1 Thiab tau muaj tias cov Neeg Nifais uas tsis tuag los ntawm tej cuab yeej ua rog, tom qab tau muab cov tuag faus tas—nim no tsis tau suav cov uas tuag, vim muaj coob heev—tom qab lawv muab lawv cov tuag faus tas lawv txhua tus rov qab los rau tom lawv tej av, thiab lawv tej tsev, thiab lawv cov poj niam, thiab lawv cov me nyuam.

2 Nim no muaj coob leej poj niam thiab me nyuam uas raug ntaj riam tua, thiab ntau tus ntawm lawv tej yaj thiab lawv tej tsiaj txhu los tib yam; thiab lawv muaj ntau daim teb uas raug puas tsuaj, vim raug neeg coob heev tsuj vau liam tas.

3 Thiab nim no tag nrho cov Neeg Lamas thiab cov Neeg Alixais uas tuag nyob ntawm ntug dej Xidoos raug muab pov mus rau hauv cov dej Xidoos; thiab saib seb lawv tej pob txha nyob hauv qab thu dej hiav txwv, thiab lawv tej pob txha ntawd ntau heev li.

4 Thiab cov Neeg Alixais txawv cov Neeg Nifais, vim lawv kos cim liab rau ntawm lawv hauv pliaj ib yam li cov Neeg Lamas; txawm li ntawd los, lawv tsis chais lawv lub taub hau zoo li cov Neeg Lamas.

5 Nim no cov Neeg Lamas muab lawv lub taub hau chais do dus; thiab lawv liab qab, tsuas yog muaj tawv tsiaj uas npog lawv ob ceg, thiab lawv tej cuab yeej ua rog, uas vas lawv, thiab lawv tej hneev, thiab lawv tej xub, thiab lawv tej pob zeb, thiab lawv tej hlua fiav, thiab lwm yam.

6 Thiab cov Neeg Lamas tej tawv nqaij dub, raws li lub cim uas tau muab rau lawv cov yawg koob, uas yog ib txoj kev foom tsis zoo rau lawv vim yog lawv tej kev ua txhaum thiab lawv tej kev ntxeev siab tawm tsam lawv cov kwv tij, uas yog Nifais, Yakhauj, thiab Yauxej, thiab Xam, cov uas yog neeg ncaj ncees thiab dawb huv.

7 Thiab lawv cov kwv tij nrhiav kev ua kom lawv puas tsuaj, yog li ntawd lawv thiaj raug foom tsis zoo; thiab tus Tswv uas yog Vajtswv thiaj ntaus ib lub cim rau lawv, muaj tseeb tiag, rau Lamas thiab Lemu-ees, thiab rau Ixama-ees cov tub, thiab tej poj niam Ixama-ees.

8 Thiab tau ua qhov no xwv kom lawv cov tub ki yuav zoo txawv ntawm lawv cov kwv tij cov tub ki, xwv kom tus Tswv uas yog Vajtswv thiaj yuav tshwj tau nws cov neeg, xwv kom lawv tsis txhob sib xyaws thiab tsis txhob ntseeg tej kab lis kev cai uas tsis yog uas yuav ua rau lawv puas tsuaj.

9 Thiab tau muaj tias tus uas cia nws cov tub ki mus xyaw nrog cov Neeg Lamas, tus ntawd yuav coj tau tib txoj kev foom tsis zoo los rau nws cov tub ki.

10 Yog li ntawd, tus uas cia rau cov Neeg Lamas coj nws mus, cov neeg muab tus ntawd hu raws lub npe Lamas, thiab tus Tswv uas yog Vajtswv muab ib lub cim uas ntaus rau nws.

11 Thiab tau muaj tias tus uas tsis ntseeg cov Neeg Lamas txoj kab lis kev cai, tiam sis ntseeg cov ceev xwm txheej uas yog coj tawm ntawm thaj av Yeluxalees tuaj, thiab ntseeg lawv cov yawg koob txoj kab lis kev cai, uas yog txoj kev yog, cov uas ntseeg Vajtswv tej lus txib thiab ua raws li tej lus txib ntawd, yog muab hu ua cov Neeg Nifais, los sis Nifais cov neeg, txij li lub sij hawm ntawd mus—

12 Thiab twb yog lawv cov uas tau ceev cov ceev xwm txheej uas yog qhov tseeb txog lawv cov neeg, thiab txog cov neeg los ntawm cov Neeg Lamas.

13 Nim no peb yuav rov qab hais txog cov Neeg Alixais, vim lawv los kuj raug muab ib lub cim ntaus rau lawv; muaj tseeb tiag, lawv ntaus lub cim rau lawv tus kheej, muaj tseeb tiag, twb yog ib lub cim liab rau lawv hauv pliaj.

