1 Thiab nim no, kuv tus me tub es, kuv paub tias tseem tshuav tej yam ntau ntxiv uas pheej ua rau koj lub siab txhawj, tej uas koj tsis to taub—tej uas yog ntsig txog Vajtswv txoj kev txim lij uas rau txim rau cov neeg ua txhaum; vim koj twb sim xav tias tsis txim lij uas tus neeg ua txhaum yuav tsum raug txib mus rau txoj kev nyuaj siab.

2 Nim no saib seb, kuv tus me tub, kuv yuav piav tej yam no rau koj. Vim saib seb, tom qab tus Tswv uas yog Vajtswv xa peb thawj nkawm niam txiv tawm hauv lub vaj Edees, mus ncaws teb, qhov uas tau muab nkawd los—muaj tseeb tiag, nws rho tus txiv neej tawm, thiab nws muab ib co qhelunpees, thiab ib rab ntaj nplaim taws uas tig rau txhua sab, tso rau sab hnub tuaj ntawm lub vaj Edees, zov tsob ntoo uas cawm neeg txoj sia—

3 Nim no, peb pom tias tus txiv neej tau hloov los ua neeg zoo li Vajtswv, paub qhov zoo thiab qhov phem; thiab ntshai tsam nws yuav cev nws txhais tes, thiab mus de cov txiv ntawm tsob ntoo uas cawm neeg txoj sia thiab, thiab muab noj thiab muaj sia nyob mus ib txhis, tus Tswv uas yog Vajtswv thiaj muab cov qhelunpees thiab rab ntaj nplaim taws tso rau hauv, xwv kom nws txhob noj cov txiv ntawd—

4 Thiab yog li ntawd peb pom tias, Vajtswv tau muab ib lub sij hawm pub rau tib neeg los hloov siab lees txim, muaj tseeb tiag, ib lub caij sim siab, ib lub caij hloov siab lees txim thiab teev tiam Vajtswv.

5 Vim saib seb, yog tias Adas cev nws txhais tes nrawm nroos, thiab noj cov txiv ntawm tsob ntoo uas cawm neeg txoj sia, ces ntshe nws yuav muaj sia nyob mus ib txhis, raws li Vajtswv txoj lus, thiab nws yuav tsis muaj caij rau kev hloov siab lees txim; muaj tseeb tiag, thiab tsis tas li ntawd Vajtswv txoj lus yuav tsis muaj qab hau, thiab yuav nres txoj hau kev cawm seej uas tseem ceeb.

6 Tiam sis saib seb, Vajtswv tau teem ib lub caij rau neeg tuag—yog li ntawd, ib yam li lawv raug txiav tawm ntawm tsob ntoo uas cawm neeg txoj sia lawv kuj yuav raug txiav tawm ntawm lub ntiaj teb mus—thiab tib neeg hloov los ua ib co neeg uas ploj mus ib txhis, muaj tseeb tiag, lawv hloov los ua ib co neeg uas poob mus li.

7 Thiab nim no, los ntawm qhov no koj pom tias peb thawj nkawm niam txiv raug txiav tawm ntawm tus Tswv xub ntiag ntawm sab cev nqaij daim tawv thiab ntawm sab ntsuj plig; thiab yog li no peb pom tias nkawd hloov ua cov uas ua raws li lawv tus kheej lub siab nyiam.

8 Nim no saib seb, tsis tsim nyog rau Vajtswv txhiv kom tib neeg dim ntawm txoj kev tuag ntawm sab cev nqaij daim tawv no, vim tias qhov ntawd yuav rhuav txoj hau kev zoo siab uas tseem ceeb.

9 Yog li ntawd, vim tus ntsuj plig tuag tsis taus, thiab txoj kev poob tau coj txoj kev tuag ntawm sab cev nqaij daim tawv thiab sab ntsuj plig los rau noob neej txhua tus, qhov ntawd txhais hais tias, lawv raug txiav tawm ntawm tus Tswv xub ntiag mus, thiaj li tsim nyog rau Vajtswv txhiv kom noob neej dim ntawm txoj kev tuag ntawm sab ntsuj plig no.

10 Yog li ntawd, vim lawv tau hloov los ua neeg muaj lub siab nyiam sab cev nqaij daim tawv, ua raws li sab cev nqaij daim tawv xav, thiab ua li dab phem ua, los ntawm lawv tus xeeb ceem, lub caij sim siab no hloov ua ib lub caij rau lawv npaj; lub caij sim siab no hloov ua ib lub caij rau kev npaj.

