1 Thiab tau muaj tias tag nrho cov uas tsis kam mloog Hilamas thiab nws cov kwv tij tej lus tau sib sau ua ke tawm tsam lawv cov kwv tij.

2 Thiab nim no saib seb, lawv npau taws heev, lawv thiaj xav muab lawv cov ntawd tua.

3 Nim no tus thawj coj ntawm cov uas npau taws tawm tsam lawv cov kwv tij yog ib tug neeg loj thiab muaj zog; thiab nws lub npe hu ua Amalikhaiyas.

4 Thiab Amalikhaiyas xav ua ib tug vaj ntxwv; thiab cov neeg uas npau taws kuj xav kom nws ua lawv tus vaj ntxwv thiab; thiab feem coob ntawm cov no yog cov txiav txim uas qis zog ntawm thaj av, thiab lawv nrhiav kev kom muaj hwj chim.

5 Thiab Amalikhaiyas tej lus dag ntxias coj lawv hais tias, yog lawv txhawb nws thiab tsa nws ua lawv tus vaj ntxwv ces nws yuav tsa lawv los ua cov kav cov neeg.

6 Yog li ntawd Amalikhaiyas coj tau lawv mus rau txoj kev tsis sib haum xeeb, txawm hais tias Hilamas thiab nws cov kwv tij twb qhuab qhia rau lawv, muaj tseeb tiag, txawm hais tias Hilamas thiab nws cov kwv tij twb sib zog heev ua hauj lwm saib xyuas lub koom txoos, vim lawv yog cov pov thawj hlob saib xyuas lub koom txoos.

7 Thiab muaj coob leej nyob hauv lub koom txoos uas ntseeg Amalikhaiyas tej lus dag ntxias, yog li ntawd lawv tawm ntawm lub koom txoos mus; thiab xws li no Nifais cov neeg tej hauj lwm tsis ruaj khov thiab plhom sij heev, txawm hais tias lawv tau kov yeej cov Neeg Lamas nyob hauv npluav rog loj, thiab lawv muaj kev xyiv fab ntau uas lawv tau txais vim yog tus Tswv txhais tes tau coj lawv dim.

8 Yog li no peb pom tias noob neej hnov qab tus Tswv lawv tus Vajtswv sai npaum li cas, muaj tseeb tiag, lawv mus ua kev phem sai npaum li cas, thiab ua kom tus niag phem coj tau lawv mus.

9 Muaj tseeb tiag, thiab peb kuj pom tias ib tug neeg uas phem phem muaj peev xwm ua tau kom muaj txoj kev phem loj nyob hauv noob neej.

10 Muaj tseeb tiag, peb pom tias Amalikhaiyas, vim nws yog ib tug neeg txawj dag ntxias thiab ib tug neeg txawj hais lus ntxias, coj tau coob leej lub siab mus ua phem; muaj tseeb tiag, thiab nrhiav kev ua kom Vajtswv lub koom txoos puas tsuaj, thiab rhuav lub hauv paus ntawm txoj kev ywj pheej uas Vajtswv tau pub rau lawv, los sis tej koob hmoov uas Vajtswv tau xa los rau hauv thaj av los pab cov uas ncaj ncees.

11 Thiab nim no tau muaj tias thaum Maulaunais, tus uas yog tus thawj coj ntawm cov Neeg Nifais cov tub rog, hnov txog tej kev tsis sib haum xeeb no, nws npau taws rau Amalikhaiyas.

12 Thiab tau muaj tias nws dua nws lub tsho loj; thiab nws muab ib daim ntaub ntawd, thiab sau ntawv rau saud—Rau txoj kev nco txog peb tus Vajtswv, peb txoj kev teev ntuj, thiab txoj kev ywj pheej, thiab peb txoj kev thaj yeeb, peb cov poj niam, thiab peb cov me nyuam—thiab nws muab daim ntaub ntawd khi rau saum ib tug ntsis pas.

