1 Nim no Amas, pom tias Amulej tej lus tau ua rau Xi-elas ntsiag to, vim nws pom tias Amulej tshawb tau qhov uas nws dag thiab ntxias ua kom Amulej puas tsuaj, thiab vim Amas pom tias nws pib tshee hnyo los ntawm qhov uas nws paub nws txoj kev muaj txim, Amas thiaj qhib qhov ncauj thiab pib hais lus rau nws, thiab txhawb Amulej tej lus, thiab piav txog tej yam ntawd ntxiv, los sis piav tej vaj lug kub ntxiv dua li tej uas Amulej tau ua lawm.

2 Nim no cov neeg uas nyob ib puag ncig tau hnov tej lus uas Amas hais rau Xi-elas; vim cov neeg coob heev, thiab nws hais cov lus no:

3 Nim no Xi-elas, pom tias Amulej tshawb tau koj txoj kev dag thiab kev txawj ntxias, vim koj tsis yog dag rau neeg xwb tiam sis koj dag rau Vajtswv thiab; vim saib seb, nws paub tag nrho koj tej kev xav, thiab koj pom tias nws tus Ntsuj Plig ua rau peb paub koj tej kev xav;

4 Thiab koj pom tias peb paub koj lub tom txwv yog ib lub uas ntse heev, ib yam li tus dab phem txoj kev uas ntse heev, kom dag thiab ntxias tau cov neeg no xwv kom koj yuav muaj peev xwm tshum lawv tawm tsam wb, cem wb thiab ntiab wb tawm—

5 Nim no qhov no yog koj tus yeeb ncuab ib lub tom txwv, thiab nws tau siv nws lub hwj chim los ntawm koj. Nim no kuv xav kom koj nco ntsoov tias tej uas kuv hais rau koj kuv hais rau txhua tus.

6 Thiab saib seb kuv hais rau nej txhua tus hais tias qhov no yog tus yeeb ncuab ib rooj ntxiab, uas nws tau cuab kom ntes tau cov neeg no, xwv kom nws yuav coj tau nej mus ywj rau nws, xwv kom nws yuav xuas nws tej saw hlau khaub zig tau nej, xwv kom nws yuav zoj tau nej rau txoj kev puas tsuaj uas kav ib txhis, los ntawm lub hwj chim ntawm nws txoj kev poob cev qhev.

7 Nim no thaum Amas hais cov lus no tas lawm, Xi-elas pib tshee heev kawg ntxiv, vim ua rau nws ntseeg ntau ntxiv txog Vajtswv lub hwj chim; thiab kuj ua rau nws ntseeg tias Amas thiab Amulej paub txog nws, vim ua rau nws ntseeg tias nkawd paub nws tej kev xav thiab tej lub hom phiaj ntawm nws lub siab; vim Vajtswv muab hwj chim rau nkawd kom nkawd paub txog tej yam no raws li lub txiaj ntsim qhia tau tej yuav muaj los yav tom ntej.

8 Thiab Xi-elas pib rau siab ntso nug nkawd, xwv kom nws yuav paub ntxiv txog Vajtswv lub nceeg vaj. Thiab nws hais rau Amas tias: Qhov uas Amulej tau hais txog kev sawv rov los ntawm cov tuag txhais li cas, hais tias txhua tus yuav sawv hauv qhov tuag rov qab los, tag nrho tus ncaj thiab tus tsis ncaj, thiab Vajtswv yuav coj lawv mus sawv rau ntawm nws xub ntiag kom txiav txim raws li tej yam lawv ua?

9 Thiab nim no Amas pib piav tej yam no rau nws, hais tias: Twb tau ua rau coob leej paub txog tej txuj ci uas neeg tsis paub txog Vajtswv; txawm li ntawd los Vajtswv muab ib lo lus txib nruj heev rau lawv tsis pub lawv faib tej txuj ci ntawd tsuas yog faib tej feem ntawm nws txoj lus uas nws pub rau noob neej xwb, raws li noob neej txoj kev mloog lus thiab kev rau siab ntso uas lawv muab rau nws.

