1 Saib seb, nim no tau muaj tias cov Neeg Lamas tus vaj ntxwv xa ib tsab xov mus rau tag nrho nws cov neeg tias, lawv yuav tsum tsis txhob xuas lawv tes ntsiab nthos Amoos, los sis Aloos, los sis Oonaws los sis Heenais, los sis ib tug ntawm lawv cov kwv tij uas yuav tawm mus tshaj tawm Vajtswv txoj lus, nyob hauv txhua qhov chaw uas lawv yuav mus, nyob hauv txhua qhov ntawm lawv thaj av.

2 Muaj tseeb tiag, nws xa ib txoj lus tshaj tawm mus rau hauv lawv, xwv kom lawv tsis txhob xuas lawv tes ntsiab nthos Amoos thiab nws cov kwv tij, muab lawv khi; thiab txhob nto qaub ncaug rau lawv, txhob ntaus lawv, txhob ntiab lawv tawm ntawm lawv tej tsev sab laj, txhob muab lawv nplawm; thiab kom lawv tsis txhob txawb pob zeb rau Amoos thiab nws cov kwv tij, tiam sis cia rau lawv nkag ywj siab mus rau hauv lawv tej tsev, thiab rau hauv lawv tej tuam tsev, thiab lawv tej chaw dawb huv.

3 Thiab xws li no xwv kom Amoos thiab nws cov kwv tij yuav muaj cuab kav tawm mus thiab tshaj tawm txoj lus raws li lawv siab nyiam, vim tus vaj ntxwv twb hloov siab los ntseeg tus Tswv, thiab tag nrho nws tsev neeg; yog li ntawd nws xa nws zaj lus tshaj tawm mus thoob plaws thaj av rau nws cov neeg, xwv kom txhob muaj kev cuam tshuam Vajtswv txoj lus, tiam sis xwv kom txoj lus yuav tawm mus thoob plaws rau tag nrho thaj av, xwv kom yuav ua rau nws cov neeg ntseeg tias lawv cov yawg koob tej kab lis kev cai yuam kev lawm, thiab xwv kom yuav ua rau lawv ntseeg tias lawv sawv daws puav leej yog kwv tij, thiab kom lawv yuav tsum tsis txhob tua neeg, los sis tsis txhob tua txeeb tej khoom, los sis tsis txhob ua tub sab, los sis tsis txhob deev luag poj luag txiv, los sis tsis txhob ua txhaum ib yam kev phem dab tsi li.

4 Thiab nim no tau muaj tias thaum tus vaj ntxwv tau xa zaj lus tshaj tawm no, Aloos thiab nws cov kwv tij tau tawm mus ntawm ib lub nroog mus rau ib lub nroog, thiab ntawm ib lub tsev teev tiam mus rau ib lub, thiab txhim tsa tej ceg koom txoos, thiab tsa cov pov thawj thiab cov xib hwb nyob thoob plaws thaj av hauv cov Neeg Lamas, los tshaj tawm thiab qhia Vajtswv txoj lus nyob hauv lawv; thiab xws li no lawv pib muaj kev vam meej heev.

5 Thiab lawv coj tau txhiab txhiab leej los paub txog tus Tswv, muaj tseeb tiag, coj tau txhiab txhiab leej los ntseeg cov Neeg Nifais tej kab lis kev cai; thiab cov Neeg Nifais tau qhia rau lawv txog cov ceev xwm txheej thiab tej kev qhia tej yuav muaj los yav tom ntej uas ib tug tau muab cev los rau ib tug txog rau lub sij hawm no.

6 Thiab tseeb npaum li tus Tswv muaj txoj sia nyob, yeej muaj tseeb tias tag nrho cov uas ntseeg, los sis tag nrho cov uas lawv coj tau los paub txog qhov tseeb, los ntawm Amoos thiab nws cov kwv tij txoj kev tshaj tawm, raws li lub txiaj ntsim txais tau kev tshwm sim thiab qhia tau tej yuav muaj los yav tom ntej, thiab Vajtswv lub hwj chim uas ua tej txuj ci tseem ceeb nyob hauv lawv—muaj tseeb tiag, kuv hais rau nej, ib yam li tus Tswv muaj txoj sia nyob, tag nrho cov Neeg Lamas uas los ntseeg lawv tej lus qhuab qhia, thiab tau hloov siab los ntseeg tus Tswv, twb tsis muaj ib tug uas ncaim mus li lawm.

7 Vim lawv tau hloov los ua ib co neeg ncaj ncees; lawv tau tso lawv tej cuab yeej ntawm kev ntxeev siab tseg, uas ua rau lawv tsis tawm tsam Vajtswv ntxiv lawm, thiab tsis tawm tsam lawv cov kwv tij ib tug twg.

8 Nim no, cov no yog lawv cov uas hloov siab los ntseeg tus Tswv:

9 Cov neeg ntawm cov Neeg Lamas uas nyob hauv thaj av Ixama-ees;

10 Thiab kuj yog cov neeg ntawm cov Neeg Lamas uas nyob hauv thaj av Midaunais;

11 Thiab kuj yog cov neeg ntawm cov Neeg Lamas uas nyob hauv lub nroog Nifais;

12 Thiab kuj yog cov neeg ntawm cov Neeg Lamas uas nyob hauv thaj av Sailos, thiab cov uas nyob hauv thaj av Seloos, thiab nyob hauv lub nroog Lemu-ees, thiab hauv lub nroog Sinailos.

13 Thiab nov yog lub npe ntawm cov Neeg Lamas uas hloov siab los ntseeg tus Tswv tej nroog ntawm cov Neeg Lamas uas tau hloov siab los ntseeg tus Tswv; thiab cov no yog cov uas tau tso lawv tej cuab yeej ntawm kev ntxeev siab tseg, muaj tseeb tiag, tag nrho lawv tej cuab yeej ua rog; thiab lawv tag nrho puav leej yog cov Neeg Lamas.

14 Thiab cov neeg Amalej tsis kam hloov siab los ntseeg, tsuas yog ib tug xwb; thiab cov neeg Amuloos los kuj zoo ib yam li ntawd; tiam sis lawv ua lawv lub siab tawv, thiab lawv kuj ua rau cov Neeg Lamas nyob hauv thaj av uas lawv nyob lub siab tawv, muaj tseeb tiag, thiab tag nrho lawv tej zos thiab lawv tej nroog.

15 Yog li ntawd, peb tau hais tag nrho tej lub npe ntawm cov Neeg Lamas uas lawv tau hloov siab lees txim thiab los paub txog qhov tseeb tej nroog, thiab tau hloov siab los ntseeg.

16 Thiab nim no tau muaj tias tus vaj ntxwv thiab cov uas tau hloov siab los ntseeg xav kom lawv muaj ib lub npe, xwv kom lawv thiaj yuav zoo txawv lawv cov kwv tij; yog li ntawd tus vaj ntxwv thiaj sab laj nrog Aloos thiab coob leej ntawm lawv cov pov thawj, ntsig txog lub npe uas lawv yuav ris, xwv kom lawv yuav txawv.

17 Thiab tau muaj tias lawv muab lawv lub npe hu ua cov Eethais-Nifais-Lihais; thiab lawv hu lub npe no thiab tsis hu ua cov Neeg Lamas ntxiv lawm.

18 Thiab lawv pib ua ib co neeg nquag heev; muaj tseeb tiag, thiab lawv ua zoo rau cov Neeg Nifais; yog li ntawd, lawv pib sib raug zoo nrog lawv, thiab Vajtswv txoj kev foom tsis zoo tsis nrog lawv mus ntxiv lawm.