1 Thiab tau muaj tias lawv tawm mus, thiab pib tshaj tawm Vajtswv txoj lus rau cov neeg, nkag mus rau hauv lawv tej tsev sab laj, thiab rau hauv lawv tej tsev; muaj tseeb tiag, thiab lawv tshaj tawm txoj lus nyob hauv lawv tej kev.

2 Thiab tau muaj tias tom qab tau ua hauj lwm ntau heev nyob rau hauv cov Neeg Xaulas, lawv pib muaj kev vam meej nyob hauv cov neeg pluag; vim saib seb, lawv raug ntiab tawm ntawm tej tsev sab laj vim yog lawv tej ris tsho khaub hlab—

3 Yog li ntawd lawv cov kwv tij tsis pub lawv nkag mus rau hauv lawv tej tsev sab laj mus teev tiam Vajtswv, vim lawv cov kwv tij xav tias lawv vuab tsuab; yog li ntawd lawv yog neeg pluag; muaj tseeb tiag, lawv cov kwv tij muab lawv saib li tej khoom seem; yog li ntawd lawv yeej pluag hais txog tej khoom ntawm lub ntiaj teb; thiab lawv kuj pluag hauv nruab siab thiab.

4 Nim no, thaum Amas tab tom qhia thiab hais lus rau cov neeg nyob saum lub pov roob Aunidas, muaj ib pab neeg coob tuaj cuag nws, yog cov uas peb tau hais txog, cov neeg uas pluag hauv nruab siab, vim yog lawv tej kev txom nyem hais txog tej khoom ntawm lub ntiaj teb.

5 Thiab lawv tuaj cuag Amas; thiab ib tug uas yog tus hlob nyob hauv lawv hais rau nws tias: Saib seb, kuv cov kwv tij no yuav ua li cas, vim txhua tus neeg ntxub lawv vim yog lawv txoj kev txom nyem, muaj tseeb tiag, thiab qhov tseem ceeb tshaj twb yog peb cov pov thawj; vim lawv tau ntiab peb tawm ntawm peb tej tsev sab laj uas peb tau khwv heev ua nrog peb tus kheej txhais tes; thiab lawv tau ntiab peb tawm vim yog peb txom nyem heev; thiab peb tsis muaj chaw teev tiam peb tus Vajtswv; thiab saib seb, peb yuav ua li cas?

6 Thiab nim no thaum Amas hnov cov lus no, nws tig hlo nws tus kheej los, nws lub ntsej muag tig mus rau tus uas hais lus, thiab nws ntsia lawv nrog txoj kev xyiv fab loj heev; vim nws pom tias lawv tej kev txom nyem tau ua rau lawv txo hwj chim tiag tiag, thiab npaj lawv los hnov txoj lus.

7 Yog li ntawd nws tsis hais lus ntxiv rau pab neeg uas nws xub qhia; tiam sis nws xyab nws txhais tes, thiab hais nrov nrov rau cov uas nws pom, uas yog cov hloov siab lees txim tiag tiag, thiab hais rau lawv hais tias:

8 Kuv pom tias nej muaj siab mos siab muag; thiab yog tias yog li ntawd, nej tau koob hmoov.

9 Saib seb nej tus tij laug tau hais tias, Peb yuav ua li cas?—vim peb raug ntiab tawm ntawm peb tej tsev sab laj, ua rau peb yuav teev tiam tsis tau peb tus Vajtswv.

10 Saib seb kuv hais rau nej, nej xav tias nej tsis muaj cuab kav teev tiam Vajtswv tsuas yog nyob hauv nej tej tsev sab laj xwb no los?

11 Kuv yuav nug nej, ntxiv, nej xav tias nej yuav tsum teev tiam Vajtswv ib lub lim tiam ib zaug xwb no los?

12 Kuv hais rau nej tias, yeej yog qhov zoo uas nej raug ntiab tawm ntawm nej tej tsev sab laj, xwv kom nej yuav txo hwj chim, thiab xwv kom nej yuav kawm kev txawj ntse; vim tsim nyog uas nej yuav tsum kawm kev txawj ntse; vim twb yog tias nej raug ntiab tawm, nej cov kwv tij ntxub nej vim yog nej txoj kev txom nyem heev, tej yam no thiaj ua rau nej txo siab txo ntsws; vim tej yam no thiaj ua rau nej yuav tsum txo hwj chim.

