1 Nim no tau muaj tias Amas pib coj Vajtswv txoj lus mus rau cov neeg, thaum xub thawj nyob hauv thaj av Xalahelas, thiab ntawm Xalahelas mus thoob plaws rau txhua thaj av.

2 Thiab tej lus no yog tej lus uas nws hais rau cov neeg nyob hauv lub koom txoos uas tau txhim tsa nyob hauv lub nroog Xalahelas, raws li nws phau ceev xwm txheej, hais tias:

3 Kuv, Amas, uas yog kuv txiv Amas tau tsa, los ua ib tug pov thawj hlob saib xyuas Vajtswv lub koom txoos, vim nws muaj hwj chim thiab txoj cai los ntawm Vajtswv los ua tej yam no, saib seb, kuv hais rau nej tias nws pib tsim ib lub koom txoos nyob hauv thaj av uas yog nyob hauv tej ciam teb ntawm thaj av Nifais; muaj tseeb tiag, thaj av uas hu ua thaj av Maumoos; muaj tseeb tiag, thiab nws tau muab nws cov kwv tij ua kev cai raus dej nyob hauv cov dej Maumoos.

4 Thiab saib seb, kuv hais rau nej tias, Vajtswv txoj kev hlub tshua thiab lub hwj chim tau coj lawv dim ntawm vaj ntxwv Nau-as cov neeg txhais tes.

5 Thiab saib seb, tom qab ntawd, cov Neeg Lamas txhais tes tau coj lawv mus ua qhev nyob hauv hav zoov; muaj tseeb tiag, kuv hais rau nej, lawv twb poob cev qhev, thiab ib zaug ntxiv tus Tswv tau coj lawv dim ntawm kev ua qhev los ntawm nws txoj lus lub hwj chim; thiab tus Tswv tau coj peb tuaj rau hauv thaj av no, thiab nyob no peb pib txhim tsa Vajtswv lub koom txoos mus thoob plaws hauv thaj av no.

6 Thiab nim no saib seb, kuv hais rau nej, kuv cov kwv tij, nej cov uas zwm rau lub koom txoos no, nej puas tseem nco qab ntsoov txog nej cov yawg koob txoj kev poob qhev? Muaj tseeb tiag, thiab nej puas nco qab ntsoov txaus txog tus Tswv txoj kev hlub tshua thiab txoj kev ua siab ntev nyiaj rau lawv? Thiab ntxiv, nej puas nco qab ntsoov txaus hais tias tus Tswv tau txhiv lawv tej ntsuj plig dim ntawm ntuj txiag teb tsaus?

7 Saib seb, nws tau hloov lawv lub siab, muaj tseeb tiag, nws tsa lawv tsim ntawm ib tug dab ntub ntsiag zog, thiab lawv sawv los mus cuag Vajtswv. Saib seb, lawv tau nyob hauv plawv ntawm txoj kev tsaus ntuj; txawm li ntawd los, qhov kaj ntawm txoj lus uas kav ib txhis tau ua rau lawv tej ntsuj plig pom kev tuaj; muaj tseeb tiag, kev tuag tej hlua, thiab ntuj txiag teb tsaus tej saw hlau tau khaub zig lawv, thiab ib txoj kev puas tsuaj uas kav ib txhis tos ntsoov lawv.

8 Thiab nim no kuv nug nej, kuv cov kwv tij, lawv puas raug puas tsuaj? Saib seb, kuv hais rau nej tias, Tsis raug, lawv tsis raug.

9 Thiab kuv nug ntxiv, kev tuag tej hlua puas tau tu, thiab ntuj txiag teb tsaus tej saw hlau uas khaub zig lawv, puas tau daws tej ntawd? Kuv hais rau nej tias, Muaj tseeb tiag, twb daws tej ntawd lawm, thiab lawv lub siab ntsws tau loj tuaj, thiab lawv tau hu nkauj txog txoj kev hlub uas txhiv dim. Thiab kuv hais rau nej tias lawv twb dim lawm.

10 Thiab nim no kuv nug nej tias yam dab tsi ua rau lawv dim? Muaj tseeb tiag, yam dab tsi ua rau lawv muaj kev cia siab rau txoj kev cawm seej? Yam dab tsi ua tau rau lawv daws tau txoj kev tuag tej hlua, muaj tseeb tiag, thiab ntuj txiag teb tsaus tej saw hlau?

