1 Thiab nim no tau muaj tias thaum Maulaunais tau txais tsab ntawv no nws lub siab muaj zog tuaj, thiab muaj kev xyiv fab puv npo vim yog Pehaulas txoj kev ntseeg, hais tias nws twb tsis yog ib tug neeg ntxeev siab rau txoj kev ywj pheej thiab lub ntsiab cai ntawm nws lub teb chaws.

2 Tiam sis nws kuj quaj ntsuag heev vim yog txoj kev ua phem ntawm cov uas tau raws Pehaulas tawm ntawm lub rooj txiav txim, muaj tseeb tiag, lub ntsiab yog vim yog cov uas tau ntxeev siab tawm tsam lawv lub teb chaws thiab lawv tus Vajtswv.

3 Thiab tau muaj tias Maulaunais coj ib pab tub rog tsis coob, raws li Pehaulas siab xav, thiab cia rau Lihais thiab Thi-akhas saib xyuas nws cov tub rog uas tseem tshuav, thiab nws taug kev mus rau tom thaj av Nkide-oos.

4 Thiab nws tsa tus chij ntawm kev ywj pheej rau txhua qhov chaw uas nws nkag mus, thiab sau tau tub rog npaum li nws muaj peev xwm ua tau thaum nws taug kev mus rau tom thaj av Nkide-oos.

5 Thiab tau muaj tias txhiab txhiab leej tau sau los rau ntawm nws tus chij, thiab nqa lawv tej ntaj tiv thaiv lawv txoj kev ywj pheej, xwv kom lawv thiaj tsis tau raug kev poob cev qhev.

6 Thiab yog li ntawd, thaum Maulaunais sau tau cov tub rog los ua ke npaum li nws ua tau los ntawm tag nrho tej chaw uas nws mus, nws mus rau tom thaj av Nkide-oos; thiab thaum nws muab nws cov tub rog los koom nrog Pehaulas cov lawv muaj zog heev, twb muaj zog tshaj Pakas cov tub rog, tus uas yog vaj ntxwv ntawm cov neeg ntxeev siab uas tau raws cov neeg ywj pheej tawm ntawm thaj av Xalahelas thiab txeeb tau thaj av.

7 Thiab tau muaj tias Maulaunais thiab Pehaulas nrog nkawd cov tub rog mus rau nram thaj av Xalahelas, thiab tawm mus tawm tsam lub nroog, thiab mus ntsib Pakas cov tub rog, lawv thiaj tau ua rog.

8 Thiab saib seb, Pakas raug tua thiab nws cov tub rog raug txhom ua neeg raug txim, thiab rov qab txum tim lub rooj txiav txim rau Pehaulas.

9 Thiab Pakas cov tub rog tau los hais lawv plaub, raws li txoj kev cai, thiab cov neeg vaj ntxwv uas raug txhom thiab raug muab tso rau hauv lub tsev kaw; thiab lawv raug tua raws li txoj kev cai; muaj tseeb tiag, Pakas cov tub rog thiab cov neeg vaj ntxwv ntawd, txhua tus uas tsis kam nqa cuab yeej ua rog tiv thaiv lawv lub teb chaws, tiam sis tseem tawm tsam lawv lub teb chaws, lawv raug muab tua.

10 Thiab yog li ntawd yeej tsim nyog kom coj nruj raws li txoj kev cai no kom muaj kev nyab xeeb rau lawv lub teb chaws; muaj tseeb tiag, thiab txhua tus uas xyeej lawv txoj kev ywj pheej lawv raug muab tua nrawm nroos raws li txoj kev cai.

11 Thiab xyoo thib peb caug ntawm cov neeg txiav txim txoj kev kav Nifais cov Neeg tau xaus li no; Maulaunais thiab Pehaulas rov qab txum tim txoj kev thaj yeeb rau thaj av Xalahelas, nyob hauv nkawd cov neeg, thiab tau muab kev tuag rau txhua tus uas tsis cia siab rau tej ntsiab cai ntawm kev ywj pheej.

