1 Thiab tau muaj tias tom qab ob hnub thiab ob hmos lawv twb yuav luag coj nws lub cev mus thiab muab tso rau hauv ib qhov ntxa pob zeb, uas lawv tau ua los faus lawv cov tuag.

2 Nim no vim niam vaj ntxwv hnov txog Amoos txoj kev muaj suab npe, yog li ntawd nws thiaj xa xov thiab xav kom Amoos tuaj cuag nws.

3 Thiab tau muaj tias Amoos ua li niam vaj ntxwv tau txib nws, thiab mus cuag niam vaj ntxwv, thiab xav paub saib nws xav kom Amoos ua dab tsi.

4 Thiab nws hais rau Amoos tias: Kuv tus txiv cov tub qhe tau ua rau kuv paub tias koj yog ib tug yaj saub los ntawm ib tug Vajtswv uas dawb huv, thiab hais tias koj muaj hwj chim ua tau ntau yam tseem ceeb los ntawm nws lub npe;

5 Yog li ntawd, yog tias qhov no muaj tseeb, kuv xav kom koj mus thiab saib kuv tus txiv, vim nws twb pw saum nws lub txaj tau ob hnub thiab ob hmos lawm; thiab ib txhia hais tias nws tsis tau tuag; tiam sis ib txhia hais tias nws twb tuag thiab nws tsw lwj lawm, thiab kom yuav tsum coj nws mus tso rau hauv lub qhov ntxa pob zeb; tiam sis rau kuv tus kheej, nws twb tsis tsw rau kuv.

6 Nim no, qhov no yog qhov uas Amoos xav tau, vim nws paub tias Vajtswv lub hwj chim los tshoov vaj ntxwv Lamaunais lawm; nws paub tias Vajtswv tab tom tshem daim ntaub thaiv uas tsaus ntuj ntawm kev tsis ntseeg tawm ntawm nws lub cim xeeb, thiab qhov kaj uas ua rau nws lub siab kaj, uas yog qhov kaj ntawm Vajtswv lub yeeb koob, uas yog ib qho kaj zoo kawg nkaus ntawm Vajtswv txoj kev zoo—muaj tseeb tiag, qhov kaj no tau txhab kev xyiv fab heev rau hauv nws tus ntsuj plig, tom qab Vajtswv tau tshem cov huab ntawm kev tsaus ntuj, thiab tau muab qhov kaj ntawm txoj sia uas kav ib txhis zes rau nws tus ntsuj plig, muaj tseeb tiag, Amoos paub tias qhov no tau kov yeej vaj ntxwv Lamaunais cev nqaij daim tawv, thiab Vajtswv tau coj nws mus—

7 Yog li ntawd, qhov uas niam vaj ntxwv xav tau ntawm nws twb yog nws tib txoj kev xav. Yog li ntawd, nws thiaj mus saib tus vaj ntxwv raws li niam vaj ntxwv xav kom nws ua; thiab nws pom tus vaj ntxwv, thiab nws paub tias nws tsis tau tuag.

8 Thiab nws hais rau niam vaj ntxwv tias: Nws tsis tau tuag, tiam sis Vajtswv ua rau nws tsaug zog, thiab tag kis nws yuav sawv rov los; yog li ntawd tsis txhob muab nws faus.

9 Thiab Amoos hais rau nws tias: Koj puas ntseeg qhov no? Thiab nws hais rau Amoos tias: Kuv tsis tau muaj tim khawv tsuas yog koj cov lus, thiab wb cov tub qhe tej lus xwb; txawm li ntawd los kuv ntseeg tias yuav muaj raws li koj tau hais.

10 Thiab Amoos hais rau nws tias: Koj tau koob hmoov vim yog koj txoj kev ntseeg heev; kuv hais rau koj, poj niam, nyob hauv tag nrho cov Neeg Nifais tsis tau muaj leej twg muaj kev ntseeg loj npaum li koj.

11 Thiab tau muaj tias nws zov nws tus txiv lub txaj, txij li lub caij ntawd mus txog rau lub caij tag kis uas Amoos tau teem tias nws yuav sawv.

12 Thiab tau muaj tias nws sawv, raws li Amoos tej lus; thiab thaum nws sawv, nws xyab nws txhais tes mus rau tus poj niam, thiab hais tias: Cia li qhuas Vajtswv lub npe, thiab koj tau koob hmoov.

13 Vim tseeb npaum li uas koj tseem muaj txoj sia, saib seb, kuv tau pom kuv tus Txhiv Dim; thiab nws yuav nqis los, thiab yug los ntawm ib tug poj niam, thiab nws yuav cawm noob neej txhua tus uas ntseeg nws lub npe. Nim no, thaum nws hais tej lus no tas, nws lub siab puv npo, thiab nws rov vau dua nrog kev xyiv fab; thiab niam vaj ntxwv los kuj vau thiab, vim tus Ntsuj Plig lub hwj chim ua rau nws tsis muaj zog.

