1 Thiab, kuv tus me tub Hilamas es, kuv txib kom koj khaws cov ceev xwm txheej uas Vaj Ntxwv Mauxiyas tau muab rau kuv;

2 Thiab kuv kuj txib koj tias koj yuav tsum sau ib phau ceev xwm txheej txog cov neeg no, raws li kuv tau ua, rau Nifais cov phiaj, thiab khaws tag nrho tej yam no kom dawb ceev tej uas kuv tau khaws los lawm, tib yam li uas kuv tau khaws tej no cia; vim yog rau ib lub hom phiaj tseem ceeb uas yuav tsum ceev tej no.

3 Thiab cov phiaj toog no, uas muaj tej ntawv sau no, uas muaj tej ceev xwm txheej ntawm cov vaj lug kub dawb huv nyob haud, uas muaj zaj qhia caj ceg txog peb cov yawg koob, txij puag thaum chiv keeb los—

4 Saib seb, peb cov yawg koob tau qhia tseg tias, yuav tsum ceev thiab muab cov phiaj toog no cev ntawm ib tiam mus rau ib tiam, thiab tus Tswv txhais tes yuav ceev thiab tsom kwm kom txog thaum cov phiaj toog no tawm mus rau txhua haiv neeg, txhua xeem neeg, txhua yam lus, thiab txhua yam neeg, xwv kom lawv yuav paub txog tej txuj ci tseem ceeb uas muaj nyob rau haud.

5 Thiab nim no saib seb, yog tias ua zoo ceev cov phiaj no ces cov phiaj no yuav tsum ci tas mus li; muaj tseeb tiag, thiab cov phiaj no yeej yuav ci tas mus li; muaj tseeb tiag, thiab tag nrho tej phiaj uas muaj cov ntawv sau uas dawb huv thiab.

6 Nim no tej zaum koj yuav xav tias qhov no yog kev ruam nyob ntawm kuv; tiam sis saib seb kuv hais rau koj tias, los ntawm tej yam me me thiab yooj yim thiaj muaj tej yam tseem ceeb los; thiab muaj ntau zaus uas kev ua tej yam me ua rau cov neeg txawj ntse poob ntsej muag.

7 Thiab tus Tswv uas yog Vajtswv ua hauj lwm siv kev ua tej yam kom muaj raws li nws tej hom phiaj tseem ceeb uas nyob mus ib txhis; thiab los ntawm kev ua tej yam me me tus Tswv ua tau rau cov neeg txawj ntse poob ntsej muag thiab coj tau txoj kev cawm seej los rau coob leej.

8 Thiab nim no, thaum ub los txog rau ziag no yeej yog Vajtswv lub tswv yim kom ceev tej yam no cia; vim saib seb, tej yam no twb pab tau cov neeg no nco ntsoov ntau yam ntxiv, muaj tseeb tiag, thiab ua rau coob leej paub txog qhov uas lawv yuam kev, thiab coj tau lawv los paub txog lawv tus Vajtswv uas ua rau lawv tus ntsuj plig txais txoj kev cawm seej.

9 Muaj tseeb tiag, kuv hais rau koj tias yog tsis muaj tej yam no uas muaj nyob hauv cov ceev xwm txheej no, uas nyob rau hauv cov phiaj no, ces Amoos thiab nws cov kwv tij yeej tsis muaj peev xwm ua rau cov Neeg Lamas ntau txhiab leej los ntseeg tias lawv cov yawg koob txoj kab lis kev cai tsis yog; muaj tseeb tiag, cov ceev xwm txheej no thiab tej lus uas nyob rau hauv coj tau lawv los rau kev hloov siab lees txim; hais tias, cov ceev xwm txheej no thiab tej lus uas nyob rau haud coj tau lawv los paub txog tus Tswv lawv tus Vajtswv, thiab los muaj kev zoo siab rau Yexus Khetos lawv tus Txhiv Dim.

10 Thiab leej twg yuav paub tias tej zaum cov ceev xwm txheej no yog qhov uas yuav coj tau ntau txhiab leej los, muaj tseeb tiag, thiab coj peb cov kwv tij uas tawv ncauj ntau txhiab leej, uas yog cov Neeg Nifais, cov uas tab tom ua lawv lub siab tawv qhawv ua txhaum thiab ua phem, los paub txog lawv tus Txhiv Dim?

