1 Thiab tau muaj tias lawv tso neeg saib xyuas cov Neeg Lamas uas raug txim, thiab yuam lawv tawm mus faus lawv cov tuag, muaj tseeb tiag, thiab cov Neeg Nifais cov tuag uas raug tua; thiab Maulaunais tso neeg kav lawv kom saib xyuas lawv thaum lawv ua lawv tej hauj lwm.

2 Thiab Maulaunais nrog Lihais mus rau hauv lub nroog Mules, thiab muab kev saib xyuas lub nroog tso rau Lihais. Nim no saib seb, tus Lihais no yog ib tug neeg uas tau nrog Maulaunais nyob hauv feem ntau ntawm tag nrho Maulaunais tej kev ua rog; thiab nws yog ib tug neeg zoo li Maulaunais, thiab nkawd ib leeg zoo siab rau ib leeg txoj kev nyab xeeb; muaj tseeb tiag, nkawd ib leeg hlub ib leeg, thiab tag nrho Nifais cov neeg los kuj hlub nkawd.

3 Thiab tau muaj tias tom qab cov Neeg Lamas tau faus lawv cov tuag thiab cov Neeg Nifais cov tuag tas lawm, lawv rov qab taug kev mus rau tom thaj av Huaj Vam; thiab Thi-akhas, los ntawm Maulaunais tej lus txib, hais kom lawv yuav tsum pib khawb ib tug kwj ncig thaj av, los sis lub nroog, Huaj Vam.

4 Thiab nws hais kom lawv yuav tsum ua ib sab phab ntsa ntoo rau hauv tus kwj sab hauv; thiab lawv khawb av tawm hauv tus kwj los npog rau sab phab ntsa ntoo ntawd; thiab lawv tau hais kom cov Neeg Lamas ua hauj lwm zoo li no txog rau thaum lawv ua tau ib sab phab ntsa ntoo thiab av, uas siab heev ncig ib puag ncig lub nroog Huaj Vam.

5 Thiab tom qab ntawd lub nroog no hloov los ua ib lub uas ruaj khov heev; thiab nyob hauv lub nroog no lawv zov cov Neeg Lamas uas raug txim; muaj tseeb tiag, twb nyob sab hauv ntawm sab phab ntsa uas lawv tau hais kom cov Neeg Lamas xuas lawv ob txhais tes ua. Nim no ua rau Maulaunais yuav tsum hais kom cov Neeg Lamas ua hauj lwm, vim yog ib qho yooj yim saib xyuas lawv thaum lawv ua hauj lwm; thiab nws xav kom tag nrho nws cov tub rog khoom yog tias nws yuav mus ntaus rog rau cov Neeg Lamas.

6 Thiab tau muaj tias Maulaunais kov yeej ib pab tub rog uas heev tshaj plaws ntawm cov Neeg Lamas zoo li no, thiab txeeb tau lub nroog Mules, uas yog ib lub uas muaj zog tshaj plaws ntawm cov Neeg Lamas nyob hauv thaj av Nifais; thiab xws li no nws kuj ua tau ib qho chaw ruaj khov los zov nws cov neeg raug txim.

7 Thiab tau muaj tias nyob rau xyoo ntawd nws tsis mus ua rog nrog cov Neeg Lamas ntxiv lawm, tiam sis nws hais kom nws cov neeg ua hauj lwm npaj rau kev ua rog, muaj tseeb tiag, thiab kom ua tej chaw ruaj khov rau thaum cov Neeg Lamas tuaj tawm tsam, muaj tseeb tiag, thiab kom cawm lawv cov poj niam thiab lawv cov me nyuam dim ntawm kev tshaib nqhis thiab kev txom nyem, thiab kom npaj zaub mov rau lawv cov tub rog.

8 Thiab nim no tau muaj tias thaum Maulaunais tsis nyob lawm, vim ib txhia ntawm cov Neeg Nifais pheej tuav tswv yim ua rau muaj kev tsis sib haum xeeb nyob hauv lawv, cov Neeg Lamas cov tub rog, uas nyob ze tus dej hiav txwv sab hnub poob, nyob sab qab teb, thiaj txeeb tau cov Neeg Nifais ib txhia av, muaj tseeb tiag, ua rau lawv txeeb tau cov Neeg Nifais ib co nroog uas nyob rau feem av ntawd.

9 Thiab yog li ntawd vim yog kev ua phem nyob hauv cov Neeg Nifais, muaj tseeb tiag, vim yog tej kev tsis sib haum xeeb thiab kev tuav tswv yim nyob hauv lawv, lawv thiaj raug tso rau hauv tej xwm txheej uas plhom sij heev.

10 Thiab nim no saib seb, kuv muaj tej yam hais txog cov neeg Amoos, cov uas, thaum chiv thawj, yog Neeg Lamas; tiam sis los ntawm Amoos thiab nws cov kwv tij, los sis los ntawm Vajtswv lub hwj chim thiab txoj lus, lawv tau hloov siab los ntseeg tus Tswv; thiab Amoos thiab nws cov kwv tij tau coj lawv los rau nram thaj av Xalahelas, thiab txij li ntawd los cov Neeg Nifais tau tiv thaiv lawv.