14 Nim no thaum Amoos pom tias raws li nws tej lus thov tus Tswv tau muab nws tus Ntsuj Plig nplua mias los rau cov Neeg Lamas, uas yog nws cov kwv tij, cov uas tau ua ntau yam kev nyuaj siab nyob hauv cov Neeg Nifais, los sis nyob hauv tag nrho Vajtswv cov neeg vim yog lawv tej kev ua phem thiab lawv tej kab lis kev cai, nws txhos caug ntua, thiab pib thov Vajtswv thiab ua Vajtswv tsaug kawg siab kawg ntsws rau tej uas nws tau ua rau nws cov kwv tij; thiab kev xyiv fab kuj ua rau nws tsis muaj zog thiab; thiab xws li no tag nrho lawv peb leeg tau vau rau hauv av.

15 Nim no, thaum tus vaj ntxwv cov tub qhe pom tias lawv tau vau tas lawm, lawv kuj pib thov Vajtswv, vim txoj kev hwm tus Tswv kuj tau los rau lawv lawm thiab, vim lawv twb yog cov uas tau sawv ntawm tus vaj ntxwv xub ntiag thiab ua tim khawv rau nws txog Amoos lub hwj chim loj.

16 Thiab tau muaj tias lawv hu txog tus Tswv lub npe, tag nrho lawv dag zog, twb mus txog thaum lawv tag nrho tau vau rau hauv av, tsuas yog tshuav ib tug poj niam Lamas, uas muaj npe hu ua Anpis, thiab nws tau hloov siab los ntseeg tus Tswv tau ntau xyoo, vim yog nws txiv txoj kev ua yog toog uas zoo kawg—

17 Yog li ntawd, vim nws tau hloov siab los ntseeg tus Tswv, thiab yeej tsis tau ua rau leej twg paub li, yog li ntawd, thaum nws pom tias tag nrho Lamaunais cov tub qhe tau vau tas rau hauv av, thiab nws tus poj nom, tus uas yog niam vaj ntxwv, thiab tus vaj ntxwv, thiab Amoos pw pua lua rau hauv av, nws paub tias qhov no twb yog Vajtswv lub hwj chim; thiab vim nws xav tias qhov no yog ib lub cib fim zoo, yog ua rau cov neeg paub txog tej uas tau tshwm sim nyob hauv lawv, yog cov neeg pom qhov uas tau tshwm sim no ntshe yuav ua rau lawv ntseeg Vajtswv lub hwj chim, yog li ntawd nws thiaj khiav tawm mus ntawm ib lub tsev rau ib lub tsev, ua rau cov neeg paub txog qhov uas tau tshwm sim no.

18 Thiab lawv pib sib sau tuaj ua ke rau hauv tus vaj ntxwv lub tsev. Thiab ib pab neeg coob tau tuaj rau ntawd, thiab lawv xav tsis thoob, thaum lawv pom vaj ntxwv, thiab niam vaj ntxwv, thiab nkawd cov tub qhe tau pw pua lua rau hauv av, thiab lawv tag nrho pw zoo li lawv twb tuag lawm; thiab lawv kuj pom Amoos, thiab pom tias, nws yog ib tug Neeg Nifais.

19 Thiab nim no cov neeg pib yws yws nyob hauv lawv; ib txhia hais tias qhov no yog ib qho kev phem loj heev uas tau los rau lawv, los sis los rau tus vaj ntxwv thiab nws tsev neeg, vim yog nws tau cia tus Neeg Nifais nyob hauv thaj av.

20 Tiam sis ib txhia cem lawv, hais tias: Tus vaj ntxwv tau coj txoj kev phem no los rau nws tsev neeg, vim yog nws tua nws cov tub qhe uas cia lawv cov yaj tawg khiav nyob rau tom cov dej Xinpus.

21 Thiab lawv kuj raug cem los ntawm cov txiv neej uas tau sawv nram cov dej Xinpus thiab ua rau cov yaj uas yog vaj ntxwv li tawg khiav, vim lawv npau taws rau Amoos vim yog nws muab lawv cov kwv tij coob leej tua nyob nram cov dej Xinpus, thaum tab tom tiv thaiv tus vaj ntxwv cov yaj.

22 Nim no, ib tug ntawm lawv, uas nws tus kwv tij tau raug tua los ntawm Amoos rab ntaj, vim nws npau taws heev rau Amoos, rho hlo nws rab ntaj thiab txav zog mus xwv kom nws yuav xuas ntaj muab Amoos tua; thiab thaum nws tsa hlo rab ntaj tua Amoos, saib seb, nws cia li vau hlo tuag kiag.

23 Nim no peb pom tias tsis muaj peev xwm tua tau Amoos, vim tus Tswv tau hais rau Mauxiyas, nws txiv hais tias: Kuv yuav tseg nws txoj sia, thiab yuav muaj li ntawd rau nws raws li koj txoj kev ntseeg—yog li ntawd, Mauxiyas tso siab muab nws rau tus Tswv.