13 Thiab nws muab nws daim phiaj thaiv taub hau kho khi rau, thiab nws daim thaiv hauv siab, thiab nws tej phiaj hlau, thiab khi nws tej cuab yeej ua rog rau ntawm nws duav; thiab nws nqa tus pas, uas muaj daim ntaub khi nyob rau tom ntsis, (thiab nws muab hu ua tus chij ntawm kev ywj pheej) thiab nws khoov rau hauv av, thiab nws sib zog thov nws tus Vajtswv kom tej koob hmoov ntawm txoj kev ywj pheej los rau nws cov kwv tij, ntev npaum li uas tseem muaj ib pab neeg ntseeg Khetos nyob tswj thaj av—

14 Vim cov uas tsis zwm rau lub koom txoos muab txhua tus uas ntseeg Khetos tiag tiag, cov uas zwm rau Vajtswv lub koom txoos, hu ua cov ntseeg Khetos li no.

15 Thiab cov uas zwm rau lub koom txoos rau siab ntseeg heev; muaj tseeb tiag, txhua tus uas ntseeg Khetos tiag tiag yeej zoo siab hlo ris Khetos lub npe, los sis cov ntseeg Khetos ib yam li lwm cov neeg muab lawv hu, vim yog lawv txoj kev ntseeg Khetos tus uas yuav los.

16 Thiab yog li ntawd, zaum no, Maulaunais thov Vajtswv kom txhawb lub hom phiaj ntawm cov ntseeg Khetos, thiab txoj kev ywj pheej ntawm thaj av yuav tau koob hmoov.

17 Thiab tau muaj tias thaum nws thov Vajtswv kawg siab kawg ntsws tas lawm, nws tis npe rau tag nrho thaj av uas nyob sab nram hav ntawm thaj av Quav Poj, muaj tseeb tiag, thiab lub ntsiab yog li no, tag nrho thaj av, nyob sab qaum teb thiab sab qab teb huv tib si—Ib thaj av uas tau xaiv tseg, thiab thaj av ywj pheej.

18 Thiab nws hais tias: Tseeb tiag Vajtswv yuav tsis cia kom peb, cov uas lwm cov neeg tsis quav ntsej txog vim yog peb ris Khetos lub npe, raug tsuj thiab puas tsuaj, kom txog thaum peb coj tau tej ntawd los rau peb los ntawm peb tus kheej tej kev ua txhaum.

19 Thiab thaum Maulaunais hais tej lus no tas, nws tawm mus rau hauv cov neeg, thiab yoj daim ntaub dua ntawm nws lub tsho rau saum ntuj, kom txhua tus pom cov ntawv sau uas nws tau sau rau saum daim ntaub dua, thiab qw nrog ib lub suab nrov nrov, hais tias:

20 Saib seb, txhua tus uas yuav tiv thaiv tus chij no rau hauv thaj av, cia lawv tawm los nrog tus Tswv lub zog, thiab ua kev khi lus tias lawv yuav tiv thaiv lawv tej kev muaj cai, thiab lawv txoj kev teev ntuj, xwv kom tus Tswv uas yog Vajtswv yuav foom koob hmoov rau lawv.

21 Thiab tau muaj tias thaum Maulaunais tau tshaj tawm cov lus no, saib seb, cov neeg tau khiav zom zaws los ua ke nrog lawv tej cuab yeej ua rog khi ncig lawv lub duav, dua zom zaws lawv tej tsoos tsho ua ib lub cim, los sis ua kev khi lus, hais tias lawv yuav tsis tso tus Tswv lawv tus Vajtswv tseg; los yog hais tias, yog lawv ua txhaum Vajtswv tej lus txib, los sis poob mus rau kev ua txhaum, thiab txaj muag ris Khetos lub npe, ces tus Tswv yuav dua lawv tib yam li uas lawv tau dua lawv tej tsoos tsho.

22 Nim no nov yog txoj kev khi lus tseg uas lawv tau khi, thiab lawv muab lawv tej tsoos tsho pov rau ntawm Maulaunais ko taw, hais tias: Peb khi lus nrog peb tus Vajtswv tias, peb yuav raug puas tsuaj, zoo tib yam li peb cov kwv tij uas nyob hauv thaj av sab qaum teb, yog tias peb yuav poob mus rau kev ua txhaum; muaj tseeb tiag, nws muab peb pov rau ntawm peb cov yeeb ncuab ko taw los tau, tib yam li peb tau muab peb tej tsoos tsho pov rau ntawm koj ko taw cia raug tsuj rau hauv qab xib taws, yog tias peb yuav poob rau hauv kev ua txhaum.