13 Thiab nim no, vim nej raug txhib los txo hwj chim nej tau koob hmoov; vim qee zaus, yog tias ib tug neeg raug txhib los txo hwj chim, nws yuav nrhiav kev hloov siab lees txim; thiab nim no muaj tseeb, txhua tus uas hloov siab lees txim ces yuav nrhiav tau kev hlub tshua; thiab tus uas nrhiav tau kev zam txim thiab nyiaj mus kom txog thaum kawg tus ntawd yuav txais kev cawm dim.

14 Thiab nim no, ib yam li kuv hais rau nej tias, vim nej raug txhib los txo hwj chim nej tau koob hmoov, nej puas xav tias cov uas txo lawv lub hwj chim tiag tiag vim yog txoj lus yuav tau koob hmoov ntau dua?

15 Muaj tseeb tiag, tus uas txo nws lub hwj chim tiag tiag, thiab hloov siab lees txim rau nws tej kev txhaum, thiab nyiaj mus kom txog thaum kawg, tus ntawd yuav tau koob hmoov—muaj tseeb tiag, tau koob hmoov ntau tshaj cov uas raug txhib los txo hwj chim vim yog lawv pluag heev.

16 Yog li ntawd, cov uas txo lawv lub hwj chim es tsis yog raug txhib los txo hwj chim tau koob hmoov; los yog hais tias, tus uas tau koob hmoov yog tus uas ntseeg Vajtswv txoj lus, thiab ua kev cai raus dej tsis ua siab tawv, muaj tseeb tiag, tsis tas ua rau lawv los paub txoj lus, los sis raug yuam los paub, ua ntej lawv yuav ntseeg.

17 Muaj tseeb tiag, muaj coob leej hais tias: Yog koj ua ib lub cim los saum ntuj ceeb tsheej los rau peb pom, ces peb yuav paub tias muaj tseeb; tom qab ntawd peb yuav ntseeg.

18 Nim no kuv nug tias, qhov no puas yog kev ntseeg? Saib seb, kuv hais rau nej tias, Tsis yog; vim tias yog ib tug neeg twb paub ib yam dab tsi lawm ces nws tsis tas ntseeg, vim nws twb paub qhov ntawd lawm.

19 Thiab nim no, tus twg yog tus uas raug foom tsis zoo ntau tshaj, tus uas paub Vajtswv lub siab nyiam thiab tsis ua li ntawd, los sis tus uas ntseeg xwb, los sis muaj ib qho rau nws ntseeg xwb, thiab poob mus rau kev ua txhaum?

20 Nim no nej yuav tsum txiav txim txog qhov no. Saib seb, kuv hais rau nej tias, sab no los yeej tib yam li sab tod; thiab txhua tus neeg yuav txais tau raws li nws tes hauj lwm.

21 Thiab nim no ib yam li kuv tau hais txog kev ntseeg—kev ntseeg tsis yog kev paub zoo tag nrho txog tej yam; yog li ntawd yog nej muaj kev ntseeg nej cia siab rau tej yam uas tsis pom, tiam sis muaj tseeb.

22 Thiab nim no, saib seb, kuv hais rau nej, thiab kuv xav kom nej nco ntsoov tias, Vajtswv muaj kev hlub tshua rau txhua tus uas ntseeg nws lub npe; yog li ntawd, ua ntej tshaj plaws, nws xav kom nej cia li ntseeg, muaj tseeb tiag, ntseeg nws txoj lus.

23 Thiab nim no, nws faib nws txoj lus rau tib neeg los ntawm cov tim tswv, muaj tseeb tiag, tsis yog rau cov txiv neej xwb tiam sis rau cov poj niam thiab. Nim no tsis tas li no xwb; ntau zaus kuj tau muab tej lus rau cov me nyuam yaus uas ua rau cov neeg txawj ntse thiab muaj kev kawm poob ntsej muag.