24 Thiab tau muaj tias thaum cov neeg coob coob pom tias tus txiv neej, uas tsa ntaj tua Amoos tau vau tuag lawm, ua rau lawv txhua tus ntshai, thiab lawv tsis kam cev lawv txhais tes mus kov nws los sis kov ib tug twg ntawm cov uas tau vau; thiab lawv rov pib xav tsis thoob dua nyob hauv lawv hais tias qhov uas tau ua lub hwj chim loj no yog dab tsi, los sis hais tias txhua yam no txhais li cas.

25 Thiab tau muaj tias muaj coob leej nyob hauv lawv uas hais tias Amoos yog tus Ntsuj Plig uas Muaj Hwj Chim, thiab muaj ib txhia ho hais tias Amoos yog tus Ntsuj Plig uas Muaj Hwj Chim xa los;

26 Tiam sis ib txhia ho cem lawv txhua tus, hais tias nws yog ib tug dab phem, uas cov Neeg Nifais tau xa tuaj tsim txom lawv.

27 Thiab muaj ib txhia hais tias tus Ntsuj Plig uas Muaj Hwj Chim tau xa Amoos los tsim txom lawv vim yog lawv tej kev ua phem; thiab hais tias twb yog tus Ntsuj Plig uas Muaj Hwj Chim uas ib txwm saib xyuas cov Neeg Nifais, tus uas ib txwm tso lawv dim ntawm cov Neeg Lamas txhais tes; thiab lawv hais tias twb yog tus Ntsuj Plig uas Muaj Hwj Chim no uas tau ua rau lawv cov kwv tij, uas yog cov Neeg Lamas, coob leej heev puas tsuaj.

28 Thiab xws li no txoj kev sib cav sib ceg pib muaj ceem heev kawg nkaus nyob hauv lawv. Thiab thaum lawv tab tom sib cav zoo li no, tus poj niam ntxhais qhev los txog, tus uas tau ua rau cov neeg coob coob tuaj sib sau ua ke, thiab thaum nws pom txoj kev sib cav nyob hauv cov neeg coob coob nws tu siab heev, ua rau nws los kua muag.

29 Thiab tau muaj tias nws mus thiab tuav niam vaj ntxwv tes, xwv kom tej zaum nws yuav tsa tau nws sawv hauv av los; thiab thaum nws tuav nkaus niam vaj ntxwv tes nws cia li sawv tsees sawv ntsug, thiab tshaj nrog ib lub suab nrov nrov hais tias: Auj Yexus tus uas muaj yeeb koob, tus uas tau cawm kuv dim ntawm ntuj txiag teb tsaus uas phem heev! Auj Vajtswv tus ua muaj yeeb koob, thov hlub tshua cov neeg no!

30 Thiab thaum nws tau hais li no tas lawm, nws muab nws ob txhais tes los ua ke, vim nws muaj kev xyiv fab puv npo, thiab nws hais ntau lo lus uas tsis to taub; thiab thaum nws tau ua li no tas lawm, nws tuav vaj ntxwv Lamaunais txhais tes, thiab saib seb nws cia li sawv tsees sawv ntsug.

31 Thiab nws, tam sim ntawd, vim nws pom txoj kev sib cav sib ceg nyob hauv nws cov neeg, txav zog mus thiab pib cem lawv, thiab qhia tej lus uas nws tau hnov los ntawm Amoos lub qhov ncauj rau lawv; thiab tag nrho cov uas hnov nws cov lus cia li ntseeg, thiab cia li hloov siab los ntseeg tus Tswv.

32 Tiam sis muaj coob leej nyob hauv lawv uas tsis kam mloog nws cov lus; yog li ntawd lawv nyias mus nyias txoj kev.

33 Thiab tau muaj tias thaum Amoos sawv los nws kuj qhuab qhia rau lawv, thiab tag nrho Lamaunais cov tub qhe los kuj ua li ntawd thiab; thiab lawv txhua tus tshaj tawm tib co lus rau cov neeg—hais tias Vajtswv twb muab lawv lub siab hloov lawm; hais tias lawv tsis muaj siab xav ua phem ntxiv lawm.

34 Thiab saib seb, lawv coob leej tshaj tawm rau cov neeg hais tias lawv tau pom tej tim tswv thiab tau nrog lawv tham; thiab xws li no lawv tau qhia rau cov neeg txog tej yam los ntawm Vajtswv, thiab txog nws txoj kev ncaj ncees.

35 Thiab tau muaj tias muaj coob leej ntseeg lawv cov lus; thiab tag nrho cov uas ntseeg tau ua kev cai raus dej; thiab lawv hloov los ua ib co neeg ncaj ncees, thiab lawv txhim tsa ib lub koom txoos nyob hauv lawv.

36 Thiab xws li no tus Tswv txoj hauj lwm pib muaj nyob hauv cov Neeg Lamas; xws li no tus Tswv pib pub nws tus Ntsuj Plig nplua mias rau lawv; thiab peb pom tias nws yeej cev nws txhais npab rau tag nrho cov neeg uas yuav hloov siab lees txim thiab ntseeg nws lub npe.