10 Thiab yog li ntawd, tus uas yuav ua nws lub siab tawv, tus ntawd yuav tau txais qhov uas tsawg dua ntawm txoj lus; thiab tus uas tsis ua nws lub siab tawv, Vajtswv yuav muab qhov uas ntau dua ntawm txoj lus rau tus ntawd, kom txog thaum tau muab rau nws paub puv npo txog tej txuj ci uas neeg tsis paub txog Vajtswv.

11 Thiab cov uas yuav ua lawv lub siab tawv, yuav muab qhov uas tsawg dua ntawm txoj lus rau lawv kom txog thaum lawv tsis paub dab tsi kiag txog nws tej txuj ci uas neeg paub tsis txog; thiab thaum ntawd tus dab phem yuav muab lawv txhom, thiab coj lawv nqis mus rau txoj kev puas tsuaj raws li nws lub siab nyiam. Nim no ntuj txiag teb tsaus tej saw hlau yog txhais li no.

12 Thiab Amulej tau hais tseeb ntsig txog kev tuag, thiab kev sawv los ntawm cev nqaij daim tawv uas txawj tuag no mus rau qhov uas tsis txawj tuag, thiab txog qhov uas Vajtswv coj yuav peb mus rau ntawm nws lub rooj txiav txim, kom txiav txim raws li tej yam peb ua.

13 Thaum ntawd yog tias peb tau ua peb lub siab tawv qhawv, muaj tseeb tiag, yog peb tau ua peb lub siab tawv qhawv tawm tsam txoj lus, npaum li uas Vajtswv tsis pom txoj lus nyob hauv peb, thaum ntawd peb yuav tau qhov phem heev, vim thaum ntawd peb yuav raug txim.

14 Vim peb tej lus yuav rau txim rau peb, muaj tseeb tiag, tag nrho tej yam peb ua yuav rau txim rau peb; yuav tsis pom tias peb tsis muaj qhov phem; thiab peb tej kev xav kuj yuav rau txim rau peb thiab; thiab nyob hauv qhov phem heev no peb yuav tsis muaj cuab kav ntsia mus rau peb tus Vajtswv; thiab peb yuav zoo siab heev yog hais tias peb ua tau rau tej pob zeb thiab tej roob vau los tsuam peb muab peb npog kom nws txhob pom peb.

15 Tiam sis ua tsis tau; peb yuav tsum txav los thiab sawv ntawm nws xub ntiag nrog nws lub yeeb koob, thiab nrog nws lub hwj chim, thiab nrog nws lub zog, lub yeeb haum, thiab txoj kev kav, thiab ua rau peb txaj muag kav ib txhis lees hais tias tag nrho nws tej kev txiav txim yeej ncaj ncees; hais tias nws yeej ncaj ua tag nrho nws tej hauj lwm, thiab hais tias nws yeej hlub tshua noob neej, thiab hais tias nws muaj hwj chim tag nrho cawm tau neeg txhua tus uas ntseeg nws lub npe thiab txi tau txiv uas tsim nyog rau kev hloov siab lees txim.

16 Thiab nim no saib seb, kuv hais rau koj tias thaum ntawd yuav muaj ib txoj kev tuag los, twb yog txoj kev tuag zaum ob, uas yog txoj kev tuag ntawm sab ntsuj plig; thaum ntawd yog lub sij hawm uas tus uas tuag thaum nws tseem muaj kev txhaum, uas yog kev tuag ntawm sab cev nqaij daim tawv, tus ntawd kuj yuav tuag ntawm sab ntsuj plig thiab; muaj tseeb tiag, nws yuav tuag ntawm tej yam ntsig txog kev ncaj ncees.

17 Thaum ntawd yog lub sij hawm uas lawv tej kev tsim txom yuav zoo li ib lub pas hluav taws thiab leej faj, uas tus nplaim sawv siab mus ib txhiab thiab ib txhis; thiab thaum ntawd yog lub sij hawm uas lawv yuav raug saw hlau zoj rau txoj kev puas tsuaj uas kav ib txhis, raws li Dab Ntxwg Nyoog lub hwj chim thiab txoj kev poob cev qhev, vim nws tau ua rau lawv ywj raws li nws siab nyiam.

18 Thaum ntawd, kuv hais rau koj tias, lawv yuav nyob zoo li tsis tau muaj kev txhiv dim; vim lawv txais tsis tau kev txhiv dim raws li Vajtswv txoj kev txim lij; thiab lawv yuav tuag tsis taus, vim yuav tsis muaj kev lwj ntxiv lawm.

