1 Nim no tom qab Amas tau hais tej lus no tas lawm, lawv xa ib tug tuaj cuag nws xav paub saib puas tsim nyog rau lawv los ntseeg ib tug Vajtswv, xwv kom lawv yuav tau txais cov txiv ntoo uas nws tau hais txog, los sis saib lawv yuav cog lub noob li cas, los sis txoj lus uas nws tau hais txog, uas nws hais tias yuav tsum muab cog rau hauv lawv lub siab; los sis saib lawv yuav ua li cas kom pib muab siab rau ntseeg.

2 Thiab Amas hais rau lawv tias: Saib seb, nej hais tias nej teev tiam tsis tau nej tus Vajtswv vim nej raug ntiab tawm ntawm nej tej tsev sab laj. Tiam sis saib seb, kuv hais rau nej tias, yog nej xav tias nej teev tiam tsis tau Vajtswv, nej yuam kev loj heev, thiab nej yuav tsum tshawb xyuas cov vaj lug kub; yog nej xav tias vaj lug kub qhia nej li ntawd, ces yog nej tsis to taub cov vaj lug kub.

3 Nej puas nco qab nyeem tej uas Xenos, tus yaj saub thaum ub, tau hais txog kev thov Vajtswv los sis kev teev tiam?

4 Vim nws hais tias: Koj yog tus muaj kev hlub tshua, auj Vajtswv, vim koj tau hnov kuv tej lus thov, txawm yog thaum kuv nyob hauv hav zoov; muaj tseeb tiag, koj yog tus muaj kev hlub tshua thaum kuv thov ntsig txog cov uas yog kuv cov yeeb ncuab, thiab koj muab lawv cob rau kuv.

5 Muaj tseeb tiag, auj Vajtswv es, thiab koj muaj kev hlub tshua rau kuv thaum kuv thov koj nyob tom kuv thaj teb; thaum kuv taij koj nyob hauv kuv txoj kev thov, thiab koj twb hnov kuv.

6 Thiab ntxiv, auj Vajtswv es, thaum kuv mus rau hauv kuv lub tsev koj twb hnov kuv thaum kuv thov.

7 Thiab thaum kuv nkag mus rau hauv kuv chav teev tiam, auj tus Tswv es, thiab thov koj, koj twb hnov kuv.

8 Muaj tseeb tiag, koj yeej hlub tshua koj cov me nyuam thaum lawv thov koj, kom koj hnov thiab tsis yog kom tib neeg hnov, thiab koj yuav hnov lawv.

9 Muaj tseeb tiag, auj Vajtswv es, koj ib txwm hlub tshua kuv, thiab hnov kuv tej kev thov thaum nyob sib koom ua ib pawg nrog koj cov ntseeg.

10 Muaj tseeb tiag, thiab koj kuj hnov kuv thaum kuv raug ntiab tawm thiab kuv cov yeeb ncuab ua saib tsis taus kuv; muaj tseeb tiag, koj twb hnov kuv tej lus thov, thiab npau taws rau kuv cov yeeb ncuab, thiab koj tau xyuas lawv nrog koj txoj kev npau taws kom raug puas tsuaj nrawm nroos.

11 Thiab koj twb hnov kuv vim yog kuv tej kev txom nyem thiab kuv txoj kev ua siab ncaj; thiab twb vim yog koj Leej Tub es koj thiaj muaj kev hlub tshua li ntawd rau kuv, yog li ntawd kuv yuav thov koj thaum kuv raug kev txom nyem, vim kuv txoj kev xyiv fab yog los ntawm koj; vim koj tau tshem koj tej kev txiav txim ntawm kuv mus, vim yog koj Leej Tub.

12 Thiab nim no Amas hais rau lawv hais tias: Nej puas ntseeg cov vaj lug kub ntawd uas yog cov thaum ub tau sau?

13 Saib seb, yog nej ntseeg, nej yuav tsum ntseeg tej uas Xenos tau hais; vim, saib seb nws hais tias: Koj tau tshem koj tej kev txiav txim mus vim yog koj Leej Tub.