12 Thiab tau muaj tias nyob rau thaum pib ntawm xyoo thib peb caug ib ntawm cov neeg txiav txim txoj kev kav Nifais cov neeg, Maulaunais hais kom xa tej khoom noj khoom siv nrawm nroos, thiab xa ib pab tub rog muaj rau txhiab leej mus rau Hilamas, mus pab nws ceev feem av ntawd.

13 Thiab nws kuj hais kom xa ib pab tub rog muaj rau txhiab leej, nrog zaub mov noj kom txaus nkaus, mus rau Lihais thiab Thi-akhas cov tub rog. Thiab tau muaj tias tau ua li no kom ua tau rau thaj av ruaj khov tawm tsam cov Neeg Lamas.

14 Thiab tau muaj tias Maulaunais thiab Pehaulas, tso tseg ib pab tub rog uas coob heev cia rau hauv thaj av Xalahelas, thiab nkawd taug kev nrog ib pab tub rog uas coob heev mus rau tom thaj av Nifaihas, vim nkawd txiav txim siab yuav mus rhuav tshem cov Neeg Lamas nyob hauv lub nroog ntawd.

15 Thiab tau muaj tias thaum lawv tab tom taug kev mus rau tom thaj av, lawv txhom tau cov Neeg Lamas ib pab tub rog uas coob heev, thiab muab lawv coob leej tua, thiab txeeb tau lawv tej khoom noj khoov siv thiab lawv tej cuab yeej ua rog.

16 Thiab tau muaj tias tom qab lawv txhom tau cov Neeg Lamas cov tub rog, lawv hais kom cov Neeg Lamas cov tub rog ua kev khi lus tias lawv yuav tsis nqa lawv tej cuab yeej ua rog tuaj tawm tsam cov Neeg Nifais ntxiv lawm.

17 Thiab thaum lawv tau ua kev khi lus no lawm lawv muab cov Neeg Lamas xa mus nrog Amoos cov neeg nyob, thiab lawv muaj kwv yees li plaub txhiab leej uas tsis tau raug tua.

18 Thiab tau muaj tias thaum lawv muab cov Neeg Lamas xa mus lawm lawv rov taug kev mus rau tom thaj av Nifaihas. Thiab tau muaj tias thaum lawv mus txog rau tom lub nroog Nifaihas, lawv rub lawv tej tsev pheeb suab ntaub nyob hauv tej tiaj ntawm Nifaihas, uas yog nyob ze lub nroog Nifaihas.

19 Nim no Maulaunais xav kom cov Neeg Lamas tawm tuaj ua rog tawm tsam lawv, nyob saum tej tiaj; tiam sis cov Neeg Lamas, vim lawv paub tias cov Neeg Nifais cov tub rog muaj peev xwm heev, thiab pom tias lawv muaj coob heev, yog li ntawd lawv tsis kam tawm tuaj tawm tsam lawv; yog li ntawd lawv tsis kam tuaj ua rog nyob rau hnub ntawd.

20 Thiab thaum tsaus ntuj tuaj, Maulaunais tau tawm mus nyob hauv txoj kev tsaus ntawm hmo ntuj, thiab nce mus rau saum hau ntsa loog soj seb cov Neeg Lamas teeb lawv tej yeej nrog lawv cov tub rog nyob rau feem twg ntawm lub nroog.

21 Thiab tau muaj tias lawv nyob rau sab hnub tuaj, ze ntawm lub qhov rooj nkag mus; thiab lawv txhua tus tsaug zog. Thiab nim no Maulaunais rov qab mus rau tom nws cov tub rog, thiab hais kom lawv nrawm nroos npaj tej hlua khov thiab tej ntaiv, coj mus tuam saum ntsa loog mus rau sab hauv ntsa loog.