11 Saib seb, kuv muaj peev xwm qhia nej—tsis yog kuv txiv Amas ntseeg tej lus uas Anpinadais lub qhov ncauj tau hais los? Thiab nws tsis yog ib tug yaj saub dawb huv los? Tsis yog nws tau hais Vajtswv tej lus, thiab kuv txiv Amas ntseeg tej ntawd los?

12 Thiab raws li nws txoj kev ntseeg ua rau nws lub siab hloov loj heev. Saib seb kuv hais rau nej tias tej no muaj tseeb tas huv tib si.

13 Thiab saib seb, nws tshaj tawm txoj lus rau nej cov yawg koob, thiab kuj ua rau lawv lub siab hloov loj heev thiab, thiab lawv txo lawv lub hwj chim thiab tso lawv lub siab rau Vajtswv tus uas tseeb thiab muaj txoj sia nyob. Thiab saib seb, lawv rau siab ntseeg mus txog thaum kawg; yog li ntawd lawv dim lawm.

14 Thiab nim no saib seb, kuv nug nej, kuv cov kwv tij ntawm lub koom txoos, nej sab ntsuj plig puas tau yug los ntawm Vajtswv? Nej puas tau txais nws tus yam ntxwv rau nej lub ntsej muag? Puas tau ua rau nej lub siab hloov loj heev zoo li no?

15 Nej puas muab siab rau ntseeg txoj kev txhiv dim uas los ntawm tus uas tau tsim nej? Nej puas ntsia lawm yav tom ntej nrog lub qhov muag ntawm txoj kev ntseeg, thiab pom tias yuav muab lub cev uas txawj tuag no tsa sawv kom tsis txawj tuag, thiab yuav muab lub cev uas txawj lwj no tsa sawv kom tsis txawj lwj, los sawv ntawm Vajtswv xub ntiag rau nws txiav txim raws li tej uas nej tau ua nyob hauv lub cev uas txawj ploj tuag?

16 Kuv hais rau nej, nej puas muaj cuab kav xav hais tias nyob rau hnub ntawd nej yuav hnov tus Tswv lub suab, hais rau nej tias: Cia li los cuag kuv nej cov uas tau koob hmoov, vim saib seb, tej yam uas nej ua yog tej yam uas ncaj ncees nyob hauv lub ntiaj teb?

17 Los sis nej puas muaj cuab kav xav hais tias nyob rau hnub ntawd nej yuav muaj cuab kav dag tus Tswv, thiab hais tias—Tus Tswv, tej yam uas peb ua yeej yog tej yam uas ncaj ncees nyob rau hauv lub ntiaj teb—thiab nws yuav cawm nej?

18 Los sis tsis li ntawd, nej puas muaj cuab kav xav txog qhov uas nej yuav raug coj los rau ntawm Vajtswv lub rooj txiav txim nrog nej tej ntsuj plig uas muaj txim thiab kev nyuaj siab puv npo, vim nej nco qab txog tag nrho nej tej kev ua phem, muaj tseeb tiag, nco qab tseeb txog tag nrho nej tej kev phem, muaj tseeb tiag, nco qab txog qhov uas nej tau muab Vajtswv tej lus txib tso tseg?

19 Kuv hais rau nej tias, nyob rau hnub ntawd nej puas muaj cuab kav ntsia Vajtswv nrog lub siab dawb thiab txhais tes huv? Kuv hais rau nej tias, nej puas muaj cuab kav ntsia nws, thiab tau Vajtswv tus yam ntxwv yees rau nej lub ntsej muag?

20 Kuv hais rau nej, nej puas xav tias nej yuav txais kev cawm dim thaum nej twb muab nej tus kheej ywj rau tus dab phem kav?

21 Kuv hais rau nej, nej yuav paub nyob rau hnub ntawd tias nej dim tsis tau; vim yuav tsis muaj ib tug neeg dim tau tsuas yog hais tias yuav muab nws tej tsoos tsho ntxuav kom dawb xwb; muaj tseeb tiag, nws tej tsoos tsho yuav tsum huv kom txog thaum tsis muaj ib qho tsuas, los ntawm cov ntshav ntawm tus uas peb cov yawg koob tau hais txog, tus uas yuav los txhiv nws cov neeg dim ntawm lawv tej kev txhaum.