24 Thiab nim no, kuv cov kwv tij uas kuv hlub es, vim nej xav kom kuv qhia saib nej yuav ua li cas vim nej raug kev txom nyem thiab raug ntiab tawm—nim no kuv tsis xav kom nej xav tias kuv cia li txiav txim rau nej tsuas yog raws li tej uas muaj tseeb xwb—

25 Vim kuv tsis hais tias nej txhua tus raug txhib los txo nej lub hwj chim; vim kuv yeej ntseeg tias nej ib txhia yeej txaus siab txo hwj chim, txawm tias lawv raug xwm txheej dab tsi los xij.

26 Nim no, ib yam li kuv tau hais txog kev ntseeg—hais tias kev ntseeg tsis yog kev paub zoo tag nrho—kuv tej lus los kuj tib yam li ntawd. Thaum xub thawj nej tsis muaj peev xwm paub zoo tag nrho tias kuv tej lus muaj tseeb, ib yam li kev ntseeg tsis yog kev paub zoo tag nrho.

27 Tiam sis saib seb, yog nej yuav tsim los thiab siv nej txoj kev txawj hnov txawj pom, xwv kom los sim ua li kuv tej lus, thiab muab siab rau ntseeg me me, muaj tseeb tiag, txawm hais tias tsuas yog nej xav kom muaj kev ntseeg xwb los, cia txoj kev xav no ua hauj lwm nyob hauv nej, twb txog thaum nej ntseeg npaum li uas nej muab tau ib qho chaw rau ib feem ntawm kuv tej lus.

28 Nim no, peb yuav muab txoj lus piv rau ib lub noob. Nim no, yog tias nej cia ib qho chaw, xwv kom cog tau ib lub noob rau hauv nej lub siab, saib seb, yog tias yog ib lub noob tseeb, los sis ib lub noob zoo, yog tias nej tsis muab lub noob pov tseg los ntawm nej txoj kev tsis ntseeg, kom ua rau nej tawm tsam tus Tswv tus Ntsuj Plig, saib seb, lub noob yuav pib loj hlob nyob hauv nej lub hauv siab; thiab thaum nej hnov lub noob no loj hlob tuaj, nej yuav pib hais rau nej tus kheej tias—Yeej yog ib lub noob zoo, los sis txoj lus yeej zoo, vim lub noob pib ua rau kuv tus ntsuj plig loj hlob tuaj; muaj tseeb tiag, pib ua rau kuv to taub zoo tuaj, muaj tseeb tiag, lub noob no pib qab heev rau kuv.

29 Nim no saib seb, qhov no puas ua rau nej txoj kev ntseeg loj tuaj? Kuv hais rau nej tias, Yeej ua; txawm li ntawd los nej txoj kev ntseeg tsis tau loj hlob mus kom txog qhov uas paub zoo tag nrho.

30 Tiam sis saib seb, thaum lub noob loj hlob, thiab tawg kaus, thiab pib loj, thaum ntawd nej yuav hais tias lub noob yeej zoo; vim saib seb lub noob loj hlob, thiab tawg kaus, thiab pib loj. Thiab nim no, saib seb, qhov no puas ua rau nej txoj kev ntseeg muaj zog tuaj? Muaj tseeb tiag, qhov no yuav ua rau nej txoj kev ntseeg muaj zog tuaj: vim nej yuav hais tias kuv paub tias lub noob no yog ib lub zoo; vim saib seb lub noob no twb tawg kaus thiab pib loj tuaj.

31 Thiab nim no, saib seb, nej puas paub tseeb tias lub noob no yog ib lub zoo? Kuv hais rau nej tias, Yeej paub; vim txhua lub noob nyias tawg paj txi txiv zoo nkaus li nyias tus yam ntxwv.

32 Yog li ntawd, yog ib lub noob loj hlob tuaj lub noob ntawd yeej zoo, tiam sis yog tsis loj hlob, saib seb lub noob ntawd twb tsis zoo, yog li ntawd yus muab pov tseg.

33 Thiab nim no, saib seb, vim nej tau sim ua li no, thiab cog lub noob, thiab lub noob ntawd loj hlob thiab tawg kaus, thiab pib loj tuaj, nej yuav tsum paub tias yog ib lub noob zoo.