11 Thiab vim yog lawv tau lav lus lawv thiaj nqa tsis tau tej cuab yeej ua rog tawm tsam lawv cov kwv tij; vim lawv tau lav lus hais tias lawv yuav tsis ua rau leeg twg nqaij ntuag ntshav nrog ntxiv; thiab raws li lawv tau lav lus lawv twb yuav piam sij; muaj tseeb tiag, lawv twb yuav cia lawv tus kheej poob mus rau hauv lawv cov kwv tij txhais tes, yog tias tsis muaj txoj kev hmov tshua thiab kev hlub heev uas Amoos thiab nws cov kwv tij muaj rau lawv.

12 Thiab vim qhov no Amoos thiab nws cov kwv tij thiaj coj lawv los rau nram thaj av Xalahelas; thiab txij li ntawd los cov Neeg Nifais tau tiv thaiv lawv.

13 Tiam sis tau muaj tias thaum lawv pom kev plhom sij ntawd, thiab ntau yam kev nyuaj siab thiab kev txom nyem uas cov Neeg Nifais ris rau lawv, kev khuv leej tshoov raug lawv lub siab thiab ua rau lawv xav nqa tej cuab yeej ua rog tiv thaiv lawv lub teb chaws.

14 Tiam sis saib seb, thaum lawv tab tom yuav luag nqa lawv tej cuab yeej ua rog, Hilamas thiab nws cov kwv tij tej lus yaum tau kov yeej lawv, vim lawv tab tom yuav rhuav kev lav lus uas lawv tau lav tseg.

15 Thiab Hilamas ntshai tias tsam ua li ntawd ces yuav xiam lawv tus ntsuj plig; yog li ntawd tag nrho cov uas tau khi lus li no yuav tsum saib lawv cov kwv tij tiv dhau lawv tej kev txom nyem, nyob rau hauv lawv tej xwm txheej uas plhom sij nyob rau lub sij hawm no.

16 Tiam sis saib seb, tau muaj tias lawv muaj tub coob leej, uas tsis tau khi lus tias lawv yuav tsis nqa lawv tej cuab yeej ua rog tiv thaiv lawv tus kheej ntawm lawv cov yeeb ncuab; yog li ntawd lawv cov tub sib sau lawv tus kheej tuaj ua ke nyob rau lub sij hawm no, tag nrho cov uas muaj peev xwm nqa tej cuab yeej ua rog, thiab lawv muab lawv tus kheej hu ua cov Neeg Nifais.

17 Thiab lawv khi lus tias lawv yuav sib ntaus sib tua kom tiv thaiv cov Neeg Nifais txoj kev ywj pheej, muaj tseeb tiag, tiv thaiv thaj av kom txog thaum lawv muab kiag lawv txoj sia tso rau; muaj tseeb tiag, lawv khi lus tias lawv yuav tsis muaj hnub tso tseg lawv txoj kev ywj pheej, tiam sis lawv yuav sib ntaus sib tua txhua zaus tiv thaiv cov Neeg Nifais thiab lawv tus kheej kom dim kev ua qhev.

18 Nim no saib seb, muaj ob txhiab leej ntawm cov tub hluas no, uas tau khi lus li no thiab nqa lawv tej cuab yeej ua rog tiv thaiv lawv lub teb chaws.

19 Thiab nim no saib seb, ib yam li ua ntej no lawv ib txwm twb tsis yog cov uas tsis pab cov Neeg Nifais, lub sij hawm no lawv kuj yog cov uas txhawb pab heev; vim lawv nqa lawv tej cuab yeej ua rog, thiab lawv xav kom Hilamas ua lawv tus thawj coj.

20 Thiab lawv tag nrho puav leej yog tub hluas, thiab lawv khov heev hais txog kev muaj peev xwm, thiab hais txog dag zog thiab kev ua ub ua no; tiam sis saib seb, tsis tas li no xwb—lawv yog neeg ncaj txhua lub sij hawm rau txhua yam uas muab tso rau lawv ua.

21 Muaj tseeb tiag, lawv yog neeg uas tseeb thiab mob siab tiag tiag, vim lawv niam thiab txiv tau qhia kom lawv ua raws li Vajtswv tej lus txib thiab kom taug kev ncaj ncees rau nws.

22 Thiab nim no tau muaj tias Hilamas taug kev pem hauv ntej ntawm nws ob txhiab tug tub rog hluas, mus txhawb pab cov neeg nyob ze tej ciam teb ntawm thaj av uas yog nyob sab qab teb ze tus dej hiav txwv sab hnub poob.

23 Thiab xyoo thib nees nkaum yim ntawm cov neeg txiav txim txoj kev kav Nifais cov neeg tau xaus li no.