22 Thiab tau muaj tias Maulaunais hais kom nws cov tub rog tawm mus thiab nce mus rau saum hau ntsa loog, thiab cia lawv nqis mus rau hauv feem ntawd ntawm lub nroog, muaj tseeb tiag, twb nyob rau sab hnub poob, qhov uas cov Neeg Lamas tsis teeb yeej nrog lawv cov tub rog.

23 Thiab tau muaj tias tag nrho Maulaunais cov tub rog tau nqis mus rau hauv lub nroog thaum tsaus ntuj, los ntawm lawv tej hlua khov thiab lawv tej ntaiv; yog li ntawd thaum sawv ntxov tuaj lawv txhua tus nyob sab hauv ntawm tej ntsa loog.

24 Thiab nim no, thaum cov Neeg Lamas tsim los thiab pom tias Maulaunais cov tub rog twb nyob sab hauv ntawm tej ntsa loog, lawv ceeb loj kawg li, ua rau lawv cia li khiav tawm ntawm lub rooj vag mus.

25 Thiab nim no thaum Maulaunais pom tias lawv tab tom khiav ua ntej nws, nws hais kom nws cov tub rog tawm mus tawm tsam lawv, thiab muab coob leej tua, thiab vij tau coob leej, thiab txhom lawv ua neeg raug txim; thiab cov uas seem tau khiav mus rau hauv thaj av Maulaunais, uas yog nyob hauv tej ciam teb ze ntug dej hiav txwv.

26 Xws li no Maulaunais thiab Pehaulas rov txeeb tau lub nroog Nifaihas yam tsis xiam ib tug neeg li; thiab cov Neeg Lamas muaj coob leej raug tua.

27 Nim no tau muaj tias coob leej ntawm cov Neeg Lamas uas yog neeg raug txim xav mus koom nrog Amoos cov neeg thiab ua ib co neeg ywj pheej.

28 Thiab tau muaj tias tag nrho cov uas xav ua li ntawd, ces tau pub rau lawv raws li lawv siab xav.

29 Yog li ntawd, tag nrho cov Neeg Lamas uas raug txim tau mus koom nrog Amoos cov neeg, thiab pib sib zog khwv heev, khawb av, cog txhua yam noob, thiab yug tej pab yaj thiab tej tsiaj txhu txhua yam; thiab yog li ntawd cov Neeg Nifais lub nra hnyav thiaj tau sib; muaj tseeb tiag, lawv thiaj tau dim ntawm txoj kev zov tag nrho cov Neeg Lamas uas raug txim.

30 Nim no tau muaj tias Maulaunais, tom qab nws rov txeeb tau lub nroog Nifaihas, tom qab nws txhom tau neeg raug txim coob leej, uas ua rau cov Neeg Lamas cov tub rog tsawg lawm ntau, thiab tom qab nws coj tau cov Neeg Nifais coob leej uas raug txhom ua neeg raug txim, uas yog los txhawb zog loj heev rau Maulaunais cov tub rog; yog li ntawd Maulaunais tawm ntawm thaj av Nifaihas mus rau tom thaj av Lihais.

31 Thiab tau muaj tias thaum cov Neeg Lamas pom tias Maulaunais tab tom tuaj tawm tsam lawv, lawv rov qab ntshai thiab khiav ua ntej Maulaunais cov tub rog.

32 Thiab tau muaj tias Maulaunais thiab nws cov tub rog tau raws lawv qab ntawm ib lub nroog mus rau ib lub nroog, txog rau thaum lawv mus ntsib Lihais thiab Thi-akhas; thiab cov Neeg Lamas tau khiav ntawm Lihais thiab Thi-akhas mus, twb mus rau nram tej ciam teb ze ntug hiav txwv, txog rau thaum lawv los txog rau thaj av Maulaunais.

33 Thiab tag nrho cov Neeg Lamas cov tub rog sib sau los ua ke, npaum li uas lawv tag nrho tau ua ib pab nyob hauv thaj av Maulaunais. Nim no, Amauloos, cov Neeg Lamas tus vaj ntxwv, kuj nrog lawv thiab.