11 Nim no Vajtswv tseem tsis tau ua kom kuv paub tag tej txuj ci uas neeg paub tsis txog no; yog li ntawd kuv yuav tsis hais ntxiv lawm.

12 Thiab twb txaus lawm uas kuv tsuas hais tias Vajtswv ceev cov ceev xwm txheej no cia rau ib lub hom phiaj uas txawj ntse, yog ib lub hom phiaj uas Vajtswv paub; vim nws yeej ntuas nrog laj lim tswv yim kav tag nrho nws tej hauj lwm, thiab nws tej kev yeej ncaj, thiab nws txoj kev yog ib txoj uas ncig nyob mus ib txhis.

13 Auj, nco ntsoov, cia li nco ntsoov, kuv tus me tub Hilamas es, Vajtswv tej lus txib nruj npaum li cas. Thiab nws hais tias: Yog nej yuav ua raws li kuv tej lus txib nej yuav vam meej nyob rau hauv thaj av—tiam sis yog nej tsis ua raws li nws tej lus txib nej yuav raug txiav tawm ntawm nws xub ntiag mus.

14 Thiab nim no nco ntsoov, kuv tus me tub es, Vajtswv tau tso siab muab tej yam no rau koj, tej yam uas dawb ceev, uas nws tau muab ceev cia kom dawb ceev, thiab uas nws yuav ceev thiab tsom kwm cia rau nws ib lub hom phiaj tseem ceeb, xwv kom nws yuav ua tau nws lub hwj chim tawm los rau tej tiam neeg yav tom ntej no paub.

15 Thiab nim no saib seb, kuv qhia koj los ntawm lub txiaj ntsim qhia tau tej yuav muaj los yav tom ntej, hais tias yog koj ua txhaum Vajtswv tej lus txib, saib seb, Vajtswv lub hwj chim yuav muab tej uas dawb ceev no tshem ntawm koj mus, thiab yuav coj koj mus rau Dab Ntxwg Nyoog, kom nws yuav muab koj tshau poob yam li tej npluag nplej uas raug cua ntsawj mus.

16 Tiam sis yog koj ua raws li Vajtswv tej lus txib, thiab ua rau tej uas dawb ceev no raws li Vajtswv txib koj, (vim koj yuav tsum thov tus Tswv tiag tiag rau txhua yam uas tsim nyog koj ua rau tej uas dawb ceev no) saib seb, tsis muaj hwj chim nyob hauv ntiaj teb no los sis hauv ntuj txiag teb tsaus yuav muaj peev xwm txeeb tau tej uas dawb ceev no ntawm koj mus, vim Vajtswv yeej muaj hwj chim ua kom muaj raws li tag nrho nws tej lus.

17 Vim nws yuav ua kom muaj raws li tag nrho nws tej lus cog tseg uas nws yuav cog rau koj, vim nws twb ua kom muaj raws li nws tej lus cog tseg uas nws tau cog rau peb cov yawg koob.

18 Vim nws cog lus rau lawv tias nws yuav tsom kwm tej yam no rau nws ib lub hom phiaj tseem ceeb, xwv kom nws yuav ua tau nws lub hwj chim tawm los rau tej tiam neeg yav tom ntej no paub.

19 Thiab nim no saib seb, ib lub hom phiaj uas nws twb ua tiav lawm, twb yog txoj kev txum tim ntau txhiab leej ntawm cov Neeg Lamas los paub txog qhov tseeb; thiab nws tau ua nws lub hwj chim tawm los nyob hauv lawv, thiab nws kuj tseem yuav ua nws lub hwj chim tawm los nyob hauv lawv rau tej tiam neeg yav tom ntej no paub; yog li ntawd yuav tsum ceev tej yam no cia.

20 Yog li ntawd kuv txib koj, kuv tus me tub Hilamas es, kom koj rau siab ua raws li tag nrho kuv tej lus, thiab kom koj rau siab ua raws li Vajtswv tej lus txib ib yam li tau muab sau cia.

