1 Thiab nim no tau muaj tias tom qab Amas hais cov lus no rau lawv tas lawm nws zaum rau hauv av, thiab Amulej sawv thiab pib qhia lawv, hais tias:

2 Kuv cov kwv tij, kuv xav tias yeej muaj tsis tau qhov uas nej tsis paub txog tej uas tau hais txog Khetos txoj kev los, tus uas peb qhia tias yog Vajtswv Leej Tub; muaj tseeb tiag, kuv paub tias twb muab tej no qhia rau nej txaus nkaus ua ntej nej khiav tawm ntawm peb mus.

3 Thiab vim nej tau thov kuv tus tij laug uas kuv hlub kom nws qhia rau nej paub saib nej yuav ua li cas, vim yog nej tej kev txom nyem; thiab nws tau hais me ntsis rau nej kom npaj nej lub siab; muaj tseeb tiag, thiab nws tau ntuas nej kom muaj kev ntseeg thiab ua siab ntev—

4 Muaj tseeb tiag, twb kom nej yuav muaj kev ntseeg loj txaus cog txoj lus rau hauv nej lub siab, xwv kom nej muaj cuab kav sim txoj lus seb puas zoo.

5 Thiab peb pom tias lo lus nug loj uas nyob hauv nej lub siab yog saib txoj lus puas yog los ntawm Vajtswv Leej Tub, los sis saib puas yuav muaj Khetos.

6 Thiab nej kuj pom tias kuv tus tij laug tau ua rau nej paub tseeb, ntau lub sij hawm, paub tias Khetos yog lub hauv paus ntawm txoj lus uas ua rau neeg txais tau kev cawm seej.

7 Kuv tus tij laug tau muab Xenos tej lus coj los hais tias, txoj kev txhiv dim yog los ntawm Vajtswv Leej Tub los, thiab kuj tau muab Xenoj tej lus los hais; thiab nws kuj tau hais txog Mauxes, qhia kom paub tseeb tias tej yam no yeej muaj tseeb tiag.

8 Thiab nim no, saib seb, kuv yuav ua tim khawv ntawm kuv tus kheej rau nej tias tej yam no yeej muaj tseeb. Saib seb, kuv hais rau nej tias, kuv yeej paub tias Khetos yuav los rau hauv noob neej, los ris nws cov neeg tej kev ua txhaum, thiab hais tias nws yuav theej neeg ntiaj teb tej kev txhaum; vim tus Tswv uas yog Vajtswv tau hais li ntawd.

9 Vim tsim nyog uas yuav tsum muaj ib txoj kev theej txhoj; vim raws li tus Vajtswv uas Nyob Mus Ib Txhis txoj hau kev uas tseem ceeb, yuav tsum muaj ib txoj kev theej txhoj, tsis li ces tib neeg txhua tus yeej yuav zam tsis dhau txoj kev piam sij; muaj tseeb tiag, txhua tus yeej tawv; muaj tseeb tiag, txhua tus poob thiab poob zoo, thiab yuav piam sij tsuas yog los ntawm txoj kev theej txhoj uas tsim nyog yuav tsum muaj xwb.

10 Vim tsim nyog kom muaj ib txoj kev txi kawg uas tseem ceeb; muaj tseeb tiag, tsis yog ib txoj kev txi tib neeg, thiab tsis yog txi tej tsiaj, los sis txi tej noog; vim yuav tsis yog ib txoj kev txi tib neeg; tiam sis yeej yog ib txoj kev txi uas tsis muaj qhov kawg thiab nyob mus ib txhis.

11 Nim no yeej tsis muaj ib tug neeg uas muaj peev xwm muab nws tus kheej cov ntshav los txi theej tau rau lwm tus tej kev txhaum. Nim no, yog ib tug neeg tua lwm tus neeg, saib seb, peb txoj kev cai uas ncaj ncees, puas yuav rau txim rau nws tus kwv tij? Kuv hais rau nej, Yeej tsis ua li ntawd.

12 Tiam sis txoj kev cai yuav rau txim kom tuag rau tus uas tau tua neeg; yog li ntawd yuav tsum muaj ib txoj kev theej txhoj uas tsis muaj qhov kawg xwb es thiaj yuav txaus rau neeg ntiaj teb tej kev txhaum.

13 Yog li ntawd, yuav tsum muaj ib txoj kev txi kawg uas tseem ceeb; thiab thaum ntawd thiaj yuav, los sis thiaj li tsim nyog, tsum txoj kev ua rau nqaij ntuag ntshav nrog; thaum ntawd yuav muaj raws li Mauxes txoj kev cai tiav lawm; muaj tseeb tiag, yuav muaj raws li tag nrho, ib nyuag qhov thiab qhov me tag nrho, thiab yuav tsis muaj ib qho uas yuav poob mus.