11 Thiab nim no nco ntsoov, kuv tus me tub, yog tsis muaj txoj hau kev txhiv dim, (yog muab txoj hau kev txhiv dim tso tseg) ces thaum lawv tuag kiag lawv tej ntsuj plig yuav nyuaj siab, vim lawv raug txiav tawm ntawm tus Tswv xub ntiag mus.

12 Thiab nim no, twb tsis muaj ib txoj hau kev twg uas yuav cawm tau tib neeg kom dim ntawm txoj kev poob no, uas tib neeg tau coj los rau nws tus kheej vim yog nws txoj kev tsis mloog lus;

13 Yog li ntawd, raws li txoj kev txim lij, yuav coj tsis tau txoj hau kev txhiv dim los, tsuas yog hais tias tib neeg yuav hloov siab lees txim nyob hauv lub caij sim siab no xwb, muaj tseeb tiag, lub caij rau kev npaj no; vim yog tsis muaj tej yam no, ces txoj kev hlub tshua twb pab tsis tau, tiam sis yuav rhuav txoj kev txim lij txoj hauj lwm. Nim no rhuav tsis tau txoj kev txim lij txoj hauj lwm; yog ua tau li ntawd ces, ntshe Vajtswv tsis yog Vajtswv ntxiv.

14 Thiab yog li ntawd peb pom tias tag nrho noob neej tau poob, thiab txoj kev txim lij muab lawv tuav cia; muaj tseeb tiag, Vajtswv txoj kev txim lij, uas ua rau lawv raug txiav tawm ntawm nws xub ntiag mus ib txhis.

15 Thiab nim no, yuav coj tsis tau txoj hau kev hlub tshua los tsuas yog tias yuav tsum muaj ib txoj kev theej txhoj xwb; yog li ntawd Vajtswv tus kheej thiaj li theej rau neeg ntiaj teb tej kev txhaum, kom coj tau txoj hau kev hlub tshua los, kom them tej nqi ntawm txoj kev txim lij, hais tias Vajtswv yog ib tug Vajtswv uas zoo tag nrho, uas ncaj ncees, thiab kuj yog ib tug Vajtswv uas muaj kev hlub tshua thiab.

16 Nim no, kev hloov siab lees txim yuav los tsis tau rau tib neeg tsuas yog yuav tsum muaj ib txoj kev rau txim, uas kuj yog nyob mus ib txhis ib yam li txoj sia ntawm tus ntsuj plig, kom ua fab ntxeev rau txoj hau kev zoo siab, uas kuj yog nyob mus ib txhis ib yam li txoj sia ntawm tus ntsuj plig thiab.

17 Nim no, ib tug neeg yuav ua li cas hloov siab lees txim yog hais tias nws tsis tau ua txhaum? Nws yuav ua tau txhaum li cas yog tsis muaj txoj kev cai? Yuav muaj taus ib txoj kev cai li cas, yog hais tias tsis muaj ib txoj kev rau txim?

18 Nim no, Vajtswv tau muab ib txoj kev rau txim txuas rau txoj kev cai, thiab ib txoj kev cai ncaj ncees, uas ua rau tib neeg muaj kev tu siab los ntawm kev paub qhov zoo thiab qhov phem.

19 Nim no, yog tsis muaj ib txoj kev cai—yog ib tug neeg tua neeg ces nws yuav tsum tuag—nws puas yuav ntshai tsam nws tuag yog nws tua neeg?

20 Thiab ntxiv, yog tsis muaj kev cai tawm tsam kev txhaum ces neeg yeej tsis ntshai ua txhaum.

21 Thiab yog tsis muaj kev cai, yog neeg ua txhaum, kev txim lij los sis kev hlub tshua puas yuav muaj peev xwm ua tau dab tsi, vim kev txim lij thiab kev hlub tshua twb tsis muaj tug rau tib neeg?

