1 Thiab nim no, kuv tus me tub, kuv muaj qee yam hais txog qhov uas yuav muab tej uas tau hais lawm txum tim rov qab los; vim saib seb, ib txhia tau muab tej vaj lug kub ntxeev, thiab tau yuam kev deb vim yog qhov no. Thiab kuv paub tias koj lub siab kuj tau txhawj ntsig txog qhov no thiab. Tiam sis saib seb, kuv yuav muab qhov no piav rau koj.

2 Kuv tus me tub, kuv hais rau koj tias, txoj hau kev txum tim rov qab los yog qhov uas yuav tsum muaj raws li Vajtswv txoj kev txim lij; vim yuav tsum muaj tias yuav muab txhua yam txum tim rov qab los raws li qhov tsim nyog. Saib seb, yuav tsum muaj thiab yog ib qho ncaj, raws li Khetos lub hwj chim thiab txoj kev sawv rov los, kom muab ib tug neeg tus ntsuj plig txum tim rov qab los rau nws lub cev, thiab kom txum tim txhua feem ntawm lub cev rov qab los rau nws tus kheej.

3 Thiab yuav tsum muaj raws li Vajtswv txoj kev txim lij hais tias tib neeg yuav tsum raug txiav txim raws li tej yam lawv ua; thiab yog tias tej yam lawv ua nyob hauv lub neej no zoo, thiab tej kev xav ntawm lawv lub siab los zoo, ces lawv kuj yuav raug txum tim rov rau qhov zoo, thaum txog hnub kawg.

4 Thiab yog lawv ua tej yam phem yuav muab lawv tej kev phem txum tim rov qab los rau lawv. Yog li ntawd, yuav muab txhua yam txum tim rov los raws li qhov tsim nyog, txhua txhia yam raws li ib txwm muaj—lub cev uas txawj tuag sawv mus ua lub cev uas tsis txawj tuag, lub cev txawj lwj mus rau lub cev uas tsis txawj lwj—yuav sawv mus rau txoj kev zoo siab uas tsis muaj qhov kawg mus tau Vajtswv lub nceeg vaj los ua lawv tug, los sis mus rau txoj kev nyuaj siab uas tsis muaj qhov kawg mus tau tus dab phem lub nceeg vaj los ua lawv tug, ib tug tau nyob sab no, lwm tus ho tau nyob sab tod—

5 Ib tug yuav sawv mus rau kev zoo siab raws li nws tej kev xav zoo siab, los sis qhov zoo raws li nws tej kev xav ua zoo; thiab lwm tus mus rau qhov phem raws li nws tej kev xav ua phem; ib yam li nws xav ua phem tag nrho hauv nws lub neej tib yam li ntawd nws yuav tau txais nws nqi zog ntawm qhov phem thaum hmo tsaus ntuj los txog.

6 Thiab yuav tshwm sim tib yam li ntawd rau lwm cov. Yog ib tug neeg twb hloov siab lees txim ntawm nws tej kev txhaum, thiab xav ua ncaj ncees kom txog thaum kawg ntawm nws lub neej, tib yam li ntawd nws yuav tau txais qhov ncaj ncees ua nqi zog.

7 Cov no yog cov uas tus Tswv tau txhiv dim; muaj tseeb tiag, cov no yog cov uas nws tau muab tshem tawm, uas tau muab tso dim ntawm hmo tsaus ntuj uas tsis muaj qhov kawg; thiab xws li no lawv yuav sawv los sis vau; vim saib seb, lawv yog cov uas txiav txim rau lawv tus kheej; txawm yuav ua zoo los sis ua phem.

8 Nim no, Vajtswv tej kev cai yeej pauv tsis tau li; yog li ntawd, twb npaj tau txoj kev lawm xwv kom tus uas xav taug ces tus ntawd yuav taug thiab txais kev cawm dim.

9 Thiab nim no saib seb, kuv tus me tub, tsis txhob pheej hmoo ua saib tsis taus koj tus Vajtswv ib zaug ntxiv ntsig txog tej lus qhuab qhia ntawd, uas koj tau pheej hmoo ua txhaum los txog nim no.

10 Tsis txhob xav tias, vim cov yaj saub tau hais txog txoj kev txum tim rov qab los, es yuav muab koj txum tim ntawm kev txhaum rov qab los rau kev zoo siab. Saib seb, kuv hais rau koj, kev phem yeej ib txwm tsis yog kev zoo siab.

11 Thiab nim no, kuv tus me tub, txhua tus tib neeg uas yog neeg ntiaj teb, los yog kuv hais tias, muaj lub siab nyiam sab cev nqaij daim tawv, lawv poob siab tag nrho thiab raug khi tej hlua ntawm kev ua phem; lawv tsis muaj Vajtswv nrog lawv nyob hauv lub ntiaj teb, thiab lawv ua tsis raws li Vajtswv tus xeeb ceem; yog li ntawd, lawv ua neej uas tsis raws li tus xeeb ceem ntawm kev zoo siab.

12 Thiab nim no saib seb, lub ntsiab ntawm lo lus txum tim rov qab los puas yog hais tias kom muab ib qho uas ib txwm muaj thiab coj mus tso rau qhov uas tsis yog ib txwm muaj, los sis muab coj mus tso rau qhov uas fab ntxeev ntawm nws tus kheej?

13 Auj, kuv tus me tub es, tsis yog li qhov no; tiam sis lub ntsiab ntawm lo lus txum tim rov qab los yog hais tias rov qab coj kev phem los rau kev phem, los sis kev nyiam sab cev nqaij daim tawv los rau kev nyiam sab cev nqaij daim tawv, los sis kev ua li dab phem rau kev ua li dab phem—qhov zoo rau qhov uas zoo; qhov ncaj ncees rau qhov uas ncaj ncees; qhov ncaj rau qhov uas ncaj; qhov muaj kev hlub tshua rau qhov uas muaj kev hlub tshua.

14 Yog li ntawd, kuv tus me tub, cia li muaj kev hlub tshua rau koj cov kwv tij; coj ncaj ncees, txiav txim ncaj ncees, thiab ua qhov zoo tsis tu ncua; thiab yog koj ua txhua yam no ces koj yuav tau txais koj nqi zog; muaj tseeb tiag, koj yuav muaj kev hlub tshua txum tim rov qab los rau koj dua; koj yuav muaj kev txim lij txum tim rov qab los rau koj dua; koj yuav muaj kev txiav txim ncaj ncees txum tim rov qab los rau koj dua; thiab koj yuav muaj nqi zog zoo rov los rau koj dua.

15 Vim tej uas koj xa tawm mus yuav rov qab los rau koj dua, thiab raug txum tim rov qab los; yog li ntawd, lo lus txum tim rov qab los haj yam rau txim ntxiv rau cov neeg ua txhaum, thiab twb tsis zam dab tsi rau nws hlo li.