21 Thiab nim no, kuv yuav hais rau koj ntsig txog nees nkaum plaub daig phiaj ntawd, hais tias kom koj ceev tej ntawd, xwv kom tej txuj ci uas neeg paub tsis txog thiab tej hauj lwm hauv kev tsaus ntuj, thiab lawv tej hauj lwm ua ntsiag to, los sis cov neeg uas raug puas tsuaj lawm tej hauj lwm ua ntsiag to, yuav muab tej ntawd ua kom cov neeg no paub; muaj tseeb tiag, tag nrho lawv tej kev tua neeg, thiab tej kev ua tub sab, thiab lawv tej kev tua txeeb tej khoom, thiab tag nrho lawv tej kev phem thiab kev qias, yuav muab tej ntawd qhia kom cov neeg no paub; muaj tseeb tiag, thiab kom koj tshwj cov cuab yeej txhais lus no tseg cia.

22 Vim saib seb, tus Tswv pom tias nws cov neeg pib ua hauj lwm hauv kev tsaus ntuj, muaj tseeb tiag, ua hauj lwm tua neeg ntsiag to thiab tej kev qias; yog li ntawd tus Tswv hais tias, yog lawv tsis hloov siab lees txim lawv yuav raug puas tsuaj tawm ntawm lub ntiaj teb mus.

23 Thiab tus Tswv hais tias: Kuv yuav npaj rau kuv tus tub qhe Nkaxiles, ib lub pob zeb, uas yuav ci nyob hauv qhov tsaus ntuj tawm mus rau qhov kaj, kom kuv yuav ua rau kuv cov neeg paub tias leej twg teev tiam kuv, kom kuv yuav ua rau lawv paub txog lawv cov kwv tij tej hauj lwm, muaj tseeb tiag, lawv tej hauj lwm ua ntsiag to, lawv tej hauj lwm kev tsaus ntuj, thiab lawv tej kev phem thiab kev qias.

24 Thiab nim no, kuv tus me tub, tau npaj cov cuab yeej txhais lus no xwv kom yuav muaj raws li Vajtswv txoj lus, uas nws hais, hais tias:

25 Kuv yuav coj tag nrho lawv tej hauj lwm ua ntsiag to thiab lawv tej kev qias tawm hauv qhov tsaus ntuj los mus rau qhov kaj; thiab tsuas yog lawv yuav hloov siab lees txim xwb tsis li ntawd kuv yuav rhuav kom lawv puas tsuaj tawm ntawm lub ntiaj teb mus; thiab kuv yuav muab tag nrho tej uas lawv ua ntsiag to thiab lawv tej kev qias, ua rau txhua haiv neeg uas yuav nyob hauv thaj av txij no mus lawm yav tom ntej paub.

26 Thiab nim no, kuv tus me tub, peb pom tias lawv tsis tau hloov siab lees txim; yog li ntawd lawv thiaj raug puas tsuaj lawm, thiab los txog niaj hnub nim no twb muaj raws li Vajtswv txoj lus; muaj tseeb tiag, Vajtswv twb coj lawv tej kev qias uas ntsiag to tawm hauv qhov tsaus ntuj thiab muab los ua rau peb paub.

27 Thiab nim no, kuv tus me tub, kuv txib kom koj khaws cia tag nrho lawv tej kev lav lus, thiab lawv tej kev khi lus, thiab lawv tej kev pom zoo los ntawm lawv tej kev qias uas ntsiag to; muaj tseeb tiag, thiab koj yuav tsum khaws cia tag nrho lawv tej cim thiab lawv tej txuj ci uas xav tsis thoob kom deb ntawm cov neeg no, xwv kom lawv tsis txhob paub txog tej ntawd, ntshai tsam lawv ho yuav poob mus rau hauv kev tsaus ntuj thiab raug puas tsuaj.

28 Vim saib seb, muaj ib txoj kev foom tsis zoo nyob hauv tag nrho thaj av no, hais tias txoj kev puas tsuaj yuav los rau txhua tus uas ua hauj lwm ntawm kev tsaus ntuj, raws li Vajtswv lub hwj chim, thaum lawv siav tas lawm; yog li ntawd kuv xav kom cov neeg no tsis txhob raug puas tsuaj.

