1 Nim no, thaum Amoos tseem tab tom qhia Lamaunais cov neeg tsis tu ncua zoo li no, peb yuav tig rov mus hais txog Aloos thiab nws cov kwv tij; vim tom qab thaum nws ncaim ntawm thaj av Midaunais mus lawm, tus Ntsuj Plig coj nws mus rau tom thaj av Nifais, twb mus rau tom tus vaj ntxwv lub tsev, tus uas kav tag nrho thaj av tsuas yog tshuav thaj av Ixama-ees xwb; thiab nws yog Lamaunais txiv.

2 Thiab tau muaj tias Aloos tau mus ntsib tus vaj ntxwv nyob rau hauv nws lub tsev, thiab nws khoov rau ntawm tus vaj ntxwv xub ntiag, thiab hais rau nws tias: Saib seb, auj vaj ntxwv, peb yog Amoos cov kwv tij, cov uas koj tau tso tawm hauv lub tsev kaw los.

3 Thiab nim no, auj vaj ntxwv, yog koj yuav tseg peb txoj sia, peb yuav ua koj cov tub qhe. Thiab tus vaj ntxwv hais rau lawv tias: Cia li sawv, vim kuv yuav pub nej txoj sia rau nej, thiab kuv yuav tsis cia nej ua kuv cov tub qhe; tiam sis kuv yuav hais kom nej qhia kuv; vim ua rau kuv nyuaj siab me ntsis rau qhov nej tus tij laug Amoos tej lus uas siab dawb thiab tseem ceeb heev; thiab kuv xav paub tias yog vim li cas nws ho tsis tawm ntawm Midaunais nrog nej tuaj.

4 Thiab Aloos hais rau tus vaj ntxwv tias: Saib seb, tus Tswv tus Ntsuj Plig tau hu nws mus lwm txoj kev lawm; nws tau mus rau tom thaj av Ixama-ees, mus qhia Lamaunais cov neeg.

5 Nim no tus vaj ntxwv hais rau lawv tias: Qhov uas koj tau hais txog tus Tswv tus Ntsuj Plig yog dab tsi? Saib seb, qhov no yog qhov uas ua rau kuv nyuaj siab.

6 Thiab ntxiv, qhov uas Amoos hais tias—Yog koj yuav hloov siab lees txim ces yuav cawm koj dim, thiab yog koj tsis kam hloov siab lees txim, koj yuav raug ntiab tawm thaum txog hnub kawg—yog dab tsi?

7 Thiab Aloos teb nws thiab hais rau nws tias: Koj puas ntseeg tias muaj ib tug Vajtswv? Thiab tus vaj ntxwv hais tias: Kuv paub tias cov neeg Amalej hais tias muaj ib tug Vajtswv, thiab kuv tau pub rau lawv cia lawv ua tej chaw dawb huv, xwv kom lawv yuav sib sau ua ke tuaj teev tiam nws. Thiab nim no yog koj hais tias muaj ib tug Vajtswv, saib seb kuv yuav ntseeg.

8 Thiab nim no thaum Aloos hnov li no, nws lub siab pib zoo siab, thiab nws hais tias: Saib seb, tseeb tiag ib yam li koj muaj sia nyob, auj vaj ntxwv es, yeej muaj ib tug Vajtswv.

9 Thiab tus vaj ntxwv hais tias: Vajtswv puas yog tus Ntsuj Plig uas Muaj Hwj Chim uas coj peb cov yawg koob tawm ntawm thaj av Yeluxalees?

10 Thiab Aloos hais rau nws tias: Yog, nws yog tus Ntsuj Plig uas Muaj Hwj Chim ntawd, thiab nws tsim txhua yam nyob saum ntuj ceeb tsheej thiab hauv ntiaj teb. Koj puas ntseeg qhov no?

11 Thiab nws hais tias: Muaj tseeb tiag, kuv ntseeg tias tus Ntsuj Plig uas Muaj Hwj Chim yog tus tsim txhua yam, thiab kuv thov kom koj qhia kuv txog txhua yam no, thiab kuv yuav ntseeg koj tej lus.

12 Thiab tau muaj tias thaum Aloos pom tias tus vaj ntxwv yuav ntseeg nws tej lus, nws pib qhia txij li thaum tsim Adas los, thiab nws nyeem tej vaj lug kub rau tus vaj ntxwv—hais tias Vajtswv tsim tib neeg raws li nws tus yam ntxwv, thiab hais tias Vajtswv muab tej lus txib rau nws, thiab hais tias vim yog kev ua txhaum, tib neeg thiaj li poob.