22 Tiam sis Vajtswv twb muab ib txoj kev cai, thiab ib txoj kev rau txim txuas rau txoj kev cai, thiab pub ib txoj kev hloov siab lees txim; txoj kev hloov siab lees txim uas txoj kev hlub tshua hais tias yuav tsum muaj; tsis li ntawd ces, kev txim lij yuav muaj tug rau tib neeg thiab txiav txim raws li txoj kev cai, thiab txoj kev cai yuav rau txim rau tib neeg; yog tsis muaj li no, tej hauj lwm ntawm kev txim lij yuav raug puas tsuaj, thiab ntshe Vajtswv tsis yog Vajtswv ntxiv.

23 Tiam sis Vajtswv yeej yog Vajtswv, thiab kev hlub tshua muaj tug rau cov uas hloov siab lees txim, thiab muaj kev hlub tshua los twb vim yog txoj kev theej txhoj; thiab txoj kev theej txhoj coj tau kom muaj txoj kev sawv rov los ntawm cov tuag; thiab txoj kev sawv rov los ntawm cov tuag coj tau tib neeg rov qab mus rau hauv Vajtswv xub ntiag; thiab xws li no muab lawv txum tim rov qab mus rau hauv nws xub ntiag, kom lawv raug txiav txim raws li tej yam lawv ua, raws li txoj kev cai thiab txoj kev txim lij.

24 Vim saib seb, kev txim lij yuam kom them tag nrho nws tej nqi, thiab kev hlub tshua muaj tug rau tag nrho tej uas yog nws li; thiab xws li no, tsuas yog cov uas hloov siab lees txim tiag tiag thiaj li dim xwb.

25 Dab tsi, koj puas xav tias kev hlub tshua yuav muaj peev xwm nyiag tau ntawm kev txim lij? Kuv hais rau koj tias, Tsis muaj; tsis muaj peev xwm hlo li. Yog muaj li ntawd ces, ntshe Vajtswv tsis yog Vajtswv ntxiv.

26 Thiab xws li no Vajtswv ua kom muaj raws li nws tej lub hom phiaj uas tseem ceeb thiab nyob mus ib txhis, uas twb tau npaj txij thaum ntuj tsim teb raug los. Thiab xws li no thiaj muaj txoj kev cawm seej thiab txoj kev txhiv dim rau tib neeg, thiab thiaj muaj tau lawv txoj kev puas tsuaj thiab txoj kev nyuaj siab.

27 Yog li ntawd, auj kuv tus me tub es, txhua tus uas xav los ces muaj cai los thiab haus cov dej ntawm txoj sia tsis yuav nqi; thiab tus uas ho tsis kam los tus ntawd yeej tsis txhib kom los; tiam sis thaum txog hnub kawg yuav muab txum tim rov qab rau nws raws li nws tau ua.

28 Yog nws xav ua phem, thiab tsis tau hloov siab lees txim nyob hauv nws lub neej, saib seb, yuav muab kev phem ua rau nws, raws li Vajtswv txoj kev txum tim rov qab los.

29 Thiab nim no, kuv tus me tub, kuv xav kom koj tsis txhob cia tej yam no xeeb txob koj ntxiv lawm, thiab tsuas cia koj tej kev txhaum xeeb txob koj xwb, kom nrog kev xeeb txob ntawd es yuav ua kom koj hloov siab lees txim.

30 Auj kuv tus me tub es, kuv thov kom koj tsis txhob xyeej Vajtswv txoj kev txim lij ntxiv lawm. Txawm tej lub ntsiab lus me npaum twg los tsis txhob nrhiav kev zam koj tus kheej vim yog koj tej kev txhaum, los ntawm txoj kev xyeej Vajtswv txoj kev txim lij; tiam sis cia Vajtswv txoj kev txim lij, thiab nws txoj kev hlub tshua, thiab nws txoj kev ua siab ntev nyiaj nyob puv nkaus rau hauv koj lub siab; thiab cia tej no ua rau koj txo hwj chim nqis mus rau hauv av.

31 Thiab nim no, auj kuv tus me tub es, Vajtswv hu koj mus tshaj tawm txoj lus rau cov neeg no. Thiab nim no, kuv tus me tub, koj cia li mus, tshaj tawm txoj lus nrog qhov tseeb thiab txoj kev mob siab ua tiag tiag, xwv kom koj yuav coj tau neeg los rau kev hloov siab lees txim, xwv kom txoj hau kev hlub tshua uas tseem ceeb yuav muaj tug rau lawv. Thiab thov kom Vajtswv pub rau koj raws li kuv tej lus. Amees.