34 Thiab tau muaj tias Maulaunais thiab Lihais thiab Thi-akhas tau teeb yeej nrog lawv cov tub rog nyob ib puag ncig hauv tej ciam teb ntawm thaj av Maulaunais, ua rau cov Neeg Lamas raug vij nyob hauv tej ciam teb ze koog hav zoov uas nyob sab qab teb, thiab nyob hauv tej ciam teb ze koog hav zoov uas nyob sab hnub tuaj.

35 Thiab xws li no lawv tau teeb yeej rau hmo ntawd. Vim saib seb, cov Neeg Nifais thiab cov Neeg Lamas sab lim vim yog taug kev deb; yog li ntawd hmo ntawd lawv thiaj tsis txiav txim siab siv ib lub tom txwv, tsuas yog Thi-akhas xwb; vim nws npau taws heev rau Amauloos, nws thiaj li xav tias Amauloos, thiab nws tus tij laug Amalikhaiyas, yog ob tug uas ua kom muaj npluav rog loj thiab tsis paub kawg no ntawm lawv thiab cov Neeg Lamas, uas ua kom muaj kev ua rog thiab nqaij ntuag ntshav nrog ntau, muaj tseeb tiag, thiab kev tshaib nqhis ntau kawg nkaus.

36 Thiab tau muaj tias Thi-akhas npau taws thiab tawm mus rau hauv cov Neeg Lamas lub yeej, thiab nqis ntawm cov ntsa loog mus rau hauv lub nroog. Thiab nws nqa ib txoj hlua tawm mus, ntawm ib qho chaw rau ib qho chaw, nws thiaj li nrhiav tau tus vaj ntxwv; thiab nws txawb ib rab hmuv mus rau tus vaj ntxwv, uas chob tus vaj ntxwv ze ntawm nws lub plawv. Tiam sis saib seb, tus vaj ntxwv tau tsa nws cov tub qhe ua ntej nws tuag, lawv thiaj tau caum Thi-akhas, thiab muab nws tua.

37 Nim no tau muaj tias thaum Lihais thiab Maulaunais paub tias Thi-akhas tuag lawm nkawd tu siab heev; vim saib seb, nws yog ib tug neeg uas sib ntaus sib tua yam tsis ntshai kiag rau nws lub teb chaws, muaj tseeb tiag, yog ib tug phooj ywg tseeb rau kev ywj pheej; thiab nws tau raug ntau yam kev txom nyem mob kawg nkaus. Tiam sis saib seb, nws twb tuag lawm, thiab twb mus rau txoj kev uas tag nrho neeg ntiaj teb mus.

38 Nim no tau muaj tias hnub tom qab Maulaunais tau tawm mus, thiab tawm tsam cov Neeg Lamas, lawv txawm muab cov Neeg Lamas tua tuag coob heev; thiab lawv muab cov Neeg Lamas raws tawm ntawm thaj av mus; thiab cov Neeg Lamas tau khiav, lawv thiaj tsis rov qab tuaj tawm tsam cov Neeg Nifais nyob rau lub sij hawm ntawd.

39 Thiab xyoo thib peb caug ib ntawm cov neeg txiav txim txoj kev kav Nifais cov neeg tau xaus li no; thiab xws li no lawv muaj kev ua rog, thiab nqaij ntuag ntshav nrog, thiab kev tshaib nqhis, thiab kev txom nyem, tau ntau xyoo.

40 Thiab tau muaj kev tua neeg, thiab kev sib cav sib ceg, thiab kev ntxeev siab, thiab txhua yam kev phem nyob hauv Nifais cov neeg; txawm li ntawd los rau cov uas ncaj ncees, muaj tseeb tiag, vim yog cov ncaj ncees tej kev thov Vajtswv, Vajtswv thiaj tseg lawv txoj sia.

