1 Thiab tau muaj tias nyob rau thaum pib ntawm xyoo thib peb caug rau ntawm cov neeg txiav txim txoj kev kav Nifais cov neeg, Sinploos yog tus khaws tej yam dawb ceev uas Amas tau muab rau Hilamas.

2 Thiab nws yog ib tug neeg ncaj, thiab nws taug kev ncaj ncees rau Vajtswv; thiab nws saib ntsoov kom ua zoo tsis tu ncua, kom ua raws li tus Tswv nws tus Vajtswv tej lus txib; thiab nws tus kwv los tib yam.

3 Thiab tau muaj tias Maulaunais los kuj tuag thiab. Thiab xyoo thib peb caug rau ntawm cov neeg txiav txim txoj kev kav tau xaus li no.

4 Thiab tau muaj tias nyob hauv xyoo thib peb caug xya ntawm cov neeg txiav txim txoj kev kav, muaj ib pab neeg coob coob, twb muaj txog tsib txhiab thiab plaub puas leej, nrog lawv cov poj niam thiab lawv cov me nyuam, tau ncaim tawm ntawm thaj av Xalahelas mus rau thaj av uas nyob rau sab qaum teb.

5 Thiab tau muaj tias Henkos, nws yog ib tug neeg xav paub lwm yam heev, yog li ntawd nws thiaj tau mus thiab txua ib lub nkoj uas loj heev, nyob rau ntawm tej ciam teb ntawm thaj av Huaj Vam, ze thaj av Quav Poj, thiab muab tso mus rau hauv tus dej hiav txwv sab hnub poob, ze ntawm ntu av nqaim uas coj mus rau thaj av nyob rau sab qaum teb.

6 Thiab saib seb, muaj cov Neeg Nifais coob leej tau nkag mus rau hauv thiab nquam tawm mus nrog tej khoom noj khoom siv ntau, thiab kuj muaj poj niam thiab me nyuam coob leej; thiab lawv nquam mus rau sab qaum teb. Thiab xyoo thib peb caug xya tau xaus li no.

7 Thiab nyob hauv xyoo thib peb caug yim, tus txiv neej no tau txua dua lwm lub nkoj. Thiab thawj lub nkoj kuj tau rov qab los, thiab muaj neeg coob ntxiv tau nkag mus rau hauv; thiab lawv kuj nqa tej khoom noj khoom siv ntau, thiab rov qab mus dua rau pem thaj av sab qaum teb.

8 Thiab tau muaj tias txij li ntawd los twb tsis hnov txog lawv ntxiv lawm. Thiab peb xav hais tias lawv poob dej hauv qab thu dej hiav txwv lawm. Thiab tau muaj tias kuj muaj ib lub nkoj ntxiv uas tau nquam tawm mus; thiab peb twb tsis paub xyov nws mus dua twg lawm.

9 Thiab tau muaj tias nyob hauv xyoo no muaj neeg coob leej tau tawm mus rau pem thaj av sab qaum teb. Thiab xyoo thib peb caug yim tau xaus li no.

10 Thiab tau muaj tias nyob hauv xyoo thib peb caug cuaj ntawm cov neeg txiav txim txoj kev kav, Sinploos kuj tau tuag, thiab Khali-atoos tau nkag rau hauv ib lub nkoj mus rau pem thaj av sab qaum teb, thauj tej khoom noj khoom siv mus rau cov neeg uas tau mus rau thaj av ped.

11 Yog li ntawd thiaj tsim nyog rau Sinploos kom muab tej yam uas dawb ceev ntawd, ua ntej nws tuag, rau Hilamas tus tub, uas hu ua Hilamas, lub npe uas zoo li nws txiv lub.

12 Nim no saib seb, tag nrho tej ntawv sau uas nyob ntawm Hilamas twb muab sau thiab muab xa tawm mus rau noob neej uas nyob thoob plaws hauv thaj av, tsuas yog tshuav tej feem uas Amas hais tias kom tsis txhob muab xa tawm mus.

13 Txawm li ntawd los, yuav tsum muab tej yam no ceev kom dawb huv, thiab muab cev ntawm ib tiam neeg mus rau ib tiam; yog li ntawd, nyob hauv xyoo no, thiaj tau muab tej yam no rau Hilamas, ua ntej Sinploos tuag.

14 Thiab tau muaj tias nyob hauv xyoo no kuj muaj ib co neeg ntxeev siab uas tau khiav mus rau tom cov Neeg Lamas; thiab lawv mus txhaub cov Neeg Lamas dua kom npau taws rau cov Neeg Nifais.

15 Thiab nyob hauv tib xyoo no lawv tau nrog ib pab tub rog coob heev tuaj ua rog tawm tsam Maulaunaihas cov neeg, los sis tawm tsam Maulaunaihas cov tub rog, nyob hauv qhov uas cov Neeg Lamas tau swb thiab raug muab raws khiav rov qab mus rau lawv tej av dua, thiab raug kev ploj loj heev.

16 Thiab xyoo thib peb caug cuaj ntawm cov neeg txiav txim txoj kev kav Nifais cov neeg tau xaus li no.

17 Thiab Amas, thiab nws tus tub Hilamas, thiab nws tus tub Sinploos, lawv zaj tau xaus li no.