29 Yog li ntawd koj yuav tsum ceev tej tswv yim ntsiag to ntawm lawv tej kev lav lus thiab lawv tej kev khi lus kom deb ntawm cov neeg no, thiab koj tsuas yog qhia txog lawv tej kev phem thiab lawv tej kev tua neeg thiab lawv tej kev qias rau cov neeg no paub xwb; thiab koj yuav qhia kom cov neeg no ntxub tej kev phem thiab kev qias thiab kev tua neeg zoo li ntawd; thiab koj kuj yuav qhia rau lawv tias cov neeg no tau raug puas tsuaj vim yog lawv tej kev phem thiab tej kev qias thiab lawv tej kev tua neeg.

30 Vim saib seb, lawv muab tag nrho tus Tswv cov yaj saub uas tuaj tshaj tawm nyob hauv lawv ntsig txog lawv tej kev qias tua pov tseg; thiab cov uas lawv muab tua tej ntshav tau thov tus Tswv lawv tus Vajtswv kom txoj kev pauj los rau cov uas tua lawv; thiab xws li no Vajtswv tej kev txiav txim thiaj los rau cov uas ua hauj lwm ntawm kev tsaus ntuj thiab kev tuav hauv ntsiag to.

31 Muaj tseeb tiag, thiab thaj av raug foom tsis zoo mus ib txhiab thiab ib txhis li rau cov uas ua hauj lwm ntawm kev tsaus ntuj thiab kev tuav hauv ntsiag to, ua rau lawv raug puas tsuaj, tsuas yog lawv hloov siab lees txim ua ntej thaum lawv siav tas xwb.

32 Thiab nim no, kuv tus me tub, nco ntsoov tej lus uas kuv tau hais rau koj; tsis txhob cia tej tswv yim ua ntsiag to ntawd rau cov neeg no, tiam sis qhia rau lawv txog ib txoj kev ntxub kav ib txhis tawm tsam kev txhaum thiab kev ua phem.

33 Tshaj tawm rau lawv txog kev hloov siab lees txim, thiab kev ntseeg tus Tswv Yexus Khetos; qhia kom lawv txo lawv lub hwj chim thiab kom muaj siab mos siab muag thiab txo siab txo ntsws; qhia kom lawv tiv tau tus dab phem txhua txoj kev ntxias, los ntawm lawv txoj kev ntseeg tus Tswv Yexus Khetos.

34 Qhia kom lawv tsis txhob nkees kiag li thaum ua tej yam zoo, tiam sis kom ua siab mos siab muag thiab txo siab txo ntsws; vim cov uas ua li ntawd yuav nrhiav tau chaw so rau lawv tus ntsuj plig.

35 Auj, nco ntsoov, kuv tus me tub, thiab kawm kom tau laj lim tswv yim thaum koj tseem hluas; muaj tseeb tiag, kawm thaum koj tseem hluas kom ua raws li Vajtswv tej lus txib.

36 Muaj tseeb tiag, thiab thov Vajtswv rau txhua yam uas koj xav tau noj tau haus; muaj tseeb tiag, muab txhua yam uas koj ua rau tus Tswv, thiab txawm yog koj yuav mus qhov twg cia koom siab nrog tus Tswv; muaj tseeb tiag, cia tag nrho koj tej kev xav taw mus rau tus Tswv; muaj tseeb tiag, muab txoj kev hlub hauv koj lub siab tso rau tus Tswv mus ib txhis.

37 Sab laj nrog tus Tswv txog txhua yam uas koj ua, thiab nws yuav coj koj mus rau qhov zoo; muaj tseeb tiag, thaum koj qhau cev pw hmo ntuj cia li qhau cev rau tus Tswv, xwv kom nws yuav tsom kwm koj thaum koj tsaug zog; thiab thaum koj sawv thaum sawv ntxov cia koj lub siab ris Vajtswv txiaj puv npo; thiab yog koj ua tej yam no, Vajtswv yuav tsa koj sawv thaum txog hnub kawg.