14 Nim no saib seb, kuv cov kwv tij, kuv yuav nug saib nej puas tau nyeem cov vaj lug kub? Yog nej tau, ua li cas nej ho tsis ntseeg Vajtswv Leej Tub?

15 Vim tsis tau sau tseg tias Xenos tib leeg thiaj hais txog tej yam no xwb, tiam sis Xenoj los kuj hais txog tej yam no thiab—

16 Vim saib seb, nws hais tias: Auj tus Tswv es, koj npau taws rau cov neeg no, vim lawv pheej tsis to taub koj tej kev hlub tshua uas koj tau muab rau lawv vim yog koj Leej Tub.

17 Thiab nim no, kuv cov kwv tij, nej pom tias twb muaj tus yaj saub thib ob thaum ub ua tim khawv txog Vajtswv Leej Tub, thiab vim cov neeg pheej tsis to taub nws tej lus lawv thiaj xuas pob zeb ntaus nws tuag.

18 Tiam sis saib seb, tsis tas li no xwb; cov uas tau hais txog Vajtswv Leej Tub tsis yog ob tug no xwb.

19 Saib seb, Mauxes los kuj tau hais txog nws; muaj tseeb tiag, thiab saib seb Mauxes tsa ib lub cim nyob hauv hav zoov, xwv kom txhua tus uas ntsia lub cim ntawd yuav ciaj. Thiab coob leej tau ntsia thiab ciaj.

20 Tiam sis tsawg tsawg leej thiaj to taub lub ntsiab ntawm tej yam ntawd xwb, thiab muaj li no los twb vim yog lawv lub siab tawv. Tiam sis muaj coob leej uas tawv heev es lawv tsis kam ntsia, yog li ntawd lawv thiaj piam sij. Nim no qhov uas lawv tsis kam ntsia yog vim lawv tsis ntseeg tias lub cim ntawd yuav kho tau lawv.

21 Auj kuv cov kwv tij es, yog hais tias nej ib nyuag ntsia xwb es qhov ntawd muaj peev xwm kho tau nej zoo, nej puas yuav ntsia nrawm nroos, los sis nej xum ua nej lub siab tawv kom tsis ntseeg, thiab ua neeg tub nkeeg, es tsis kam tsa nej qhov muag mus ntsia, xwv kom nej yuav piam sij?

22 Yog zoo li ntawd, ces kev txom nyem yuav los raug nej; tiam sis yog tsis zoo li ntawd, ces cia li tsa nej qhov muag mus ntsia thiab pib ntseeg Vajtswv Leej Tub, ntseeg tias nws yuav los txhiv nws cov neeg dim, thiab ntseeg tias nws yuav los raug kev txom nyem thiab tuag theej rau lawv tej kev txhaum; thiab ntseeg tias nws yuav sawv hauv qhov tuag rov qab los, qhov uas yuav ua kom muaj tau txoj kev sawv rov los, kom tib neeg txhua tus yuav tau los sawv ntawm nws xub ntiag, kom raug txiav txim thaum txog hnub kawg thiab hnub txiav txim, raws li tej yam lawv ua.

23 Thiab nim no, kuv cov kwv tij, kuv xav kom nej yuav cog txoj lus no rau hauv nej lub siab, thiab thaum txoj lus pib loj hlob nej cia li tu txoj lus los ntawm nej txoj kev ntseeg. Thiab saib seb, txoj lus no yuav hloov los ua ib tsob ntoo, yuav loj hlob nyob hauv nej mus rau txoj sia uas kav ib txhis. Thiab thaum ntawd thov Vajtswv pub rau nej kom nej tej nra yuav sib, los ntawm txoj kev xyiv fab txog nws Leej Tub. Thiab txhua yam no nej yeej ua tau yog nej yuav ua. Amees.