23 Maulaunais hais rau lawv tias: Saib seb, peb yog ib co uas seem tshuav ntawm Yakhauj cov tub ki; muaj tseeb tiag, peb yog ib co uas seem tshuav ntawm Yauxej cov tub ki, tus uas nws lub tsho loj raug nws cov kwv tij muab dua ua ntau daim; muaj tseeb tiag, thiab nim no saib seb, cia peb nco ntsoov ua raws li Vajtswv tej lus txib, tsis li ntawd peb tej tsoos tsho yuav raug peb cov kwv tij muab dua, thiab peb yuav raug muab tso rau hauv lub tsev kaw, los sis raug muab muag, los sis muab tua.

24 Muaj tseeb tiag, cia peb tsom kwm peb txoj kev ywj pheej kom zoo li Yauxej ib co neeg seem tshuav; muaj tseeb tiag, cia peb nco ntsoov txog Yakhauj tej lus, uas ua ntej nws yuav tuag, vim saib seb, nws pom tias ib feem uas seem tshuav ntawm Yauxej lub tsho loj tau raug tsom kwm thiab tsis tau lwj. Thiab nws hais tias—Tib yam li qhov uas seem tshuav ntawm kuv tus tub lub tsho loj no raug tsom kwm, tib yam li ntawd Vajtswv txhais tes yuav tsom kwm kuv tus tub ib co tub ki uas seem tshuav, thiab coj lawv mus rau nws tus kheej, tiam sis Yauxej cov tub ki uas tseem tshuav yuav piam sij, tib yam li qhov uas seem tshuav ntawm nws lub tsho loj.

25 Nim no saib seb, qhov no ua rau kuv tus ntsuj plig tu siab; txawm li ntawd los, kuv tus ntsuj plig xyiv fab rau kuv tus tub, vim yog feem ntawm nws cov tub ki uas yuav raug coj mus rau Vajtswv.

26 Nim no saib seb, cov no yog Yakhauj cov lus.

27 Thiab nim no leej twg yuav paub tias Yauxej cov tub ki uas seem tshuav, uas yuav piam sij ib yam li nws lub tsho, tej zaum twb yog cov uas tau tawm ntawm peb mus? Muaj tseeb tiag, thiab tej zaum twb yog peb tus kheej yog hais tias peb tsis sawv khov kho muab siab rau ntseeg Khetos.

28 Thiab nim no tau muaj tias thaum Maulaunais hais tej lus no tas lawm nws tawm mus, thiab kuj xa neeg mus rau txhua txhia qhov chaw ntawm thaj av uas muaj tej kev tsis sib haum xeeb, thiab sib sau tuaj ua ke tag nrho cov neeg uas xav tiv thaiv lawv txoj kev ywj pheej, los sawv tawm tsam Amalikhaiyas thiab cov uas tau ua kom tsis sib haum xeeb, cov uas lawv muab hu ua cov neeg Amalikhaiyas.

29 Thiab tau muaj tias thaum Amalikhaiyas pom tias Maulaunais cov neeg coob tshaj cov neeg Amalikhaiyas—thiab nws kuj pom tias nws cov neeg ua ob peb siab ntsig txog txoj kev txim lij ntawm qhov uas lawv tau pib ua—yog li ntawd, vim nws ntshai tsam ua tsis tau raws li lub hom phiaj, nws thiaj coj nws cov neeg uas kam nrog nws thiab ncaim mus rau hauv thaj av Nifais lawm.