13 Thiab Aloos piav meej txog cov vaj lug kub txij li thaum tsim Adas los rau nws, qhia txog tib neeg txoj kev poob rau nws, thiab lawv txoj kev nyiam sab cev nqaij daim tawv thiab txoj hau kev txhiv dim, uas Vajtswv tau npaj txij thaum ntuj tsim teb raug los, los ntawm Khetos, rau txhua leej txhua tus uas yuav ntseeg nws lub npe.

14 Thiab vim tib neeg tau poob nws thiaj tsis tsim nyog tau ib yam dab tsi los ntawm nws tus kheej; tiam sis Khetos tej kev nyuaj siab thiab txoj kev tuag theej rau lawv tej kev txhaum, los ntawm kev ntseeg thiab kev hloov siab lees txim, thiab li ntawd; thiab piav hais tias Khetos ua rau kev tuag tej hlua tu, xwv kom lub qhov ntxa thiaj tsis muaj yeej, thiab xwv kom tej kev cia siab tias yuav txais yeeb koob yuav kov yeej qhov uas kev tuag muaj kuab heev; thiab Aloos piav meej txog tag nrho tej yam no rau tus vaj ntxwv.

15 Thiab tau muaj tias tom qab Aloos tau piav meej txog tej yam no rau nws, tus vaj ntxwv hais tias: Kuv yuav ua li cas es kuv thiaj tau txoj sia nyob mus ib txhis uas koj tau hais no? Muaj tseeb tiag, kuv yuav ua li cas kom kuv yug los ntawm Vajtswv, thiab muab tus ntsuj plig phem no rho tawm hauv kuv lub siab mus, thiab txais yuav nws tus Ntsuj Plig, xwv kom kuv yuav muaj kev xyiv fab puv npo, xwv kom kuv thiaj tsis raug ntiab tawm thaum txog hnub kawg? Nws hais tias, saib seb, kuv yuav muab txhua yam uas kuv muaj tso pov tseg, muaj tseeb tiag, kuv yuav tso kuv txoj kev kav teb chaws, xwv kom kuv yuav tau txais txoj kev xyiv fab heev no.

16 Tiam sis Aloos hais rau nws tias: Yog koj xav tau qhov no, yog koj yuav pe Vajtswv, muaj tseeb tiag, yog koj yuav hloov siab lees txim rau tag nrho koj tej kev txhaum, thiab yuav pe Vajtswv, thiab hu txog nws lub npe nrog kev ntseeg, ntseeg tias koj yuav tau txais, ces koj yeej yuav tau txais txoj kev cia siab uas koj xav tau.

17 Thiab tau muaj tias thaum Aloos hais tej lus no tas lawm, tus vaj ntxwv txhos caug ntua pe tus Tswv; muaj tseeb tiag, nws twb pw pua lua rau hauv av, thiab qw nrov kawg nkaus, hais tias:

18 Auj Vajtswv es, Aloos tau qhia rau kuv tias muaj ib tug Vajtswv; thiab yog muaj ib tug Vajtswv, thiab yog koj yog Vajtswv, thov koj ua koj tus kheej rau kuv paub, thiab kuv yuav tso tag nrho kuv tej kev txhaum tseg los paub koj, thiab xwv kom kuv yuav sawv hauv qhov tuag rov qab los, thiab txais kev cawm dim thaum txog hnub kawg. Thiab nim no thaum tus vaj ntxwv hais tej lus no tas, nws vau hlo zoo li nws tuag lawm.

19 Thiab tau muaj tias nws cov tub qhe khiav mus thiab qhia rau niam vaj ntxwv txhua yam uas tau tshwm sim rau tus vaj ntxwv. Thiab nws tuaj rau ntawm tus vaj ntxwv; thiab thaum nws pom tus vaj ntxwv pw zoo li nws twb tuag lawm, thiab pom Aloos thiab nws cov kwv tij sawv ntsug zoo li lawv yog cov uas ua rau tus vaj ntxwv vau, nws npau taws rau lawv, thiab txib kom nws cov tub qhe, los sis tus vaj ntxwv cov tub qhe, txhom lawv thiab muab lawv tua.