22 Thiab nim no kuv nug nej, kuv cov kwv tij, nej txhua tus xav li cas, yog hais tias nej sawv ntawm Vajtswv lub rooj txiav txim, es nej tej tsoos tsho tsuas ntshav thiab txhua yam kev vuab tsuab? Saib seb tej yam no yuav ua tim khawv li cas tawm tsam nej?

23 Saib seb tej yam no puas yuav ua tim khawv hais tias nej yog neeg tua neeg, muaj tseeb tiag, thiab hais tias nej ua txhaum txhua yam kev phem?

24 Saib seb, kuv cov kwv tij, nej puas xav tias ib tug neeg zoo li no yuav txais tau ib qho chaw zaum nyob hauv Vajtswv lub nceeg vaj, nrog Anplaham, nrog Ixaj, thiab nrog Yakhauj, thiab nrog tag nrho cov yaj saub dawb huv, cov uas lawv tej tsoos tsho dawb huv thiab tsis muaj qhov ceb, huv huv thiab dawb?

25 Kuv hais rau nej tias, Tsis muaj li; tsuas yog ntshe nej muab liam hais tias tus uas Tsim peb yog ib tug neeg dag txij thaum chiv keeb los, los sis nej muab xav hais tias nws yog ib tug neeg dag txij thaum chiv keeb los, nej yeej tsis muaj cuab kav xav hais tias ib tug neeg zoo li ntawd yuav muaj chaw nyob rau saum ntuj lub nceeg vaj ceeb tsheej; tiam sis lawv yuav raug ntiab tawm vim lawv yog cov me nyuam ntawm tus dab phem lub nceeg vaj.

26 Thiab nim no saib seb, kuv hais rau nej, kuv cov kwv tij, yog nej lub siab twb hloov, thiab yog nej lub siab xav hu zaj nkauj txog txoj kev hlub uas txhiv dim, kuv nug hais tias, nim no nej puas tseem xav zoo li ntawd?

27 Nej puas tau taug kev, es ceev nej tus kheej kom txhob muaj txim rau Vajtswv pom? Yog Vajtswv hu nej kom cia li tuag lub sij hawm no, nej puas muaj cuab kav hais tau nyob hauv nej lub siab hais tias, nej twb txo hwj chim txaus nkaus lawm? Hais tias nej twb muab nej tej tsoos tsho ntxuav kom huv thiab ua kom dawb los ntawm Khetos cov ntshav, tus uas yuav los txhiv nws cov neeg dim ntawm lawv tej kev txhaum?

28 Saib seb, nej puas tau muab kev muab hlob hle pov tseg? Kuv hais rau nej tias, yog nej tsis tau muab hle pov tseg nej tseem tsis tau npaj mus ntsib Vajtswv. Saib seb nej yuav tsum npaj nrawm nroos; vim tsis ntev twb yuav txog lub sij hawm rau lub nceeg vaj ceeb tsheej lawm, thiab tus uas zoo li ntawd yuav tsis tau txoj sia nyob mus ib txhis.

29 Saib seb, kuv hais tias, puas muaj leeg twg nyob hauv nej uas tsis tau muab kev ntshaw luag tug hle pov tseg? Kuv hais rau nej tias tus uas zoo li ntawd tseem tsis tau npaj; thiab kuv xav kom nws cia li npaj nrawm nroos, vim twb yuav txog teev sij hawm lawm, thiab nws tsis paub tias thaum twg yuav txog lub sij hawm; vim tus uas zoo li ntawd Vajtswv yuav saib tias tus ntawd muaj txim.

30 Thiab kuv hais rau nej ntxiv, puas muaj leej twg nyob hauv nej uas thuam nws tus kwv tij, los sis muab tej kev tsim txom los tsuam nws?

31 Kev txom nyem yuav raug tus uas zoo li no, vim nws tsis tau npaj, thiab twb txog lub sij hawm lawm uas nws yuav tsum hloov siab lees txim tsis li ces yuav cawm tsis tau nws dim!

32 Muaj tseeb tiag, kev txom nyem twb yuav raug tag nrho nej cov uas yog neeg sib zog ua kev phem; cia li hloov siab lees txim, hloov siab lees txim, vim tus Tswv uas yog Vajtswv tau hais li ntawd!

33 Saib seb, nws caw tib neeg txhua tus, nws txhais caj npab hlub tshua cev tuaj rau lawv, thiab nws hais tias: Cia li hloov siab lees txim, es kuv mam li txais nej.