14 Thiab saib seb, qhov no yog tag nrho lub ntsiab ntawm txoj kev cai, txhua yam huv tib si taw mus rau txoj kev txi kawg uas tseem ceeb ntawd; thiab tus uas yuav ua txoj kev txi kawg uas tseem ceeb ntawd yog Vajtswv Leej Tub, muaj tseeb tiag, txoj kev txi uas tsis muaj kawg thiab nyob mus ib txhis.

15 Thiab xws li no nws yuav coj txoj kev cawm seej los rau txhua tus uas yuav ntseeg nws lub npe; thiab qhov no yog lub hom phiaj ntawm txoj kev txi kawg no, kom muaj ntsoov lub siab hlub tshua, uas muaj hwj chim kov yeej txoj kev txim lij, thiab qhib kev rau noob neej kom lawv yuav muaj kev ntseeg los hloov siab lees txim.

16 Thiab xws li no txoj kev hlub tshua thiaj them tau tej nqi ntawm txoj kev txim lij, thiab puag lawv nyob hauv txhais npab ntawm kev nyab xeeb, tiam sis tus uas tsis muab siab rau ntseeg mus rau kev hloov siab lees txim yuav raug kev cai tag nrho uas yog tej nqi ntawm txoj kev txim lij; yog li ntawd Vajtswv tsuas yog coj txoj hau kev txhiv dim tseem ceeb thiab nyob mus ib txhis los rau tus uas muaj kev ntseeg mus rau kev hloov siab lees txim xwb.

17 Yog li ntawd thov Vajtswv pub rau nej, kuv cov kwv tij, kom nej yuav pib muab siab rau ntseeg mus rau kev hloov siab lees txim, xwv kom nej pib hu txog nws lub npe dawb huv, xwv kom nws yuav hlub tshua nej;

18 Muaj tseeb tiag, thov nws rau txoj kev hlub tshua; vim nws muaj hwj chim cawm tau.

19 Muaj tseeb tiag, txo nej lub hwj chim, thiab thov nws ntxiv mus.

20 Thov nws thaum nej nyob hauv nej tej liaj teb, muaj tseeb tiag, ntsig txog tag nrho nej tej tsiaj txhu.

21 Thov nws nyob hauv nej lub vaj lub tsev, muaj tseeb tiag, ntsig txog tag nrho nej lub cuab yig, tag nrho thaum sawv ntxov, thaum tav su thiab thaum tsaus ntuj.

22 Muaj tseeb tiag, thov nws tawm tsam nej cov yeeb ncuab lub hwj chim.

23 Muaj tseeb tiag, thov nws tawm tsam tus dab phem, tus uas yog ib tug yeeb ncuab rau tag nrho kev ncaj ncees.

24 Thov nws ntsig txog tej qoob loo tom nej tej liaj teb, xwv kom nej yuav huaj vam vim tej qoob loo ntawd.

25 Thov ntsig txog tej tsiaj txhu tom nej tej liaj teb, xwv kom yuav muaj ntau ntxiv.

26 Tiam sis tsis tas li no xwb; nej yuav tsum thov Vajtswv kawg siab kawg ntsws nyob hauv nej tej chav teev tiam, thiab nej tej chaw uas tsis muaj neeg paub txog, thiab nyob hauv nej tej hav zoov.

27 Muaj tseeb tiag, thiab thaum nej tsis thov tus Tswv, cia nej lub siab puv npo, thov nws tas mus li tsis tu ncua rau nej txoj kev noj qab nyob zoo, thiab rau cov uas nyob ib ncig nej txoj kev noj qab nyob zoo.

28 Thiab nim no saib seb, kuv cov kwv tij uas kuv hlub es, kuv hais rau nej, tsis txhob xav tias tas li no xwb; vim tom qab uas nej tau ua tag txhua yam no lawm, yog nej tsis kam pab cov neeg txom nyem, thiab cov neeg liab qab, thiab tsis saib xyuas cov neeg mob thiab txom nyem, thiab tsis faib nej tej khoom, yog nej muaj, rau cov uas txom nyem—kuv hais rau nej tias, yog nej tsis ua tej yam no hlo li, saib seb, nej txoj kev thov Vajtswv yeej tsis muaj qab hau dab tsi, thiab yuav tsis ua ib yam dab tsi rau nej, thiab nej zoo li tej neeg siab dag uas xyeej txoj kev ntseeg.

29 Yog li ntawd, yog nej tsis nco qab muaj siab hlub, nej zoo li tej quav hlau, uas cov neeg ntaus hlau muab pov tseg, (vim tej quav hlau tsis muaj nuj nqis) thiab raug neeg ko taw tsuj.

30 Thiab nim no, kuv cov kwv tij, tom qab nej tau txais tej kev ua tim khawv ntau npaum li no, thiab tau pom tias cov vaj lug kub dawb huv yeej ua tim khawv txog tej no, kuv xav kom nej cia li tawm los thiab txi txiv rau kev hloov siab lees txim.