20 Nim no cov tub qhe twb pom qhov uas ua rau tus vaj ntxwv vau, yog li ntawd lawv tsis kam xuab lawv tes ntsiab nthos Aloos thiab nws cov kwv tij; thiab lawv thov niam vaj ntxwv hais tias: Vim li cas koj ho txib kom peb tua cov neeg no, thaum twb pom tias lawv ib tug xwb twb muaj zog tshaj tag nrho peb sawv daws? Yog li ntawd peb yeej yuav vau rau lawv xwb.

21 Nim no thaum niam vaj ntxwv pom cov tub qhe txoj kev ntshai nws kuj pib ntshai heev kawg nkaus li, ntshai tias tsam muaj kev phem los rau nws. Thiab nws txib nws cov tub qhe kom lawv mus thiab hu cov neeg, xwv kom lawv yuav tua Aloos thiab nws cov kwv tij.

22 Nim no thaum Aloos pom niam vaj ntxwv txoj kev txiav txim siab, vim nws paub txoj kev tawv ntawm cov neeg lub siab, ntshai tias tsam ib co neeg coob coob lawv yuav sib sau tuaj ua ke, thiab yuav muaj ib txoj kev sib cav sib ceg loj thiab ib txoj kev kub ntxhov nyob hauv lawv; yog li ntawd nws thiaj cev nws txhais tes mus thiab tsa tus vaj ntxwv sawv hauv av los, thiab hais rau nws tias: Cia li sawv. Thiab tus vaj ntxwv sawv ntseg ntsees, thiab rov qab tau nws lub zog.

23 Nim no tau ua qhov no nyob ntawm niam vaj ntxwv thiab ntau tus tub qhe xub ntiag. Thiab thaum lawv pom qhov no lawv xav tsis thoob li, thiab pib ntshai. Thiab tus vaj ntxwv sawv txav zog los, thiab pib qhuab qhia rau lawv. Thiab nws tau qhuab qhia rau lawv, ua rau tag nrho nws tsev neeg hloov siab los ntseeg tus Tswv.

24 Nim no tau muaj ib pab neeg coob coob sib sau tuaj ua ke vim yog niam vaj ntxwv lo lus txib, thiab pib muaj tej kev yws yws hnyav heev nyob hauv lawv vim yog Aloos thiab nws cov kwv tij.

25 Tiam sis tus vaj ntxwv sawv txav zog los rau hauv lawv thiab qhuab qhia rau lawv. Thiab daws tau lawv txoj kev chim rau Aloos thiab cov uas nrog nws.

26 Thiab tau muaj tias thaum tus vaj ntxwv pom tias twb daws tau cov neeg txoj kev chim, nws hais kom Aloos thiab nws cov kwv tij los sawv nyob hauv nruab nrab ntawm cov neeg coob coob, thiab kom lawv tshaj tawm txoj lus rau lawv.

27 Thiab tau muaj tias tus vaj ntxwv tau xa ib zaj lus tshaj tawm mus thoob plaws rau tag nrho thaj av, rau tag nrho nws cov neeg uas nyob thoob plaws hauv nws thaj av, cov uas nyob thoob plaws tej thaj tsam ib puag ncig, uas nyob npuab kiag ntawm tus dej hiav txwv, nyob rau sab hnub tuaj thiab sab hnub poob, uas muaj ib leej hav zoov nqaim kem ntawm tag nrho nws thaj av thiab thaj av Xalahelas, leej hav zoov uas nyob txij li ntawm tus dej hiav txwv sab hnub tuaj mus rau tus dej hiav txwv sab hnub poob, thiab nyob rau ib puag ncig ntawm tej ciam teb ntawm ntug dej hiav txwv, thiab tej ciam teb ntawm thaj hav zoov uas nyob sab qaum teb ze ntawm thaj av Xalahelas, dhau mus rau tej ciam teb ntawm Meethais, ze ntawm hauv dej ntawm tus dej Xidoos, uas ntws pem sab hnub tuaj mus rau sab hnub poob—thiab xws li no leej hav zoov uas nqaim kem cov Neeg Lamas thiab cov Neeg Nifais.