41 Tiam sis saib seb, vim yog npluav rog ntawm cov Neeg Nifais thiab cov Neeg Lamas tau ncua ntev heev, muaj coob leej tau hloov los ua siab tawv, vim yog npluav rog tau ncua ntev heev; thiab coob leej tau ua siab muag vim yog lawv tej kev txom nyem, ua rau lawv txo lawv lub hwj chim rau Vajtswv, twb txo hwj chim kawg nkaus li.

42 Thiab tau muaj tias tom qab Maulaunais tau txhim kho tej feem av uas nyob qhib lug rau cov Neeg Lamas, txog rau thaum uas tej feem av ntawd muaj zog txaus lawm, nws rov qab mus rau tom lub nroog Xalahelas; thiab Hilamas los kuj rov qab mus rau tom qhov chaw uas yog nws qub txeeg qub teg; thiab rov qab txhim tsa tau kev thaj yeeb dua ib zaug ntxiv nyob hauv cov Neeg Nifais.

43 Thiab Maulaunais tso txoj kev saib xyuas nws cov tub rog rau hauv nws tus tub txhais tes, tus uas npe hu ua Maulaunaihas; thiab nws mus so nyob hauv nws lub tsev xwv kom nws yuav tau ua lub neej nrog kev thaj yeeb rau lub sij hawm uas nws tseem tshuav.

44 Thiab Pehaulas rov qab mus rau nws lub rooj txiav txim; thiab Hilamas rov qab mus tshaj tawm Vajtswv txoj lus rau cov neeg dua; vim yog muaj kev ua rog thiab kev sib cav sib ceg ntau thiaj li tsim nyog kom rov qab tsa ib txoj kev cai dua nyob hauv lub koom txoos.

45 Yog li ntawd, Hilamas thiab nws cov kwv tij tawm mus, tshaj tawm Vajtswv txoj lus yam muaj hwj chim heev uas hloov tau coob leej los to taub txog lawv tej kev phem, uas ua rau lawv hloov siab lees txim rau lawv tej kev txhaum thiab ua kev cai raus dej rau tus Tswv lawv tus Vajtswv.

46 Thiab tau muaj tias lawv rov qab txhim tsa Vajtswv lub koom txoos dua, nyob thoob plaws hauv thaj av.

47 Muaj tseeb tiag, thiab tau tsa tej txheej txheem ntsig txog txoj kev cai. Thiab tau xaiv lawv cov neeg txiav txim, thiab lawv cov thawj txiav txim.

48 Thiab Nifais cov neeg pib vam meej dua nyob hauv thaj av, thiab pib huaj vam thiab muaj zog heev zuj zus tuaj nyob hauv thaj av. Thiab lawv pib nplua nuj heev.

49 Tiam sis txawm hais tias lawv nplua nuj, los sis lawv muaj zog, los sis lawv vam meej, lawv twb tsis khav theeb vim lawv qhov muag muab hlob; thiab lawv twb tsis qeeb nco txog tus Tswv lawv tus Vajtswv; tiam sis lawv txo lawv lub hwj chim rau nws heev kawg nkaus.

50 Muaj tseeb tiag, lawv nco ntsoov tej yam tseem ceeb heev uas tus Tswv tau ua rau lawv, nco tias nws tau cawm lawv dim ntawm kev tuag, thiab ntawm tej kev ua qhev, thiab ntawm tej tsev kaw, thiab ntawm txhua yam kev txom nyem, thiab nws tau cawm lawv dim ntawm lawv cov yeeb ncuab txhais tes.

51 Thiab lawv thov tus Tswv lawv tus Vajtswv tsis tu ncua, tus Tswv txawm foom koob hmoov rau lawv, raws li nws txoj lus, kom lawv thiaj muaj zog zuj zus thiab vam meej nyob hauv thaj av.

52 Thiab tau muaj tias tau ua txhua yam no. Thiab Hilamas tau tuag, nyob hauv xyoo thib peb caug tsib ntawm cov neeg txiav txim txoj kev kav Nifais cov neeg.