34 Muaj tseeb tiag, nws hais tias: Cia li los cuag kuv thiab nej yuav tau noj cov txiv ntawm tsob ntoo uas cawm neeg txoj sia; muaj tseeb tiag, nej yuav tau noj tej mov mog thiab haus cov dej ntawm txoj sia tsis txwv hlo li;

35 Muaj tseeb tiag, cia li los cuag kuv thiab ua tej yam uas ncaj ncees los, thiab nej yuav tsis raug ntov kom vau thiab pov rau hauv hluav taws—

36 Vim saib seb, twb txog lub sij hawm lawm uas tus uas tsis txi txiv zoo, los sis tus uas tsis ua tej yam ncaj ncees, tus ntawd yuav raug tej yam uas ua rau nws quaj nrov nrov thiab quaj ntsuag.

37 Auj nej cov uas ua hauj lwm ntawm kev ua phem; nej cov uas muaj plhus rau tej khoom tsis muaj nuj nqis ntawm lub ntiaj teb, nej cov uas khav tias paub tej kev ncaj ncees tiam sis tseem yuam kev, ib yam li tej yaj uas tsis muaj tswv, txawm tias tus tswv yug yaj twb hu nej thiab tseem hu nej, tiam sis nej tsis mloog nws lub suab!

38 Saib seb, kuv hais rau nej tias, tus tswv yug yaj zoo twb hu nej; muaj tseeb tiag, thiab nws twb hu nej los ntawm nws lub npe kiag, uas yog Khetos lub npe; thiab yog nej yuav tsis mloog tus tswv yug yaj zoo lub suab, rau lub npe uas nws hu nej, saib seb, nej tsis yog tus tswv yug yaj zoo tej yaj.

39 Thiab nim no yog nej tsis yog tus tswv yug yaj zoo tej yaj, nej yog pab yaj twg? Saib seb, kuv hais rau nej tias, tus dab phem yog nej tus tswv yug yaj, thiab nej yog nws pab; thiab nim no, leej twg muaj cuab kav xyeej qhov no? Saib seb, kuv hais rau nej tias, tus uas xyeej qhov no ces tus ntawd yog ib tug neeg dag thiab yog tus dab phem ib tug me nyuam.

40 Vim kuv hais rau nej tias txhua yam uas zoo yog los ntawm Vajtswv los, thiab txhua yam uas phem yog los ntawm tus dab phem los.

41 Yog li ntawd, yog ib tug tib neeg ua tej yam zoo nws yeej mloog tus tswv yug yaj zoo lub suab, thiab nws coj raws li tus tswv yug yaj zoo; tiam sis tus uas ua tej yam phem, tus ntawd hloov los ua tus dab phem ib tug me nyuam, vim nws mloog tus dab phem lub suab, thiab coj raws li tus dab phem.

42 Thiab tus uas ua tej no yeej yuav tau txais nws tej nqi zog ntawm tus dab phem; yog li ntawd, tej nqi zog uas nws tau txais yog kev tuag, xws li tuag ntawm tej yam ntsig txog kev ncaj ncees, vim nws tau tuag ntawm txhua txoj kev ua zoo.

43 Thiab nim no, kuv cov kwv tij, kuv xav kom nej mloog kuv, vim kuv hais kawg siab kawg ntsws; vim saib seb, kuv twb hais meej rau nej xwv kom nej tsis txhob yuam kev, los sis kuv twb hais raws li Vajtswv tej lus txib.

44 Vim Vajtswv hu kuv los hais li no, raws li Vajtswv tus txheej txheem dawb huv, uas yog los ntawm tus Khetos Yexus; muaj tseeb tiag, kuv raug txib los sawv thiab ua tim khawv rau cov neeg no txog tej uas peb cov yawg koob tau hais txog tej uas yuav muaj los.

45 Thiab tsis tas li no xwb. Nej puas xav tias kuv paub tau tej yam no ntawm kuv tus kheej? Saib seb, kuv ua tim khawv rau nej tias kuv yeej paub tias tej yam uas kuv tau hais no muaj tseeb. Thiab nej xav seb ua li cas kuv ho paub tias tej yam no muaj tseeb?