19 Nim no tau muaj tias thaum Amas tau xaus hais cov lus no lawm, cov neeg haj yam xav tsis thoob;

20 Tiam sis muaj ib tug hu ua Anthi-aunas, uas yog ib tug thawj tswj hwm ntawm lawv, uas txav los thiab hais rau nws tias: Qhov uas koj hais no yog dab tsi, hais tias tib neeg yuav sawv hauv qhov tuag rov qab los thiab yuav hloov ntawm lub cev uas txawj tuag no mus rau lub cev uas tsis txawj tuag, xwv kom tus ntsuj plig yuav tsis txawj tuag ib zaug li lawm?

21 Vaj lug kub txhais li cas, qhov uas hais tias Vajtswv tau tso qhelunpees thiab ib rab ntaj nplaim taws rau sab hnub tuaj ntawm lub vaj Edees, nyob tsam peb thawj nkawm niam txiv yuav nkag mus thiab noj cov txiv ntawm tsob ntoo uas cawm neeg txoj sia, thiab muaj sia nyob mus ib txhis? Thiab yog li ntawd peb pom tias yuav ua tsis tau rau nkawd muaj sia nyob mus ib txhis.

22 Nim no Amas hais rau nws tias: Qhov no yog qhov uas kuv tab tom yuav piav, nim no peb pom tias Adas tau poob vim yog nws noj cov txiv uas tau txwv tsis pub noj, raws li Vajtswv txoj lus; thiab yog li no peb pom tias, los ntawm nws txoj kev poob, tib neeg txhua tus thiaj los ua cov neeg yuam kev thiab poob lawm.

23 Thiab nim no saib seb, kuv hais rau koj tias yog ua tau rau Adas noj cov txiv ntawm tsob ntoo uas cawm neeg txoj sia thaum lub sij hawm ntawd, ces twb tsis muaj kev tuag, thiab ua rau txoj lus tsis muaj qab hau, thiab hais tias Vajtswv yog ib tug neeg dag, vim nws hais tias: Yog koj noj ces koj yuav tuag.

24 Thiab peb pom tias txoj kev tuag tau los rau tib neeg, muaj tseeb tiag, txoj kev tuag uas Amulej tau hais txog, uas yog txoj kev tuag ntawm sab cev nqaij daim tawv; txawm li ntawd los Vajtswv twb pub ib lub sij hawm rau tib neeg kom lawv hloov siab lees txim; yog li ntawd lub neej no los ua ib lub caij sim siab; ib lub sij hawm los npaj mus ntsib Vajtswv; ib lub sij hawm los npaj rau lub neej uas tsis txawj kawg uas wb tau hais lawm, uas yog tom qab txoj kev sawv rov los ntawm cov tuag.

25 Nim no, yog tias tsis muaj txoj hau kev txhiv dim, uas Vajtswv tau npaj txij thaum ntuj tsim teb raug los, ces twb muaj tsis tau txoj kev sawv rov los ntawm cov tuag; tiam sis Vajtswv twb tau npaj ib txoj hau kev txhiv dim, uas yuav ua kom muaj txoj kev sawv rov los ntawm cov tuag, qhov uas twb tau hais lawm.

26 Thiab nim no saib seb, yog ua tau rau peb thawj nkawm niam txiv mus noj cov txiv ntawm tsob ntoo uas cawm neeg txoj sia ntshe nkawd yuav nyuaj siab mus ib txhis, vim nkawd tsis muaj caij npaj; thiab xws li no yuav ua tsis raws li txoj hau kev txhiv dim, thiab Vajtswv txoj lus yuav tsis muaj qab hau, vim twb tsis muaj kuab li.

27 Tiam sis saib seb, tsis yog li ntawd; tiam sis twb tau teem lawm hais tias tib neeg yeej yuav tuag; thiab tom qab lawv tuag, lawv yeej yuav los raug txiav txim, twb yog txoj kev txiav txim uas wb tau hais, uas yog qhov kawg.

