1 Nim no tau muaj tias nyob rau hauv xyoo thib peb caug ntawm cov neeg txiav txim txoj kev kav Nifais cov neeg, tom qab Maulaunais tau txais thiab nyeem Hilamas tsab ntawv, nws zoo siab heev vim yog txoj kev nyab xeeb, muaj tseeb tiag, zoo siab heev rau txoj kev ua tau li siab xav uas Hilamas tau muaj, uas rov txeeb tau tej av uas tau poob lawm.

2 Muaj tseeb tiag, thiab nws qhia rau tag nrho nws cov neeg paub, nyob rau tag nrho tej av uas nyob ib puag ncig ntawm sab uas nws nyob, kom lawv yuav zoo siab thiab.

3 Thiab tau muaj tias tam sim ntawd nws xa kiag ib tsab ntawv mus rau Pehaulas, thov nws hais kom cov neeg sib sau mus txhawb zog rau Hilamas, los sis Hilamas cov tub rog, kom yuav yooj yim rau nws tswj tuav feem av uas nws txeeb tau rov qab los yam muaj txuj ci tseem ceeb heev.

4 Thiab tau muaj tias thaum Maulaunais tau xa tsab ntawv no mus rau thaj av Xalahelas lawm, nws rov pib npaj ib lub tswv yim saib nws puas yuav txeeb tau tej av thiab tej nroog seem uas cov Neeg Lamas txeeb tau ntawm lawv lawm.

5 Thiab tau muaj tias thaum Maulaunais tab tom npaj mus ua rog tawm tsam cov Neeg Lamas zoo li no, saib seb, cov Neeg Lamas tuaj tawm tsam Nifaihas cov neeg, uas yog sib sau ntawm lub nroog Maulaunais thiab lub nroog Lihais thiab lub nroog Mauli-atoos tuaj ua ke.

6 Muaj tseeb tiag, twb yog cov Neeg Lamas uas raug yuam kom khiav tawm ntawm thaj av Meethais, thiab ntawm tej av ib puag ncig, tau tuaj koom nrog cov Neeg Lamas nyob rau hauv feem av no.

7 Thiab yog li ntawd vim lawv muaj coob heev, muaj tseeb tiag, thiab lawv tau txais zog ntxiv ib hnub dhau ib hnub, los ntawm Amauloos txoj kev txib cov Neeg Lamas thiaj tawm tuaj tawm tsam Nifaihas cov neeg, thiab cov Neeg Lamas pib muab lawv tua tuag coob heev kawg nkaus li.

8 Thiab lawv cov tub rog muaj coob heev ua rau Nifaihas cov neeg uas tseem tshuav yuav tsum khiav ntawm lawv mus; thiab lawv thiaj los koom nrog Maulaunais cov tub rog.

9 Thiab nim no vim Maulaunais xav tias yuav tsum xa neeg mus rau lub nroog Nifaihas, mus pab cov neeg tswj tuav lub nroog ntawd, thiab vim nws paub tias yuav yooj yim ceev kom lub nroog tsis txhob poob mus rau hauv cov Neeg Lamas txhais tes dua li rov qab mus txeeb ntawm lawv los, nws xav tias yuav yooj yim rau Nifaihais cov neeg tswj tuav tau lub nroog ntawd.

10 Yog li ntawd nws thiaj cia tag nrho nws cov tub rog nyob tswj tuav cov chaw uas nws rov txeeb tau lawm.

11 Thiab nim no, thaum Maulaunais pom tias lub nroog Nifaihas tau poob lawm nws tu siab heev, thiab pib ntshai tias lawv yuav poob mus rau hauv lawv cov kwv tij txhais tes, vim yog cov neeg txoj kev phem.

12 Nim no tag nrho nws cov thawj hau rog los kuj xav li no thiab. Lawv kuj ntshai thiab txhawj vim yog cov neeg txoj kev phem, thiab muaj li no los twb vim yog qhov uas cov Neeg Lamas kov yeej lawv.

13 Thiab tau muaj tias Maulaunais npau taws rau cov nom tswv, vim lawv tsis quav ntsej txog txoj kev ywj pheej ntawm lawv lub teb chaws.