46 Saib seb, kuv hais rau nej tias Vajtswv tus Ntsuj Plig Dawb Huv ua rau kuv paub tej yam no. Saib seb, kuv tau yoo mov thiab thov Vajtswv tau ntau hnub xwv kom kuv yuav paub tau tej yam no ntawm kuv tus kheej. Thiab nim no kuv paub ntawm kuv tus kheej tias tej yam no muaj tseeb; vim tus Tswv uas yog Vajtswv tau ua tej yam no tshwm sim rau kuv los ntawm nws tus Ntsuj Plig Dawb Huv; thiab nov yog lub txiaj ntsim txais tau kev tshwm sim uas yog nyob hauv kuv.

47 Thiab ntxiv, kuv hais rau nej tias tau muab ua tshwm sim los rau kuv paub li no, hais tias tej lus uas peb cov yawg koob tau hais yeej muaj tseeb, twb muaj tseeb raws li lub txiaj ntsim qhia tau tej yuav muaj los yav tom ntej uas yog nyob hauv kuv, uas kuj yog los ntawm kev ua tshwm sim ntawm Vajtswv tus Ntsuj Plig.

48 Kuv hais rau nej tias, kuv paub ntawm kuv tus kheej tias txhua yam uas kuv hais rau nej, txog tej uas yuav muaj los, yeej muaj tseeb; thiab kuv hais rau nej tias, kuv paub tias Yexus Khetos yeej yuav los, muaj tseeb tiag, Leej Tub, Leej Txiv Tib Leeg Tub, uas muaj kev tshav ntuj puv npo, thiab kev hlub tshua, thiab kev tseeb. Thiab saib seb, nws yog tus uas yuav los tshem neeg ntiaj teb tej kev txhaum, muaj tseeb tiag, tej kev txhaum ntawm neeg txhua tus uas nyob khov kho ntseeg nws lub npe.

49 Thiab nim no kuv hais rau nej tias qhov no yog tus txheej txheem uas tus Tswv hu kuv los ua, muaj tseeb tiag, los qhuab qhia kuv cov kwv tij uas kuv hlub, muaj tseeb tiag, thiab txhua tus uas nyob hauv thaj av; muaj tseeb tiag, los qhuab qhia sawv daws, tag nrho cov laus thiab cov hluas, tag nrho cov ua qhev thiab cov ywj pheej; muaj tseeb tiag, kuv hais rau nej cov muaj hnub nyoog, thiab cov muaj hnub nyoog ib nrab, thiab tiam neeg uas tab tom loj hlob; muaj tseeb tiag, los tshaj tawm rau lawv tias lawv yuav tsum hloov siab lees txim thiab yug dua tshiab.

50 Muaj tseeb tiag, tus Ntsuj Plig hais li no: Cia li hloov siab lees txim, nej txhua tus uas nyob thoob plaws lub ntiaj teb, vim twb yuav txog lub sij hawm rau lub nceeg vaj ceeb tsheej lawm; muaj tseeb tiag, Vajtswv Leej Tub yuav los nrog nws lub yeeb koob, nrog nws lub zog, yeeb haum, hwj chim, thiab kev kav teb chaws. Muaj tseeb tiag, kuv cov kwv tij uas kuv hlub, kuv hais rau nej tias, tus Ntsuj Plig hais tias: Saib seb, lub yeeb koob ntawm tus Vaj Ntxwv uas kav tag nrho lub ntiaj teb thiab saum ceeb tsheej yuav ci tawm los rau tag nrho noob neej sai sai no.

51 Thiab tus Ntsuj Plig kuj hais rau kuv ntxiv, muaj tseeb tiag, ua ib lub suab qw rau kuv, hais tias: Cia li mus thiab hais rau cov neeg no hais tias—Cia li hloov siab lees txim, vim yog nej tsis hloov siab lees txim nkaus xwb ces nej yeej yuav tsis tau lub nceeg vaj ceeb tsheej los ua nej tug.

52 Thiab kuv hais rau nej ntxiv, tus Ntsuj Plig hais tias: Saib seb, twb muab rab taus tso rau ntawm lub hauv paus ntoo; yog li ntawd txhua tus ntoo uas tsis txi txiv zoo yuav raug muab ntov kom vau thiab muab pov rau hauv hluav taws, muaj tseeb tiag, cub tawg uas tsis txawj tuag, twb yog cub hluav taws uas cig tas mus li. Saib seb, thiab nco ntsoov, Tus Dawb Huv tau hais li ntawd.