38 Thiab nim no, kuv tus me tub, kuv muaj tej yam uas xav hais txog qhov uas peb cov yawg koob hu ua ib lub pob, los sis lub taw kev—los sis peb cov yawg koob muab hu ua lub Liyahaunas, uas txhais hais tias, ib lub koob taw kev; thiab tus Tswv yog tus npaj lub ntawd.

39 Thiab saib seb, tsis muaj ib tug neeg muaj peev xwm ua tau tus qauv tes zoo npaum li ntawd. Thiab saib seb, tus Tswv tau npaj lub Liyahaunas los qhia peb cov yawg koob txoj kev uas lawv yuav taug nyob hauv hav zoov.

40 Thiab lub Liyahaunas ua hauj lwm rau lawv raws li lawv txoj kev ntseeg Vajtswv; yog li ntawd, yog lawv muaj kev ntseeg los ntseeg tias Vajtswv muaj peev xwm ua rau cov koob kom taw kev rau lawv mus, saib seb, twb ua tau li ntawd; yog li ntawd lawv muaj qhov txuj ci tseem ceeb no, thiab Vajtswv lub hwj chim kuj tau ua ntau qhov txuj ci tseem ceeb, ib hnub dhau ib hnub.

41 Txawm li ntawd los, vim tej txuj ci tseem ceeb ntawd yog ua los ntawm tej yam me me lub Liyahaunas qhia rau lawv paub txog tej hauj lwm uas xav tsis thoob. Lawv yog neeg tub nkeeg, thiab tsis nco qab muab siab rau ntseeg thiab rau siab thiab tom qab ntawd tej hauj lwm uas xav tsis thoob ntawd tau tsum, thiab lawv tsis tau mus tom ntej nyob rau hauv lawv txoj kev tsiv;

42 Yog li ntawd, lawv tau nyob hauv hav zoov, los sis mus tsis ncaj kev, thiab raug kev tshaib thiab kev nqhis, vim yog lawv tej kev ua txhaum.

43 Thiab nim no, kuv tus me tub es, kuv xav kom koj to taub tias tej yam no muaj ib qho piv txwv, vim thaum peb cov yawg koob nkees nkees ua raws li lub koob taw kev no (nim no tej yam no yog ntawm sab cev nqaij daim tawv) lawv tsis vam meej; tej yam uas yog ntawm sab ntsuj plig yeej zoo tib yam li ntawd.

44 Vim saib seb, qhov uas koj mloog Khetos txoj lus, uas yuav taw ib txoj kev ncaj rau koj kom mus txog txoj kev zoo siab uas nyob mus ib txhis, kuj yooj yim ib yam li qhov uas peb cov yawg koob ua raws li lub koob taw kev, uas taw ib txoj kev ncaj rau lawv kom mus txog thaj av uas cog lus cia.

45 Thiab nim no kuv hais tias, qhov no puas yog ib lub cim? Vim tseeb npaum li uas lub taw kev no tau coj peb cov yawg koob tuaj txog thaj av uas cog lus cia, los ntawm qhov uas mus raws li txoj kev no, Khetos tej lus kuj yuav ris kom peb dhau lub hav ntawm kev tu siab no mus rau ib thaj av uas cog lus cia uas zoo tshaj, yog tias peb coj raws li tej lus ntawd.

46 Auj kuv tus me tub es, tsis txhob cia peb tub nkeeg vim yog tej kev yooj yim ntawm txoj kev; vim peb cov yawg koob twb zoo li ntawd; vim Vajtswv tau npaj rau lawv li ntawd, hais tias yog lawv ntsia ces lawv yuav muaj sia nyob; kuj zoo tib yam li ntawd rau peb. Twb npaj tau txoj kev lawm, thiab yog peb yuav ntsia ces peb yuav muaj sia nyob mus ib txhis li.

47 Thiab nim no, kuv tus me tub, ua zoo saib xyuas tej yam dawb ceev no, muaj tseeb tiag, ntsia ntsoov Vajtswv xwv kom koj muaj sia nyob. Cia li mus rau hauv cov neeg no thiab tshaj tawm txoj lus, thiab ua tiag tiag. Kuv tus me tub, mus zoo koj.