30 Nim no Maulaunais xav hais tias tsis tsim nyog kom cov Neeg Lamas yuav muaj zog ntxiv; yog li ntawd nws xav tias yuav mus tav cov neeg Amalikhaiyas kev, los sis mus txhom lawv thiab coj lawv rov qab los, thiab muab Amalikhaiyas tua; muaj tseeb tiag, vim nws paub tias Amalikhaiyas yeej yuav txhaub kom cov Neeg Lamas npau taws tawm tsam lawv, thiab ua kom cov Neeg Lamas tuaj ua rog tawm tsam lawv; thiab nws paub tias Amalikhaiyas yuav ua li no xwv kom nws yuav ua tau raws li nws tej hom phiaj.

31 Yog li ntawd Maulaunais thiaj xav tias tsim nyog rau nws coj nws cov tub rog, cov uas tau sib sau lawv tus kheej tuaj ua ke, thiab npaj tej cuab yeej, thiab khi lus los tiv thaiv txoj kev thaj yeeb—thiab tau muaj tias nws coj nws cov tub rog thiab tawm nrog nws tej tsev pheeb suab ntaub mus rau hauv hav zoov, mus txiav Amalikhaiyas kev nyob hauv hav zoov.

32 Thiab tau muaj tias nws ua raws li nws siab xav, thiab tawm mus rau hauv hav zoov, thiab mus txiav Amalikhaiyas cov tub rog kev.

33 Thiab tau muaj tias Amalikhaiyas khiav dim nrog ib pab ntawm nws cov neeg uas tsawg, thiab cov uas seem raug coj los rau hauv Maulaunais txhais tes thiab raug coj rov qab mus rau hauv thaj av Xalahelas.

34 Nim no, vim Maulaunais twb yog tus uas cov thawj txiav txim thiab cov neeg lub suab tsa, yog li ntawd nws thiaj li muaj hwj chim los txhim tsa thiab siv txoj cai los kav cov Neeg Nifais cov tub rog raws li nws siab xav.

35 Thiab tau muaj tias tus Neeg Amalikhaiyas twg uas tsis kam ua kev khi lus los txhawb txoj kev ywj pheej, xwv kom lawv yuav muaj tau tsoom fwv uas muab kev ywj pheej rau tej pej xeem, nws hais kom muab tus ntawd tua pov tseg; thiab tsuas yog muaj ob peb leeg xwb uas xyeej txoj kev khi lus ntawm kev ywj pheej.

36 Thiab kuj tau muaj tias, nws hais kom muab tus chij ntawm kev ywj pheej tsa rau saum txhua tus pej thuam uas muaj nyob thoob plaws hauv thaj av, uas cov Neeg Nifais nyob; thiab xws li no Maulaunais cog tus chij ntawm kev ywj pheej nyob hauv cov Neeg Nifais.

37 Thiab lawv rov qab pib muaj kev thaj yeeb dua nyob rau hauv thaj av; thiab yog li ntawd lawv ceev tau kev thaj yeeb rau hauv thaj av txog rau thaum yuav luag kawg ntawm xyoo thib kaum cuaj ntawm cov neeg txiav txim txoj kev kav.

38 Thiab Hilamas thiab cov pov thawj hlob los kuj tswj tuav tau kev nyab xeeb nyob hauv lub koom txoos; muaj tseeb tiag, lawv twb muaj kev thaj yeeb ntau thiab kev zoo siab nyob hauv lub koom txoos tau plaub xyoos.

39 Thiab tau muaj tias muaj coob leej uas tuag, ntseeg ruaj nrees hais tias tus Tswv Yexus Khetos twb txhiv lawv cov ntsuj plig dim; yog li ntawd lawv xyiv fab hlo thaum lawv tas lub neej no.

40 Thiab muaj ib txhia tuag nrog kev ua npaws, uas tej lub caij ntawm lub xyoo los muaj ntau zaus nyob hauv thaj av—tiam sis kuj tsis tuag coob npaum li cas nrog kev ua npaws, vim yog muaj tej nroj tsuag thiab tej cag ntoo zoo tshuaj heev uas Vajtswv tau npaj los tshem tej kab mob, uas tib neeg raug los ntawm tej huab cua—

41 Tiam sis muaj coob leej uas tuag vim yog hnub nyoog laus; thiab cov uas tuag thaum muaj txoj kev ntseeg Khetos yeej zoo siab nrog nws, ib yam li tsim nyog rau peb ntseeg.