28 Thiab tom qab Vajtswv tau teem hais tias tej yam no yuav tsum los rau tib neeg, saib seb, thaum ntawd nws pom tias tsim nyog rau tib neeg paub ntsig txog tej uas nws tau teem rau lawv;

29 Yog li ntawd nws thiaj xa cov tim tswv los nrog lawv tham, cov uas ua rau tib neeg pom tau nws lub yeeb koob.

30 Thiab txij lub sij hawm ntawd los lawv pib hu txog nws lub npe; yog li ntawd Vajtswv nrog tib neeg tham, thiab ua rau lawv paub txog txoj hau kev txhiv dim, uas tau npaj txij thaum ntuj tsim teb raug los; thiab qhov no nws ua rau lawv paub los ntawm lawv txoj kev ntseeg thiab kev hloov siab lees txim thiab tej yam dawb huv uas lawv ua.

31 Yog li ntawd, nws muab tej lus txib rau tib neeg, vim lawv xub ua txhaum thawj cov lus txib ntawm sab cev nqaij daim tawv, thiab tau hloov los ua neeg zoo li Vajtswv, paub qhov zoo thiab qhov phem, ua rau lawv tus kheej txawj xaiv ua, los sis Vajtswv ua rau lawv txawj xaiv ua raws li lawv siab xav thiab siab nyiam, txawm yuav ua phem los sis ua zoo—

32 Yog li ntawd Vajtswv muab tej lus txib rau lawv, tom qab nws ua rau lawv paub txog txoj hau kev txhiv dim, hais tias kom lawv tsis txhob ua phem, kev raug txim ntawm qhov ntawd yog txoj kev tuag zaum ob, uas yog ib txoj kev tuag kav ib txhis ntawm tej yam ntsig txog kev ncaj ncees; vim txoj hau kev ntawm kev txhiv dim tsis muaj hwj chim cawm tau cov zoo li no, vim yuav ua tsis tau kom tej hauj lwm ntawm kev txim lij puas tsuaj, raws li Vajtswv txoj kev zoo tshaj plaws.

33 Tiam sis Vajtswv hu tib neeg, los ntawm nws Leej Tub lub npe, (qhov no yog txoj hau kev txhiv dim uas Vajtswv tau npaj tseg) hais tias: Yog nej yuav hloov siab lees txim, thiab tsis ua nej lub siab tawv qhawv, ces kuv yuav muaj kev hlub tshua rau nej, los ntawm kuv Tib Leeg Tub;

34 Yog li ntawd, tus uas hloov siab lees txim, thiab tsis ua nws lub siab tawv, nws yuav muaj cai txais tau kev hlub tshua los ntawm kuv Tib Leeg Tub, xwv kom muaj txoj kev zam txim rau nws tej kev txhaum; thiab cov no yuav tau nkag mus rau hauv kuv qhov chaw so.

35 Thiab tus uas yuav ua nws lub siab tawv thiab yuav ua phem, saib seb, kuv cog lus nrog kuv txoj kev npau taws tias nws yuav tsis tau nkag mus rau hauv kuv qhov chaw so.

36 Thiab nim no, kuv cov kwv tij, saib seb kuv hais rau nej tias, yog nej yuav ua nej lub siab tawv qhawv nej yuav nkag tsis tau mus rau hauv tus Tswv qhov chaw so; yog li ntawd nej txoj kev ua phem yuav thab nws xwv kom nws yuav xa nws txoj kev npau taws los rau nej ib yam li txoj kev thab thawj zaug, muaj tseeb tiag, raws li nws txoj lus thaum txoj kev thab zaum kawg zoo ib yam li thawj zaug, rau txoj kev puas tsuaj kav ib txhis ntawm nej tus ntsuj plig; yog li ntawd, raws li nws txoj lus, rau txoj kev tuag zaum kawg, ib yam li thawj zaug.

37 Thiab nim no, kuv cov kwv tij, vim pom tias peb paub tej yam no, thiab tej yam no yeej muaj tseeb, cia peb hloov siab lees txim, thiab tsis txhob ua peb lub siab tawv, xwv kom peb tsis txhob thab tus Tswv peb tus Vajtswv kom rub nws txoj kev npau taws los rau peb raws li nws cov lus txib zaum ob no uas nws tau muab rau peb; tiam sis cia peb nkag mus rau hauv Vajtswv qhov chaw so, uas tau npaj raws li nws txoj lus.