34 Thiab nim no, saib seb, nej puas paub zoo tag nrho? Muaj tseeb tiag, nej yeej paub zoo tag nrho txog qhov ntawd, thiab nej tsis tas siv nej txoj kev ntseeg; thiab muaj li no los vim yog nej paub lawm, vim nej paub tias txoj lus tau ua rau nej tus ntsuj plig loj hlob, thiab nej kuj paub tias txoj lus tau tawg kaus tuaj, uas ua rau nej pib to taub zoo tuaj, thiab nej lub cim xeeb pib loj tuaj.

35 Auj yog li ntawd, qhov no puas muaj tseeb? Kuv hais rau nej tias, Yeej muaj tseeb, vim qhov no yog qhov kaj; thiab txhua yam uas kaj yeej zoo, vim yus txawj to taub yam ntawd, yog li ntawd nej yuav tsum paub tias yam ntawd yeej zoo; thiab nim no saib seb, tom qab nej tau saj qhov kaj no lawm nej puas paub zoo tag nrho?

36 Saib seb kuv hais rau nej tias, Tsis paub; thiab nej yuav tsum tsis txhob muab nej txoj kev ntseeg tso tseg, vim twb yog nej muab siab rau ntseeg cog lub noob xwv kom nej yuav tau sim kom paub saib lub noob puas zoo.

37 Thiab saib seb, thaum tsob ntoo pib loj tuaj, nej yuav hais tias: Cia peb tu tsob ntoo no kom zoo, kom yuav muaj taus cag, kom yuav loj hlob, thiab txi taus txiv rau peb. Thiab nim no saib seb, yog nej tu tsob ntoo saib xyuas ntau heev tsob ntoo yuav muaj taus cag, thiab loj hlob, thiab txi tau txiv.

38 Tiam sis yog nej tsis quav ntsej, thiab tsis xav txog txoj kev tu tsob ntoo, saib seb tsob ntoo yuav tsis tuaj ib tug cag li; thiab thaum tshav ntuj kub tuaj thiab kub tsob ntoo, vim tsis muaj cag tsob ntoo yuav qhuav mus, thiab nej yuav muab tsob ntoo rho thiab muab pov tseg.

39 Nim no, qhov no tsis yog vim lub noob tsis zoo, thiab kuj tsis yog vim cov txiv ntawd tsis qab; tiam sis vim yog nej thaj av qhuav qhuav, thiab nej tsis tu tsob ntoo, yog li ntawd nej thiaj muaj tsis tau cov txiv ntawd.

40 Thiab yog li ntawd, yog nej tsis kam tu txoj lus, tos ntsoov nrog txoj kev ntseeg rau cov txiv ntawd, nej yeej de tsis tau cov txiv ntawm tsob ntoo uas cawm neeg txoj sia ib zaug li.

41 Tiam sis yog nej yuav tu txoj lus, muaj tseeb tiag, tu tsob ntoo thaum pib loj hlob, los ntawm nej txoj kev ntseeg nrog kev rau siab ntso heev, thiab nrog txoj kev ua siab ntev, tos ntsoov rau cov txiv ntawd, tsob ntoo yuav tuaj taus cag; thiab saib seb yuav yog ib tsob ntoo loj tuaj mus rau txoj sia uas kav ib txhis.

42 Thiab vim yog nej txoj kev rau siab ntso thiab nej txoj kev ntseeg thiab nej txoj kev ua siab ntev tu txoj lus, xwv kom txoj lus yuav tuaj taus cag nyob hauv nej, saib seb, tsis ntev nej yuav tau de cov txiv ntawd, uas yog cov muaj nuj nqis tshaj, uas yog cov qab zib tshaj txhua yam qab zib, thiab uas yog cov dawb tshaj txhua yam dawb, muaj tseeb tiag, thiab huv tshaj txhua yam huv; thiab nej yuav tau noj cov txiv no kom txog thaum nej tsau plab, xwv kom nej tsis tshaib, thiab xwv kom nej tsis nqhis.

43 Thaum ntawd, kuv cov kwv tij es, nej yuav tau sau tej nqi zog ntawm nej txoj kev ntseeg, thiab nej txoj kev rau siab ntso, thiab kev siab ntev, tos ntsoov kom tsob ntoo txi txiv rau nej.