31 Muaj tseeb tiag, kuv xav kom nej cia li tawm los thiab tsis txhob ua nej lub siab tawv ntev ntxiv lawm; vim saib seb, tam sim no yog lub sij hawm thiab yog hnub ntawm nej txoj kev cawm seej; thiab yog li ntawd, yog nej yuav hloov siab lees txim thiab tsis txhob ua nej lub siab tawv, tam sim no Vajtswv yuav ua kom muaj raws li txoj hau kev txhiv dim uas tseem ceeb los rau nej.

32 Vim saib seb, lub neej no yog lub caij rau tib neeg npaj mus ntsib Vajtswv; muaj tseeb tiag, saib seb lub caij ntawm lub neej no yog lub caij rau tib neeg ua lawv tej hauj lwm.

33 Thiab nim no, ib yam li kuv tau hais rau nej ua ntej lawm, vim nej twb muaj tej kev ua tim khawv ntau heev, yog li ntawd, kuv thov nej kom nej tsis txhob laug nej lub sij hawm hloov siab lees txim rau puag tom kawg; vim tom qab lub neej no, uas tau muab rau peb npaj rau txoj kev nyob mus ib txhis, saib seb, yog peb tsis ua zoo siv peb lub sij hawm thaum nyob hauv lub neej no, ces hmo tsaus ntuj yuav los thaum ntawd yuav ua tsis tau hauj lwm lawm.

34 Nej hais tsis tau tias, thaum nej los txog rau qhov xwm txheej txaus ntshai ntawd tias, kuv mam hloov siab lees txim, kom kuv yuav tau rov qab mus cuag kuv tus Vajtswv. Tsis tau, nej hais tsis tau li no; vim tias tib tug ntsuj plig uas kav nej lub cev thaum nej ncaim lub neej no mus, tib tug ntsuj plig ntawd yuav muaj hwj chim kav nej lub cev nyob hauv lub ntuj uas nyob mus ib txhis ntawd.

35 Vim saib seb, yog nej laug nej lub sij hawm hloov siab lees txim kom txog thaum tuag, saib seb, nej twb raug tus dab phem tus ntsuj plig kav, thiab nws muab nej khi ua nws li; yog li ntawd, tus Tswv tus Ntsuj Plig tau tso nej tseg, thiab tsis muaj chaw nyob rau hauv nej, thiab tus dab phem muaj hwj chim tag nrho kav nej; thiab qhov no yog qhov kawg ntawm cov neeg phem.

36 Thiab kuv paub qhov no, vim tus Tswv tau hais tias nws tsis nyob hauv tej tuam tsev uas tsis dawb huv, tiam sis nws nyob hauv tej neeg ncaj ncees lub siab; muaj tseeb tiag, thiab nws kuj tau hais tias cov neeg ncaj ncees yuav zaum hauv nws lub nceeg vaj, yuav tsis tawm mus ntxiv ib zaug ntxiv li lawm; tiam sis tus Me Nyuam Yaj cov ntshav yuav ua kom lawv tej tsoos tsho dawb paug.

37 Thiab nim no, kuv cov kwv tij uas kuv hlub es, kuv thov kom nej nco ntsoov tej no, thiab kom nej ua hauj lwm rau nej txoj kev cawm seej nrog txoj kev hwm Vajtswv, thiab kom nej tsis txhob xyeej txoj kev Khetos yuav los ntxiv lawm;

38 Kom nej tsis txhob tawm tsam tus Vaj Ntsuj Plig Dawb Huv ntxiv lawm, tiam sis kom nej txais yuav nws, thiab kom nej ris Khetos lub npe; kom nej txo nej tej hwj chim kom ti hauv av, thiab teev tiam Vajtswv, nyob txhua qhov chaw uas nej nyob, raws li tus ntsuj plig thiab raws li txoj kev tseeb; thiab kom nej ua neej nyob ua tsaug txhua hnub, rau tej kev hlub tshua thiab tej koob hmoov ntau uas nws tau muab rau nej.

39 Muaj tseeb tiag, thiab kuv kuj ntuas nej, kuv cov kwv tij, kom nej faj seeb thov Vajtswv tsis tu ncua, xwv kom tus dab phem tej kev ntxias coj tsis tau nej mus, xwv kom nws yuav kov tsis yeej nej, xwv kom nej yuav tsis rais mus ua nws qhev thaum txog hnub kawg; vim saib seb, nws twb tsis muab ib yam zoo ua nqi zog rau nej.

40 Thiab nim no kuv cov kwv tij uas kuv hlub es, kuv yuav ntuas nej kom ua siab ntev, thiab kom nej nyiaj txhua yam kev txom nyem; kom nej tsis txhob cem cov uas ntiab nej tawm vim yog nej txoj kev pluag heev, nyob tsam nej ho los ua tej neeg ua txhaum li lawv thiab;

41 Tiam sis kom nej ua siab ntev, thiab nyiaj tej kev txom nyem, nrog kev cia siab uas ruaj khov tias muaj ib hnub nej yuav tau so ntawm tag nrho nej tej kev txom nyem.