalahelas.

27 Thiab saib seb, thaum lawv tseem tab tom hla tus dej Xidoos, cov Neeg Lamas thiab cov Neeg Alixais, coob heev, npaum li tej xuab zeb nram ntug dej hiav txwv, tau tuaj tawm tsam lawv kom lawv puas tsuaj.

28 Txawm li ntawd los, tus Tswv txhais tes tau ntxiv dag zog rau cov Neeg Nifais, vim lawv mob siab thov nws kom nws cawm lawv dim tawm ntawm lawv cov yeeb ncuab tes, yog li ntawd tus Tswv tau hnov lawv tej lus thov, thiab tau ntxiv dag zog rau lawv, thiab cov Neeg Lamas thiab cov Neeg Alixais tau qaug rau lawv.

29 Thiab tau muaj tias Amas xuas ntaj nrog Alixais sib tus, tim ntsej tim muag; thiab nkawd sib tawm tsam yam hnyav kawg li, ib leeg nrog ib leeg.

30 Thiab tau muaj tias Amas, vim nws yog Vajtswv tus neeg, vim nws muab siab rau ntseeg heev, nws thov, hais tias: Auj tus Tswv es, thov hlub tshua thiab tseg kuv txoj sia, xwv kom kuv yuav ua tau ib rab cuab yeej nyob hauv koj tes los cawm thiab tshwj cov neeg no.

31 Nim no thaum Amas hais cov lus no tas lawm nws rov qab tawm tsam nrog Alixais dua; thiab nws tau muaj zog tuaj, ua rau nws xuas nws rab ntaj tua tau Alixais.

32 Thiab nws kuj tawm tsam nrog cov Neeg Lamas tus vaj ntxwv; tiam sis cov Neeg Lamas tus vaj ntxwv tau khiav rov qab ntawm Amas mus thiab xa nws cov tub rog los tawm tsam nrog Amas.

33 Tiam sis Amas, nrog nws cov tub rog, tawm tsam nrog cov Neeg Lamas tus vaj ntxwv cov tub rog txog rau thaum uas nws tua tau lawv coob leej thiab ua rau lawv thim rov qab.

34 Thiab xws li no nws ua kom txhob muaj dab tsi nyob saum tej av, los sis ntawm tus ntug dej, uas nyob sab hnub poob ntawm tus dej Xidoos, thiab muab cov Neeg Lamas cov tuag pov rau hauv cov dej Xidoos, xwv kom nws cov neeg thiaj muaj chaw hla mus tawm tsam nrog cov Neeg Lamas thiab cov Neeg Alixais nyob rau sab hnub poob ntawm tus dej Xidoos.

35 Thiab tau muaj tias thaum lawv txhua tus tau hla tus dej Xidoos cov Neeg Lamas thiab cov Neeg Alixais pib khiav ntawm lawv mus, txawm tias lawv muaj coob heev uas suav tsis txheeb.

36 Thiab lawv khiav ntawm cov Neeg Nifais mus rau tom hav zoov uas nyob sab hnub poob thiab sab qaum teb, khiav mus dhau deb ntawm tej ciaj ciam ntawm thaj av; thiab cov Neeg Nifais tau raws lawv qab tas lawv lub zog, thiab tau tua lawv.

37 Muaj tseeb tiag, cov Neeg Nifais tau tawm tsam lawv rau txhua txhia sab, thiab muab lawv tua thiab raws, txog rau thaum lawv tawg khiav ri niab nyob rau sab hnub poob, thiab nyob rau sab qaum teb, txog rau thaum lawv mus txog hauv lub hav zoov, uas hu ua Hawmos; thiab yog feem hav zoov uas muaj tej tsiaj qus thiab tej tsiaj noj nqaij coob nyob.

38 Thiab tau muaj tias coob leej tau tuag nyob hauv hav zoov vim lawv tej qhov txhab, thiab raug cov tsiaj qus thiab tej dav qhuav saum nruab ntug noj; thiab cov neeg tau mus pom lawv tej pob txha, thiab muab lawv tej pob txha tum tsheej pawg rau saum av.