28 Nim no, cov Neeg Lamas uas tub nkeeg tshaj yog cov uas nyob hauv hav zoov, thiab nyob hauv tej tsev pheeb suab ntaub; thiab lawv nyob thoob plaws hauv hav zoov ntawm sab hnub poob, nyob hauv thaj av Nifais; muaj tseeb tiag, thiab kuj nyob rau sab hnub poob ntawm thaj av Xalahelas, nyob hauv tej ciam teb ntawm ntug dej hiav txwv, thiab nyob rau sab hnub poob hauv thaj av Nifais, nyob hauv qhov chaw ntawm lawv cov yawg koob thawj qhov qub txeeg qub teg, thiab yog li ntawd nyob raws ntug dej hiav txwv.

29 Thiab kuj muaj ntau tus Neeg Lamas nyob rau sab hnub tuaj ze ntug dej hiav txwv, qhov chaw uas cov Neeg Nifais tau caum lawv mus. Thiab xws li no cov Neeg Lamas nyob vij yuav luag thoob cov Neeg Nifais; txawm li ntawd los cov Neeg Nifais tau mus nyob thoob plaws sab pem toj ntawm thaj av uas nyob npuab thaj hav zoov, nyob pem hauv dej ntawm tus dej Xidoos, txij li sab hnub tuaj mus rau sab hnub poob, ib ncig ntawm tej ntug hav zoov; nyob rau sab qaum teb, mus txog ntua rau thaj av uas lawv muab hu ua Huaj Vam.

30 Thiab thaj av Huaj Vam nyob npuab rau thaj av uas lawv muab hu ua Quav Poj, vim thaj av Quav Poj nyob deb heev pem sab qaum teb uas ncav mus rau hauv thaj av uas tau muaj neeg nyob thiab tau raug puas tsuaj lawm, cov neeg uas peb tau hais txog lawv cov pob txha, uas cov neeg Xalahelas mus nrhiav tau, vim thaj av ntawd yog qhov chaw uas lawv xub tuaj txog.

31 Thiab lawv los ped los rau hauv hav zoov nram sab qab teb. Yog li ntawd thiaj muab thaj av pem sab qaum teb hu ua Quav Poj, thiab thaj av nram sab qab teb hu ua Huaj Vam, vim thaj av ntawd yog hav zoov uas muaj txhua yam tsiaj qus nyob, ib txhia ntawm cov tsiaj qus no yog los pem thaj av sab qaum teb los nrhiav noj.

32 Thiab nim no, rau ib tug neeg Nifais, txoj kev ntawm thaj av Huaj Vam mus rau thaj av Quav Poj, ntawm tus dej hiav txwv sab hnub tuaj mus rau tus dej hiav txwv sab hnub poob, tsuas deb li ib hnub thiab ib nrab ke xwb; thiab xws li no tej dej hiav txwv vij yuav luag tas thaj av Nifais thiab thaj av Xalahelas, thiab tsuas yog muaj ib thaj av nqaim txuas thaj av sab qaum teb thiab thaj av sab qab teb.

33 Thiab tau muaj tias cov Neeg Nifais tau nyob hauv thaj av Huaj Vam, twb txij ntawm tus dej hiav txwv sab hnub tuaj mus rau tus dej hiav txwv sab hnub poob, thiab xws li no vim los ntawm cov Neeg Nifais txoj kev txawj ntse, nrog lawv cov neeg zov nyas thiab lawv cov tub rog, lawv thaiv tau cov Neeg Lamas uas nyob rau sab qab teb, xwv kom lawv thiaj txeeb tsis tau thaj av uas nyob rau sab qaum teb ntxiv, xwv kom lawv thiaj tsis tuaj ri sua puv thaj av sab qaum teb.

34 Yog li ntawd cov Neeg Lamas tsis muaj peev xwm txeeb tau thaj av ntxiv tsuas yog thaj av Nifais xwb, thiab hav zoov uas nyob ib puag ncig. Nim no qhov no yog cov Neeg Nifais lub tswv yim—vim tias cov Neeg Lamas yog lawv ib co yeeb ncuab, lawv yuav tsis cia kom cov Neeg Lamas ua tau rau lawv txom nyem nyob txhua txhia sab, thiab xwv kom lawv yuav muaj ib lub teb chaws uas lawv tau khiav mus rau, raws li lawv siab xav.

35 Thiab nim no kuv, tom qab tau hais qhov no tas, yuav rov qab mus hais txog Amoos thiab Aloos, Oonaws thiab Heenais, thiab lawv cov kwv tij.