14 Yog li ntawd tau muaj raws li Vajtswv txoj lus, vim cov lus uas nws hais rau Nifais muaj raws li no: Saib seb, kuv tau foom tsis zoo rau cov Neeg Lamas, thiab kuv yuav tso ib lub cim rau lawv xwv kom yuav faib lawv thiab lawv cov tub ki tawm ntawm koj thiab koj cov tub ki, txij li lub sij hawm no lawm yav tom ntej thiab mus ib txhis li, tsuas yog hais tias lawv hloov siab lees txim rau lawv txoj kev phem thiab tig los cuag kuv xwv kom kuv muaj kev hlub tshua rau lawv.

15 Thiab ntxiv: Kuv yuav ntaus ib lub cim rau tus uas cia nws cov tub ki mus xyaw nrog koj cov kwv tij, xwv kom lawv yuav raug foom tsis zoo tib yam.

16 Thiab ntxiv: Kuv yuav ntaus ib lub cim rau tus uas tawm tsam koj thiab koj cov tub ki.

17 Thiab ntxiv, kuv hais tias tus uas ncaim ntawm koj mus lawm yuav tsis muab nws hu ua koj cov tub ki; thiab kuv yuav foom koob hmoov rau koj, thiab txhua tus uas yuav hu ua koj cov tub ki, txij no mus lawm yav tom ntej thiab mus ib txhis li; thiab tej no yog tej lus cog tseg ntawm tus Tswv rau Nifais thiab rau nws cov tub ki.

18 Nim no cov Neeg Alixais twb tsis paub tias lawv tab tom ua kom muaj raws li Vajtswv tej lus thaum lawv pib ntaus cim rau lawv hauv pliaj; txawm li ntawd los lawv tseem tab meeg ntxeev siab tawm tsam Vajtswv; yog li ntawd yeej tsim nyog tias txoj kev foom tsis zoo yuav tsum poob los rau lawv.

19 Nim no kuv xav kom nej pom tias lawv coj txoj kev foom tsis zoo los rau lawv tus kheej; thiab txhua tus neeg uas raug foom tsis zoo los kuj coj txoj kev rau txim los rau nws tus kheej thiab.

20 Nim no tau muaj tias tau tsis ntev tom qab npluav rog nyob hauv thaj av Xalahelas, uas yog los ntawm cov Neeg Lamas thiab cov Neeg Alixais, tau muaj dua ib pab tub rog ntawm cov Neeg Lamas tuaj tawm tsam Nifais cov neeg, nyob hauv tib qho chaw uas thawj pab tub rog ntawm cov Neeg Lamas tau ntsib cov Neeg Alixais.

21 Thiab tau muaj tias cov Neeg Nifais xa ib pab tub rog mus raws lawv tawm ntawm lawv thaj av.

22 Nim no vim Amas nws tus kheej raug mob nws thiaj tsis mus ua rog tawm tsam cov Neeg Lamas zaum no;

23 Tiam sis nws xa ib pab tub rog coob mus tawm tsam lawv; thiab lawv mus thiab tua cov Neeg Lamas coob leej, thiab raws lawv cov uas tseem tshuav tawm ntawm lawv thaj av tej ciaj ciam mus.

24 Thiab tom qab ntawd lawv rov qab los dua thiab pib txhim tsa kev thaj yeeb nyob hauv thaj av, thiab lawv tsis muaj teeb meem nrog lawv cov yeeb ncuab ntxiv tau ib ntus.

25 Nim no tau ua tiav txhua yam no, muaj tseeb tiag, tag nrho tej kev ua rog thiab tej kev sib cav sib ceg no tau pib thiab tau xaus nyob hauv xyoo tsib ntawm cov neeg txiav txim txoj kev kav.

26 Thiab nyob hauv ib xyoos, tau muab ntau txhiab leej neeg xa mus rau lub ntuj uas nyob mus ib txhis, xwv kom lawv yuav sau lawv tej nqi zog raws li tej yam uas lawv tau ua, seb lawv ua zoo los sis ua phem, kom sau tau txoj kev zoo siab nyob mus ib txhis los sis txoj kev nyuaj siab nyob mus ib txhis, raws li lawv xaiv ua raws li tus ntsuj plig twg, seb yog ib tug ntsuj plig zoo los sis ib tug phem.

27 Vim txhua tus neeg txais tau nqi zog los ntawm tus uas nws xaiv ua raws li, thiab qhov no yog raws li tej lus ntawm lub txiaj ntsim qhia tau tej yuav muaj los yav tom ntej; yog li ntawd cia kom muaj raws li qhov tseeb. Thiab xws li no thiaj li xaus xyoo thib tsib ntawm cov neeg txiav txim txoj kev kav.