53 Thiab nim no kuv cov kwv tij uas kuv hlub, kuv hais rau nej tias, nej puas tiv tau tej lus hais no; muaj tseeb tiag, nej puas muaj cuab kav tso tej no tseg rau ib sab, thiab muab Tus Dawb Huv tsuj rau hauv nej qab xib taws; muaj tseeb tiag, nej puas muaj cuab kav khav theeb vim nej lub siab muab hlob; muaj tseeb tiag, nej puas tseem pheej hnav tej ris tsho kim kim thiab tso siab rau tej khoom tsis muaj nuj nqis hauv ntiaj teb, rau nej tej kev nplua nuj?

54 Muaj tseeb tiag, nej puas tseem pheej xav tias nej ib tug zoo dua ib tug; muaj tseeb tiag, nej puas tseem pheej tsim txom nej cov kwv tij, uas txo lawv lub hwj chim thiab taug kev raws li Vajtswv tus txheej txheem dawb huv, uas coj lawv los rau lub koom txoos no, thiab tus Ntsuj Plig Dawb Huv muab lawv hloov ua neeg dawb huv, thiab lawv ua tej yam uas tsim nyog rau kev hloov siab lees txim—

55 Muaj tseeb tiag, thiab nej puas tseem pheej tig nej nraub qaum rau cov neeg pluag, thiab txom nyem, thiab tsis pub nej tej khoom rau lawv?

56 Thiab thaum kawg, tag nrho nej cov uas tseem pheej ua phem, kuv hais rau nej tias cov no yog cov uas yuav raug ntov kom vau thiab muab pov rau hauv hluav taws tsuas yog lawv hloov siab lees txim nrawm nroos xwb.

57 Thiab nim no kuv hais rau nej tias, tag nrho nej cov uas xav coj raws li tus tswv yug yaj zoo lub suab, nej cia li tawm hauv cov neeg phem los, thiab cais nej tus kheej tawm ntawm cov neeg phem, thiab tsis txhob kov lawv tej khoom uas tsis dawb huv; thiab saib seb, lawv lub npe yuav raug rho tawm, kom cov neeg phem lub npe tsis txhob nyob nrog cov neeg ncaj ncees lub npe, xwv kom yuav muaj raws li Vajtswv txoj lus, uas hais tias: Yuav tsis cia cov neeg phem lub npe txuam nrog kuv cov neeg lub npe;

58 Vim yuav muab cov neeg ncaj ncees lub npe sau cia hauv phau ntawv txheeb txoj sia, thiab kuv yuav pub ib qho qub txeeg qub teg rau lawv nyob ntawm kuv sab xis. Thiab nim no, kuv cov kwv tij, nej tseem muaj dab tsi yuav hais tawm tsam qhov no? Kuv hais rau nej tias, yog nej hais lus tawm tsam qhov no, yuav tsis ua li cas, vim yeej yuav muaj raws li Vajtswv txoj lus.

59 Nej cov leej twg uas yog tus tswv yug yaj, uas muaj ntau tus yaj yuav tsis saib cov yaj ntawd, xwv kom cov hma txhob nkag tau los thiab tom nws cov yaj? Thiab saib seb, yog ib tug hma nkag los rau hauv nws pab yaj, nws yuav tsis raws kom tus hma ntawd khiav tawm mus los? Muaj tseeb tiag, thiab tom qab ntawd, yog nws ua tau, nws yuav ua kom tus hma puas tsuaj.

60 Thiab nim no kuv hais rau nej tias tus tswv yug yaj zoo yeej hu nej; thiab yog nej yuav mloog nws lub suab nws yuav coj nej los rau hauv nws pab, thiab nej yog nws cov yaj; thiab nws txib nej kom nej tsis txhob cia tus hma nyaum nkag los rau hauv nej, xwv kom nej thiaj yuav tsis puas tsuaj.

61 Thiab nim no kuv, Amas, txib nej los ntawm yam lus ntawm tus uas tau txib kuv, kom nej ua raws li tej lus uas kuv tau hais rau nej.

62 Qhov uas kuv hais yog ib lo lus txib rau nej cov uas zwm rau lub koom txoos; thiab rau cov uas tsis tau zwm rau lub koom txoos los qhov kuv hais yog txoj kev caw, hais tias: Cia li los thiab ua kev cai raus dej rau txoj kev hloov siab lees txim, xwv kom nej yuav tau noj cov txiv ntawm tsob ntoo uas cawm neeg txoj sia thiab.